PSALMEN 67:1-8

“ Puji  hamu  ma   Jahowa  ala   ni  balga  ni  asi  ni  roha-Na”.

Patujolo.

Tama   do  hurianta  HKI  marlas  ni  roha  marolop-olop  mamuji  Jahowa  Debata   dibagasan  Jesus  Kristus   nampuna   Huria  i, ala  ni  balga  ni  asi  ni  rohana  naung  sahat  tu  Huriana  HKI,  naung  boho  sadari  on-89  taon. Sada Huria naung  matoras  mangihuthon  sian  umurna. Hape,  diangka  panghobasion,  dipelayanan,  mansai  jot-jot  dope  masa  angka  ragam  ni  hamaolon,  parungut-unguton, pangiburuon, parbolat-bolatan  dohot  angka  na  asing, jala  hurang  pangantusion  taringot  tu  arti  ni   Huria,  ima  nampuna  ni  Tuhan i,  jala  Jesus  Kristus  do  Ulu  ni  Huria  i. ”Ai  tumimbanghon  lelengnai,  nunga  patut  guru  hamu  nian, hape  angka  sisiasia  ni  hata  ni  Debata   dope  siajarhononhon  tu  hamu ; gabe  susu  nama  ringkot  di  hamu,ndada   sipanganon  hian. Ai  ganup  partohap  di  susu  ndang  marbinoto  di  hata  hatigoran  i,  ai  posoposo  do i. Alai   sipanganon  hian  do  di  angka  na  rimpas,  naung  pasomalsomal  rohana, gabe  malo  mambolati  na  denggan  sian  na  roa.”(Heb.5:12 – 14). Ndang  tingkina  be  Huria  HKI  lalap  holan  di  ragam  ni  angka  persoalan-persoalan  na  so membangun, holan  mamingkiri  dirina  sandiri  dohot  lan  na asing, alai  nunga  tingkina  mangalangka  tu  na  humaliang,  Nasional, Regional  dohot  Dunia. Mamingkiri  langkah-langkah  pelayanan  na  menyeluruh,  lumobi  ma  marningot   angka  pangula,  buruh  na  mansai  jotjot  menderita, na  so adong  jaminan  Hari  Tua,  naeng  pahombaronta  Hurianta  mamingkiri  nasida,  alana  Tgl. 1 Mei  on  laos  huhut  do  on  Peringatan  Hari  Buruh  Sedunia. Aha  do  naung  tapatupa  ditonga-tonga  ni  HKI  tu  angka  donganta  angka  pelayan/parhobas/buruh  na  mansai  jotjot  menderita  dohot  tertindas? Songon  dia  do  nasida  laho  marolopolop   laho  mamuji  Debata,  hape  so  adong    jaminan  hidup, perumahan  yang  layak,  d.n.a ? Sude  na  on  ingkon   gabe  perhatian  ni  sude  Hurianta  HKI,  paboa  hita  naung   dewasa, matoras,    songon  parbue  ni  haporseaonta. Huria  HKI, ingkon  gabe  Huria  na  tarpasupasu, na  ringgas  mamuji  dohot  pasangap  Debata,  asa  gabe  habaoran  ni  pasu-pasu  tu  na humaliang .Laos  marhite  i  ma  adong  3  bagian  na naeng  tangkasanta  di  turpuk  on:

1.Mangido  pasu-pasu  sian  Jahowa  Debata!.

Ay.2. Ale  Debata, sai  asi  ma  roham  di  hami, jala   pasu-pasu  hami, sai  marsinondang  ma  bohim  mandongani  hita!.

Tangiang  on  na dienet  do  on  sian  tangiang  pasupasu  ni  si  Aron  na  di  4 Musa 6: 24 -26,   pataridahon,  panandaion, pengenalan  diri  ni  par-pesalmen  on. Ditanda  do  hadirionna,  na  so  margogo  ibana  molo  so  dipasupasu  Debata  Jahowa  ibana. Boi  do  tangiang  pasu-pasu,  tangiang  pangidoan  on  marharoroan  sian  sada  Malim  na  rap  dohot  angka  jemaat, umat  na  dibagasan  hagaleon,  pergumulan  dohot  angka  ragam  ni  hamaolon  umbahen  didok : Ale  Debata,  sai  asi  ma  roham  di  hami,  jala  pasupasu  hami.

Di  Padan  Narobi, tangkas  do  pasupasu  ni  Debata  tu  si  Abraham. Dipillit  Debata  do  si  Abraham  jala  di  pasupasu.”Hubahen  pe  ho  gabe  bangso  na  bolon, jala  pasupasuongku  ma  ho,  jala  pabalgaongku  goarmu,  asa  gabe  pasupasu  ho”.(1 Musa 12 :2).

Marhitehite  si  Abraham  sahat  pasupasu,  dapotan  pasupasu  sude  bangso. Halak  na  tarpasupasu,  ingkon  gabe  pasupasu,  mamboan  pasupasu  tu  na humaliang. Dipatindang  Jesus  Kristus  do  Huria-Na  asa  gabe  pasupasu  tu  portibion, asa  sude  bangso  tarpasupasu,  marhite  hadameon,  hasintongan,  keadilan. Naeng  ma  sude  Huria,  ruas  ni  HKI  angka  siula  Hatai,  na  boi  dipataridahon  marhite  angka  ulaon,  pelayanan  na  denggan  ditongatonga  ni  keluarga,  Huria  dohot  masyarakat,  asa  gabe  pasupasu,  habaoran  pasupasu  Huria  HKI  tu  na humaliang,  ditongatonga  ni  Bangsonta  dohot  di  liat  portibion.

 

2.Mamuji  dohot  Pasangap  Jahowa   Debata.

Ingkon  pujion  ni  angka  bangso  do  Ho  sogot,  ale  Debata,  sude  angka  bangso  tutu  mamuji  Ho.(ay.4). Nunga   dibagabagahon  Jahowa  tu  bangso  Israel  las  ni  roha  ia  dung  sahat  nasida  tu  tano    silehonon  ni  Jahowa, ima  tano  Kanaan. ”Jala  ingkon  marlas  ni  roha  ho  mida  sude  denggan  basa  naung  nilehon  ni  Jahowa  Debatam  tu  ho  dohot  tu  isi  ni  bagasmu ;  songon  i  ho  ro  di  halak  Lepi  dohot  halak  dagang  na  di  tongatongami”( 5 Musa 26:11). Las  ni roha  ni  bangso  Israel, ima  silehonlehon  ni  Debata  na  mansai  balga,  na paluahon  nasida  sian  parhatobanan  di  Mesir  marhite  tangan  na  gogo,  dohot  lan angka  tandatanda  halongangan  na  pinatupa  ni  Debata. Ala  ni  i   tama  bangso  Israel  mandok  mauliate  mamuji  Debata   marhite  angka  pambahenan,bpasahathon  pelean,  patumona  ni  nasa  na niula  ni  tanganna,  dohot  pasahat  pelean  persepuluhan  songon  parbue  ni  haporseaonna,  alana  saluhut  na  adong  di nasida  sian  Jahowa  do i,  jala  Jahowa  do  nampuna i  sude. Ima  hadaulaton ni  na  marroha,  tumangkas  di  bahasa   Indonesia    hata  hadaulaton  dipangke, dohot   kata “ibadah’.Tangkas  do  on  tajaha  di  Jak.1:27.” On  do  hadaulaton (ibadah)  na  so  marlindang,  diroha  ni  Debata  Ama: Mandulo  angka  na  so  marama,  so  marina  dohot  angka  na mabalu  dihaporsuhon  nasida, huhut  mangaramoti  diriniba  maralohon  portibion,unang  marlindang. Jala  laos  tumangkas  muse  dipaingot  Apostel  Paulus  Huria  i  taringot  tu  na  mangaramoti  diri  di  Rom 12 : 1.”Pasahat  hamu  ma  dagingmuna   bahen  pelean  na mangolu,  na badia,  na hinalomohon  ni  Debata;  ima  hadaulaton    ni  na  marroha, itulah  ibadahmu”!.

Marhitehite  bangso  Israel,  patar  ma  hagogoon,  hasangapon  ni  Debata  tu  sandok  portibion, gabe  dohot  do  sude  jadijadian  ni  Debata  mamuji  pasangap  Debata. Naeng  ma  dohot  Hurianta  marolopolop  marlasniroha   ganup  tingki  marningot  denggan  basa  ni  Debata  naung  sahat  tu  Hurianta  naung  boho  nuaeng    89  taon.  Unang  be  lalap  Hurianta  di  angka  ragam  ni  hamaolon  gabe  lupa  ulaon  na  balga,  ima  Marbarita  Nauli,  marhite  ulaon,  Marturia, Koinonia,  dohot  Diakonia. Angka  Huria  na tingkos  mangaradoti  ulaon  pelayanan  di  Huria  i,  terhindar  do  i  sian  angka    ragam  ni  hamaolon, isara  persoalan-persoalan  Huria,  parungutunguton   dohot  na  asing  i, ala  Tondi  ni  Debata  do   na  mian  di  Huria  i, gabe  boi  ma  nasida  marlas  niroha  mamuji  dohot  pasangap  Debata,  jala  tau  tiruan  ma  Huria  i  tu  na humaliang. Alai  angka  Huria  na  so  satia  tu  tugas  panggilanna,  tugas  pelayananna,  na  holan  mamingkiri  dirina, na  holan  marungut-ungut, angka  i ma  na  mura  madabu  tu bagasan  parmaraan  bolon,  jala  na  so  tau  marlas  ni  roha  dohot  mamuji  Debata.

  1. Marhabiaran tu Jahowa  Debata!.

Dipasu-pasu  Debata  ma  hita,  jadi  habiaran  ni  sude  ujung  ni  tano  on  ma  Ibana.

Halak na  tarpasupasu, naung  tangkas  mananda  asi  ni  roha  ni  Debata  di  ngoluna,  ima  na  marhatopothon, habalgaon  dohot  hagogoon  ni  Debata,  dohot na  marhabiaran  tu  Debata. Mabiar  ala  ni  hasangapon,  hasongkalon  ni  Debata  na  so  adong  tudosanna,  molo  dipatudos  tu  hadirion  ni  jolma  gea,  na  gale,  na  so  marlapatan  molo  so  dipargogoi  Debata  ngoluna. Porlu  panandaion  di  diri  ni  jolma  i  asa  unang  madabu  tu  ginjang  ni  roha  dohot  na  merasa  na  gogo,  na  sanggup, hape  na gale do  ibana. Pengakuan  ni  Apostel  Paulus:  Ditingki  gale  do  ahu  margogo!. Ala  na  sadar  do  ibana  jolma  na  gale,  umbahen  dipangido  gogo  sian  Tuhanta  marhite  tangiang  pangidoan. Tangiang  i  do  sada  dalan  laho  manghatai  tu  Debata  pabotohon  aha na  diroha  dohot  aha  na  tapargumulhon,  dohot  angka  na asing i,  asa  diurupi  hita,  marhite  hagogon  ni  Tondi  Parbadia. Nuaeng  on,  sada  mara  na taadopi, ima  na  so  adong  be  biar  ni  jolma  mangulahon  dosa,  berarti  ndang  mabiar  be  tu  Debata;  nunga  umbiar  jolma  nuaeng on  tu  na  gogo  ni  portibion,  isara  ni  Jaksa,  Hakim, Polisi, KPK,  ala  molo  sala  pintor  diuhum?,  hape  molo  sala  mardosa  tu  Debata,  ah..parasi  roha  do  Debata,  gabe  lam  gait  haporseaon  i  di  na  deba. Apostel  Paulus  paingothon  hita  sude: ”Ingkon  oloan  do  iba  di  Debata  asa  di  jolma”.(Ul.Ap.5:29).

Molo  oloan,  molo  umbiar  hita  tu  Debata  asa  tu  jolma,  tarpasupasu  ma  Huriana  HKI,  dohot  sude  ruasna  nang  parhaladona,  tau  pujipujian  di  Debata,  las  ni  roha  ma   dihita,   jala  dame  ma  di  tano  on.

 

Sipahusor-husoron.

Tama  sude   ruas  ni  HKI   marlas  ni  roha  huhut  mamuji  Debata  marningot  sude   denggan  basa  naung  pinasahatna  tu  HKI,  naung  marumur  89  taon  sadari on (1 Mei  1927 –  1 Mei  2016). Naeng  gabe  siula  hatai  sude    Huria  HKI, ima  nampuna  ni  Tuhan  i,  unang  holan  panangi-nangi. Sude  do  hita  tarjou  gabe  angka  parhobas  ni  Tuhanta,  gabe  angka  pelayan  marhite  ragam  ni  silehonlehon  na  sahat  tu  hitabe. Tapangke  mai  asa  lam  rarat  harajaon  ni  Debata  marhite  Huriana  HKI  asa  marmulia  goar  ni  Tuhanta,  asa  gabe  Huria  na  mangolu,  na  marpanindangion,  ditonga-tonga  ni  bangsonta  nang  di  liat  portibion.Gereja  HKI  sebagai  Gereja  Pejuang  Iman,  ingkon  gabe  pelopor,  ingkon  gabe  Ulu,  uluan  na  boi  dipataridahon  marhite  haporseaon  na  togu,  dikeluarga,  di  Huria  dohot  di  masyarakat  sekitar  nang  dohot  di  bangsonta Indonesia. Huria  HKI  ingkon  peduli  tu  angka  na  pogos,  na metmet,  angka  na tartindas  dohot  angka  na ginosagosa  ni  na  gogo  ni  portibion,  lumobi  ma    angka  buruh  na  jotjot  tertindas,  naso  adong  masa  depan  na  pasti,  gaji  na  mansai  otik, hape  tuntutan  jaman  na mansai  timbo  ala  ni  ekonomi  na  so  pasti,  dohot  hinorhon  ni  korupsi  namambahen marpogos  bangsonta.

Huria,  HKI    ingkon  gabe  huria   sipartangiang  dohot  na  gir-gir  mamuji  Debata  marhite  angka  ende  pujipujian,  ende   partondion  di  tongatonga  ni  parpunguan,  parmingguon,  jala  ingkon  oloan,  ingkon  umbiar  tu  Debata  asa  tu  jolma. Selamat  Ulang  Tahun  HKI ke  89,  dohot  Selamat  Hari  Peringatan  Buruh  Sedunia. Dipasu-pasu  Tuhanta  ma  Huria-Na  HKI.

Pdt.H.Simangunsong.BD

Facebooktwittergoogle_plusredditpinterestlinkedinmail

Tinggalkan Balasan

Alamat email Anda tidak akan dipublikasikan. Ruas yang wajib ditandai *