1 Musa 15:1-6, JAMITA MINGGU XI DUNG TRINITATIS MINGGU, 7 AGUSTUS 2016

Thema: Debata Jahowa paluahon si Abraham sian ihot-ihot ni holso na so tubuan anak

P a t u j o l o

Bulan perayaan parningotan kemerdekaan ni bangsonta do di hita bulan Agustus on. Mansai balga do lapatan ni kemerdekaani di bagsonta, ai malua bangsonta sian ihot-ihot ni pengaruh, huaso dohot lomo ni bangso na manjaja hita. Somalna, ia bangso na terjajah dang boi mangula dohot mambahen na denggan na di rohana di ngoluna so holan mangulahon hagiot ni bangso na manjajah ibana. Hatoban manang kuli do bangso na terjajah diadopan ni penjajah. Hea do hubege cerita ni natuatua taringot tu pengalamana nasida di jaman penjajahan ni Nippon. Didok, nang pe satokkin do penjajahan ni Nippon i, ai dang gok 3 taon i di Tapanuli, alai mansai hansit do panghorhonna. Ikkon pasahaton do tu nasida satonga hasil ni naniula. Sude boras sipasahaton ikkon na bontar. Molo boras rara do boras niba, ikkon dudaon doi sampe bontar laho lehonon tu nasida. Asing nii, dang boi iba marpungupungu, dang boi dohot mangulahon lomo ni roha ianggo so ditolopi nasida. Hatoban do iba di huta dohot di tano niba, ninna.

Ala malua do bangsonta sian penjajahani di taon 1945 dung diparkuli bangso penjajah leleng ni 350 taon, jala marningot sude akka na so tama di jaman ni penjajahani, asa mansai rikkot do marningot kemerdekaani jala mangudutisa. Marragam do pangaradeon naung binahen ni pamarenta laho marningot kemerdekaani, dalan nasida doi manghalashon dohot mambahen panghirimon asa akka na lam tu dengganna sieahan ni bangsonta tu joloan ni ari. Alanii do asa akka anak sikkola pe dipaingot taringot tu kemerdekaani jala diparade nasida gabe akka generasi na merdeka, na membangun negerina sandiri. Sude do unsur-unsur ni masyarakat Indonesia dipaingot asa unang adong na olo gabe ula-ula manang dongan ni bangso penjajah di tonga ni masyarakatna manang di tongani bangsona sandiri. Akka na digoari teroris i pe boi do gabe ula-ula ni bangso naasing laho manegai negaranta, ai diajari do akka na olo dongan nasida laho manegai negarana sandiri. Asa sipadaoon do akka na songoni.

Dang holan di politik manang na marnegara masa penjajahan, alai dohot do nang di haporseaon. Hangoluanta na sintong ima hangoluan na mangantusi na tinoppa ni Debata do hita jala na pinaluaNa sandiri sian parhatobanan ni dosa marhite anakNa Jesus Kristus asa mangolu hita rap dohot Debata songon di tikki panoppaon na parjoloi. Malahan, ianggo hangoluan dohot haluaonta i nunga diparadei tu hita andorang so ojak dope hasiangan on. (jaha di Epesus 1, 4). Molo adong jolma manang huaso manang gogo nanaeng manarik hita siani dohot nanaeng manggugai hita disi, akka gogo dohot huaso ni penjajah doi ima huaso manang gogo na adong di awang-awang nanaeng mamparhatobanhon hita jala mamboan hita tu hamagoan.

Alai Debata na manoppa hajolmaon, tarpalua Ibana do akka na manghaporseai Ibana sian akka ihot-ihot ni ngolu na mangambati halalas ni roha dohot haporseaonna. I do na pinaandar ni Jamitanta sadarion, asa ta parhatopot tarpatupa Debata Jahowa do pangurupion tu akka na manghaporseai Ibana.

