JAMITA MINGGU 22 MEI 2022 – YAKOBUS 5:13-18

JAMITA MINGGU, 22 MEI 2022 - HUASO NI TANGIANG NI HALAK NA BONAR

Jamita Minggu Rogate 22 Mei 2022
MINGGU ROGATE
MINGGU, 22 MEI 2022
HUASO NI TANGIANG NI HALAK NA BONAR
Jakobus 5:13-18

PATUJOLO

Bukku Jakobus on ditongos tu halak Kristen Jahudi na adong di pangarantoan (diaspora). Bukku on marisihon angka poda taringot tu angka aha ma na boi sibahenon di na mangadopi angka ragam ni hamaolon. Jala disurathon do muse di bukku on taringot tu togutogu tu huria i asa haruar sian pangantusion na sala tu ngolu na sintong. Isarana pangantusion taringot tu haporseaon na so dipatuduhon marhite pangulaon. Asing ni i disurathon do muse di bagasan bukku on taringot tu pangajarion di tangiang. Dipaingot di bukku on mansai arga jala margogo do tangiang i di bagasan ngolunta. Dihaporseai angka halak Kristen do ia na manurathon bukku on i ma si Jakobus, umbahen i do dibahen goar ni bukku on Jakobus. Disurathon ibana ma bukku on hirahira taon 80-90 Masehi.

Goar ni minggunta sadari on, i ma “Minggu Rogate” lapatanna “tangiang”. Boi do talapati tangiang on songon sada pangkataion ni haporseaonta tu Debata sian nasa roha. Doshon hosa ni tondi do tangiang i, mansai arga jala margogo situtu laho mangurupi hita. Tema ni Jamita Minggu 22 Mei 2022 sadari on i ma, “Huaso ni Tangiang”. Tema ni Jamita Minggu 22 Mei 2022 on boi do tong didok “gogo ni tangiang”. I do na naeng diondolhon di jamita on, gabe sipaingot, taringot tu gogo ni tangiang di ngolu ni halak siihuthon Kristus.

BACA JUGA BAHAN EPISTEL MINGGU ROGATE – MINGGU, 22 MEI 2022

HATORANGAN

Molo di ngolu ni halak Kristen dihaporseai do, tangiang, i ma gogo sian saluhut hagogoon na adong. Ala tahaporseai do Debata na gumogo jala na boi patupahon angka aha na ringkot di bagasan parngoluonta. Jala marhite tangiang do hita mangido tu Debata laho patupahon angka aha na ringkot di bagas ngolunta huhut mandok mauliate di saluhut pambahenanNa di hita. Domu tu si ringkot do tapeop hatorangan na di toru on taringot tu tangiang.

Rumingkot do martangiang sian angka ulaonta.

Diantusi si Jakobus do ulaon na parjolo siulahononhon di angka na marsahit, i ma tangiang. Alai jotjot do masa di hita, molo adong na marsahit pintor parjolo do hita mangalehon tambar, dung i pe asa tatangiangkon. Hape adong do na gumogo jala jumago sian i, i ma tangiang. Ndang na naeng mandok ndang ringkot mambahen angka dalan laho manambari. Alai ingkon tahaporseai do di bagasan ngolunta gumogo do huaso ni Tuhan i sian sude dalan na tapatupa laho manambari angka sahit. I do na naeng dipasahat tu hita marhite Hata ni Debata di tingki on. Molo adong na marsahit, masa hamaolon dohot sitaonon, ingkon jumolo do hita martangiang pasahathon angka sahit nang parsorionta tu Debata. Sian na so panagamanta, sasintongna jotjot do maimaima Tuhan i di tangiangta andorang so taubati sahitta, andorang so taulahon dalan laho patureture angka parsoalanta dohot angka na asing.

Di taon 1988 adong ma sahalak Kardiolog (sada bidang pangantusion taringot tu dalan panambarion sahit jantung dohot pembuluh darah) na margoar Dr. Randolph C. Byrd, MD. Disagi ibana ma 393 halak na marsahit jantung di San Fransisco General Hospital Medical Center tu dua horong. Na parjolo, i ma angka halak na marsahit na sai ditangiangkon angka halak kristen na adong di luat i. Na paduahon i ma angka halak na marsahit na so ditangiangkon. Dapot ni ibana ma, gumodang do angka halak na ditangiangkon na gabe malum. Otik do dipangke di nasida angka anti biotik nang angka tambar na mangorui bakteri. Marhite penelitian ni dokter i boi dohonon sai na margogo situtu do tangiang ni angka na porsea di Jesus jala partigor. Tangiang i gabe dalan tu hamamalum ni sahit. Jala ingkon i do siulahononhon molo jumpang parsahiton, dung i pe asa dipatupa panambarion.

Tangiang i do paluahon na marsahit, gabe boi hehe. Alai ndada holan hamamalum ni na marsahit i, umbalga sian i dope gabe disesa do dosana molo tung adong diulahon. Ndang pintor dijamin si Jakobus hamamalum ni sahit i, alai dijamin ibana na ingkon do malua. Molo marpardomuan do sahit i tu dosa, marhite tangiang disesa do dosa nang pe ndang tolap gogo ni na marsahit i manghatahonsa. Marhite tangiang ni angka sintua na manangiangkon na marsahit i gabe disesa  ma  dosana.  Ala ni  i ringkot  do  marsitopotan  dosa  di bagasan  tangiang  (bandingkon Tangiang Ale Amanami).

Tapature ma dirinta asa margogo tangiangta.

Margogo dohot marhasil sada do i. Ala ndang mungkin marhasil tangiang i molo ndang margogo. Alai nang pe songon i, na dua hata on tong do ndang dos lapatanna. Molo hata “margogo” patuduhon tangiang i boi do patupahon angka habalgaon. Molo hata “marhasil” patuduhon tangiang i na dioloi Debata. Dipatuduhon tu hita gogo ni tangiang i dohot hasautanna marhite si Elia dohot tangiangna. Margogo jala marhasil do tangiang ni si Elia, marhite tangiang boi do so udan tolu taon onom bulan lelengna (ayat 17), boi do muse ro udan di na diulahi ibana martangiang (ayat 18; 1 Raja-raja 18:42-45), boi do muse ro api sian langit (ida 1 Raja-raja 18:36-38) jala dipangolu ibana anak ni sahalak ina na mabalu di Sarpat (ida 1 Raja-raja 17:17-24).

Boasa boi margogo jala marhasil tangiang ni si Elia? Tangkas do taboto molo si Elia i ma sahalak na bonar jala naposo ni Debata. Songon dia do huroha hadirion ni halak na bonar na margogo jala marhasil tangiangna? Tangkas do taboto sai na rade do Debata laho patupahon aha na ringkot di hita angka na porsea di Ibana. Jala andorang so tapangido pe nunga diboto Debata sasingtongna angka aha ma na naeng tapangido tu Ibana. Alai molo taida di bagasan pargoluonta, jotjot do tangiangta ndang maralus. Nang pe tahilala nunga tingkos na tapangido jala ringkot hian i di hita. Dibahen i gabe marsak jala gale tahilala jala gabe gale hita martangiang. Boasa boi songon i? Holan sada do alusna, ala ndang jolma na bonar hita di adopanNa.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Marhite Jamita Minggu 22 Mei 2022 sadari on, songon dia do asa margogo jala marhasil tangiangta di adopan ni Debata? Ingkon adong do di hita angka parange si songon on:

Halak partigor (ayat 16b)

Halak na tigor i ma halak naung porsea di Tuhan Jesus. Sasintongna ndang adong hita na tigor sian hadirionta, alai dipatigor Debata hita asa mangolu di bagasan habadiaon, ndang di bagasan dosa be. Dosa i do mangambati tangiangta tu Debata. Molo ndang ditangihon Debata tangiangta, tasulingkit ma jolo haporseaon nang habadiaonta, atik na hurang do hita di si. Gogo ni tangiang ndada sian na marhite hatahatana, hinadeak ni angka hata na dipandok di tangiang i. Gogo ni tangiang i, di hadirion ni si partangiang i do. Godang do halak na marpingkiran molo tangiang na jago i ma molo malo mangkatahonsa, marhite hata na uli jala nunur huhut tabo begeon. Denggan do uli angka hata ni tangiangta. Alai taingot ma ndada di hinauli ni angka hata ni tangiangta i gogo ni tangiang. Adong do halak dung sidung martangiang disungkun donganna “Boha, jago do dibege ho tangiangki?” ninna. Dirajumi ibana paboa hajagoon ni tangiang, molo tabo halak mambege angka hata ni tangiangna i. Ringkot do antusanta, tarlumobi ma di angka dongan na maol suruon martangiang, molo hagogoon ni tangiang i ndang di hatahatana alai di hadirionta do, halak partigor do hita manang ndang.

Burju martangiang (ayat 17-18)

Adong  do  istilah  di  halak  Ibrani  na  mandok, “martangiang di bagasan tangiang,” lapatanna tangiang na so marnamontok, na jugul huhut na serius, ndang marmeammeam. Molo martangiang hita, serius do hita di si manang marmeameam. Molo martangiang hita ingkon do burju, serius, molo dialusi Debata tangiangta i las roha. Alai molo ndang dialusi Debata dope ndang pola pintor mandele hita di si. Tahaburjuhon ma martangiang.

Martangiang di bagasan toruk ni roha.

Molo martangiang hita, ingkon ma nian di bagasan toruk ni roha. Ndang songon halak Parise na martangiang di bagasan ginjang ni roha, na mangetong dirina jumago sian na asing. Taida ma sahalak sijalo beo na martangiang di bagasan toruk ni roha. Dietong ibana do dirina ndang talup di adopan ni Debata (ida Lukas 18:9-14). Molo pe jolma na mora hita, parpangkat, beteng jala jago molo sian parnidaan ni jolma, alai molo ro hita martangiang tu Debata ingkon tandaonta do dirinta. Halak na ramun do hita jala na so adong laho sipangasohononhon di adopan ni Debata. Molo pe Naposo ni Tuhan i hita, manang boha pe keadaanta dohot statusta, molo martangiang hita tu Debata ingkon do di bagasan toruk ni roha. Songon Pandohan ni halak Batak na mandok: ”Di toru tangan mangido.” Ala ni i molo ro hita tu adopan ni Debata ingkon do di bagasan toruk ni roha.

Martangiang di bagasan haporseaon na so ganggu tu Debata.

Di bagasan haporseaon na so ganggu do si Elia martangiang, umbahen i do diparo Debata udan. Dalan laho patangkashon naung dipamasa Debata pangidoan na i pola do sampe pitu hali disuru si Elia naposona laho marnida  tandatanda manang naung ro udan i. Ndang ganggu roha ni si Elia. Terbukti do dung papituhalihon diulahi naposona i laho marnida, diida ma sada ombun mardongan habahaba, gabe ro ma udan tipotipo. Naeng ma hita songon si Elia di na martangiang hita, di bagasan haporseaon hita martangiang, unang ganggu rohanta, ai ganggu ni roha i tudos do i tu galumbang ni laut na pinahuturhutur jala na pinalindaklindak ni alogo. Molo ganggu do roha ni jolma i di na mangido ibana di bagasan tangiang unang ma diparbaga rohana na ingkon jaloonna agia aha sian Tuhan i. Jesus pe tangkas do dipaingot angka siseanNa asa porsea jala unang ganggu rohanasida di angka pangidoannasida tu Debata (ida Mateus 21:21-22). Molo naeng margogo tangiangta, tatiru ma hadirion ni si Elia di na martangiang hita tu Tuhan i. Amen.

Penulis:
Departemen Marturia HKI

Penyunting:
Timothy P. Saragi

BAHAN JAMITA INI JUGA DAPAT DIUNDUH DENGAN MENG-KLIK TULISAN DI BAWAH INI
JAMITA MINGGU 22 MEI 2022 – MINGGU ROGATE

Bagikan Postingan ini:

About Timothy Saragi

Staf Biro Infokom HKI

View all posts by Timothy Saragi →