JAMITA KAMIS PUTIH 14 APRIL 2022 – 1 KORINT 11:23–34

JAMITA KAMIS PUTIH, 14 APRIL 2022 - PARNINGOTAN DI PANGHOPHOPON NI KRISTUS

Jamita Kamis Putih 14 April 2022
KAMIS PUTIH
KAMIS, 14 APRIL 2022
PARNINGOTAN DI PANGHOPHOPON NI KRISTUS
1 Korint 11:23–34

PATUJOLO

Di borngin na parpudi andorang so tartangkup jala mate tarpajal Tuhan Jesus di hau silang, dipatupa do marulaon na badia rap dohot angka siseanNa. Tangkas do i tarsurat di buku Evangelium Mateus 26:26–29; Markus 14:22–25 dohot Lukas 22:15–20. Dipabotohon do di si, “dihindat Jesus ma roti, dipasupasu ma, diponggoli jala diparlehon ma tu angka siseanna, huhut ma didok: Jalo hamu ma, pangan hamu; Dagingku do on! Dung i dihindat ma panginuman, didok ma mauliate, dilehon ma tu nasida, huhut ma didok: Sude ma hamu manginum sian i! Ai MudarHu do on, mudar parpadanan i, na niusehon humongkop torop, bahen hasesaan ni dosa.”

Di turpuk Jamita Kamis Putih 14 April 2022 on tangkas do dipabotohon, ia parpadanan na badia manang ulaon na badia songon na pinatupa ni Tuhan Jesus uju i, rap dohot siseanNa, na ingkon do patupaon ni ganup siihuthon Jesus.

BACA JUGA BAHAN EPISTEL KAMIS PUTIH – KAMIS, 14 APRIL 2022

HATORANGAN
Ganup parsidohot di Parpadanan na Badia taruli do di haluaon i.

Di parpadanan na badia i, ia roti dohot anggur i ma singkat ni daging dohot mudar ni Kristus na nilehonNa humongkop jolma pardosa. Lapatanna, marhite na manganhon parpadanan i, ganup dosa diburi Tuhan Jesus. Marhite i do gabe taruli hita di haluaon i, haluaon sian gomgoman ni dosa. Gabe mardame hita dohot Ama i. Jala marhite i do hita partohap nang di hangoluan si salelengnilengna na pinaradeNa di surgo i.

Ganup parsidohot di Parpadanan na Badia mangoloi tona ni Tuhan Jesus (ayat 22)

Manorushon ulaon Parpadanan na Badia songon na pinatupa ni Tuhan Jesus uju i rap dohot siseanNa. Dipasahat Tuhan Jesus tu siseanNa asa dipatupa si songon i, bahen parningotan. Jala parataratahon taringot tu haradeon ni Tuhan Jesus patupahon hasesaan ni dosa. Di angka na ro di bagasan roha na magopu jala manolsoli dosana, huhut mangan dohot minum sian parpadanan na badia i. Dihalomohon Jesus do na mangoloi tona manang parentaNa mangulahon Parpadanan na Badia i.

Namangulahon Parpadanan na Badia, mamaritahon hamamate ni Tuhan Jesus do i, rasirasa ro Ibana (ayat 26)

Dipatangkas do muse di son, ia Parpadanan na Badia i, hamamate ni Tuhan Jesus do na binaritahonna di si. Hamamate ni Tuhan Jesus di hau silang i do dipangke Debata laho patupahon haluaon. Asa ndang sihailahonhon barita taringot tu hamamate ni Tuhan Jesus. Ai hamamate ni Tuhan Jesus i do puncak ni pengorbananNa laho manobus jolma pardosa. Jala tangkas do taboto, ndada na marujung di hamatean i Tuhan Jesus, hehe do Ibana manaluhon hamatean i, jala manaek tu banua ginjang. Na maimaima do hita di haroroNa laho mangalap na porsea i di haroroNa na padua halihon i.

Pangalaho na denggan manjalo Parpadanan na Badia (ayat 27–34).

Na marpardomuan tu na patupahon Parpadan na Badia di huria na di Korintus, tarbege do tu Apostel Paulus, na jotjot masa di huria i angka pangalaho na so patut di na patupahon Parpadanan na Badia. Isarana, na mangan bersama do nasida, alai masipangan sipanganonna be, angka parnampuna na godang, maradu marlobilobi, jala kesempatan pasombu tagas mangan dohot manginum siinumon di tingki perjamuan i. Alai na pogos holan marsaulihon na tarbahensa, bahkan male di tongatonga ni situasi ni jolma na marlobilobi. Dung i muse adong na masijolojoloani masipanganon, ndang sabar paima tingki asa rap masipanganon dohot angka pangalaho na so saling masiantusan jala ndang saling masiargaan patupahon ulaon Parpadanan na Badia di huria i.

Ala ni i ma Apostel Paulus paingothon huria i asa patupahon Parpadanan na Badia dohot mangula pangalaho na tau hinalomohon ni Debata. Asa unang parsala di daging dohot mudar ni Tuhan Jesus  (ayat 27). Ala ni i, ingkon ditangkasi be do dirina di na dohot tu Parpadan na Badia i. Marningot hasomalan na sala uju patupa Parpadanan na Badia di Huria Korintus. Diajari Apostel Paulus do huria i, asa manjamothon dirina be saluhut siihuthon Kristus. Ingkon gabe paniru ma saluhut na porsea dipambahenan ni Tuhan Jesus, na sumeahon diri-Na (daging dohot mudarna) laho patupa haluaon di jolma na portibi on.

Halak na parsidohot di ulaon na badia, unang ma mangasahon denggan ni pangalahona. Alai sian na mangarajumi diri pardosa sian hatutubuna, nang marningot sude dosana, huhut ro di bagasan roha na magopu huhut manolsoli dosana i tu Debata, mangido hasesaan ni dosa, huhut manganhon Parpadanan na Badia, i do na hinalomohon ni Debata di halak na parsidohot di Ulaon na Badia.

Halak na porsea di Hata, i do na taruli sian Ulaon na Badia.

Di huria Kristen Protestan na beraliran Lutheran adong do dua jenis ni sakramen. Sada sian i, i ma Ulaon na Badia. Di Katekhismus na metmet i, na pinatomutomu ni si Marthin, adong disungkun: Aha do laba ni na mangan dohot minum di na marulaon na badia? Dialusi do di bukku i laba ni na marulaon na badia. Didok di si: “Na nilehon humophop hamu bahen hasesaan ni dosa, hangoluan dohot hasonangan marhite panganon na badia i. Ai di si do hasesaan ni dosa, hangoluan dohot hasonangan.” Tangkas do dipabotohon di si, hata na mandongani sipanganon dohot siinumon i. I do situan ni sipanganon dohot siinumon na badia i. Manang ise na porsea di Hata i dapotan hasesaan ni dosa.

Pangauhononhon Ulaon na Badia

Ulaon na Badia i ma sada sian dua sakramen di hurianta. Sakramen na marlapatan do i “yang digunakan Allah sebagai sarana mengomunikasikan rahmat bagi umat beriman yang menerimanya.” Hataridaan ni asi ni roha ni Debata na mangalehon Anak-Na Jesus Kristus tu hamatean laho manobus hita jolma. Ala ni i di turpuk Kamis Putih sadarion tangkas do disoarahon, paboa tona ni Tuhan Jesus do laho patupahon haluaonta, ndada holan parningotan sambing i, alai tahaporseai do, di ulaon na badia i, disesa dosanta di bagasan daging dohot mudar ni Jesus Kristus. Asa denggan ma dipatupa Ulaon na Badia i, di tongatonga ni huria.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN
  1. Kamis Putih tongon do di na pinatupa ni Tuhan Jesus masipanganon rap dohot siseanNa, mandapothon arina laho pasingkop panghophoponNa marhite hamamateNa di hau silang. Naeng ma saluhut na porsea mangauhon panghophoponni Tuhan Jesus marhite na mangalehon daging nang mudarNa, ai i do dalan na binahen ni Ama i, laho patupa haluaon sian dosa. Ndang adong dalan na asing dungkon ni i.

  2. Naeng tangkas parsidohot hita di Ulaon na Badia na pinatupa ni hurianta, doshon na mamaritahon Kristus i do hita di si, laos dalanta marsaulihon hasesaan ni dosa. Alai ro ma hita di bagasan roha na mananda dosanta, na mangasahon asi ni roha ni Tuhan i sambing naung pataluphon hita gabe parsidohot marsaulihon panghophoponNa i.

  3. Ingkon martanda ma di ngolunta naung parsidohot hita dipanghophopon ni Tuhan Jesus.Tarida ma i sian roha na manghaholongi dongan. Unang holan sumarihon na ringkot di dirinta (egois), alai tatiru ma pambahenan ni Tuhan i naung mate humongkop hita.

Penulis:
Pdt. Nurdia Hutasoit, S.Th

Penyunting:
Timothy P. Saragi

BAHAN KHOTBAH INI JUGA DAPAT DIUNDUH DENGAN MENG-KLIK TULISAN DI BAWAH INI
JAMITA KAMIS PUTIH 14 APRIL 2022

About Timothy Saragi

Staf Biro Infokom HKI

View all posts by Timothy Saragi →