 

Sub Thema 1: Unang ho mabiar, upam mansai balga

Molo pikkiran, panghilalaan, roha, manang na rikkot di hita do tabahen mangantusi na binahen ni Debata, jotjot suhar doi di hita. Ala jotjot suhar, dungi tadok ma dang masuk akkal. Jotjot hita mangido manang martangiang mangido holan na rikkot di hita,hape dialusi Debata Jahowa mai marhite na mangalehon na rikkot di Ibana dohot na rikkot di hita. Jotjot dang tatanda manang dang taboto pangalusi ni Debata na songoni, ujungna tadok ma dang dialusi Debata hita.

Contoh: Adong sahalak dolidoli anak ni hurianta naung tamat Sarjana Ekonomi. Dung 4 bulan 5 bulan ibana tamat, sai digogo ibana dohot natorasna do martangiang asa dilehon Debata di ibana parkarejoan na tama laho mamakke parbinotoannai. Hape sataon 2 taon da ra dapot songon na pinarsinta nasida. Di tikki na nigoaran ibana menganggur, sai rade do ibana mangajari akka dolidoli dohot natoras di hutana dohot di huriana asa diboto nasida mangurus ekonomi keluarga, mangurus ekonomi jemaat dohot na asing. Pola do godang akka naposo di garejana na gabe tamba parbinotoan nasida mambahen program di naposo pahembang pandapotan ni lembaga naposo. Tontu mansai marguna mai di huria di huta nang di akka naposoi marsada-sada. Alai tutu, asa sukarela doi jala dang jabatan manang karejo na formal, dianggap doi dang karejo ala sai dibalanjoi natorasna ibana mangan. Jotjot alus ni Debata berdampak tu naumbidang, nang pe disarihon do marsasahalak.

Nunga dipabotohon Debata Jahowa tu si Abram (si Abram dope goarna tikkii dang dope Abraham) di tikki panjouonna bukkas sian huta ni amana paboa ibana dapotan pasupasu sian Debata. Didok Debata tu ibana: Hubahen pe ho gabe bangso na bolon, jala pasupasuonKu ma ho, jala pabalgaonKu goarmu, asa gabe pasupasu ho. Pasupasuonku akka na mamasumasu ho, pparhu jala toruanKu akka na mamurai ho, jala dapotan pasupasu marhitehite ho saluhut bangso di tanoon (1 Musa 12,2-3). Tontu takkas do taida jala taantusi pasupasu na tu si Abram on mansai balga di ibana jala berdampak tu sude bangso di tanoon. Dang holan di ibana alai tu sandok bangso. Dang holan particular (khusus marsasahalak) alai dohot do universal (tu sude). Tutu, marsasahalak do dipakke Debata Jahowa dalanna laho mangalehon tu na umbidang (umum), alai unang ma pinikkiran holan tu sahalak pasupasui unang adong na merasa egois, marginjang ni roha, manang hapunjunganna dietong na adaong di ibana.

Disarihon Debata do sude na tinoppaNa nang pe dipakke marsasahalak dalanNa manang parhiteanNa laho patupahoni. Dipatupa haluaon ni sandok manisia marhitehon sahalak ima Jesus Kristus. Hita pe marsadasada diparade Debata do asa marguna dohot tu halak naasing.

 

