PSALMEN 23:1b-6

Patujolo

Psalmen 23 on, ima ende haposan ni si Daud, na tubu sian las ni roha, na pinarbuehon ni tangiang maradophon Debata. Haposan na tubu marnida hadirion dohot nasa pambahenan ni Jahowa tu angka na porsea. Tarida do i di turpuk on, dibagasan dua bagian bolon : (1). Jahowa songon siparmahan (1-4), (2). Jahowa songon suhut na paturehon dohot paradehon na ringkot ditamuena (5-6).

Si Daud andorang so dipabangkit gabe raja paduahon di Israel, parmahan biru-biru, hambing, dorbia do ulaonna. Parmahan na gok tanggung jawab na pinasahat ni amana si Isai.

Alani tung tangkas do diboto si Daud tanggungjawab ni sahalak parmahan tu napinarmahanna, songon panindangion ni si Daud tu raja Saul (1 Samueel 17:34-37)

Ndang holan sian sudut tanggungjawab ni sahalak parmahan tu pinarmahanna pangantusion ni si Daud ulaon ni Debata tu bagasan ngoluna, alai nang sian sudut budaya dohot patik partamueon naung ni ulahon ni angka ompuna, tung tangkas do di auhon si Daud ulaon ni Debata dibagasan ngoluna, keluargana, nang dingolu ni angka naporsea di Jahowa (Patudos: 1 Musa 18:1-8. 1 Musa 19:1-9)

Alani dua bagian bolon psalmen 23, patuduhon ulaon dohot hadirion ni Jahowa ni ngoluni angka naporsea: 1. Jahowa na tarida songon siparmahan (ayat 1-4)          2. Jahowa na taridasongon suhut napaturehon dohot paradehon na ringkot di tamue na (ayat 5-6)

 

Hatorangan ni Turpuk

  1. Jahowa na tarida songon siparmahan

Ay 1. Nunga mamungka sian si Jakob ditanda ibana hadirion ni Debata songon siparmahan (1 Musa 48:15) dungi dipasupasu si Israel ma si Josep, ninna ma: Debata na ni habiaran ni angka daompung si Abraham dohot si Isak, angka namarparange di jolona, Debata siparmahan ahu saleleng ahu adong rasirasa sadarion. Joujou ni parpsalmen i patuduhon panindangionna paboa Jahowa i siparmahan ahu, alani do porsea do ibana, nunga diboto siparmahan i/ Jahowa na ringkot di ngolun alani do umbahen didok “ndang tagamon hurangan ahu”, nunga adong namanarihon di ngoluna.

Ay 2-4 on tung lam dipaandar/dipatangkas ulaon na sinarihon ni parmahan i/Jahowa:

Dipatongon do ahu tujampalan angka na lomak (ay. 2a)

Dipalestina terbatas do panjampalan i, dibaehn i ingkon tangkas ditanda jala ditogutogu siparmahan i napinarmahanna i sian sada inganan tu inganan na asing, gabe napinarmahan i cukup disipanganon.

Ditogutogu do ahu di lambung aek hasonangan (ay.2b)

Dohot do panginuman ingkon disarihon siparmahan i asa unang mauas birubiruna i. di logo ni ari (musim panas) mansai mohop do angka dolok, songon i dibagasan liang na bolon huhut na mansai jorbut angka inganan i maradophon binatang na riar/binatang buas. Pandohan “Jampalan na lomak dohot aek hangoluan” martudutudu tu hangoluan i sandiri. Dilehon Jahowa hangoluan tu na pinarmahan i.

Dipasabam do rohangku (Ay.3a)

Tumangkas lapatanna paboa dipasuang Ibana muse hagogoon ni ngolungku, mulak margogo muse, dilehon ngolu na imbaru diperbatasan ni halojaon dohot hamatean.

Ditogu do au di dalan hatigoran ala ni goar na i (ay. 3b)

Dalan hatigoran i ma dalan haluaon na adong tujuanna jala na sadalan tua aturan ni Debata siala hatigoran ni lomo ni rohaNa. Dalan hatigoran i ndang dalan sipanogunogu na asing, ndang dalan panigoran/pamotongan, alai dalan ni Debata sandiri dalan parsaoran/padan ni Debata dohot bagabagaNa tu birubiruna i. marhite goar na i tangkas adong pardomuan/dalan komunikasi (Patudos tu Psalm 31:4)

Didongani do ahu (ay.4a)

Ndang adong habiaran manang aha pe molo didongani Debata hita. Sai jotjot do dapot hita di Padan na Robi nang di Padan Naimbaru pe pandohan “Unang mabiar hudongani pe ho”. Pandohan pola 365 (baca tulisan Sekretaris Jendral HKI di Almanak tahun 2016/1 x/hari)tangkas hatana patoguhon roha marondolan tu pos ni roha di halak na mandok i. songon i do dison dibagasan panindangion i ulaon hatuaon,haluaon,partahanan,hamonangan maralohon biar ni roha. Di ayat on tarida pangkataion ni parpesalmeni jalo langsung dohot Debata, pola didok “Ai Ho do mandongani ahu tungkotmu dohot batahim mangapuli ahu”. Di haroro ni Debata mandongani par psalmen dohot angka naporsea, ndang namandok gabe ndang ro parungkilon manang hasusaan, alai nang pe mardalan di tongatonga ni hasusaan, jea manang parmaraan manang haporsuhon gabe dipadao do biar ni roha i, songoni do nang dilinggoman ni hatamean. (Patudos tu 2 Korint 4:7-9)

Tungkotmu dohot batahim mangapuli ahu (ay 4b)

Ganup parmahan dipalestina sai mangusung tungkot dohot batahi laho marmahani. Ganjang ni tungkot i hira-hira 60 cm, napinatu[a sian ragam ni hau jati jala diujung na dibalut dohot angka bosi na tajom asa boi songon sinjata na tajom laho mangalo angka bitanga buas (1 Sam 17:35). Sai disangkothon doi tu hohos na manang ditiop di tangan na. Batahi ganjang na 5-6 kaki napinatupa somalna sian dangka ni hau zetun. Somal na adong dangka na diujungna. Dipangkeon laho mangurupi angka birubiru nangkok sian sada inganan tu inganan na tumimbo, songoni laho pasisihon angka birubiru na marbadai manang na lilu sian punguan i. tungkot dohot batahi songon sada gombaran do dipatorang dison paboa Debata do namarhuaso mangaramoti parpsalmen on/ huria i maradophon angka musuna, jala ibana do namanogunogu asa unang lilu, marsitombisan dipunguan ni birubiru/huria i, alai asa diganup dalan na tigor i mangolu. Molo tung didok tungkotmu dohot batahim mangapuli ahu napabotohon mardalan do pinsang-pinsang ni Debata, alai dang tung tu jea ujungna, alai sada apul-apul do muse manang daon ni sahit, manang paulakhon angka na lilu tu dalan na tigor/dalan hangoluan.

Jahowa na tarida songon suhut naparadehon na ringkot ni tamuena.

Marganti do gombaran na adong dison, ndang be ditaringoti ulaon ni siparmahan i, alai tu ulaon partamueon nama. Ndang be ditaringoti jampalan na lomak manang aek hasonangan,alai ditaringoti bagas ni Jahowa.bagas joro, disi do Ibana songon suhut na manjalo tamuena. Ndang pola digombarhon dison pangalaho partamueon hatopan, ala sada bagian do, ima partamueon di tingki na mangandi meja dohot di haroro ni tamue. Nang ulon dijabu pe tangkas do ulon ni Jahowa na mngkobasi par psalmen, dohot angka na porse napasahathon bagas na gabe bagas parmeaman ni Jahowa.

Ho do paradehon meja (sipanganon/angka naringkot) di jolongku

Diparade Jahowa do sipanganon tu tamue nai, pangalaho on patandahon sada jaminan dibagasan patik partamueon di halak Israel paboa angka tamue ndang boi dipalea, diganggu, alai ingkon dipasangap, jala ndang boi halak manang musuna manggunturi tamue naro tu sada bagas/huta. (bereng 1 Musa 18:1-8; 1 Musa 24:28-32; 1 Musa 19:1-18; Panguhum 19:16-24) ido dalan na nadang tarbahen musunai manggosa-gosa par psalmen i siala pangaramotion ni Jahowa dibagasan parsaoran marsipanganon i. nang dipadan na robi nunga dapot hita meja sipanganon i (1 Samuel 20:5; 1 raja-raja 13:20)

Suksuk do panginumanku

Ndang holan na paradehon meja dohot sipanganon dipatorang, alai dohot do diparade si inumon anggur tu tamue (psalmen 16:50). Dibagasan pandohan tubu do nang pangantusion taringot tu “Panginuman Hatuaon” napinarade ni Debata (Psalmen 116:13). Suhar-suhar ni panginuman hatuaon i, ima “panginuman hamuruhon/ harimason” (Jesaya 51,17,22). Tagamon do panginuman na dua on dipangke dimulanai ditongatonga ni halak Israel laho marsumpa manang na tigorpangalaho ni sasahalak manang ndang, jadi ingkon inumoonna ma panginuman sian aek napaet napinature ni malim. Molo marsala ibana gabe hona toru ni Debata ma ibana, na laos songon uhuman ni Debata, alai molo so marsala ibana gabe lias ma ibana sian toru-toru/bura-burai, boi ma ibana muse marhangoluan (4 Musa 5:11-31). Alai anggo di turpukta on tarida ndang be di igil manang dituntut Jahowa tuhas-tuhas tu par psalmen i jala ndang dibagasan parpiar ni muruk ni Debata maradophon ibana, alai dibagasan pangkobasion/silehonlehon asi ni rohana.

Dimiahi ho do ulungku

Tu angka tamue na ro tu jabu sai jolo dimiahi do uluna di adat ni halak Israel (Amos 6:6; Lukas 7:46; Mateus 26:7), tanda “palashon roha” (Poda 27:9), jala diparjamita sian si salomo 9:8 didok: Ulu na marmiak patandahon halalas ni roha di bagasan ngoluna.

Tongon tahe denggan basa dohot asi ni roha mangihutihut ahu saleleng ahu mangolu.

Diayat 6 on tangkas dipahantus paboa na diramoti Debata Jahowa do ibana siganup ari di ruar ni jabu songoni dibagasan jabu, ido umbahen dihatindangkon si Daud di pandohan “Denggan basa dohot asi ni roha” do dipatupa Jahowa. Di ayat 6.b, alus huhut gabe padan/janji ni si Daud maradophon panarihonon ni Jahowa tu ibana: naeng mian ahu dibagas ni Jahowa salelengleleng na. Namian dijabu ni Jahowa patandahon sihol ni rohana tongtong pajumpang/marsaor dohot Debata. Bagas ni Jahowa martudu-tudutu Jerusalem, ingana ni pelean hamauliateon dohot pesta marsipanganon. Masuk tu bagas ni Jahowa do dirajuni halak na badia i di padan na Robi punsu nihabalgaon dohot las ni roha dibagasan ngoluna (Lukas 2:49). Alai ianggo bagas ni Jahowa di padan na imbaru martudu-tudu tu surgo hasonangan i, ala ni i do dihata partinadingan ni Tuhan Jesus tu angka sisean i didok Tuhan Jesus: Unang bonsa rohamuna! Porsea ma hamu di Debata, jala porsea ma hamu di ahu! Torop do inganan di bagas ni Damang……sai mulak do ahu mangalap hamu, asa rap hamu dohot ahu (Johannes 14:1-3)

Panimpuli

  1. Dipadan na robi dipatuduhon do paboa Jahowa do siparmahan bolon, alai suman-suman ni i di padan naimbaru paboa Jesus Kristus do siparmahan naburju roha. Diseahon parmahan naburju rohai do/Jesus hosaNa humongkop biru-biruNa (Johannes 10:15). Laos parmahan na burju roha i do roti hangoluan, jala sandok naso male be manang ise naro tu ibana, jala nasotupa mauas be manang ise naporsea di ibana (Johannes 6:35,54). Ditanda siparmahan na burju roha i do angka biru-biru na, jala ditanda angka biru-biru i do siparmahan na burju rohai, jala ditangihon soaraNa, jala di ihuthon angka biru-biru i do siparmahan na burju roha i (Johannes 10:14,27)
  2. Nang diadat partamueon tongtong do dapot hita di padan naimbaru, napinatupa ni Debata dobagasan Tuhan Jesus Kristus, namangan dohot naminum di meja na martudu-tudu dibagasan harajaon ni Debata (Lukas 22:30; Pangungkapon 2:7), disi gabe mian hita dibagas joro ni Debata “Ai Tuhan Debata si gonggom saluhutna do joro Na rap dohot biru-birui (pang 21:22). Didok si Agustinus nang si Marthin Luther do : molo naeng daion ni jolma hinauli ni panghobasion ni Jahowa songon suhur naparadehon na ringkot di tamue na, paloas ma Johowa gabe nampuna bagasmu, jala dohot pangisi ni bagasmu gabe tamue ni jahowa. Ala ni didok Jesus: Ida ma najongjong do ahu di jolo pintui manuktuhi; ia adong na tumangihon soarangku dohot mangungkap pintui, bongot ma ahu tu ibana, mangan ma ahu rap dohot ibana, jala ibana rap dohot ahu. (Pangungkapon 3:20)

Ojahan/Thema: Panarihon ni Jahowa di angka naporsea/huriana, marojahan tu denggan basana dohot asi ni rohana.

  1. Disarihon do hita di sipanganon dohot si inumon ganup ari.
  2. Di ondingi/dipalua do hita maradophon angka paraloan dohot parmaraan.
  3. Panarihon ni Jahowa sahat tu parsaoranta dohot Debata rodi saleleng ni leleng na.

Pdt. M. Saragi

Facebooktwittergoogle_plusredditpinterestlinkedinmail

Tinggalkan Balasan

Alamat email Anda tidak akan dipublikasikan. Ruas yang wajib ditandai *