Lukas 18:9-14, JAMITA MINGGU XXII DUNG TRINITATIS, 23 OKTOBER 2016

JAMITA MINGGU XXII DUNG TRINITATIS, 23 OKTOBER 2016

NATS : Lukas 18:9-14

 

  1. Opat macam do ragam ni pangalaho parugamaon ni angka jolma mulai sian na jolo sahat tu tingkion. Parjolo: sabagian angka jolma paragama holan mangharonsothon ngolu partondion, parugamaon, partangiangon, ndang parduli di ngolu pardagingon, partuturon, paradaton dohot di parartaon. Paduahon: sabagian nari paragama na munafik, idaon songon na manghaporluhon ngolu partondion di jolo ni sihatoropan, hape kenyataanna holan topengna do paragamaon i, manabunihon angka hajahatonna. Songon i do halak parise, na manghilala dirina badia, hape ramun. Patoluhon: angka jolma na so parduli di ngolu partondion, na sai holan mamingkiri dohot mangharonsothon mangalului hepeng, arta, dohot angka haportibion, so pola parduli di ngolu parugamaon. Sipata rela mangorbankan angka jolma na asing, asal ma sahat ibana tu na tinuju ni rohana. Paopathon: manarihon huhut mangharingkothon ngolu partondion dohot pardagingon secara seimbang. Diradoti ngolu partondion, huhut disarihon ngolu pardagingon. Masuk tu horong dia ma hamu?
  2. Mayoritas halak Jahudi di tingki i masuk tu horong na paduahon, i ma angka na munafik, na idaon songon na badia. Di jolo ni halak tangkas do diulahon patik i, hape di sihabunian parjahat do ibana, i ma angka halak parise. Sebagian nasida masuk tu horong patoluhon, na so parduli di ngolu partondion, alai holan mangharingkothon arta portibion. Targolong tu si ma halak Sijalobeo i. Diparrohahon Jesus do gaya hidup parugamaon ni halak Jahudi na marragam i. Ala ni i do umbahen dihatahon Jesus umpama on, taringot tu partangiangon ni halak Parise dohot Sijalobeo na adong di turpuk on. Ndang langsung Jesus maminsang manegor angka hasalaan i, alai jumolo do dibahen Jesus penyadaran, i ma pangajarion marhite umpama, jamita, tanda halongangan, asa sadar sude na umbegesa taringot tu angka penyimpangan na sala di tingki i. songon dia do gaya hidup parugamaon ni halak Kristen ruas ni HKI di tingki on? Masuk tu horong dia do hita? Songon dia do tabahen mangajari dohot menyadarkan angka donganta? Paminsangon dohot tegoran somalna ndang manghorhon hamubaon ni roha. Alai penyadaran, panogunoguon marhite tiruan na denggan, i do manghorhon tu hamubaon ni roha.
  3. Nunga somal halak Parise manganggap dirina sittong. Nansida ma na sai mangharonsothon mangulahon patik sabbat, partangiangon dogot sude angka patik na asing. Nasida ma na manghapadothon martangiang tu Debata, hape ndang holong roha nasida di donganna jolma. Somal do nasida songon pengawas mamatamatai angka jolma na torop, atik na di ulahon do patik, alai ndang perduli nasida di angka penderitaan ni halak na asing. Nasida ma na di anggap masyarakat na unggul jala istimewa di parugamaon, hape apala nasida ma tinegor ni Jesus marhite umpama on, ala umporlu do di nasida patik sian jolma. Sebalikna halak sijalobeo i, dianggap halak na ramun, na lea, pardosa na sumalim, hape apala i ma na niampin ni Jesus di umpama on mandok sumintong do partangiangon ni i.
  4. Somal do di halak Jahudi martangiang tu bagas joro di pukul sia manogot dohot pukul tolu botari. Di tingki i ma ro halak parise dohot sijalobeo i. Nian dang apala holan nasida na dua na ro di tingki i, alai nadua i ma na dapot sorotan sian Jesus. Ia halak Parise i, dina martangiang Ibana, pintor laho do ibana tu jolo ni langgatan, huhut jongjong, dipaherbang ma tanganna tu ginjang, di adophon bohina dompak langgatan, dohot simalolongna buka, huhut mandok tangiangna songon na tarsurat di ayat 11-12 mandok: “mauliate ma di Ho ale Debata, ala so dos ahu dohot halak na leban, angka panamun, pargeduk, pangalangkup manang songon sijalo beo an…” Alai anggo halak sijalobeo i, mandao do ibana sian langgatan i, unduk ma ibana, huhut pimpit simalolongna mandok tangiangna: “Asi ma roham Debata mida ahu pardosa on”. Ndang adong pangidoan dohot pandohanna so lain sian mangido asi ni roha ni Debata.
  5. Molo tapamanat isi ni tangiang na dua i, adong parasingan na tandi di metode dohot isi ni partangiangon nasida na dua, i ma: 1) Parise i mangasahon huhut manghaginjanghon hatigoranna sandiri, merasa diri sumintong sian halak na asing. Hape sijalobeo i manghilala hahuranganna sandiri huhut mangido asi ni roha ni Debata. 2) Marrumang laporan do tangiang ni Parise i paboa na marpuaso ibana dua hali saminggu, dohot paboahon sude angka na niulana na asing di bagasan haginjangon ni roha. Hape anggo sijalobeo i manghilala ndang adong sipangasahonna sian dirina, holan asi ni roha ni Debata do na pinangasahonna. Ndang patut jolma manghaginjanghon na niulana, ala ni i do didok Jesus, sumintong do tangiang ni Sijalo beo i.