Sub Thema 2 : Dang adong pinopparhu dilehon ho

Sonari si Abram terbuka jala focus di jolo ni Debata. Boi do tutu masa sude nanidok ni Debata Jahowai bahenonNa tu portibion marhitehon sahalakna, alai dijoloani si Abram do patujolohon asa sude nanidok ni Debata berkelanjutan sahat tu generasi nanaeng ro. Dang adong pinopparhu dilehon ho. Udut ni nanidokna, dung mate ahu, siap ma sude, so, dang adong be. Dang dope marpikkir sian sudut paradaton, molo so adong anak dang marlanjut be silsilah. Si Abram mandok, na tubu di jabukku (anak ni hatobanku) nama tumean ahu.  Mangihuthon paretongan ni partikkian, hira-hira 25 taon do lelengna dung ruar si Abram sian Ur Kasdim asa ro bagabaga naeng tubuan anak si Sara di si Abram. Marumur 75 taon do ibana ruar jala marumur 65 taon si Sara. Dung pe marumur 99 taon si Abram jala 89 taon si Sara asa ro bagabaga tubuan anak. Dang dohonon be poso dope jolma tikkii marumur 89 taon, ai didok do: Nunga pola sarimatua be si Abraham dohot si Sarah, nunga pola montok si Sarah marningot hasomalan ni boruboru hian (Bd.18, 11). Asa leleng do jarak ni kepentingan Tuhan dohot kepentingan ni hajolmaon, nang pe tarpatupa Debata Jahowa do manggohi kepentingan ni jolma marsasahalak asa tong boi pakkeonNa manguduti sakkapNa tu hajolmaon.

Dialusi Debata Jahowa do holso-holso ni si Abram jala dipastihon sataon nari tubuan anak ma si Sara. Aha buktina?? Langit do saksi tu bagabaga ni Debata Jahowa. Tailihon ma dompak langiti, bilangi bintang molo habilangan ho akkai… songoni ma pinomparmu sogot. Bukti hasasaut ni bagabaga ni Jahowa sai dihubunghon doi tu benda langit, ala I do parbinotoan na tumimbo ujui. Taingot parroha sian Purba na umboto hatutubu ni Mesias marhite petunjuk bintang.

Dihaporseai si Abram do bagabagai. Talu do pikkiran, adat dohot hasomalanna dibahen bagabaga ni Debata Jahowa. Gabe hatigoranna doi dietong Jahowa. Dang pikkiranna dohot sude abat-abat tu hajolmaon be mempengaruhi ibana, alai bagabaga ni Debatai nama. Malua ma ibana sian akka holsoi ala naung dihaporseai bagabaga ni Debata Jahowa.

 

Siauhononhon sian Jamita on

Di Minggu Trinitatis on, dipatubegehon do hagogoon ni Debata Jahowa na so Hatudosani, alai laos mangihut do tusi asi ni rohaNa na godangi. Sian hagogoonNa, tarpatupa Ibana do luhut manang aha pe. Na so mungkin di jolma sude do mungkin di Ibana. Gari hasiangan on boi ditoppa holan marhite HataNa sambing. Laut rara boi dibola holan ala haoloon ni na mangoloi HataNa. Jamita Trinitatis manait rohanta manghaporseai hagogoon dahot asi ni rohaNai. Molo tapangasahon doi (hagogoon dohot asi ni rohaNai) di ngolunta, holso-holso dia pen a adong di hita dang maoli bolongkonnonta molo tutu hita tanpa ragu pasahathon tu Ibana. Ia holso-holso, masalah pribadi-pribadi doi. Gari masalah hasiangan on dang maoli di Ibana, lam beha ma masalah pribadi.

Holso-holso ni si Abram, holso-holso pribadi na marpardomuan tu keluarga, tu silsilah dohot generasi , dohot tu kelanjutan ni hajongjonganna di jolo ni Debata Jahowa. Ala dihatahon ibanai tu Debata, nang pe dang luput perhatian ni Debata siani, hape naung dirancang Debata do jalan sejarahi asa akka tindakan halongangan lehononna di akka na porsea. Manang dia pe holso-holsom, metmet manang balga, jumolo mma pasahat tu Ibana. Pasahat dohot tu pangisi ni jabum asa sisada pangidoan tu jolo ni Debata. Sude do gabe halongangan dalan pangurupionNa, alanii unang mansohot mangido, unang tertutup apalagi manjaga gengsi tu Ibana. Diboto do na taholsohon, alai andorang soi dope nunga diparade akkapangurupion.

Hatahon pangidoanmu dengan terbuka, jujur jala porsea, lehononNa do lobi sian na hinirimmu. Amen.

Pdt.Dr. H.R.Panjaitan

Bagikan Postingan ini: