Epistel Minggu Reminiscere
Minggu, 13 Maret 2022
“Marpangunsandean Tu Tahi Ni Debata”
Pilippi 3:17-21
“Rap sitiru ahu ma hamu, ale angka dongan; jala pamanat hamu ma angka na marparange songon hami, sitiruonmuna! 18. Ai songon naung jotjot hudok tu hamu, jala anggo nuaeng mardongan ilu do hudok: Torop do marpangalaho, gabe musu ni silang ni Kristus. 19. Hamagoan do ujungnasida, butuhanasida do dipardebata, sihailahononna dihasangaphon, angka na di tano on diparrohahon. 20. Ai di banua ginjang do sambulonta; sian i do tapaimaima Sipangolu hita, Tuhan Jesus Kristus i. 21. Paubaonna do dagingta na lea on, gabe doshon dagingna na sangap i, hombar tu hagogoonna i, ai tarpatunduksa do saluhutna tu Ibana.
Molo adong sungkun-sungkun tu hita: “Dia do tanda sasalak i na jonok tu Debata?”, aha do alusta? Sungkun-sungkun na sangat dangkal alai tung mansai marimpola. Molo disimpulhon na jonok tu Debata tontu na marlapatan do i na porsea jala unduk satia mangulahon lomo ni roha ni Debata. Molo dung lomo roha ni sasahalak tu sada barang manang materi manang dongan, pasti do haholonganna jala paulionna. Ganup jolma ingkon paandaronna do roha nang pingkiranna jonok tu idola na i. Paling tidak berusaha do ibana mangalului dalan manang mediator asa boi jonok tu haholonganna i. Songon halak Kristen hita haholonganta do Jesus, jala dipaingot marhite tiruan naung niulahon ni Apostel Paulus mamelehon diri tu Jesus. Tontu nunga berbeda hadirion ni apostel Paulus dung ditangkup Jesus ibana gabe apostel sian na so mananda hian gabe mananda, sian hatoban ni daging, dosa dohot patik, nuaeng nunga naposo na marhaluaon. Asa gabe naposo na marhaluaon, malua sian hatoban ni dosa dohot patik ingkon barani do ibana mamelehon hadirionna na jolo ungkap di daging marpangalaho, ujungna gabe musu ni silang ni Kristus.
Hirim do roha ni Apostel Paulus mamparbue angka podana on songon na somal di hagiothon ibana anggiat lam dasip panandaion ni angka siihuthon Kristus taringot Jesus Sipalua i. Mangihuthon Kristus nda ingkon andapma nian ditanda Jesus naung mamelehon diri gabe haluaon ni naporsea. Tangkas do diboto apostel i, angka na mangihuthon Jesus holan sian bilangan ni daging, alai dang dope sahat tu roha nang haporseaon. Ujungna jotjot gabe batu sandungan ibana di sangkap haluaon na binasabasahon ni Tuhan i.
Di sada tingki, rap manghatahatai ma dua halak naposo bulung termasuk remaja labil dope nasida nadua. Hape baru masintandaan dope nasida nadua. Disungkun sahalak ma donganna: “Ai halak Kristen do hamu?”ninna. Dialusi dongan na i mandok: “bah Kristen do da, ai bapakku pe Kristen do, ai sering do bapa dohot oma marminggu di Gareja A”. Oh, ido ate. Jadi menurutmu bosmu, Kristen do huroa? Dialusi ma: “Menuruthu Kristen, alana sian ari Senen sahat tu ari Sabtu ganup manogot ingkon jolo martangiang do ibana andorang so borhat karejo. Hami pe sakeluarga hampir tiap manogot do hami kebaktian saat teduh. Apalagi molo nga dapot ari Minggu, mulai sian metmet ingkon marjas, mardasi do bapakku laho tu gareja. Ingkon dibonceng do omakku laho tu gareja, romantis do”. Antong omakmu (bilang ibu) tong do Kristen? Denggan do dialusi ibana donganna i: “mungkin, alana oma pe na ringgasan marguru ende tu gareja, angota koor, alana na huboto sian naposo ninna omakku tong do sahat tu saonari guru singkola minggu. Apalagi nuaeng na sibukan omakku laho tu arisan, kegiatan diakonia ni gareja”. Kristen do ra angka itom dohot abang dohot adekmu ate?. Dialusi: “anggo i nga pasti antong Kristen, lagian dang pas antong molo natorasna Kristen hape gellengna daong. Kan sala do i. Ai halak i pe na ringgasan marminggu, botoma abangku do ketua ni naposo bulung di gareja, kakakku do bagian kerohanian di kampusna dohot di pemuda gareja”. Disungkun donganna i ma ibana muse: Tabo na i ho ate, burju-burju do hamu sude marminggu, alai tahe hea do ditogihon nasida ho marminggu? Hea do ditogihon nasida ho lao tu gareja martangiang, mamuji Tuhan mamelehon diri? So antong satongkin ibana huhut di rimangi alusna tu sungkun-sungkun i: “Dang hea bah, ai sibuk be do nasida di kegiatan na masing-masing, haru di jabu pe nasida sibuk tu hape na be do, beha ma carana peduli tu ahu”. Hea do muruk manang marbadai abangmu, tu bapa, manang bapa tu oma? Bah hea. Bah bahkan gogo gogo suarana, masilobongan, sampe ponggol sapu, bohi ni oma pe bongkak. Didok donganna i ma tu ibana: “Molo songon i, sarupa do hape hita ate, sarupa do lungun ni rohanta, songon i nang panghirimonta. Antong beta asa tabahen kesibukanta masing-masing mangalului hepeng ma hita. Talului dalan unang sai gok pingkiranta, di huta an adong sigaret begu, asa plong jo. Barangkali adong rezeki di terminal an, mangarampok, mancopet ma hita, bea ma asa boi hita tenang jala boi bertahan hidup. …..
