Lukas 12 : 49-56, JAMITA MINGGU XII DUNG TRINITATIS MINGGU, 14 AGUSTUS 2016

~    Mamillit dohot Manotophon Na Sintong di Tuhan i ~

  1. Patujolo

Somalna molo naeng manjalo karyawan naimbaru angka instansi, lembaga manang perusahaan na diportibion, sai angka hasonangan dohot las ni roha ni karyawan i do dipaboa dohot ragam ni fasilitas sijaloonna, dang hea dipaboa risiko siadopan ni karyawan ni naimbaru i. Dang songoni ianggo na naeng gabe sisean ni Jesus. Dung dijou jala dipaborhat Tuhan Jesus angka siseanNa, ihut do dipaboa risiko siadopan ni angka siseanNa i.  Parjolo do dipaboa siseanNa siatonon na ingkon songgop tu nasida, alai pangkorhonna las niroha dohot hatuaon do diangka na marsihohot. Dung dijou jala dipaborhat Jesus siseanNa na sapulu dua i, di turpuk on marragam poda dipasahat Jesus tu nasida, namardomu tu ulaon sipatupaon nasida dohot taringot tu sijamothonon nasida manaritahon harajaon banua ginjang i.

Dijolo ni turpuk on dipaingot do angka asa unang holsoan, unang ganggu taringot tu parngoluan nasida, ingkon pos roha nasida diangka panarihonon ni Tuhan i. Pudun tu si dipaingot nasida asa hobas mangula ulaon i, unang dilalapi portibi on. Unang tarhirim nasida mangirikhon Jesus dohot mangulahon ulaon najinalo nasida i, dipatorang Jesus do sisean i taringot tu sittuhu ni ulaonNa. Angkup ni namamboan las ni roha, ulaon ni Jesus ima manguhum dohot maminsang portibion. Ala paminsanganNa i, ingkon marsitaonon Ibana. Diulaonna na mamboan barita na uli i ingkon masa panirangon, pemisahan ni namanghaporsea i Ibana sian na so manghaporsea i. Dipasahat I tu siseanNa asa mangarade nasida mangulahon i jala rade nasida manjalo risikona.

 

 

  1. Hatorangan ni Turpuk dohot nagabe Jamita
  2. Haporseaon di Jesus papataron marhite paminsangon

Dipangantusian ni halak Jahudi hata “api” ima gombaran ni penghakiman/paruhuman. Marhite pandohan “naro do Ahu mandanggurhon api tu tano on. Dihasiholi rohangku do, anggiat haru galak nian”. Naeng dohonon ni Jesus, ro Ibana tu portibion laho manguhum pardosa. Ala dipangantusion ni halak Jahudi ndang dohot nasida hona uhum ni Debata, ala bangso ni Debata nasida dohot ala diulahon nasida do sisia-sia ni patik i. Hape ndang lias nasida sian paruhuman i, ido umbahen didok ni Jesus : “Dihasiholi rohangku do, anggiat haru galak nian”. Ndang holan mamboan hatuaon Jesus diangka na manjangkon Ibana, alai huhut do mamboan uhum tu namanulak Ibana. Di si do borat ni ulaon na pinasahat ni Jesus tu angka siseanNa. Ingkon barani siseanNa paingothon pardosa asa unang dohot nasida hona uhum. Ingkon barani paingothon dohot maminsang. Ai hosoman ni portibion do nasida ala paminsangon i, songon si Johannes Pandidi na maminsang dohot namanudu dosa ni si Herodes Antipas, gabe dihurunghon jala digotap uluna (Matius 14 : 1-12). Didangguri Jahudi si Stepanus dohot batu ala dipinsang dosa nasida (Ulaon 7). Ai manang ise nabarani manghatindanghon Jesus di jolo ni jolma, ido hatindanghononNa sogot di jolo ni Debata. Sebalikna, manang ise namansoadahon Jesus di jolo ni Portibi on, ala mabiar marungkil, soadahononNa do Ibana sogot di jolo ni Amai. Marhite pandohan i dibaga-bagahon Jesus do siseanNa, naso marisuang panindangon ni si sean i nang pe ingkon agoan hosa nasida ala panindangionna di Jesus.

 

  1. Haporseaon di Jesus papataron marhite narade marsitaonon.

Hata “didihon” diayat 50 disalin sian hata “baptizein”, lapatanna: mangungkor/menyelam. Somal pandohan i dipangke tu halak na mogap alani parungkilon namandondoni ngoluna. Songonima dipatulus Jesus diriNa diturpuk on. Ala ulaonNa napajongjong hatigoran banua ginjang i ingkon mogap Ibana songon namaridi mangadopi sitaonon, parungkilon naro sian Jahudi, pola mate tarsilang. Dipaboa i tu siseanNa asa unang tarsonggot nasida di hamamasana. Marhite diparade siseanNa mangadopi parungkilon naingkon songgop nasida lao mangulahon panjouon i. Sejarah gereja  mencatat, torop do sian halak Kristen narade maneahon dirina, hosana ala ni Jesus. Di Tano Batak pe adong do na maneahon hosana laho pararathon barita nauli i, ima Pdt Munson dohot Pdt Lyman, na mate tarbunu ditaon 1834 di Lobu Pining. Tutu ma pandohan namandok: Mudar ni namate martir do boni ni hakristenon. Patar do parbue ni mudar nasida na durus i di Tano Batak, ai mangerbang jala marparbue nagodang do hakristenon i di Tano Batak rasira sadarion.

 

  1. Haporseaon di Jesus papataron marhite na ingkon humolong roha di Jesus sian tu sisolhot

Gabe jotjot do dilapati jolma pandohan ni Jesus: “ro Jesus tu portibion mamboan parbadaan ditonga-tonga ni na marsisolhot, manirang namarianangkon dohot namarsaripe”. Ala salah mangantusi di ayat on adong sian halak Kristen namaninggalhon keluargana, natorasna ala so olo mangihuthon ibana tu persekutuan nanidohotanna. Disungkun Ibana, boasa tinggalhononmu keluargam?, dipangke ayat 51-56 on mangalusi: “nadirimpu rohamuna do, nalaho mangalehon dame au tu atas tano on, umbahen naro? Nda tung, hu dok ma dihamu: panurirangon do tahe! Ai olat ni onma maralo lima halak nadisada jabu: Natolu maralohon nadua, jala nadua maralohon natolu. Maralo ma ama tu anakna, anak i tu amana, ina tu boruna, boru i tu inana, simatua boru tu parumaenna, parumaen i tu namboruna. Sai songon pabada-pabadon Jesus ro tu portibion. Hape ndang songoni lapatanni ayat i. Tangkas do haroro ni Jesus tu portibion mamboan dame, tua, dohot hasadaon diangka namanjalosa, alai gabe jea manang podang do haroroNa tu namanulak. Marhite ayat 51-56 naeng dohonon ni Jesus, naboi masa do paraloan manang parsirangon di na marsisolhot, di namarsaripe ala haporseaon di Jesus. Jala molo masa na songoni ditonga-tonga ni keluarga, ingkon humolong roha ni siseanNa tu Jesus sian tu natoras dohot tu sisolhotna. Holong tu natoras do holong na sumolhot jala na humontot dihajolmaon. Alai diangka namangihuthon Jesus, ingkon tu mimbo do holong tu Jesus sian holong tu natoras. Nanidokna disi, molo pangambati natoras i dipangihuthonon di Jesus ingkon rade mambaen haputusan manang mengambil sikap mangihuthon Jesus do manang ndang. Ingkon rade maninggalhon ruhut-ruhut dohot ihot-ihot ni portibion, molo gabe pangambati I manguhuthon Jesus. Dipangido Jesus sian siseanNa kesetiaan, kepatuhan, pangoloion manang mono loyalitas. Amen.

Pdt. Jansen Simanjuntak, MTh, MM

(Kadep Marturia HKI)

 

Facebooktwittergoogle_plusredditpinterestlinkedinmail

Tinggalkan Balasan

Alamat email Anda tidak akan dipublikasikan. Ruas yang wajib ditandai *