ROMA 10:8b-14

Na marhatopoton Tuhan Jesus dingoluna i do na malua (ayat 9-10)

Tangkas situtu dibereng siPaulus na hinirim ni halak Jahudi asa malua nasida sian dosa dohot panghuman ni Debata. Alai dijogal ni roha nasida nasai holan mamereng pambahenan nasida laos ido na mangambati nasida gabe malua. Nunga tangkas ibaritahon siPaulus barita las niroha na binoan ni Tuhan Jesus. Jala holan alani ido nasida  gabe boi dapotan haluaon molo olo mamparhatopoton Tuhan Jesus gabe sipangolu diibana. Jala manjangkon Tuhan Jesus gabe Anak  ni Debata, na sinuru ni Debata, na marharoroan sian Debata jala Ibana Tuhan sipalua. Songon pangoloionta ni Tuhan Debata Ama suang songoni ma tongtong pangolointa di Tuhan Jesus. Asa molo diangka halak na porsea dibagasan Tuhan Jesus gabe tu hatigoran ma dilului, jala las pamangana do mangkhatindangkon saluhut na. Ndada holan pandohan sambing alai bagas situtu dina mangkhangoluhon Tuhan Jesus na gabe sipalua dihita i ma Tuhan naung hehe sian hamatean holan alani saluhut jolma pardosa, jala dihaheheon na i ndang mate Ibana alai gabe Tuhan sipangolu saleleng ni leleng na. Haporseaon tu Tuhan Jesus gabe patubuhon hatigoran jala mandok mangkahatindangkon gabe dapotan haluaon. Holan alani haporseaon sambing gabe mananda hatigoran (bnd.1:17; 3:22). Jala ditingki na dihatindakon jolma i do gabe disesa saluhut dosana.

Malua do ganup na manjou goar ni Tuhan i (ayat 11-13)

Asa molo halak na porsea di Tuhan Jesus gabe appuna ni Tuhan Jesus ma i. Asa dang adong be na boi pailahon jala mambahen nasida gabe marlea. Dihaolon ni jolma mangihuthon Tuhan Jesus ido mambahen nasida gabe tongtong marlas ni roha. Jala ndang adong na boi manirang jolma i sian Tuhan Jesus. Asa ndada adong be jumpangan ni halak Kristen na diluat Rom hami halak Jahudi (Israel) na pinnilllit jala na mandok holan nasida maua hinorhon ni patik i, alai naeng ma ganup angka halak na porsea i mandok sada do Tuhan ni halak Jahudi dohot non Jahudi na mangalehon haluaon tu ganup jolma na mardosa.

 

Hahonaan/Refleksi

Jotjot hita maniru songon pamingkirion ni halak Farise,  tongtong marojahan patik dohot uhum, na diantusi dalan dohot hataridaan ni haluaon i. Ido umbahen torop halak mandok malua sian dosa molo tarulahonsa luhut patik i.

Pangantusion na hurang ampit i, mambahen hita mangundukhon jala mangulahon angka na maralo to roha ni Tuhan i. Gabe olo hita marojahan tu ajaran na asing, mamaksahon ajaran ni nasida ingkon gabe i ma habonaron tong naeng dapot hita dibagasan hata ni Debata dibuku na badia. Tapamanat saotik pingkiranta tu angka pandapot na mandok molo lam godang marsilehon-lehon Tuhan i pe lam godang mangalehon pasu-pasu na marlopit ganda muse jala gabe boi ma i dalanta mangelek Tuhan i asa malua hita sian dosanta. Denggan tutu do nian molo boi halak Krsiten marsilelhon-lehon alai ndang gabe daan ni jolma i laho mamaksa Tuhan i laho mangoloi pangidoanna. Ditingki sisaonari on ngetrend do nuaeng haak Kristen molo ni di tingki pesta natal patupahon na didiok na bhakti sosial na patupahon bingkisan natal/ manang kado paskah sesuai dohot perayaan tahun gerejawi. Mansai denggan situtu doi ala adong do roha laho marsiurupan didongan na susah alai ndang na gabe paksahonon dohot tu Tuhan i asa gabe boi hita marlomo-lomo ni ngolunta dihasianganon, ndang boi tuntutonta Tuhan asa dilehon dihita sude na tapangido hape ndang sian dalan na hita mangulahon i, Tuhan tidak bisa diajak kompromi oleh siapapun dan daam bentuk hal apa pun.

Jolma pardosa diibarathon ma songon dakdanak na mangido tu bapana asa dilehon diibana na pinagido ni rohana, hita jolma pardosa pe mangido tu Tuhan asa dapotan haluaon alai ndang ungkuranta na gabe sipangkaeonta alai haporseaon i do na boi paluahon hita. Tuhan Jesus Kristus Anak ni Debata naung tinongos ni amana asa gabe porsea hita diibana, on na mangalehon haluaon i di hita. Asa molo nunga adong haporseaon ni dibagasan Tuhan Jesus laho i do mangarahon manang patuduhon tu hita hatigoran. Ndang hatigoran i patubuhon haporseaon. Alani talup  diangka halak na sai holan mandok hatigoran alani pambahenna ndang disi dope ibana na gabe mangkhaporseai Tuhan Jesus.

Na mangashon gogo na mandok asa malua ibana laos ido na gabe hamagoan dihosana, alai na mangkangkon Tuhan Jesus Kristus gabe sipalua dingolu na imana gabe dapotan. Antong ndang adong be haak Kristen na boi mandok dirina lumobi sian angka halak na asing laos sian pambahenan manang sian  parsaoran dohot Tuhan i. Alai tangkas ma naeng berengonta ia haporseaon i ndang ditabunihon tarida do i sian ngolu na siagunp ari na mangkahtindangkon Tuhan Jesus Kristus.

 Pdt.Widya Fitriyanti Sinaga, S.Th

Bagikan Postingan ini: