Epistel Minggu VII Dung Trinitatis 31 Juli 2022
MINGGU VII DUNG TRINITATIS
MINGGU, 31 JULI 2022
“HABISUHON NA SIAN BANUA GINJANG“
Parjamita 2:18-23
PATUJOLO
Bukku Parjamita on didok Qohelet (qahal) secara hurufiah marlapatan; punguan, marpungu, mardomu manang pajumpang. Punguan pengalaman ni sasahalak na bisuk. Guru, punguan pangajarion ni angka jamita. Di bindu 1:1 di surat do ise parjamita i, ise do parjamita i? di terj. NIV didok TEACHER son pf Daud King in Jerusalem. Di terj. KJV didok: PREACER the son of the David, di terj. LAI didok PENGKHOTBAH anak Daud. Terj. BIS didok SANG PEMIKIR putra Daud. Tangkas ma di paboa sian i ia bukku Parjamita ima bukku na marisi parbue ni pamingkirion, sipahusoron ni roha, pangajaran, jamita, sipaingot sian sahalak parjamita, ahli, pemikir, guru. Sipemikir mangarimangi di ngoluna secara mendalam taringot arti HIDUP jala mamodahon tu angka naumbegesa.
Mangihuthon si parjamita, ia ngolu ni jolma i mansai otik do ariarina (hidup singkat) jala sai hira ngolu na marisuang (siasia). Parjamita 1:2 “Tung na laho salpu do luhutna, alogo sambing do tutu luhutna i! Parj. 1:14 “Nunga huida saluhut jadijadian angka na masa di hasiangan on, gabe ida ma, saluhutna i na laho salpu do, jala pangeahion di alogo sambing do i. Alai sang pemikir ndang putus asa, ndang mandele, suhar ni i dipingkiri do boha asa dapot marguna, marlapatan. Ndang boi putus asa, unang mandele ala nunga di lehon Debata tu jolma i laho paturehon angka na masa i. Ido nanidok ni pamingkir “BISUK, HAPISTARAN”. Di bahasa Heber didok ‘Hokmah’ (hikmat). Sian sude bukku Parjamita on hita boi manjaha, habisukon, hapistaran, asa unang oto jolmai alai asa marbisuk.
HATORANGAN
Molo di hatai pe di turpuk on haotoon-hapistran ndang marsidais i tu intelektualitas, tingkat akademis, gelar naung dipeop sasahalak. Alai hapistaran/haotoon ni sasahalak namarpardomuan taringot tu par-TUHAN-on, HAPORSEAON, manang AGAMA do. Halak na bisuk manjalo sipaingot, sipodaon na sian Tuhan. Alai halak na oto ndang manganturehon, ndang manjalo sipodaon sian Tuhan i, na so mabiar tu Debata, cuek tu ugamona, jais tu suara ni Tuhan, na sai patujolo dirina, gogona, pingkiranna, kehebatanna. Nilai agamana roa, toru/rendah. Ndang manjalo bisuk sian Debata. Taida do gombaran ni panurat Parjamita on parsaingan ni na bisuk, na pistar na mabiar tu Tuhan alai halak na oto patujolohon dirina sambing.
Unang Sanga Tading Manang Salpu i, Bahen Ma Nuaeng!
Halak na marbisuk sai dipingkiri do unang sanga salpu, unang tading jala dibahen ma nuaeng on, ai tu marsogot ndang binoto aha na masa. Saluhut angka ulaon na di hangaluthon di hasiangan on ingkon tadinghonon ni jolma do. Alai boasa sai marlojaloja jolmai mangulahon i hape ndang marpambahenan hombar tu lomo ni roha ni Debata. Ai nda ibana do gabe tuan di saluhut ulaon angka na huhangaluthon mardongan hapistaran di hasiangan on! Laho salpu do hape nang i. Boasa ma pola gabe antanonna gogona. Gari na godang marpambahenan na laho salpu “tanpa bekas” lam na so marpambahenan i ma gabe alogo sambing salpu tak bernilai di roha, pingkiran lumobi ma sian martimbanghon habisukon. Ay. 19, Ise pabotoboto manang halak na pistar ibana manang halak na oto? ibana do mamboto dirina na pistar manang na oto, jala ndang pola dipaboaboa dirina di haotoonna manang di hamaloonna, ai ingkon sadaranna do i laho salpu, alai halak na bisuk sai di rohana do boha do marparbue andorang so salpu? Bahen ma nuaeng on. Na adong sipatupaonmu pature mai tu Tuhan, tu huriaNa, tu donganmu manang tu ulaon hajolmaon. Marbiasbias roha ni parjamita i di ayat 18 mida saluhut angka na di hangaluthon di hasiangan on ala ingkon tadinghononna doi tu jolma na ro muse sian pudina (generasi) berikut.
Parar Ma Na Denggan Andorang So Salpu (Ay. 20-21)
Ayat on mangondolhon ia jolma na mangula mangasahon gogo ima halak na hurang pantas marroha, ala gogona sandiri di pangasahon dohot dipatujolo. Nang pe dihangaluthon angka ulaon na di hasiangan on, ingkon salpu doi. Ala laho salpu doi gabe naeng marpandelean, ala laho salpu doi jala ingkon ditadinghon, tontu songon halak na marhosa na ganjang ma ibana disi, jala di sadarkan paboa ingkon salpu do sude angka na hinangaluthonna i. Antong ndang adong hape gogonta di tano on so ganda holan manghamuliatehon sian nanilehon ni Jahowa di hita, nang pe partingkian nasaotik pe. “Dung i marbalik ma rohangku naeng marpandelean nian mida saluhut ulaon angka na huhangaluthon di hasiangan on. Ala huida sada jolma, dibahen do nian nasa hapistaranna, parbinotoanna dohot hamaloonna mangaradoti ulaonna, hape ingkon tinggalhononna do i bahen jambar ni jolma na so dung marhangaluton ala ni! Alogo sambing do hape nang i jala hinamago godang.” (Parj.2:20-21). Ganup jolma manghangaluthon siulaonna be do. Jala ingkon bahenonna manang pangkeonna sude hapistaranna (bisuk dohot hikmatna), parbinotoanna dohot hamaloonna lao mambahen denggan situtu hasil ni nahinangaluthonna i.
Alai molo taida sian isi ni bukku on, di sude poda na sinurathon ni Parjamita on, sada pangarimpunan ima: asa sude jolma i manghabiari Debata Jahowa jala mangolu di bagasan na mangaradoti tona dohot patikna, ai sude na ni ula ni jolma i di portibi on na ingkon boanonna do sogot tu jolo ni Debata di paruhuman (Bnd. 12:13-14). Asa sude nian jolma di na mangula di hasiangan on di bagasan parbinotoan taringot tu Debata jala dibagasan Debata.
Na Marbisuk Mangarodihon Na Denggan (Ay. 22-23)
Parsaulian ni jolma sian sude ulaonna tontu ingkon marujung do jala ndang adong na hot. Ala tangkas do di boto halak na marbisuk i ingkon salpu do jala marujung, ndang gabe mabiar ibana mangulahonsa dohot paradehonsa ala ndang ibana be mandai manang marsaulihonsa, manongtong do rohana nang pe holan mangaradehonsa ibana jala las do rohana disi. Ida hita ma angka penemu na tarbarita sinuaeng on, isara ni amanata Thomas Alfa Edison nang pe ndang apala leleng be ibana mamakke na hinangaluthonna taringot tu bola lampu, kelistrikan, perekam suara, dohot perfiliman. Kontribusi na umbalga di ibana di portibi on, holan parningotan (ay. 16) do jambarna sian na hinalojahonna. Alai anggo halak na hurang bisuk i dohonna do tu dia ma pola huhangaluthon i, angka i tong nama so ahu mandai manang manghangoluhonsa tu angka na di pudingku nama muse, ninna! Sai parade na bisuk i do na denggan dohot tama tu angka sundut nanaeng ro muse. Na marbisuk i ndang pasudahon manang mansuasaehon angka na hinangaluthonna i, ai pos do rohana ndang marisuang i tu hangoluan ni jolma i muse. Antong gabe sipodaon do nang hata on tu hita asa angka na marbisuk do na mangarodihon na tama dohot na denggan. Angka na otoi gabe di halupahon (ay. 16) ndang diingot halak ibana, tagamon do ingoton ni Debata nang ibana dung mate?
Alai molo las do roha ni naringgas jala namanghasilhon nadenggan ulaonna i molo dohot halak marsaulihon hasil ni naniulana i, lam semangat do ibana mangula ulaonna i dohot manghangaluthonsa. Jadi alogo sambing do (tung so marguna) do molo angka siula ulaon na denggan mangiburu, molo dohot halak marsaulihon parbue ni naniulana. Hamamago godang do pangiburuon na songon i, ai gabe marniang pamatangna, lam ndang sehat pikkiran nang partondionna. Ikkon botoonna be do aha parsaulianna na mangula ulaonna i mansai denggan.
Martua do jolma molo boi dope ibana marhangaluthon laho patupa angka nadenggan tu ngoluna sandiri dohot tu halak. Molo pe gumodang di halak angka hasil/guna ni nanihangaluthon i, i do siparhatuahononhon. Toho do i, tong do gumodang di halak hasil ni nanisari ni sahalak naporsea sioloi hata ni Tuhan. (misalna: sinari ni amanta di sada keluarga gumodang do di halak, ndang di dirina, i ma di ripena, di anakkonna, di tondongna, di dongan sahutana). Sadia ma ianggo di ibana sandiri. Songon nidok ni ay. 24 i, mangan dohot minum denggan dohot pasonang rohana mangihutihut i ulaonna naung hinangaluthonna i. Ianggo parsaulian na dumenggan di ngolu on, i ma molo boi angka jolma na asing sonang jala marlas ni roha mandai dohot manghasonanghon hasil ni naniula ni tanganniba. Molo so songon i do, ndang lam tu dengganna hajolmaon. Alai molo boi do didai halak na tabo sian hasil ni naniulaniba, i do natumabo jala i do mambahen lam tu dengganna hajolmaon.
HAHONAAN
1. Parar ma na denggan i andorang so salpu, ai sangombas do jala hatop do salpu. Andorang so salpu angka partingkianta, mamarar angka na denggan na sian pangajaran ni Debata marhite pangajaran ni poda habisukon, parbinotoan, jamita na sintong i, unang tundalhon.
2. Parjamita mandok, marisuang do saluhut na adong di ibana i molo ndang di bagasan Tuhan i. Mangaradehon na denggan i do parrohaon na marbisuk na sian ginjang. Ndang holan paradehon na mura salpu i ibana, ai na so tarngatngat ngitngit i, (bnd. I Petrus 1:4). Laos didok do sai na marparbue do ulaon i molo di bagasan Tuhan i. Tarbahensa laho mandok i siala panandaion na tu Debata, naung di gohi bisuk dohot parbinotoan taringot tu Debata di ngoluna.
3. Parengkelon dohot las ni roha di halungunhon angka na marbisuk i do i jala sai dipareakhi. Binsan adong tingkinta sinuaeng on taparade ma i jala unang marisuang so adong bogasna. Naeng ma marbogas angka na taparade gabe siingoton songon parrohaon ni halak na marbisuk na sian ginjang, Amen.
Penulis:
Pdt. Dandro Sandy Panjaitan, STh
Penyunting:
Yohanes Simatupang
Kunjungi juga kanal YouTube HKI untuk mengetahui informasi seputar pelayanan HKI.
