1 MUSA 15:1-12, 17-18

MARSIHOHOT MARHAPORSEAON DIBAGASAN TUHAN I !

 Patujolo

Buku 1 Musa on didok do dibagasan bahasa Indonesia “Kejadian” namarharoroan do i sian hata Heber bereshith (“pada mulanya”) na marlapatan do i: Mula ni nasa na adong manang haroroan ni nasa na adong. Alani i boi ma dohonon buku 1 Musa on ima buku na manaringothon mula ni saluhutna. Laos buku 1 Musa on ma na paradehon sada landasan hakiki ni Buku na Badia i. Terbukti do i di godang ni ragam angka tema na boi jumpang di buku on isarana tema na manaringothon taringot tu panompaon ni portibi on ro di luhut pangisina, taringot tu jolma, dosa ni jolma, sejarah haluaon ni jolma nang sejarah ni hasahatan pasupasu ni Debata tu angka jolma namanghabiari Ibana, dohot angka lan na asing.

Di bindu 15 ni buku 1 Musa on, jumpang do dihita sada tema na manaringoti parmulaan ni parpadanan bangso Israel dohot Debata marhite si Abram. Marhite parpadanani dipillit Debata do angka na porsea i gabe hasahatan ni pasupasuNa tu nasa hajolmaon.Debata marpadan laho mangalehon pinompar tu si Abram.Ia pangidoan taringot tu pinompar do na rumingkot sian pangidoan angka arta nang pe nunga diuraihon tu si Abram (7-21). Ai pinompar do na rumingkot di angka paisolat, dungkon torop pinomparna ipe asa boi nasida masiurupan laho manjalahi ngolungolu.  Alai tu angka partani tung rumingkot do tano dinasida, ai tano do mual ni ngolungolu nasida. Ia molo tu angka raja nang panggomgomi di Bangso Israel ringkot ma na dua i; pinompar dohot tano.

 

Hatorangan ni Turpuk

Ayat 1-3:Unang ho mabiar ale Abram. Ahu do lombulombum, upam mansai balga”. Adong dua hal na mandasori si Abram gabe hatahuton. Naparjolo: Mabiar do si Abram tu si Kedorlaomer dohot angka donganna atik ro muse marmusu dompak ibana (Patud. 1 Musa 14). Napaduahon na mambahen si Abram tahutan ima mabiar ala ndang adong pinomparna dilehon Debata hatiha i. Secara manusiawi merupakan hal na wajar do gabe tubu roha biar di bagasan roha ni si Abram secara khusus mabiar ibana gabe halak na asing ma sitean ni bagasna. Alai di situasi kejiwaan na gok roha biar si Abram dipasahat Jahowa ma hatana: “unang ho mabiar. Ahu do lombulombum”. “Unang Mabiar” namarlapatan; Debata sandiri nabertanggung-jawab dingolu ni si Abram laho mangaramoti ngoluna jala mangalehon upa ni hapintoranna di haporseaon. Dungi didok Debata; ”Upam mansai balga”, pandohan on na marlapatan mangihuthon Debata ndang adong rugi, alai sabalikna angka paruntungan do, ai so adong na pinagido Debata songon pangidoan ni jolma ia so holan haporseaon tu Ibana sambing.Diondolhon Debata do bagabagaNa marhite hataNa i, jala marhite hata i dilehon Debata do sada jaminan tu si Abram paboa na Debata do na gabe donganna manang tudia ibana mangalangka, jala laos Debata sandiri do upa ima jambar manang laba na so boi longkang sian ngoluna ni si Abram; Debata na mangolu gabe donganna, jala na tongtong mangalehon gogo di ibana laho mandalani ngoluna.

Dung i di dok si Abram ma mangalusi hata ni Debata i: Oe ale Tuhan Jahowa, aha ma lehononmu di ahu? Molo tauji manulingkit alus ni si Abram on sasintongna merupakan alus na gok hagangguon ni roha do alus on. Ndang porsea manang hurang porsea ibana na tuk do Debata mangalehon upa na mansai balga tu ibana secara khusus taringot tu pinomparna na so adong dope hatiha i. Hombar tu situasi na hinolsohon ni si Abram i tontu boi do tubu pingkiran-pingkiran na marragam di ibana, pingkiran-pingkiran na mambahen ibana ganggu mangoloi hata ni Debata.

