Jesaya 1:10-20

Haunduhon tu Debata Manogu Tu Hangoluon

Syaloomm… Huria ni Debata na hinaholongan… Di pardalanan ni ngolunta di hasiangan on, ragam do na boi daionta, ima na tonggi (angka las ni roha) nang angka na paet (arsak ni roha). Di saluhutna i, naeng ma manontong hita manghirim tu Debata. Asa di bagasan pangurupionNa hita margogo laho mamolus saluhut na masa i. Jala tongtong di bagasan roha mandok mauliate tu adopan ni Debata.

Diturpuk on, digombarhon do ngolu ni bangso Israel doshon halak na mangingani huta Sodom dohot Gomora. Tangkas do taboto, luhut pangisi ni Sodom dohot Gomora, ima angka na mandao sian dalan ni Debata. Dihatonggion ni pasupasu pardagingon na jinalona mambahen nasida gabe lupa tu Debata, mual ni pasupasu i. Hanapuon ni tano na mangalehon parbuena, angka gabe naniula nang sinur ni pinahan manghorhon hatangkangon dohot haginjangon ni roha Sodom dohot Gomora. Pamelean tu debata sileban nang ganaganaan, permabukon, perjujion, pangalangkupon, jala pesta pora angka na nihagigihon ni Debata Jahowa. Gabe diluntak marhite api huta Sodom dohot Gomora, ala ditulak nasida pinsangpinsang hamubaon na pinasahat ni Debata.

Dibahen i, disoarahon si Jesaya tu saluhut halak Israel, panandaon tu Debata dibagasan pasangap Debata, ndang holan marhite patupa pelean situtungon birubiru tunggal dohot tabotabo ni lombu na mokmok, nang haulion angka ari raya ni Israel (ay. 10-15). Panandaon na polin ima, haunduhon ni roha, na dipatupa marhitehite haimbaruon ni roha, pangalaho na dibagasan holong maradophon Debata tarlumobi maradophon dongan jolma na sopot somarama somarina, dohot mangondingi na mabalu (ay. 16-17).

 

Dingolu sinuaeng on, jotjot do jumpang di keluarga Kristen molo dapot ari Natal nang ari Paskah, rap udur do nasida tu gareja laho mamestahon i. Alai molo di ari Minggu manang ditingki partangiangan holan inanta dohot boruna do na tarida. Jala somalna, keluarga Kristen, liburan manang refreshing ditingki ari Minggu digoari “family time”. “Holan ari Minggu do hami boi marpungu, ari na asing sibuk ala niangka ulaon, di kantor, sikkola, arisan, dna”. Jotjot nai hape humurang hita menyadari ima partingkian i saluhutna sian Debata do jaloonta. Ala asi ni rohaNa na mangalehon hahipason nang ganjang ni umur di hita do umbahen boi hita mandai saluhutna. Keluarga, kesuksesan pekerjaan, cita-cita, dna, holan siala pasupasu ni Debata. Tama ingkon mandok mauliate do hita tu Debata marhite rohanta na lam tu ringgasna mangguruhon hataNa di bagas joroNa, ditongatonga keluarga masing-masing, di humaliang, manang didia pe hita maringanan. Jala marningot hita ima pasangaphon Debata dang holan di tingki perayaan-perayaan huria, manang tingki ro silas ni roha, alai ganup tingki ingkon mamuji Debata.

Huria ni Debata, haunduhon ni roha laho mangoloi hataNa dohot marparange na denggan, ido nahinalomohon ni Debata. Jala tarida sian pambahenan na denggan, isara lam tu ringgasna mangguruhon hataNa, tu parpunguan halak Kristen, ganup keluarga patupahon partangiangan keluarga hombar tu taon ni hurianta ima Taon Keluarga. Udutna muse pangalaho angka ama na lam tu dengganna maradophon huria, keluarga, dongan sahuta, dao sian parbadaan, perjudian, mabuk,dna. Angka ina pe lam tu hobasna manogunogu keluarga manghaholongi Debata, gabe sitiruon di hata nang pambahenan. Angka naposo dipaholang dirina sian narkoba, miras, sex-bebas, judi,dll. Ido na hinalomohon ni Debata. Dung i, mardabudabu ma pasupasu ni Debata tu hita saluhutna, diramoti dohot diparmudumudu ngolunta. Gabe di ganup ngolunta on, asa holan Debata na tapujipuji salelenglelengna, jala Debata na manguluhon dohot mamasumasu hita.

Jadi manang aha pe na songgop dingolunta, arsak ni roha dohot las ni roha saluhutna manahan hita jala tongtong marhaposan holan tu Debata. Debata do Parmahan Bolon dingolunta, natongtong manogihon ngolunta on tu aek hasonangan (Psalm 23), asalma manontong Debata na gabe partanobatoan di hita. Jala asa hot ojahanta na Debata do mual saluhut pasupasu, gogo, hangoluan, hahipason nang partingkion. Sialani di hita ruas ni Debata, asa lam tapajonok dirinta tu Tuhan, unang lomos siala parsorion, unang ganggu siala sipingkiron. Alai saluhutna tapasahat tu Debata, ai ndang adong na so tarpatupa Debata (Luk. 1:37). Marningot ma hita, Yesaya: Debata do na paluahon. Tuhan lah kekuatanku. Amin.

 

C.Pdt. Leri Cahaya Duma Simatupang, STh

HKI Bahalat, Resort HKI Nagojor

Facebooktwittergoogle_plusredditpinterestlinkedinmail

Tinggalkan Balasan

Alamat email Anda tidak akan dipublikasikan. Ruas yang wajib ditandai *