Epistel Minggu Kantate 15 Mei 2022
MINGGU KANTATE
MINGGU, 15 MEI 2022
“MARENDE MA HAMU DI DEBATA“
Pangungkapon 4:8-11
PATUJOLO
Bukku Pangungkapon disurathon si Johannes uju tarbuang ibana di Pulo Patmos. Bukku Pangungkapon on digoari do bukku Apokaliptik ima namarisihon alatan manang tudutudu tu angka nanaeng masa tu ari sogot nang naung adong masa di partingkian nuaeng. Dipabotohon do tu angka huria angka nanaeng masa ima uhuman ni Debata do sude bangso hombar tu angka naniulana be, jala pasahatonna ma uhuman tu angka parjahat, dohot tumpal hangoluan tu angka nabadia di harajaon ni Debata. Dibagasan hamaolon bolon do halak Kristen uju i (gereja mulamula) lumobi hamaolon i marharoroan sian Kekaisaran Romawi. Godang do halak Kristen nadibunu ala so marsomba tu kaisar uju kaisar domtianus. Torop do halak Kristen na so Manahan ala ni angka parungkilon i, torop mandele bahkan sumurut nasida sian haporseaonna.
Buku pangungkapon on ima surat penguatan dohot apulapul tu angka huria na parjolo i asa manahan nasida di haporsuhon na borat i. Alani i mansai gomos di ondolhon di buku pangungkapon asa satia nasida sahat rodi ujungna. Ai na satia rodi ujungna i do namanganhon parbue ni hau hangoluan na di Paraideso ni Debata. Turpuk ni jamita on patoranghon tu hita ia Debata do na patut sisombaon, jala pusat ni panombaon i, ima Debata na paluahon jolma sian dosa, jala na naeng ro muse laho mambahen uhum tu jolma na so porsea tu ibana.
HATORANGAN
1. Pangisi ni harajaon banua Ginjang marsomba tu Debata
Di turpuk ni jamita on, dipatorang do si Johannes mamereng adong 4 parngolu (makhluk), dohot 24 sintua na marsomba tu Debata. Jala sian i botoon ta ma taringot tu songon dia do Panombaon na sasintongna. Opat parngolu i (makhkluk) manomba Debata jala didok “Na badia, na badia, na badia do Tuhan Debata, sigomgom saluhutna, naung adong hian, Siparngolu i, na naeng ro (ay. 8b). Ayat on secara sederhana patorangkon, aha do alasanna umbahen na ingkon manomba Debata. Parjolo, Na badia do anggo Ibana. Paduahon, Na manongtong (kekal) do anggo Debata.
Karakter Habadiaon ni Debata paboahon tu hita ia Debata ima Debata na marhagogoan, Debata na Marholong ni roha, Debata na so muba, dohot angka na asing. Jadi, habadiaon ima mahkota sian sude karakter ni Debata.
2. Holan Debata do na patut sisombaon, ai di Ibana do Hasangapon, Hamuliaon dohot Hagogoon.
Debata gabe patokan mutlak di Habadiaon, ndang adong anggo na asing sian Debata. Debata patupahon angka halongangan bolon di ngolu ni Jolma, ndang hea ibana patupahon hasalaan, jala ndang mardosa dohot ndang martihas. Na badia do anggo Debata, alani holan Ibana do na patut sombaon ganup angka na porsea.
Ndang angka na tinompa ni Debata sisombaon, alai na Manompai do, jala sude angka na manomba Debata ingkon mangolu dibagasan Habadiaon, marhite na mambolongkon angka roha na jat, roha na olo manghatai donganna, dohot angka ulaon haramunon na asing.
HAHONAAN
Marhite turpuk on, dijou hita asa mangolu dibagasan habadiaon manomba Debata, unang sebatas seremonial belaka, alai dohot ma di ulaon siganup ari, parange siganup ari, ingkon patuduhon habadiaon ni Debata.
Rom. 12:1b “Pasahat hamu ma dagingmuna bahen pelean na mangolu, na badia, na hinalomohon ni Debata; i ma hadaulaton ni na marroha”. Na marlapatan mai, na manomba Debata ingkon pasahathon ngoluna tu Debata,
Nunga tajalo be haluaon i sian Debata, ndang alani hagogoonta i, ndang alani malonta, alai alani asi ni roha ni Debata do i. Ai saluhutna na di Portibion silehonlehon ni Debata do i, alani i tasomba ma Ibana, tapatudu hamauliateonta marhite na manomba Ibana dibagasan ngolunta. Amen
Penulis:
Pdt. Efran M.I. Pasaribu, S.Th
Penyunting:
Yohanes Simatupang
