1 KORINT 10:1-13

DAI JALA IDA HAMUNA DENGGAN BASA NI JAHOWA

 Patujolo

Di bagasan kerangka parsagi ni surat 1 Korintus, tarrajum do turpuk Epistel on tu sub-bagian poda taringot tu juhut naung pinelehon tu begu (8:1-11:1). Dipasingothon do i mardomu tu sada upacara ni parbegu na margoar misterion. Disi, dipelehon angka halak parbegu i do pelean na marmudar (pinahan) tu na angka na pinardebatanasida. Mangihuthon haporseoan nasida, disi dipelehon pelean i, secara magis dan rahasia pintor saor do angka debata tu juhut i. Dung i, dipangan nasida ma juhut i. Marhite na manganhon i, laos dihaporseai nasida ma na gabe saor do tu nasida angka debata. Deba sian juhut pelean i diboan do tu onan jala digadisi disi. Sangkapna disi, asa angka na so boi mandohoti upacara pamelean i boi ma manuhor dohot manganhonsa gabe dohot jumpangan di parsaoran na tu angka na pinardebatanasida i. Mardomu tusi, tubu ma sungkunsungkun di roha ni ruas ni huria Korintus na mandok, “Boi do halak Kristen mandohoti upacara misterion i? Dung i, boi do tuhoron jala panganon juhut na dipelehon di upacara i na diboan tu onan jala digadis disi?” Sabagian sian nasida angka na targoar na gogo manang na jongjong di rohana mandok, “Boi.” Alasan nasida, na parjolo: Ndang adong begu di tano on (pat.1 Kor. 8:4) Hombar tusi, ndang adong agia aha na manjalo dohot na sorop tu juhut i; sandok juhut sambing do i na so sala panganon. Alasan paduahon: Pangantusion na sala taringot tu haluaon. Didok rohanasida, ala naung dipalua Kristus i nasida sian sude huaso dohot hagogoon, nunga bebas be nasida mangulahon saluhut, bebas mandohoti upacara misterion, bebas manuhor dohot manganhon juhut pelean na digadis di onan, bebas pasaorhon diri tu angka ulaon hajahaton dohot haronsamon. Ndang sala i, ai holan daging i do na mangulahon i, ndang dohot anggo tondi naung malua i. Alai na sabagian nari sian ruas ni huria i mandok, “Ndang boi.” Angka nasida on, ndang sahat dope tu pangantusion di hasoadongon ni begu di tano on. Ala ni i dihaporseai do na adong do na manjalo jala na saor tu juhut pelean i. Gabe mabiar ma nasida mandohoti upacara misterion i, jala ndang olo manuhor dohot manganhon juhut pelean na digadis di onan i. Boha do ia pandok ni si Paulus? Manguduti alusna naung dipasahat di ujung ni bindu 8, di turpuk on dohot di pudina, dipatangkas si Paulus do pingkiranna taringot tusi.

Porlu botoonta muse ia, ngolu dohot haluaon na tajalo holan ala asi ni roha ni Debata do. Alai na gabe parsualon; boha do pola ni Barita Nauli na boi gabe standard dibagasan ngolu ni hajolmaon jala na gabe hagogoonta laho mandalani ngolu sahat ro diujungna? Boha do standard na? Jala standart na songon dia do? Mansai ringkot do nian gogo i; sai luluan ni jolma do hagogoon. Nang sian gogo ni pamatang, hagogon ni arta, hagogoon ni bisnis, hagogoon ni datu, dna. Mansai ringkot do hagogoon alai ndada sudena i martujuan tu na denggan. Alai mansai godang do hagogoon namangagohon, ia so molo hagogoon ni portibi on na manait roha ni jolma i gabe mandao sian adopan ni Debata? siparungkilhononhon do i! Ai ia hagogoon mansai ringkot do dihaporluhon laho mandalani ngolu, siala ia so adong hagogoon, mansai maol do jolma i martahan dibagasan ngoluna. Alai molo gogo ni portibi on parsatongkinan do ndang manongtong, tu dia ma lapatan  ni i? Dung tadingkononta portibi on, margogo do hagogooon na tadok ondeng laho paluahon? Dison ma parsualonna na tung andul marasing sian hagogoon ni Barita Nauli. Ala hagogoon ni Barita Nauli (Euanggelion) na nidokna dison ima hagogoon (barita las ni roha) na mandok hapintoranta ima holan marhite Hata Ni Debata.

 

Hatorangan ni Turpuk

Hapintoran i ingkon jaloonta do imarhite haporseaon, hapintoran i mansai ringkot jaloon gabe jati diri ni ngolu, jala gabe standard ni ngolu hakristenonta. Siala holan ido dalan hagogoonna paluahon manisia manjalo panobusion. Ndada ala ni gogo na asing! Dipangantusion ni Hata ni Debata, ia haluaon i ndada sian usaha ni jolma i, alai sabalikna, siala asi ni roha ni Debata sambing do. Nunga sahat tu hita Barita Nauli i. Alai na gabe parsualaon; sadalan do na pinangido ni HATA ni Debata dohot parngoluonta siganup ari?

Hita saluhutna na hinaholongan dibagasan Jesus Kristus! Dibagasan ngolu hakristenonta, jotjot do tarbortik dirohana pangantusion na sala taringot tu Haluaon. Didok rohana molo nunga tardidi, bah….otomatis ma nunga dipalua ibana. Molo mandohoti Ulaon Na Badia, bah…nunga sesa be angka dosa. Molo ringgas tu parmingguan dohot partangiangan; nunga sada tudutudu ni halak naung mangolu di haimbaruon jala dihilala parbue ni haporseaon nang hamumuba ni rohana. Sandok dirohana, molo nunga diulahon sude rutinitas i, nunga sae holan i. Alai dungkon na mandalani ngolu siganup ari ditonga ni masyarakat? Berengonna ma kenyataanna na godang do tantangan na mangambati haporseaonna.

