JAMITA EPISTEL MINGGU 19 MARET 2023 – MINGGU LETARE

Psalm.5: 8-13

Marlas Ni Roha Ala Porsea

“Pantun do hangoluan jala tois do hamagoan” sada poda na mansai arga na membangun peradaban ni bangso Batak. Karakter na terbangun dibagasan hapantunon dohot toruk ni roha do padaohon hamusuon. Alai tois do mula ni hamagoan. Sai dipodahon natoras do karakter on tu angka ianakhon manang sundut na umposo asa manontong mangolu di bagasan hapantunon dohot toruk ni roha asa adong bohal parngoluonna jala na so jadi tois maradophon manang ise pe (santun terhadap siapapun dan jangan Egois atau nakal dan kurang ajar), na maraleale, mardongan, na maruluan baik pe na marbawahan. Molo talapati hata di hata Indonesia, Pantun ima Santun, ramah jala tois didok ma i angkuh, biadap, kurang ajar, nakal, ceroboh, suka melawan, bangkang. Hapantunon maradopon dongan ido mula ni pardonganon, mangolu jala siat manang tudia pe, alai molo tois do pangalaho hamusuon ma na ro.
Dipaingot si Daud do situasi ni ngoluna marhite tangiang tu Jahowa na sedang mangadopi tantangan hebat sian angka musuna. Alai dang mabiar ibana ala dihaporseai rohana do adong Jahowa mandongani ibana. Situasi on paingothon upa ni haporseaon na mangolu na pargogoan ni Debata ibana mandalanhon ngoluna. Dang pasombuonna naposoNa mangula sandiri mangadopi sumbia ni hamusuon i. Turpuk on paingothon hita songon na tarsurat di bibel i na mandok: “Onpe, aha ma dohononta disi? Molo Debata donganta, ise ma alonta? (Roma 8: 31).

Tujuan utama di turpuk on ima ayat 12 dohot 13 i do : “Sai marlas ni roha ma sude angka na marhaposan tu Ho, sai marendei ma nasida ro di salelenglelengna ala ni ondinganmu nasida, sai marolopolop ma mida Ho angka na holong roha di goarmu. Ai Ho do, ale Jahowa, mamasumasu na tigor marroha i, songon lombulombu do dihaliangkon Ho asi ni rohami tu ibana”. Porsea situtu do si Daud di bagabaga ni Jahowa na tongtong mangaramoti huhut marmahani ngoluna. Na sintong do angka hata ni Jahowa, songon perak naung nilala di bagasan balanga, pola pitu hali tinapis. Ho do, ale Jahowa, mangondingi nasida, paluaonmu do ibana sian halak na sansundut on, ro di salelenglelengna (Psalm 12: 7-8). On ma na sai patogu rohana asa tongtong marsihohot jala marpos ni roha holan tu Jahowa. Tung mansai marsihohot do roha arian borngin, “Sogot ma, ale Jahowa, tangihon soarangku, sogot do ahu marhobas manopot Ho, jala manatapnatap ahu. Ai ndang lomo roham mida hageduhon, ale Debata, jala ndang tarsorang na geduk marroha i Ho (Psalm.5:4-5). Na porlu siparrohahononta ia bagabaga ni Jahowa ndada tu angka na marhageduhon, holan tu angka na sintong marroha do i. “Ndang manahan angka na ginjang marroha maradophon pamerengmu, dihosom roham do nasa siulahon na so uhum. Matua diago Ho do, ale Jahowa, angka sidon gabus, jala dihagigihon roham do halak angka na tumahi mudar dohot sipaotooto..” (Psalm.5:5b-7). Padohan on dipagomos muse di ayat 12 i: “Sai marlas ni roha ma sude angka na marhaposan tu Ho, sai marendei ma nasida ro di salelenglelengna ala ni ondinganmu nasida, sai marolopolop ma mida Ho angka na holong roha di goarmu”.
Di konteks haporseaon ni halak Kristen, orang benar adalah orang percaya yang dibenarkan karena iman kepada Tuhan Yesus Kristus, ia halak na marhaposan (Orang benar) ima angka na patujolohon hasintongan (kejujuran), hatigoran (keadilan), tigor marroha (kelurusan hati) jala ndang margabus diadopan ni Jahowa. Halak na sintong marroha ima partigor roha, ualonna pe tigor. Aangka i do na dapot asi ni roha jala tarpasupasu jala na ondingan ni Jahowa.
Sai na pasupasuon ni Jahowa do angka na porsea i, jala malua sian uhuman. Jala bagas ni angka naporsea ipe sai na suksuk pasupasu na so ra suda. Poda 3:33-35, didok: “Ai marbiasbias do Jahowa mida halak na geduk, alai rosu do Ibana tu halak partigor. Manginona do torutoru ni Jahowa tu jabu ni parjahat, alai dipasupasu do ianggo undungundung ni halak partigor. Ibana marengkelengkelihon halak pangelesi, alai dilehon do asi ni roha anggo tu halak na unduk marroha. Hamuliaon do teanon ni halak na bisuk sogot, alai luahonon ni haurahon do halak na oto i.” Sian on ma taboto mandao do uhum sian angka na porsea. Apostel paulus pe doras do paingothon bahwa sai na paluaonna do angka na porsea i ndada sian gogo ni pambahenanna, alai sian asi ni roha ni Debata, didok : Gabe dipintori do nasida dalan basabasa binahen ni asi ni rohana hinorhon ni panobusion na di bagasan Kristus Jesus. Alasanna ndang margogo jolma patigorhon dirina di adopan ni Jahowa, ai dang adong haluaon ni jolma sian dirina sandiri. Alai martua ma ganup artigor di adopan ni Jahowa, ai jahowa dibahen ngoluna. Martua ma angka na tigor roha ai sai asian ni Jahowa do ibana, jala nasida do nampuna harajaon banua ginjang.
Keadaan marlas ni roha ndada bersifat partisis, olo mengkel nang pe holan diduru, ni roha otomatis sikap dohot gejolak hati sintong pataridahon ngolu ba marolopolop. Marlas ni roha ndada bersifat marsanggasangga, marbagi di tingki, situasi dohot inganan, manang didia jala sadihari pe tongma mian gejolak ni roha ni na marolopolop, ala hot jala manontong mian Jahowa di ngoluna. Molo tahubunghon do haporseaon tu upa marlas ni roha na menyangkut do i tu panandaion na sintong tu Jahowa. Ndang boi longa, ingkon jelas. Ndang boi lomos manang leas, ingkon tepat do antong hapeahan ni haporseaon i. Adong sada kisah na songon i:

