EPISTEL MINGGU 3 APRIL 2022-JESAYA 43:16-21

EPISTEL MINGGU, 3 APRIL 2022 - MANGAUHON PANJOUON NI BANUA GINJANG

Epistel Minggu 3 April 2022
MINGGU JUDIKA
MINGGU, 3 APRIL 2022
“MANGAUHON PANJOUON NI BANUA GINJANG”
Jesaya 43: 16-21

PATUJOLO

Molo impola ni Jesaya 43 on ima, paboahon holong ni Debata na salelenglelengna tu bangsona. Na ingkon adong do haluaon tu bangsona naung leleng manaon hapariron di tano parhatobanan Babel. Naeng bukkaon ni Tuhan do dalan parasian tu bangso na naung leleng marhansit ala ni dosa nasida. Lehonon na ma ngolu naimbaru tu bangsoNa, dungi pujion nasida ma asi ni roha na i. Tung songon dia pe borat ni na masa tu nasida tingki i, marhuaso do Tuhan Debata laho paulihonsa. Umbehen i do dipanurirangi si Jesaya bangso i laho mengalehon apul-apul tu nasida asa unang mendele alai gabe marpanghirimon tu Debata na mangalehon haluaon tu nasida.

BACA JUGA BAHAN KHOTBAH MINGGU JUDIKA – MINGGU, 3 APRIL 2022

HATORANGAN

Dipatandahon Debata do dirina tu bangsona Israel ima paboahon habadiaan-Na, huaso-Na na manjadihon/manompa bangso Israel (ay 15), jala Ibana do na tuk paluahon nasida. Dibagasan pardalanan ni bangso Israel, nunga tung mansai patar dipatuduhon Debata diriNa tu nasida. Ditogu-togu do bangsoNa laho ruar sian tano Misir. Dibukka Debata do dalan di nasida sian tongatonga ni laut laho tariparon nasida asa malua sian tano Misir. Laos mate do musu nasida di tongatonga laut i. Marhite na marningot denggan basa ni Jahowa tu nasida, boima gabe sada sunggulsunggul di nasida paboa holong ni Debata na manontong jala hot tu nasida.

Dung i bahenon ni Debata ma sada na imbaru di tongatonga nasida, asa unang be sai dipaingot-ingot nasida na hansit na tinaon nasida ala angka dosana. Lapatanna, asa unang sai dirangrangi nasida angka parsorion nasida di Babel. Natama ma sirajumon nasida sude angka denggan basa ni Jahowa tu nasida nasailaon, jala marhite i ma, paboahon tu nasida na ingkon paluaon ni Debata do nasida di bagasan sangkapNa. Bahenon ni Tuhan ma sada imbaru, ima haluaon na umbalga sian haluaon nasida na sian Misir.

“Ida ma: Bahenonku ma na imbaru, nunga pola martumbur nuaeng; tung so tandaonmuna ma i? Songon on do tahe, bahenonku ma dalan di halongonan, angka batang aek di tano bangkalbangkal”. Marhite ayat on, dipatudu Debata gogo ni huasoNa di parngoluan ni bangsoNa. Dang adong na so tarpatupa Debata, ai boi do tuk pasiatonNa manang aha laho paluahon Israel bangsoNa i. Molo tung pe madabu nasida tu dosa mangalo Debata, alai tong do dang dihalupahon Debata nasida di tikki joujou nasida tu Debata.

Haluaon na naeng patupahon ni Debata tu nasida dang marhite haluaon sian parsorion ni daging nasida sambing, alai sahat do tu haluaon tu ganup bangso. Dalan na naeng bahenon ni Debata di halongonan ima na gabe sada dalan tu saluhut bangso. Angka batang aek na di bangkal-bangkal i pe, gabe dapotan sude na marhosa. Marhite i ma pujion ni saluhut bangso Padan Naimbaru na binahen ni Debata. Marhite bangsoNa i ma, na gabe pararathon hamuliaon ni Debata.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Godang do sangkap ni Debata di bagasan parngoluon on. Na pasauthononNa do sangkapNa, tung pe sai ganggu roha ni jolma i. Ia ayat on domu do tu halumbaan ni haroro ni Kristus tu portibi on laho masuk tu padan na imbaru. Ngolu naimbaru i dipatudu ndang holan tu bangso Jahudi, alai tu saluhut bangso gabe mananda asi ni roha ni Debata. Tung saluhut do di jou sian hagolapon asa masuk tu hatiuron.

Tema ni Epistel Minggu 3 April 2022 di hita i ma “Mangauhon Panjouon ni Banua Ginjang”. Apala di tingki on sian hata ni Tuhan di paingot do hita taringot tu asi dohot holong ni roha ni Debata, sian najolo, nuaeng sahat tu haduan ro di saleleng ni lelengna. Ibana do Debata na manontong di huasona di parngoluan on. Alai asa sahat hita tu asi dohot holong ni roha ni Debata i, ikkon taauhon do panjouonNa, asa taruli hita di asi ni rohaNa, lapatanna, asa Ibana raja na sun gogo i gabe haporusan ta. Adong pigapiga alasan sitiopon ta, umbahen na ingkon marhaporusan hita tu ibana.

  1. Sian zaman narobi sahat tu nuaeng on, boi do taida habonaran ni Debata Jahowa sian angka hata di buku nabadia i, dohot hapapatar ni angka halumbaan nasian buku nabadia i tu jaman nuaeng on.
  2. Sahat tu nuaeng dilean Debata di hita tingki gabe dongan sakarejo na laho mangaradoti portibi on.
  3. Sahat tu nuaeng sude jolma nasa na olo marhaporseaon tu Ibana gabe tinobusNa.
  4. Sahat tu nuaeng diparade hasesaon ni dosa tu ganup na olo manolsoli rohana.

Sian pigapiga alasan ima, boi hita marnida panjouon ni Debata tu hita, asa tapararat asi ni rohana i, na manontong sian narobi sahat tu nuaeng on. Di jou do hita laho mambaritahon holong ni roha ni Tuhan i, huasoNa, gogoNa, dohot angka halongangan napinatupaNa di bagasan ngolunta. Asa dohot hita mangarade laho patuduhon dohot pararathon holong ni Tuhan i.

Songon haroro ni Tuhan Jesus tu portibi on ndada asa dioloi halak Ibana, umbahen na ro; Ibana balik pangoloi jala mangalehon hosana bahen tobus ni torop jolma. Suang songon i do hita tarjou asa pangoloi pararathon hasangaponNa. Nungga di pasahat hosaNa jala durus mudarNa di dolok Golgota humonghop hita, nda tung tanggungjawab ta nama i laho pararat holong na i? asa sude taruli jamita i? Manghobasi laho di Tuhan ndang ingkon di Gereja. Sude ulaon na dibagasan parngoluan ta, naeng ma nian pasangap Debata asa gabe jamita na mangolu i di dongan ta jolma. Tu si ma hita di jou.

Manghobasi laho tu Debata, ima panjouon na arga situtu. Dijou Debata hita asa pajonok dirinta tu Ibana huhut manghobasi di Ibana. Boasa ikkon gabe maol hita mangoloi? Dijanjihon Debata laho mangaramoti hita di panghobasionta. Sada tua do boi mangoloi panjouon ni Debata. Tung ise ma hita, umbahen na dijou Debata hita laho tu panghobasionNa? Jolma pardosa do hita, alai dijou do hita sian asi ni rohaNa. Ta oloi ma panjouonNa asa taruli hita di hangoluan sogot naung pinaradeNa di Hita. Amen.

Penulis:
Departemen Marturia HKI

Penyunting:
Yohanes Simatupang

BAHAN EPISTEL INI JUGA DAPAT DIUNDUH DENGAN MENG-KLIK TULISAN DI BAWAH INI
EPISTEL MINGGU 3 APRIL 2022 – MINGGU JUDIKA

Bagikan Postingan ini:

About Yohanes Simatupang

Staff Biro Infokom

View all posts by Yohanes Simatupang →