Hita na hinaholongan dibagasan Jesus Kristus; songon i do pangantusion na pejet taringot tu haporseaon? Jala aha do lapatanna molo Barita Nauli i gabesada hagogoon na ro sian Debata? Molo sai muramura hita mangalapati haluaon na pinaandar ni Barita Nauli i, boi do gabe ndang ringkot be Barita Nauli i gabe sada hagogoon ni haporseaon di halak Kristen. Pangantusion na lilu i masa do ditongatonga ni huta Korint uju i taringot tu haluaon. Ido alana Apostel Paulus paingothon nasida; ai ia asi ni roha ni Debata marhitehite haluaon ingkon gabe dasor ni ngolu haporseaon nasida.

Dibahen Apostel Paulus ma tudosanna tu Halak Israel uju di Padan Na Robi; didok ndada sude halak Israel bongot tu tano Kanaan. Naeng paingoton ni Apostel Paulus jala di patingkos pemahaman nasida; na masa sisongon i boi masa di huria na adong di Korint, molo ndang diharingkothon nasida mangolu dibagasan habadiaon. Ala ni ima asa unang neang jala langgus roha nasida manjalo haluaon nasian Debata na mangalehon i tu nasida. Siala ni i do, ndang tingkos nasida mangolu songon pangalaho ni angka jolma na dihumaliangna; na gok pargadombuson, hahormuson, manomba debata sileban, ganaganaan, angka panipu, maroharoha, marmungutmungut, jala holan mangalului hasonangan na boi margogoihon ngoluna di portibi on.

Nuaeng; boha do hita mangantusi molo Barita Nauli i nagabe hagogoon ni Debata laho paluahon hita? Jala boha do asa gabe standard ni haKristenonta? Lapatanna: ndang boi hita mangganti haluaon na nilehon ni Debata tu hita siala ni alasan na so marimpola. Ala arga ni haluaon i ndada na muramura i etongon, ido umbahen na mampu hita mangadopi angka pangunjunan dibagasan ngolunta dibagasan hadaulaton ndang marmungutmungut. Molo sanga do hita manggonti haporseaonta i dohot santopik hasonangan ni portibi. Ala ni i tongtong ma hita satia mandalani ngolunta marhite ragam ni angka ulaon dohot na gabe prestasi ni ngolunta, sahat tu na tau hita margogo dibagasan Tuhan i na mangalehon las ni roha na manongtong.

 

Hahonaan ni Jamita

Molo dirajumi jolma i dirina porsea huhut dipintori Debata, ingkon tarida do i dipanggulmiton ni ngolu siganup ari. Songon sada tudosan: Ianggo halak naung pinintoran ni Debata tudos do i tu halak naung ias jala marbaju na bontar na mansai saksak situtu. Tontu jolma na songoni ndang olo be jumonok tu gambo manang angka na boi mambaen rotak paheanna. Marisuang do didok dirina porsea tu Debata hape parniulaonna mansai dao dope sian hasintongan ni Debata, isarana: sai dieahi dope pangomoan na so torbang (korupsi, mandobo, manghaliangi na so artana, mangotootoi halak), sonang rohana diparjujian, parmabuhon, parbadaan, dna.

Hea do ra hita mambege pandohan; “Mana ada kucing yang menolak ikan asin?” sintong do pandohan i. Molo tapeakhon santopik gulamo i dijolo ni huting, ndang pola piga menit, nunga suda habis i sude. Laos songon i do dosa i; diboto sibolis i do angka dia do na tumabo di roha ni jolma i. Ido umbahen angka pangunjunan i ni dosa i ndada hea i angka na so tabo. Jala ditingki ro dosa i manait rohanta, disi ma jolma i tarunjun laho mandaisa. Ido umbahen ditingki madabu tu bagasan dosa, jotjot jolma mandok “khilaf” atau “abis enggak tahan, sih. “Ala ni i dipaingot Apostel Paulus ndada boi Debata unjunan. Asa unang lupa hita dipudi ni dosa na mansai tabo berengon i, adong muruk ni Debata tu hita. Ala i na mampu do hita mangadopi pangunjunan i ala diboto Debata do angka kemampuanta; jala disi ma hita ro mangido pangurupion dohot hagogoon sian Debata asa tartaon hita namasa pangunjunan dihita jala dilehon dalan laho haruar sian pangunjunan i. Jala mardonganton Debata monang ma hita maralohon sibolis dohot pangunjunan i. Goar ni minggunta ima Minggu Okuli: Sai mangaranap do matangku tu Jahowa; asa sai taingot tongtong mangido asi ni roha ni Debata di tingki ro angka pangunjunan dbagasan ngolunta asa margogo haporseaonta mangadopisa songon topik ni minggunta na mandok: Dai jala Ida hamuma Denggan basa ni Jahowa. Asa di angka na porsea dibagasan Jesus Kristus sai mangaranap mida Jahowa pardengganbasa i, na tuk manaluhon sumbia ni si bolis dohot hamatean. Jala margogo situtu do angka tangiang ni partigor molo dihaburjuhon. Amen (MBW)

Facebooktwittergoogle_plusredditpinterestlinkedinmail

Tinggalkan Balasan

Alamat email Anda tidak akan dipublikasikan. Ruas yang wajib ditandai *