Diboto si Abram do ia Debata do na manjagai ibana di Misir (masa parporangan opat raja mangalo lima raja); dungi dilehon Debata do angka arta di ibana. Marhitehite ima boi dohonon nunga dijalo si Musa godang pasupasu ni Debata. Alai dao lobi sian artai na rumingkot dihasiholi si Abram ima pinompar, asa gabe sada jaminan doi di si Abram. Ai marisuang do angka pasupasu di arta i, ia so adong pinompar na manjalosa, hape padan ni Debata ia si Abraham  dohot pinomparna asa gabe pasupasu tu saluhut bangso, ndada marlangku be i, alai gagal siala punu na ma ibana. Na mangapuli rohana ima hasosorang ni sada anak ditonga ni keluargana. Asa unang tu hatobanna si Elieser sian Damsyik arta teanteanna i molo dung monding ibana. Ala hatiha i, molo so adong pinomparna, manang gellengna, ingkon tu hatobanna do arta teanteanna i (Poda 17:2). Eliezer lapatanna: Debatangku pangurupingku (patud.2 Musa 18:4), ibana anak na tubu dibagasan jabuna na gabe sitean ibana molo so adong pinomparna.

Ayat 4-5: Di tongatonga ni hagangguan ni roha na songon i ro hata ni Debata, mangalusi holso dohot uas ni roha ni si Abram, di dok Debata ma tu ibana: Ndang ibana tumean ho, na ruar sian butuham, ibana tumean ho. Dipasahat Debata do tu ibana bagabagaNa laho patoguhon roha dohot pingkiran ni si Abram asa unang ganggu rohana, jala unang tahutan manang mabiar ibana di hata ni Debata. Memang ganggu do roha ni si Abram taringot hata ni Debata na naeng mangalehon pinompar tu ibana na ruar sian butuhana. Ai marasing do na nidok ni Debata dohot situasi parngoluon ni si Abram na naung lam matua jala lam dao sian na ni dok ni Debata na ingkon tubuan anak di ngoluna. Secara logika memang ndang terterima akal bagabaga ni Debata i alai marhite huasoNa boi do dipatupa Debata i tu si Abram upa ni haporseaonna naung taruji di adopan ni Debata. Upa dia do dilehon Debata tu ibana? Ndada hamoraon manang goar na tarbarita, alai dilehon Debata do hombar tu uas ni rohana ima dapotan pasupasu dihagabeon; pola do dilumbahon Debata songon torop ni bilangan angka bintang na di langit ma pinomparna sogot (patud. 15:5).

Ayat 6: Di ayat on diondolhon do, ia si Abram jolma na ganggu hian rohana tu hata ni Debata gabe porsea situtu ibana di hata ni Debata. Marhite haporseaon ni si Abram tu Jahowa gabe hatigoranna do i        dietong Jahowa. Angkup ni sikap ni si Abram na sangat positif i di jolo ni Debata gabe dipasahat Debata ma tu ibana penghargaan na luar biasa manang penilaian na luar biasa hinorhon ni haporseaon na pineopna jala dilehon Debata do tu ibana hombar tu uas ni rohana ima dapotan pasupasu dihagabeon na tumean ibana. Dungi porsea ma si Abram tu Debata. Ndang ditulak si Abram padan ni Debata, dijalo ibana doi jala dihaporseai; ima hapintoranna. Ndada si Eliezer be na manean ibana alai anak sian butuhana sandiri do (anak kandung) na ingkon sipaimaonna. Dison ma adong haporseaon di si Abram; porsea saurdot do sian hata Heber; “aman” jala tadok do jotjot di na manutup tangiangta gabe “Amen”, namarlapatan: manongtong, gogo, ndang muba, satia. Jala Hata Aman/amen, patuduhon sada alus manolopi pandohan ni sasahalak, dohot manjalo dibagasan bulus ni roha. “gabe hatigoranna do i dietong Jahowa”; Hata on gabe luar-biasa, siala dibuat Ap.Paulus do on pola sahat tolu hali di Surat Rom jala sahali dipangke di surat Galatia. Jala na boi gabe hatigoran di Debata siala na ungkap do roha ni si Abram manjanghon Hata ni Debata. Gabe hatigoran di hata Heber; tsadiqim; tsedaqah; di hata Indonesia sedekah, derma. Dijalo Debata hatigoran ni si Abram, ndada sian parsaoranna dohot Debata, ndada ala ulaonna, ndada ala peleanna, alai ala ni rohana i do na ungkap tu Hata ni Debata, asa sadalan dohot sangkap ni Debata. Nang dingolunta pe sude tangiangta nada patuduhon asa pangidoanta i na saut, alai asa martangiang pe hita; disi ma asa sadalan pangidoanta dohot pangidoan ni Debata, dungi dohononta ma: sai sautma lomo ni rohaM. Ai ndang adong na so tarpatupa Debata (Luk. 1:37).

Ayat 7-8: Dung porsea si Abram didok Tuhan debata ma tu ibana, Ahu do Jahowa, na paruarhon ho sian Ur ni halak Kasdim jala mangalehon tu ho tano bahen teanteananmu. Haporseaonmi do paluahon ho ninna Jesus uju pajumpang Ibana dohot sahalak na sarion i. Laos i do dasor ni Jesus mandok hasesaan ni dosa ni parompuan (patud Mat. 9:2,22). Songon i do nang nilai ni haporseaon ni si Abram, laos ido suhatsuhat na pinangke ni Debata lao mamintorii ibana atik pe godang hahurangan dibagasan dirina. Martin Luther mandok: holan hinorhon ni haporseaon (sola fide), asi dohot holong ni roha ni Debata (sola gratia) dohot hinorhon ni barita na uli (sola scriptura) do taruli hita dipambahenan ni Debata dingolunta. Jala manongtong do i dipasahat Debata tu angka na porsea i.

Ayat 9-11: Alai tung pe naung porsea ibana tu Tuhan Debata tong do dipangido si Abram tanda tu Tuhan Debata na gabe sada bukti sian dia do tandaonna paboa na ibana tumeansa. Ido umbahen di ayat 9-10 dipaboa Debata do tanda i tu ibana. Jadi, marhite angka pambahenan ni Debata, boi ma idaonta Debata selalu berinisiatif patuduhon holong ni rohaNa tung pe jolma i tongtong meragukan huaso dohot hata ni Debata. Godang do jolma nunga mambege hata ni Debata alai tongtong marlomos ni roha, bahkan sai pintor mandele jala sai pintor manuntut do tu Debata ala ndang dipasahat Debata dope na di pingkiranna. Alai marhite pengalaman ni si Abram on boi ma idaonta na satia do Debata di padan naung niuarihonNa. Ndada songon jolma i, marpadan nuaeng sogot diose.Dibahen Debata do tanda tu si Abram marhite hataNa na mandok: buat ma sada lombu na marumur tolu taon dohot sada hambing na marumur tolu taon dohot sada birubiru tunggal na marumur tolu taon dohot anduhur sada dohot anak ni darapati sada. Dioloi Ibana do sudena i, jala diboan ibana do sude na tu adopan ni Tuhan i, angka dipardostonga ma i, dung i martoradan be ma dibahen. Tanda na sisongoni biasa do dipatupa songon sada upacara laho padimposhon padan di angka na marpadan. Alani boi ma idaonta tutu na marpadan do Tuhan Debata dohot si Abram, anak haholonganNa i.

Ayat 12, 17-18: Jadi dung manihir mata ni ari, tarnenep modom ma si Abram, gabe songgop ma tu ibana hasonggoton dohot haholomon bolon. Di na tarpodom i ibana, dipapatar Jahowa ma diriNa laos dihatahon ma padanNa tu si Abram na mandok: tu pinomparmu lehononku tano on, olat ni batak Aek Misir sahat ro dibatang aek na bolon i, ima batang aek Euprat. Aha do na boi idaonta dampak sian padan ni Debata dohot roha na mangoloi sian si Abram. On do: Molo tung serep jala tongtong sai marguru tu Debata hita laho mangulahon dohon mandalani ngolunta siganup ari gabe tulus ma angka na pinarsitta jala gabe lasniroha ma i tu pinomparta sogot. Sudena akka na denggan na hita ulahon i sai di bereng Tuhan i doi molo memang ulaonta i denggan tu dongan jolma dohot tu Debata. Jala sudena angka pasu pasu na ro tu ngolunta ndang tarambatan i. “Jangan pernah memohon kepada Tuhan agar apa yang pernah engkau minta akan terkabul, tetapi bermohonlah agar engkau mampu mengerjakan sesuatu itu agar menjadi terkabul”.

 

