EPISTEL KAMIS PUTIH 14 APRIL 2022-2 MUSA 12:1-14

Epistel Kamis Putih 14 April 2022
KAMIS PUTIH
KAMIS, 14 APRIL 2022
“PARNINGOTAN DI PANGHOPHOPON NI KRISTUS“
2 Musa 12:1-14

BACA JUGA BAHAN KHOTBAH KAMIS PUTIH – KAMIS, 14 APRIL 2022

HATORANGAN

1. Ia turpuk Epistel Kamis Putih 14 April 2022 on, i ma sebagian sian barita taringot tu si Musa na sinuru ni Debata laho paluahon bangsoNa sian parhatobanan Misir. Uju borhat si Musa mangadop raja Firaun raja ni Misir. Di na borhat si Musa mangoloi parsuruon ni Debata, dipatangkan si Firaun do rohana. Alani dipamasa Debata ma 10 uhuman (tulah) tu pangisi ni Misir, asa ima dalan ni Debata patuduhon huasona tu raja Firaun nang saluhut Misir, asa diloas bangso Israel ruar sian Misir i. Alai sahat tu uhuman na pasiahon dipatangkan raja Firaun do rohana, ndang olo mangaloas bangso i ruar sian Misir. Naeng dope di rohana parhatobanonna bangso i. Ia turpuk on, ima parenta ni Debata tu bangsoNa di na laho patupa uhuman/kutuk na pasampuluhon tu halak Misir, ima hamamate ni anak buha baju ni sude pangisi ni halak Misir.
   

2. Parsuruon ni Debata tu ganup parripe ni bangso Israel, maneat birubiru jala mandaishon mudarna tu tiang parhinsuhinsuan dohot tohang ni bagasnasida. Di angka ari andorang so borhat bangso Israel maninggalhon Misir, disuru Jahowa ma marhite si Musa dohot si Aron asa ganup keluarga ni halak Israel na di Misir mambuat sada birubiru tunggal naso marlindang, na marumur sataon. Patupaon nasida i di ari sampulu hombar tu penanggalan nasida ujui.
   

3. Ingkon daishononnasida ma mudar ni birubiru i tu tohang ni bagasnasida be. Ia jagal ni birubiru i (sian pat sahat tu uluna), ingkon panggangon nasida ma saluhutna di na saborngin i. Na so tupa tadinghonon nasida tu marsogotna. Jala panganon nasida ma i mardongan sagusagu na so niigaran dohot ingkau paet. Jala uju na mangan juhut i nasida, ingkon marpahean naung tipak hombar tu pinatikhon ni Debata. Ingkon marhohos gonting nasida, marsipatu, maniop tungkot. Ia ulaon ima ulaon Paska. Paska ima hata heber “pesakh/psh” na marlapatan “berjalan melewati (manalpui).
   

4. Hombar tu parsuruon ni Jahowa mandaishon mudar ni birubiru na pinotong nasida ditohang ni bagas nasida be, ai naeng mamolus ma Jahowa di saluhut huta na di Misir. Uhumon ni Jahowa ma marhite hamamate ni anak buhabaju ni sude halak Misir, nang pahanpahanan nasida tahe, ndang adong na so matean buhabaju nang raja ni Misir. Alai bangso Israel na mandaishon mudar ni birubiru di tohang ni bagasna, salpuan ni Jahowa ma pangisi ni bagas i. Di na marsitaonon huhut sandok pangisi ni Misir manangisi buhabaju nasida, di situasi I madipangke Jahowa tingki na lehet laho mamboan bangsona ruar sian Misir, jala halak Misir pe ndang diotapi, gariada nasida tahe manjujui halak Israel asa borhat sian huta nasida i.
   

5. Malua bangso Israel sian Misir dibahen Jahowa. Borhat ma bangso Israel sian Misir uju i. Haluaon nasida sian tano parhatobanan nang sian tangan ni Firaun, ndada ala ni gogo nang malo nasida. Tung tangan ni Jahowa do na paluahon nasida. Debata do na mambahen dalan haluaon tu bangso i, marhite na marsuru nasida mandaishon mudar ni birubiru tu tohang ni bagasnasida. Na mamolus do Jahowa disandok tano Misir, mambahen uhuman hamatean di sude buhabaju ni halak Misir nang saluhut buhabaju ni sude pahan-pahananna tahe. On ma na ingkon tongtong sihatindanghonon ni saluhut pinompar ni Israel, nang pabotohonsa tu pinomparna marsundutsundut.
   

6. Patik ni Jahowa paingothon asa mangulahon Paska ganup taon, marningot haluaon pinatupaNa. Di ayat 14 dipatikhon Jahowa ulaon paska songon na di ayat 11, I patupaon nasida i ganup taon salelenglelengna. Jala diturpuk na mangihut dibahen Jahowa ma aturan siulahonon nasida di na marpesta paska. Ia tujuan ni Jahowa marsuru patupahon paska di siganup taon, ima asa sian sundut tu sundut bangso i mananda huhut pasangaphon Jahowa, naung buas patupa haluaon ni jala paingothon ganup sundut, dipanghophopon ni Debata dibangsona.
   

7. Di Padan Na imbaru do di masa paska ni Jahudi bersamaan dohot habobongot ni Tuhan Jesus tu Jerusalem, na marsihundul di halode di na laho pasingkophon mangulahon parsuruon ni Ama I marhite na marsitaonon, sahat ro di na mate tarsilang humonghop portibion. Jesus Kristus do birubiru ni Debata na manghophop dosa ni portibion. Sopot dungkon madabu jolma tu dosa nunga dibagabagahon Debata do Sipalua (I Musa 3:15), dung i dibagabagahon do haroro ni Sipalua marhite angka Panurirang di Padan na Robi. Digoari do Jesus I birubiru ni Debata na mamorsan dosa ni Portibi on, laho paluahon jolma pardosa, hombar tu naung sinuriranghon ni panurirang Jesaya di Jesaya 53:4. Paska na tapestahon dibagasan hakristenonta, ima marningot panghophopon ni Tuhan Jesus marhite hamamate sahat tu parningotan haheheonNa.
   

8. Parningotan Kamis Putih on sebagai rangkaian Paska di hita huria ni Tuhan Jesus, laho ma rohanta marningot nang mangauhon borngin parpudi andorang so dipasahat si Judas Tuhan Jesus marhite pangummaonna i. Diborngin i dipatupa Tuhan Jesus do perjamuan rap dohot siseanNa. Dibuat ma roti, dungi diponggoli laos dilehon tu angka siseanNa na gabe gombaran ni daging ni Kristus na ingkon marutang hosa (mate), songon i nang anggur dilehon tu angka siseanNa songon gombaran ni mudarNa na durus laho paluahon hita si pardosa.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

1. Debata Jahowa do na paluahon bangsona sian parhatobanan Misir. Ala ni i naeng tangkas bangsoNa i mananda, marningot tarlumobi ma tongtong mangasahon Jahowa di pardalanan ni ngoluna.
   

2. Di Parningotan Kamis Putih on, na marthema “Parningotan di Panghophopon Ni Kristus”  ima marningot borngin parpudi mandapothon tingki ari partinaonan ni Tuhan Jesus. Dipatupa Jesus dohot siseanNa mangan roti dohot minum anggur manggombarhon mudar dohot daging ni Kristus na laho manobus, manghophop jolma pardosa. Naeng tangkas di hita, Panghophopon ni Kristus do mambahen haluaonta. Naung mardosa do saluhut jolma, ala ni dosa ni jolma na parjolo i (Roma 3:13). Jala ndang adong jolma na tuk paluahon dirina sian gomgoman ni dosa. Ibarat ni halak naung tarrobung bagas ndang tuk paluahon dirina. Holan pangurupion/asi ni roha do na boi paluahon jolma i. Di situasi na songon i ma Ama i marsuru AnakNa Tuhan Jesus Kristus tu portibion, laho manghophop jolma pardosa.
   

3. Asi ni roha ni Debata dipatupa marhite sitaonon ni Jesus sahat tu na mate tarsilang. Na digoari Viadolorosa (jalan salib). Asa saluhut parniahapan ni Jesus na tarsilang i dalan haluaonta do i.
   

4. Hita naung dohot marsaulihon panghophopon ni Jesus, ingkon patuduhon ngolu naimbaru na hombar tu hataNa nang lomo ni rohaNa. Marholong ni roha di dongan sada tanda na mangargahon holong ni Kristus.

Penulis:
Pdt. Nurdia Hutasoit, S. Th

Penyunting:
Yohanes Simatupang

BAHAN EPISTEL INI JUGA DAPAT DIUNDUH DENGAN MENG-KLIK TULISAN DI BAWAH INI
EPISTEL KAMIS PUTIH – KAMIS, 14 APRIL 2022