PSALMEN 150:1-6

SALUHUT NA MARHOSA MEMUJI TUHAN I

Patujolo

Sian mulana do nungga dibaritahon di bukku na badia i asa pujion ni sude jolma Tuhan i. Alai molo tapaihutihut di diparngoluan ni jolma diparpudion nungga tung godang be jolma i ndang olo mamuji Tuhan, nungga mulai ndang adong be biar ni roha ni jolma i maradophon Tuhan i. Torop do na mamuji Tuhan i alai ndang be sian ungkap ni rohana laho mamuji Tuhan i, nungga godang na mamuji Tuhan i holan mangihuthon hasomalan parugamoon sambing, dang haruar sian roha dohot panandaion di Tuhan i.  Songon na tinompa nungga gabe jambarta laho mamuji Tuhan i, jala molo tarajumi habadiaon dohot hasangapon ni Tuhan i, dang tama nian hita mansohot mamuji Ibana jala ndang tama hita mamuji Tuhan i molo holan tama idaon ni halak, ingkon na tubu sian roha na bagas ma nian pamujion i. Debata namanompa saluhut na adong diportibion, umbahen I saluhut namarhosa ingkon mamuji Tuhan i.

Hatorangan

Hata “haleluya” marharoroan sian dua hata Heber ima: Hallelu-yah, hallel namarlapatan pujima, jala “yah” ima hapendehan ni sian hata Yahwe, jadi halleluyah namarlapatan pujima Jahowa. Turpuk Psalmen 150 on ima sosososo laho mamuji pasangap Debata. Tung mansai tangkas do dihatahon parpesalmen asa pujion ni saluhut na marhosa Debata. Pamujion tu Debata ala ni habadiaonna, hasangaponna dohot hagogoonna. On do alasan na pinasahat ni parpsalmen tu saluhut namarhosa na adong di portibion. Molo tarajumi do habadiaon dahot hagogoon ni Tuhan i, tontu sahali patut ma hita mamuji pasangap goarna nabadia i. Diarahon parpesalmen do asa saluhut jolma mamuji pasangap Tuhan i marhite ragam ni angka uninguningan. Alat na pinangke ni jolma i laho pasonang jolma i, laos ido alat pangkeon ni jolma i laho pasangap Tuhan i.

Pamujion tu Tuhan i ndang diolati holan di sada ruangan manang holan dibagasan parpunguan, misalna; partangiangan, parmingguon dohot angka punguan na asing. Alai lobi sian i, disaluhut gulmit ni parngoluan ni nasa na marhosa ingkon mamuji pasangap Tuhan i. Sahalian nai, hita boi mamuji pasangap Debata sian saluhutna roha, molo boi hita marnida habalgaon dohot hagogoon ni Debata, jala boi taida saluhut denggan basa ni Debata dingoluntaon na Ibana na mangalehon saluhut na adong di hita, disi ma tarida pamujiaon na marsitutu jala na haruar sian ungkap ni roha. Asa molo songonon do pamujion i, ima na ni dokna, pamujion songon tanggapan ni saluhut pambahenan ni Debata di hita jolma, di pamujionon ma tarida tangkas songon dia do ungkapan hamauliateon ni rohanta di Debata, dohot sihol ni rohanta di Debata laho marsaor dohot Ibana. Tangkas ingkon ingotonta do, ia ende pamujion i, ima; ungkapan pengakuan ni haporseaonta di Tuhan i.

Disamping ni na mamuji Debata di ganup angka parpunguan na pinatupa ni huria dohot angka punguanpunguan tontu sahali, ingkon pasangaponta do Tuhan i dibagasan parngoluonta di angka ulaonta siganup ari. Asa ingkon saurdot do pamujian na haruar sian pamangan dohot pambahenan manang parniulaon siganup ari. Molo asing do pamujion sian pambahenan dingoluon, ima na ni goaranna pamujion na so marimpola. Isarana rupani; di parmingguon dipuji jala dipasangap do Tuhan i marhite ende pujipujian dohot marhite angka uninguningan, alai dung simpul marhuria, dung mulak sian gareja, di datdati muse mangulahon angka naso lomo ni roha ni Tuhan i.  Molo songonon do pamujionta di Tuhan i, tung so tarbahen hita do mamuji pasangap Tuhan i marhite uninguningan jala molo pe dipuji halak marhite uninguningan Tuhan i, holan tabo begeon ni sipareon ni jolma i nama i.  On do nuaeng  namasa diparngoluon ni hita Kristen secara umum secara khusus ma di hurianta, nungga godang be patupa ende pujian, konser, koor dohot lan angka naasing mardongan uninguningan holan asa tabo begeon ni sipareon ni jolma, ende i ndang marangkup partondion, alai holan sebatas pasonang sipareonni hajolmaon nama.

Nungga tung manimbil be nuaeng on pamujion ni jolma i, hape turpukta mandok pujionta ma Jahowa marhite unginguingan ala ni sude dengganbasana, hasongkalanna dohot hagogoona i, alai balik ma nuaeng sian pangidoan ni parpsalmen, tujuan ni marende ndang be laho mamuji Debata, alai laho mamuji jolma i nama. Tutu ingkon adong do sian jolma i roha dohot ungkap ni rohana laho mamuji pasangap Tuhan i, alai nungga gumodang na manimbil sian hata ni turpuktaon. Debata do sipujion ni jolma i, alai digulut jolma i ma pamujion i asa mamuji dirina sandiri. Dao umbiar do jolma i sala marende diadopan ni jolma sian, dijalo Debata do ende pujian i manang na ndang, jala umbagas sian i, ndang adong be tarbortik di roha ni jolma i tagan marende ibana laho pasangap Tuhan i, holan na marende mangisi acara nama dohot hasomalan sambing.  Asa marhite turpuktaon di sososi parpsalmen do hita mamuji pasangap Tuhan i marhite angka uninguningan, jala sude na marhosa ingkon mamuji pasangap goarna na badia i. Dibahen i marhite soso ni hata ni Tuhanta di turpuk on manangkas ma pamujionta mangadop holan tu adopan ni Tuhan i,  unang tagulut jambar ni Tuhan i, ai holan ibana do na patut pujion ni nasa na marhosa diportibion.

Panimpuli

Sude namarhosa ingkon mamuji Tuhan i, pamujion i na marharoroan sian panandaion di sude pambahenan ni Debata dingoluntaon dohot pamujian sian sihol ni roha marsaor dohot Debata dingoluntaon. Dihalomohon Debata do pamujian mardongan uninguningan namartondi, alani i, mamuji pasangap Tuhan i ingkon dibagasan partondion do asa dao roha nang pingkiran nanaeng pasangap hadirion ni hajolmaon marhite angka ende pamujian i. Ende pamujian di huria dohot diangka punguan dengan ma tutu mamangke angka uningungingan na adong dihita. Jala pamujion i ingkon saurdot do dohot parngoluon siganup ari. Sude namar hosa…, namarlapatan doi saleleng hita marhosa manang mangolu ingkon pujionta do Debata manang na didia pe hita maringanan, asa ndang holan di gareja pujion Debata, manang dipartangiangan manang diangka punguan alai disaluhut gulmit ni ngoluntaon.    Rio Pendi Nababan,S.Th

Facebooktwittergoogle_plusredditpinterestlinkedinmail

Tinggalkan Balasan

Alamat email Anda tidak akan dipublikasikan. Ruas yang wajib ditandai *