Anggo di halak Jahudi, halak na lea do Sijalobeo , ala: 1) Dianggap penghianat  bangsa do nasida, ala olo gabe alat ni Pamarenta Romawi na menjajah halak Yahudi, gabe patugas pajak. 2) Dianggap do sijalobeo i sionsop mudar, ala lomo nasida mambahen arga ni beo ni sude barang dagangan ni sude halak. Ala ni i digoari do halak sijalobeo “pardosa na sumalim” (Lukas 19-7). Mangihuthon  anggapan ni halak Jahudi, ndang pantas sijalobeo i masuk tu bagas joro na badia i. Diboto sijalobeo i do na songon i anggapan ni masyarakat tu ibana. Ala ni i, di tingki masuk ibana tu bagas joro i, dilului ibana ma inganan na holip, na dao sian langgatan, di si ma ibana martangiang tu Debata di bagasan serep ni roha.

  1. Songon partangiangon ni halak Jahudi i, songon i do partangiangon ni halak parugamo silom ganup ari, di tingki dohot jom naung tinontuhon, huhut marhite cara naung di aturhon. Alai anggo partangiangon i halak Kristen maniru partangiangon ni sijalobeo i do, jumolo mananda dosa dohot lomo ni roha ni Debata. Unduk simajujung, tutup mata, lompit tangan, asa hibul pikiran dohot roha. Halak Parise somal do martangiang di topi dalan, di tonga ni onan, asa di ida halak. Alai anggo partangiangon ni halak Kristen, di inganan na holip (Mateus 6:5-6). I ma partangiangon na formal. Asing ni na formal, na martangiang do hita di ganup tingki, di tingki mangula, mardalan, dohot na asing. Nang pe so apala sempurna rumusan ni tangiang i, dijalo Debata do i. Ala ni i ndang patut sireheanta, molo adong halak na martangiang di tingki partangiangan , molo so lengkap tangiangna, manang molo sungkot didok. Alai ganup ma martangiang di bagasan tondi dohot haporseaon, tangiang na sittong do i, jala sahat dijalo Debata. Ndang apala rumusan ni tangiang i na umporlu, alai motivasi dohot tulus ni roha do. Nang pe so tangkas tahatahon hata ni tangiang i marhite pamangan, nangpe sungkot manang sala mandok, dipasingkop Tondi ni Debata do tangiangta i, molo tahatahon i dibagasan tondi dohot roha na tulus (Rom 8:26)
  2. Sada revolusi perobahan do na tinuju ni Jesus marhite umpama on. Ndang jadi adong jolma na manghaginjanghon na niulana di jolo ni Debata. Ndang sumintong tangiang ni Parise ala petugas agama ibana, sian halak na so petugas agama. Revolusi perubobahan pemahaman do umpama i, asa muba pemahaman ni situan na torop taringot tu anggapan na mandok holan pemimpin agama do na patut martangiang. Nang di ruas ni HKI, godang do na merasa dirina ndang talup martangiang, ala didok rohana holan angka partohonan do na talup martangiang. Jotjot do ruas ni hurianta bangkol martangiang ala di dok rohana ndang dijalo Debata tangiangna manang ala hurang malo ibana mangatur redaksi ni tangiang. Hape ndada hatahata ni tangiang i na umporlu di Debata , alai roha na bulus di bagasan tondi na ias manghalungunhon panghataion tu Debata. Jumolo do roha ni jolma i di ida Debata, dohot pangonjar ni roha (motivasi) martangiang, ipe asa isi ni tangiang i, jala marpanghorhon, ai ala ni I do umbahen didok: “na margogo situtu do tangiang ni angka partigor, molo dihaburjuhon” (Jakobus 5:16).
  3. Molo dioloi Debata angka na tatangianghon, ndang patut dohononta: ”Ala ni tangianghu do i”, ai ndang ala ni tangiangta umbahen na dipasaut Debata na itapangido i, alai ala ni asi dohot holong ni roha ni Debata do. Kesombongan rohani do molo adong na mandok, “Ala ni tangianghu”, manang “Ala ni tangiang ni pandita nami”, alai ndang ala ni tangiang ni manang ise, alai ala ni Debata do. Sebalikna, molo dang saut na itapangido, ndang patut dohononta na so ditangihon Debata tangiangta. Manang ndang jadi hita manudu na so dijalo Debata tangiang ni sasahalak, ai lehonon ni Debata do na itapangido hombar tu lomo ni rohaNa. Na marguna jala na margogo do tangiangta i pasahathon pangidoanta tu Debata, alai ndada tangiangta i pasauthon pangidoanta, Debata do. Sarupa songon si jalo beo i, songon i do hita di jolo ni Debata, ndang adong si pangasahononta. Ndang adong manang dia dipangido di jalo beo i sian Debata, so lain sian asi ni roha.
  4. Porlu do ingkon manat halak Kristen di dirina sandiri, sotung marginjang ni roha mangasahon hapadoton martangiang songon halak Parise. Sotung adong sian hita naeng mamaksahon lomona marhite tangiang, ai ndang adong jolma na boi mamaksa Debata. Ndang tarsirang tangiang sian pangulaon, panghirimon, haporseaon, pangalaho dohot pangulaonta sandiri do na manontuhon hasasaut ni pangidoanta, dung jolo dapotan asi ni roha hita sian Debata. Ala ni i naeng lam serep rohanta mangido hasasaut lomo ni roha ni Debata dibagasan ngolunta. Amen.

Oleh : Pdt. Jansen Simanjuntak, MTh, MM

Bagikan Postingan ini: