Jesaya 43:16-21

“Bangso Na Manghatindanghon Hagogoon Ni Debata”

 

PATUJOLO

Turpuk jamita di Minggu sadari on dienet sian buku ni Panurirang Jesaya, nasomal digoari “Deutero Jesaya” manang Jesaya na paduahon. Nian ndada pola godang dipatorang taringot tu hadirion ni panurirang di buku Jesaya bindu 40-55, alai diparhatopot do periode na paduahon panghobasion ni panurirang Jesaya tupa do i di abad na paonomhon; uju dipatunduk Jehuda tu toru ni huaso harajaon Babel.

Torop do sian bangso i na di boan jala ditaban di Babel, jala torop so piga do pasipasi ni bangso i na tinggal di tanonasida. Alai duansa do sian horong ni bangso i (na tartaban dohot na tinggal) na marsitaonon mambahen nasida marhagaleon songon bangso na dipapatu. Lan do angka sitaonon diae nasida; secara fisik, ekonomi, budaya nang ugamo. Tung mansai tangkas do diahap nasida panghorhon ni huaso dohot hagogoon ni Babel. On do sada na gabe ulaon ni panurirang Jesaya uju i, i ma na laho pauliulihon pola pikir ni bangso i songon bangso na pinillit ni Debata sandiri jala paposhon roha ni bangso i marpanghirimon paboa na tuk do huaso dohot gogo ni Debata paluahon nasida, bangso ni Debata, sian gomgoman ni huaso ni Babel.

  

HATORANGAN

Jesaya 43:16-21 dipungka dohot pandohan na gabe rumus na somal di angka na manjaha buku ni angka panurirang: “Songon on do hata ni Jahowa”. Hata pandohan on i ma na songon panandaion na tradisional taringot tu hapanurirangon, jala tolu hali ma pandohan on dapot hita di turpuk on (ayat 1, 14 dohot 16). Tolu pandohan  na tarsurat di bindu 43 on patotahon panandaionta taringot tu Debata, patuduhon hadirion ni Debata; Ibana na gabe bona dohot ujung ni panurirang manurirangi tu bangso i.

Jahowa, Ibana naung “mangalehon dalan di laut, jala dalan balobung di bagasan angka aek na doras” (ayat 16b). Ibana naung  “paruarhon hureta dohot hoda, parangan dohot parhohas: Rap marpeahan nasida, ndang tarbahensa be hehe, pidom do nasida, songon sumbu naung mintop.” (ayat 17). Gombaran na patuduhon hagogoon ni Debata na patar jala mangatasi “kekuatan alam dohot kekuatan militer”, hagogoon ni Debata naung dipapatar Ibana di peristiwa “exodus” (haruruar ni bangso Israel sian tano parhatobanan Misir) na gabe ojahan haporseaon di bangso Israel. Tudosan ni Jesaya 43:16-21 dohot deskripsi haluaon ni bangso i di laut songon na tarsurat di 2 Musa 14 dohot 15; on do na gabe ojahan ni panurirang Jesaya padirihon pos ni roha ni bangso i maradophon Debata marhite na paingothon nasida di pambahenan ni Debata di “kisah dramatis” panobusion ni bangso Israel sian parhatabonan di tano Misir.

Molo tasigati di turpuk on, ndada maol be putihanta angka pandohan na pabagashon pamotoanta taringot tu barita panobusion na pinatupa ni Debata. Boi do sigatanta di sude isi ni bindu 43 on na patoranghon sejarah ni bangso i (hajolmaon) dohot Debata sandiri. Mamungka di ayat 1 di turpuk on, ondol do dipaboa ia Jahowa, Ibana do Debata “na manompa” (created), “na jumadihon” (formed), “na mangaluluhon” (redeemed) dohot “na manjou goar” (named) nasida. Di Ayat 7 dipatangkas muse paboa Jahowa, Ibana do na manjou goar ni bangso i (hajolmaon) jala ditompa bahen hasangaponNa sandiri (jaha nang di ayat 21). Asa tung mansai tangkas do disangkapi panurirang Jesaya asa diparhatopot bangso i bahasa hadirion ni nasida ndang malua i sian hadirion ni Debata, ndang tarsirang hadirion ni bangso i sian hadirion ni Debata.

Hal na menarik, dipaingot panurirang Jesaya do bangso i asa dingot jala dipeop nasida pambahenan ni Debata di angka na masa najolo, alai di ayat 18 dipaingot muse bangso i mandok: “Unang be paingotingot hamu angka na masa najolo, jala unang be pingkiri hamu angka na robi”. Sipaingot na mambahen tarsonggot roha. Sada cara do i dipatupa panurirang Jesaya na gabe ulaula retoris na efektif laho mambuat roha ni bangso i laho padimposhon pangantusion nasida taringot tu angka na denggan na masa sogot.

Ndang dihalomohon panurirang Jesaya bangso i gabe tading di tingki narobi, ndada partingkian narobi on molo pe tung marningot nasida di angka na masa najolo. Diparsinta panurirang i do laho padirihon “ruang imajinatif” di pamingkirion ni bangso i asa konsepsi nasida nasian narobi boi paimbaru konsepsi nasida di partingkian sinuaeng nang di ari sogot: “Ida ma: Bahenonku ma na imbaru, nunga pola martumbur nuaeng; tung so tandaonmuna ma i?” Di situasi naung gotap panghirimon nasida, disurirangkon panurirang Jesaya do tu bangso i asa unang marmenek ni roha, alai naeng ma jongjong nasida dungo managam panobusion na pinatupa ni Debata naung jonok partingkianna marhite angka tandatanda sipajongjongonNa, “haimbaruon” sipamasaonNa.

“Haimbaruon” sipamasaon ni Debata dipatorang do i songon gombaran ni angka naung masa di angka ari naung salpu, alai tangkas didok pamasaonNa ma i di angka ari na naeng ro. Dalan di halongonan, aek di halongonan dohot angka batang aek di tano bakkalbakkal di ayat 19b-20 patuduhon tudosan ni pardalanan ni bangso Isarel “exodus” dohot hamumulak ni bangso Jehuda na tarbuang i sian Babel. Angka binatang na ginoaranna pabotohon halelengse ni tano sidalanan ni bangso i muse di pardalanan nasida mulak tu tanona, sihobasan nasida laho paingothon bangso i di pardalanan ni ompunasida di halongonan ruar sian tano Misir.

Angka binatang, gompul dohot pidong unto; assosiasi manang gombaran ni angka inganan na liar, na so parhutaan jala ndang hainganan alai gabe parhutaan jala diingani, songon i ma di papos panurirang Jesaya roha ni bangso i asa unang mabiar. Di dok angka binatang na di halongonan i pe dohot do pasangaphon Jahowa,  Debata “na mangalehon aek di halongonan”. Tutu maol jala borat situtu do pardalanan di halongonan, alai asi ni roha dohot huaso ni Debata naung manghamonangkon nasida najolo laos songon i do Debata mangula muse manghamonangkon nasida. “Tung so tandaonmuna ma i?” ninna panurirang i laho manait roha ni bangso i asa hobas nasida mulak mangalului Jahowa jala mian di bagasan panghirimon na mangolu.

 

SIPAHUSORHUSORON

Di turpuk on nalnal do di gombarhon panurirang Jesaya hadirion ni Jahowa Debata, Ibana na mangula di tingki narobi, alai disurathon di panurirangon taringot tu angka na masa sogot. Ayat 19-21 di turpuk on ditulishon songon wacana na langsung dihatahon Debata. Dipatingkos hata ni Debata do pangantusion taringot Debata Namangula (Allah yang bertindak) songon naung ginombarhon ni panurirang. “Unang be paingotingot hamu…” i do hata ni Debata. Tatapma na humaliang jala berenag angka tandatanda. molo so i ndang parsidohot ho di haimbaruon si pamasaon ni Debata marsogot.

Keluarga dohot komunitas disangkapi do i laho padirihon stabilitas di angka na gabe parsidohot di bagasan. Suang songon i do nang Huria manang Gereja. Alai, jotjot do di namasa angka sitaonon, di tongatonga ni parsorion, sai mian hita di pandohan: “The evil you know is better than the evil you don’t know” (hajahaton na binotom tumagon do i sian hajahaton na so binotom). Alai marhite turpuk Jesaya 43:16-21 on disosoi do hita asa manaili hita tu pudi, marhatopothon asi ni roha ni Debata diangka partingkian naung salpu i gabe pahothon hita di na manatap hita tu dalan sidalananta muse; ndang mabiar be hita, alai di bagasan pos ni roha hita mardalan, di na manghirim di asi dohot holong ni roha ni Debata na manghamonangkon hita.

Di ragam ni angka na masa di ngolunta on; las ni roha nang arsak pe, Ndang na muba ianggo hadirion ni Tuhanta i. Asi ni roha dohot huasoNa na manongtong sian narobi, idaonta ma i nuaeng laos i do na manganahon hita tu ari sogot, ari na gok las ni roha dohot parolopolopon. Disosoi turpuk on do hita asa tongtong dungo, rade managam Tuhanta, na manongtong satia patupa panobusion tu hita sahat tu sadari on. Laos songon i dope, marhite turpuk on, di jou do hita asa tahatindanghon ma Ibana, Debata Jahowa, na sun gogo i; naung mandongani, mangaramoti jala mamasumasu hita dipardalanan ni ngolunta sian angka partingkian naung salpu sahat tu sadari on, laos songon i ma tong pos ni rohanta tu angka ari marsogot Debata tongtong mangula di bagasan ngolunta. Amen.

Pinatomutomu ni

Pdt. Tahan Master GM. Simaremare

Facebooktwittergoogle_plusredditpinterestlinkedinmail

Tinggalkan Balasan

Alamat email Anda tidak akan dipublikasikan. Ruas yang wajib ditandai *