Sipahusorhusoron

Sai na tulus do bagabaga ni Debata naung nipadanhonNa tu angka na hinaholongan ni rohaNa. Diramoti jala diparmudumudu Debata do angka na porsea di Ibana jala dilehon do tu ibana hombar tu uas ni roha ni halak na porsea i.Molo jujur hita nuaeng diparngoluontaon ra nungnga sering hita ganggu manghaporseai Debata. Boasa boi ganggu hita? Ala jotjot dope dibagasan ngolunta gok roha na biar. Mabiar taringot tu si panganon, siinumon, parabiton, taringot tu angka parsahiton, parianakhonon, taringot tu siulaon, dohot lan na asing. Angkup ni biar ni rohantai gabe madabu ma hita tu biar na meragukan kuasa manang otoritas kemampuan ni Debata na mampu mangurupi ngolunta sian nasa hamaolon i.Taingot ma Padan Na Robi Dohot Padan na Imbaru, disada Bibel na marisihon Hata ni Debata. Disi ma patuduhonon ni Debata padanna tu hita na porsea. Jala ndang tadingkonon ni Debata hita asal ma porsea hita paimahon padanNa i. Buku Ende 766 Padan na uli; Padan na uli “Ho ndang hulupahon”, Ndang pola mabiar au di ngolungki, Nang pe holom do dalan siboluson, Ro do hatiuron sian langit i. “Ho tung so huhalupahon Ahu do manogihon Ahu do mangondihon. Ho tung so huhalupahon, Ahu do margogoihon pos ma rohami”. Taingot ma na marpadan do hita tu Debata ditingki: tardidi ianakkonta asa natoras mangarahon ianakkonna tu gareja. Ditingki Marguru malua, ditingki marbagas tarpasupasu. Taingot ma padanta i, nang pe jotjot hita lupa jala ndang satia, alai Debata sai tongtong do marningot padanNa i jala satia di padanNa i. Sian turpuk on sai jaloon do haporseaon na bulus sian hita songon haporseaon ni si Abram, adong ungkap ni roha di Padan ni Debata, ima dietong Debata gabe hatigoran. Nang hita pe na porsea dibagasan Jesus Kristus, tapatuduhon ma haporseaonta marhite na olo hita mangungkap rohanta di Hata ni Debata. (Heber 11: 1 Alai anggo haporseaon i, pos ni roha do i di angka sihirimon, jala pamotoan na tontu taringot tu na so niida. Galatia 3:9 Onpe, angka na sian haporseaon i do dipasupasu rap dohot si Abraham na porsea i. Lukas 18:8 Hudok ma di hamu: Magira ma pintoranna nasida! Alai tagamon jumpang Anak ni jolma i ma haporseaon di tano on di harorona i?).

Minggu Reminiscere lapatanna: sai ingot ma denggan ni basaNa. Tongtong do dihaholongi Debata angka na porsea di Ibana atik pe sai ganggu rohana manghaporseai Ibana. Boasa ganggu, ala ariari ni ngoluna sai godang do i digohi marhite ragam ni angka biar. Mabiar taringot tu sipanganon, siinumon, parabiton, taringot tu parsahiton na masa, parianakhonon, taringot tu si ulaon, dna. Alai lobi jumorbut do sian saluhut na biar i molo sanga ganggu dihuaso ni Debata. Aha do na masa molo sahat tu situasi na songoni? Jadi persoalan na utama dison ndada pergumulanta na dokdok na rongomi, alai sikap ni jolma sandiri do laho mangadopi pergumulan/persoalan i. Marhite haporseaon do ibana manang ndang, i do na ingkon tangkas tarida. Molo tapahombar tu pengalaman ni si Abram diragam ni pergumulan na masa tu ibana, taida do peranan ni Tondi ni Debata mangalehon hiras ni roha gabe margogo ibana jala disi ma jumpang pandohan ni Debata ‘unang ho mabiar ai AHU do mandongani ho’. Molo Debata do tutu mandongani angka na porsea i gabe taruli ma nasida digogo dohot hiras ni roha ala dipargogoi tondi ni Debata. Porlu ingotonta: ndang pingkiranta suhatsuhat di pambahenan ni Debata, jala pangurupiNa ndang tadodo ni jolma. Alani, molo tapahombar tu pengalaman ni si Abram di ragam ni pergumulanna nang biar ni rohana, alai tongtong do didongani Debata ibana jala dilehon do tu ibana hiras ni roha gabe margogo ibana laho mangihuthon Tuhani jala paimahon bagabagaNa saut tu ibana. Alani i hitape molo tajalo Debata i gabe donganta, porsea hita di hataNa jumpang ma hita ni hataNa na mandok: unang mabiar ho, ai Ahu do mandongani ho. Molo Debata do na gabe donganta porsea ma hita na pasauthononNa do bagabagaNa di parngoluonta be. Taingot ma: ndang hombar tu na piningkiran ni jolma i pambahenan ni Debata, jala panguripionNa i pe tung so tardodo roha ni jolma i do. Nunga digohi Debata padanNa i tu hita jolma pardosa marhite Jesus Kristus na mamorsan angka dosanta nang pangalaosionta. Molo Debata donganta, gabe taruli nasa pasupasu ma hita, dipargogoi nang tondinta mamolus angka tingki nang ari ni ngolunta. Jala naeng ringkot botoonta ia dalan ni Debata tung andul do sian dalan ni jolma, Jesaya 55:8 Ai ndada pingkiranku pingkiranmuna i, jala ndada dalanmuna angka dalanku, ninna Jahowa. Asa dalan ni Debata do na ingkon jalahanta asa martua hita hinorhon ni i. Efesus 3:12 Marhitehite Ibana dapot hita hiras ni roha dohot dalan masuk, di bagasan roha na pos, na manghaporseai Ibana. Alani i, mardalan ma hita hombar tu lomo ni rohaNa. Amen. (MBW)

Facebooktwittergoogle_plusredditpinterestlinkedinmail

Tinggalkan Balasan

Alamat email Anda tidak akan dipublikasikan. Ruas yang wajib ditandai *