Adong ma sahalak na manjual hodana, didok ma tu sahalak panuhor: Pajadi ma amang, asa diboto amang on kuda spesial do on, dang dapot manang didia pe songon on mantapna, ba pokokna spesial ma”, ninna Ibana tu panuhor i (atik pe i malona martigatiga asa intor langku). Bereng amang ma da, nunga hulatik hoda on gabe hoda kristen. Hampir tersinggung calon panuhor i ala didok hoda kristen: aha tung hamuma, bea do dohot hoda sarupahononmu tu parugamo? “hoda kristen ?” ninna panuhor i, ala masibotoan nasida sarupa marugamo Kristen. “on ma nian hamu, bereng ma, jala nangkok ma hamu, molo naeng mardalan hoda on ba tinggal mandok “Puji Tuhan” mardalan ma hoda on, molo naeng so do tinggal dok “Haleluya” intor so do i. Nangkok ma amang. Simpul dipatorang nampuna hoda on, na sai penasaran si panuhor. Dinangkohi ma hoda i, huhut las rohana apalagi uju didok ibana “Puji Tuhan” mardalan hoda on, didok ibana “halleluya” so hoda, songon i ma dibaen ibana sampe pola hurang lobi satonga jam. Aman. Ujungna tarida do las ni rohana, saut ma dituhor ibana hoda on. Sai semangat ma ibana manangkohi hoda on sai dipandok ibana“Puji Tuhan” sai dinunuti hoda on mardalan diboan mulak tu hutana. “Haleluya..”ninna so hodana on. Hape ala ni las ni roha na do nian di dalan i gabe sai marendei ibana “Puji Tuhan…. Puji Tuhan….Puji Tuhan..” torus mardalan hodana on. Ehh.. alai dang sadar ibana na adong dijolona lombang, gabe songgot ma rohana mardongan panik, sai digorai ibana gogo soaran, “eh…eh..eh berhenti…..so jo…stop….stop…. nga pas di bibir ni lombang i, tong sai mardalan hoda on. Na untung intor sadar ibana, Oh…tahe, kodena: “Haleluya” intor so ma antong hoda on, alai nunga mattak tarontok ibana, bohi na pe nunga mamontar huhut keringat dingin.
Minggu on digoari minggu Letare na marlapatan marlas ni roha ma hamu (bersukacitalah senantiasa). Minggu Laetare berlangsung tepat 21 ari andorang Minggu Paskah, antara 1 Maret dan 4 April, di mana kejadian pada bulan April dianggap tidak biasa. Parpudi sahali Minggu Laetare dipatupa di bulan April ima 3 April 2011.

Pdt. Saidon Ambarita, STh

EPISTEL MINGGU, 12 MARET 2023 – MINGGU OKULI
JAMITA MINGGU INVOKAVIT – DEBATA MUAL NINASA ASIROHA

Bagikan Postingan ini: