JOHANNES 14:23-29

MARLAS NI ROHA MA HITA MANGHALASHON PASU-PASU NI DEBATA

PAMUHAI

Turpuk on marisihon hata ni Tuhan Jesus songon pangapulion tu 12 sisean i andorang so manaek dope Ibana tu banua ginjang, manopot Debata Ama di HarajaonNa. Laos disi do diparbohali nasida asa tongtong mangaradoti patik ni Debata patuduhon holong ni roha nasida tu Tuhan nang tu dongan jolma na porsea. Jala diparbagabaga Jesus do na lehononNa dame marhite haroro ni Tondi Pangondianon ima Tondi Parbadia na mangajari nang pasingothon nasida di huaso ni Jesus. Dang namanadingkon salelenglelengna Jesus laho to Banua Ginjang, alai na paradehon sada inganan dibagasan Debata Ama do, asa hombar tu partingkian ni Debata na ro do Jesus mangalap angka na porsea asa mian di harajaonNa, asa tongtong nasida marlas ni roha mangaradoti patik ni Debata nang manghalashon pasupasuNa ima Tondi Pangondianon i.

HATORANGAN

  • 23-25. Pataridahon holong tu Tuhan i dibagasan ngolu si ganup ari.

Somal do dipatuduhon sasahalak tanda ni holong tu donganna jolama. Manang, tarido do parbue ni holong sasahalak tu donganna jolma. Isara, mangalehon kado, mangalehon sipanganon, hepeng, ditangianghon, dijaga dirina asa unang adong tubu parbadaan nang selisih paham,dna. Sandok dihophop do mambahen sonang roha nang pingkiran ni donganna i, dao sian ragam hancit ni roha nang parbadaan. Singkop na ima ingkon adong pengorbanan, pangoloion nang parrohahon. Suang songon i do napinangido ni turpukta on, asa dipataridahon manisia i holong ni rohana tu Debata dibagsan ngoluna si ganup ari. Nunga parjolo Debata patuduhon holong ni rohana tu jolma i, asa namanguduti muse naeng ma nian tongtong jolma i boi manghaholongi Debata sian saluhut roha nang pingkiranna, asa maringanan Debata dibagasan rohana.  Tanda ni holong tu Tuhan i tontu sahali mangihuthon lomo ni rohana hombar tu naung dipadanhon di Patik na sampulu i, dohot dihasisingkop ni pangajarion Jesus di Padan Naimbaru (Patik Raya).

 

  • 26-27. Baga-baga haroro ni Tondi Pangondianon.

Umbahen i ma, asa boi manontong jolma i manghangoluan dohot patuduhon holong na tu Tuhan i, dilehon do Tondi Pangondianon asa mangajari jolma i unang lupa, lilu, mandele dina mangolu dibagasan holong tu Tuhan. Nunga dipaboa Jesus tu 12 siseaanNa ima naborat do siteanon na mangihuthon Ibana, ingkon ditulak portibion, direhe i, dilelei portibion. Alai, dipaborhat do nasida dibagasan dame na sian Debata asa unang ganggu, mabiar, bonsa roha ni siseann i, dinamangulahon  tugas pemuridan diliat portibion. Pandonganion ni Tuhan marhite Tondi Pangondianon i, ima namangalehon gogo naimbaru ganup tingki, panghirimon na manontong, nang parbinotoan na hot sian Debata asa ganup jolma manjangkon Jesus gabe Sipalua dingoluna.

  • 28-29. Marlas ni roha manghalashon pasu-pasu ni Debata ima tumpal hangoluanta di harajaonNa.

Umbahen i, molo dipeop sisean i gomos hata ni Tuhan jala hot holong nasida tu Tuhan i, hombar tu tona ni Debata asa saluhut bangso mananda Jesus do Sipalua i, jaloonnasida ma tumpal na niulanasida, ima hangoluan salelenglelengna di harajaon ni Debata. Ido sangkap ni Jesus tuat tu banua ginjang, laho parade inganan di saluhut jolma na manghaholongi, manjangkon dohot mangulahon lomo ni roha Debata.

 

HAHONAAN

Diganup na masa dingolunta, tarlumobi ma angka silasniroha, isara ulang tahun, naik jabatan, karir membaik, usaha lancar,dna, tahalashon do saluhutna. Jala marragam be do cara  ni jolma patuduhonon i. Adong na patupahon pesta olopolop, mangalehon hamuliatehon tu gareja, tu panti asuhan, mardalani, mangan-mangan,dna. Saluhutna i  mamboan las ni roha nang dame tu rohanta, boi hita manjalo pasupasu ni Tuhan i. Sialani i, molo tarimangrimangi do angka tingki naung tabolus nang pasupasu naung tajalo sian Debata tontu sahali anggiat i manuanhon roha na lam bagas laho mangaradoti patik ni Tuhan i. Ai ido tanda ni halak na manghaholongi Debata, na manghalashon pasupasu ni Debata di ngoluna. Pasupasu i ndang na holan mandok angka kenaikan jabatan, usaha, alai angka arsak ni roha pe dohonon do pasupasu na mangalehon pangajarion partingkion laho manopoti di rohana ringkot ni huaso Debata mangurupi ibana mamolus i.

Tarlumobi ma dipadomu do turpuk on tu ari ulangtahun ni hurianta HKI. Tapatuduhon ma parbue ni holongta tu Tuhan nang hurianta HKI on marhite ngolu haporseaonta si ganup ari, hombar tu visi-misi ni hurianta, marturia/bersaksi, diakonia/melayani, koinonia/ bersekutu, didaskalia/pengajaran. Tadukung ma saluhut program napamajuhon HKI, jala tahalashon ma dibagas joro ni Debata asa lam marbungaran jolma na porsea tu Tuhan marhite HKI nang ngolunta. Unang ma bonsa manang mabiar hita patuduhon haporseaonta i, marningot ma hita tongtong didongani nang diramoti Tuhan hita dinamandalani ngolunta. Selamat Ulang Tahun HKI! Amen

 

C.Pdt. Leri Cahaya Duma Simatupang, S.Th

Facebooktwittergoogle_plusredditpinterestlinkedinmail

Tinggalkan Balasan

Alamat email Anda tidak akan dipublikasikan. Ruas yang wajib ditandai *