Angka dongan na hinaholongan di bagasan Jesus Kristus, halak Kristen dang boi disimpulhon sian paheanna, ringgasna marminggu, markoor, manang martangiang. Dang tu aha i saluhutna warna ni kulit manang daging i. Si soada do i luhut molo ihut tiruan dohot ulaon na denggan. Ditogihon apostel i do hita luhut ruas asa tarohahon sintong tiruan na denggan i. Ngolu ni apostel i dalan sitindangi ni Jesus pataridahon/ mentransfer pambahenan ni ngoluna na denggan tu humaliang. Dipatuduhon ibana do pengaruhna naung muba gabe siihuthon jala siula ulaon ni Tuhan na nyata di ganup ulaon dohot humaliangna. Ngolu na jolo marpangalaho gabe musu ni Kristus. Adong do tolu hataridaan ni jolma na marpangalaho musu ni Debata, ima:
Parjolo, Dang tenang ngoluna, ai hamagoan do ujungna. Musu ni silang Kristus do molo sai didok naposo ni Debata hape dang diula pansuruon ni Debata. Hinorhon ni na so adong hahotanna di portibion sai dilului do dalan mangalui hundulan nang sangap, mangakku Kristen, sai ringgas maghatindanghon haporseaon, ringgas marminggu, manaruhon sosial sian huria nang punguan hape dipaurak barita nauli i dohot ragam cara na so gabe manghalalhon pingkiranna sandiri paula badia dohot ajaran sipaula na so sintong. Molo so dapotna na di rohana gabe munggil ma haporseaonna so adong ojahan. Taingot dope si Judas ate na marujung bunuh diri holan ala ni mamon. Dalam hal sisongon on nunga mansai ringkot reformasi jiwa ngolu ni halak siihuthon Kristus na holan sian warna luar, ganup halak na mandok porsea di pamangan nasida alai paurakhon barita nauli. Angka sisongon on ma na gabe batu sandungan di parbarita naulion. Ndang boi jaminon haporseaon ni sasahalak holan sian uli ni paheanna manang lambok ni soara nang lambok ni tangiangna.
Kedua, butuhanasida do dipardebata. Selagi di portibion jala mangolu jolma i tontu ringkot do materi. Perjuanghononna do luhut, pujipujionna, topaonna asalma dapot pangidoan ni na sanjongkal on. Ambisi di saluhut kemewahan, dohot hasangapon, menghalalkan semua cara demi terwujudnya impian duniawi. Pandohan “siubeon lambok dope i, alai molo dung “butuha” kasarna nama i, dicakup do i saluhut na margoar ambisi dohot nafsu. Somalna molo mangulahon badia do hira soada na hurang. Alai unang ma nian mammon i manang arta i na gabe suhatsuhat ni las ni roha. Ndang mungkin boi arta mambahen sonang roha, apalagi ma ala na mambahen siubeonna dipardebata. Toho, nunga lam semakin materialistis jala sangat konsumeris angka jolma na di tano on. Lam mauas di angka materi, barang branded, fasilitas na gabe tuanna, dietong tuk pasonanghon rohana. Penggunaan barang tanpa batas. Contohna, ndada holan jenis sipanganon, dohot do fasilitas, isarana hape android. Ai boi ma antong so masipanghulingan be suami isteri, natoras tu ianakhon holan ala ni hape on, hape tung so sadia jarak. Nunga dihirim roha ni jolma i ingkon pesawat na ma dalan dalanna, minimal mobil mewah, pahean, tas, sepatu dohot barang merk “bergengsi” ala ni argana. Unang ma nian portibion dohot hinagiotna na gabe ganaganaan di jolma i. Pola masiadu tu materi, ndang na mandok na so ringkot. Taingot ma na didok na di 1 Timoteus 6:9-10: “Ia angka na naeng gabe mamora, madabu do tubagasan pangunjunan dohot tu lan hahisapon haotoon, angka na mangago, na mangalonongkon jolma i tubagasan jea dohot hamagoan. Ai urat ni nasa hajahaton do roha na holongan di hepeng; i do disangkapi na deba, umbahen na lilu sian haporseaon i, gabe diaithon do godang na bernit tu dirina”.
Patoluhon, sihailahononna dihasangaphon, angka na di tano on diparrohahon. Demi sebuah hasangapon, demi arta dang maila be jolma i mardosa. Ndang sian portibion hita, Molo tung pe saonari gabe ruas ni portibion hita ala warga harajaon banua ginjang do hita jala na ro sian banua ginjang. Ajaran Paulus na sangat kontras mandok “nasida” dohot “hita”; “tanoon” dohot “banua ginjang.” Dungi, angka nasida seolaholah na gok las niroha ala sangap dohot nikmat portibi, hamagoan do ujungnasida, alai anggo hita di banua ginjang do sombulonta. Sian i do tapaimaima Sipangolu hita, Tuhan Jesus Kristus i. Dang sae disi. Paubaonna do dagingta na lea on, gabe doshon dagingna na sangap i, hombar tu hagogoonna i, ai tarpatunduksa do saluhutna tu Ibana. Jesus sandiri pe dipangot do: “Antong unang ma holsoan rohamuna, mandok: Aha ma panganonnami? Aha ma inumonnami? Aha ma parabitonnami? Angka sipelebegu do mangkaringkothon saluhutna sisongon i. Diboto Amamuna na di banua ginjang i do, naung ringkot angka i di hamu. Sai jumolo ma lului hamu harajaon ni Debata dohot hatigoranna, dung i tambahononna do sude angka ondeng tu hamuna! (Mateus 6:33).
Attar sude do ra hita hea mangadopi kegagalan, kekecewaan, hurangan, kesalahan di masa lalu alai yakin dang boi i mangambati hita asa maju berpikir bahwa di Jesus do olopolop nang haluaonta. Coba jo tarohahon latar belakang ni ngolu ni apostel Rasul Paulus (Filipi 3: 5-7). Sibunu jolma, silele angka na porsea ibana, godang dope hagaleon hagaleon fisikna alai dang i gabe alasan di si Paulus asa tulus parsiaduonna tu Jesus. Gariada lam diampehon ibana do ngoluna dompak pandang i jala marhite haporseaonna na jumpangan upa nauli ibana sian Jahowa marhite Jesus Kristus naung paubahon pamatang na na marlaok dosa na buruk gabe tu hasangapon di bagasan Kristus. Dietong ibana do dang sadia hamaolon i dibandinghon upa sijaloonna sian Tuhan i. Ima tiruan ni si Paulus. Nang hita pe ringkot ma tatiru tiruan ni si Paulus on na rela berkorban, mearsitaonon jala tarsilang asa malua angka pardosa i di Jesus, dohot mamuri diri tu mudar ni Jesus. Berjuang ma hita paubahon hadirionta angka na buruk menuju tu hamubaon na imbaru di bagasan Jesus. Fokus ni si Paulus ndada dirina sandiri, alai Jesus naung tarsilang i do. Ringkot do adong hamaolon taadopi tantangan dalan patauhon diri molo masa angka hamaolon muse boi ma manahan. Laptanna, mangihuthon Jesus, porsea ma unang holan di warna sian duru, dohot ma hataridaon ni roha, parbue na denggan. Molo pe ingkon taadopi angka hamaolon, na boi ro sian dirinta sandiri, orang-orang terdekat, lingkungan, angka sahit marganti soring so ra simpul mambahen hita naeng tinggang, asa gagal, manontong ma hita maniru Jesus. Molo tung pe adong silehonlehon tajamoti unang ma gabe tu haginjangon ni roha, gariada nian lam pajonokhon tu Debata ma hita sian saluhutna i, sotung ma intor hatop hita merasa puas. Paulus mandok: Onpe, hamu angka donganku na hinaholongan jala na hinasiholan, halasan ni rohangku jala tumpalhu; songon i ma marsihohot hamu di bagasan Tuhan i; hamu angka haholongan! Lam tapajonok ma tu Tuhan i na tuk mangalehon solusi di ganup pergumulanmu. Amen
Penulis:
Departemen Marturia HKI
Penyunting:
Yohanes Simatupang
