JAMITA MINGGU 14 AGUSTUS 2022 – LUKAS 12:49–53

JAMITA MINGGU, 14 AGUSTUS 2022 - MANGIHUTHON JESUS SIAN NASA ROHA

Jamita Minggu IX Dung Trinitatis 14 Agustus 2022
MINGGU IX DUNG TRINITATIS
MINGGU, 14 AGUSTUS 2022
MANGIHUTHON JESUS SIAN NASA ROHA
Lukas 12:49-53

PATUJOLO

Barita na Uli (di hata Gorik didok Euangelion, di hata Latin Evangelium) sinurat ni sahalak pande (pandaoni/dokter) na margoar Lukas, i do na jotjot tagoari Evangelium Lukas. Barita na Uli pinajojor ni Lukas dipasahat tu sahalak partogi ni Rom na margoar Teopilus na mian di huta Rom. Duansa do nasida (panongos dohot hasahatan ni surat) marharoroan sian duru bangso Jahudi.

Dia do roha ni Lukas umbahen na pola disurat ibana Evangelium i? Didok di Lukas 1:4, “asa ditanda ho hasintongan ni hata, naung dipodahon tu ho.” Nunga dipodahon sude angka Barita na Uli i tu si Teopilus. Alai didok roha ni Lukas ringkot dope laho patandahon hasintongan ni sude Barita i. Molo dung ditanda hasintongan tontu gabe tangkas ma langka sidalananna. Tangkas nang pamillitonna di haporseaon i. Porsea do ibana tu Jesus manang parsoadaonna do?

Sasintongna mansai maol do antusan ni halak Gorik Barita na Uli binoan ni Jesus i. Jala partuktuhan (sihailahononhon) do i di halak Jahudi. Ai maila do nasida mangkatindangkon “Debata na gabe jolma” (Immanuel). Lumobi ma jolma tinandanasida di diri ni Jesus sian Nasaret i. Haleaon do i dietong rohanasida. Halak Gorik nang angka bangso sileban na sian duru ni Jahudi pe busisaon do umbege Barita i. Ndang tarjalo ni pingkiran ni halak Gorik manjalo haluaon marhite sahalak jolmalaos huhutDebata, na margoar Jesus. Alai nang pe songon i, na ingkon do porsea nasida di Barita i, ai i do haluaon. Angkup ni i ndada holan na umbege boti nasida di Barita i, alai ingkon maralus do i di hatangkason (ketegasan), ndang meoleol. Ingkon parungkilhononhon do Barita na Uli i. Jala ingkon tagamon do pangkorhonna (konsekuensi) molo dung porsea iba. Parungkilon, siteanon, hamaolon nang hasusaan pe ingkon tagamon do molo dung dijangkon Jesus di ngolunta.

BACA JUGA BAHAN EPISTEL MINGGU IX DUNG TRINITATIS – MINGGU, 14 AGUSTUS 2022

HATORANGAN
Ayat 49–50

Haroro ni Jesus mandanggurhon api, pataridahon hapolinon do i. Songon api na dipangke laho papolinhon sere. Songon i do Barita na Uli i, masigorgor manutung angka ateate ni nasa jolma asa polin marhaporseaon di Jesus Sipalua i. Jesus sandiri do na mangkatindangkon ulaonNa na mandanggurhon api i. Angkup ni i, “dihasiholi nasa rohangKu”, ninna Jesus. Ndada na tarsor ulaon i dibahen Jesus, baliksa dituntun rohaNa do. Laos dipasingkop do muse dohot hata “anggiat haru galak.” Sai hira halak na so marlambok ni roha do begeon Jesus di son. Alai ndada i lapatanna. Didanggurhon pe api i, asa polin jala hibul do roha ni angka na di tano on laho mangihuthon Jesus.

“Paridion,” sada gombaran (lambang) ni hasusaan dohot hamatean do i. Halak na dididi dilonongkon do ngoluna tu aek jala pusok marhosa. Songon i ma Jesus marungkilhon sitaononNa i, ia dung sahat Ibana tu Jerusalem (ringkot ingotonta: Hata ni Jesus on dihatahon uju pardalananNa na parpudi manopot huta Jerusalem laho tarsilang).

Ayat 51 – 53

“Panirangon,” hata na suhar do i sian hadameon. Ndada holan pamenakmenakhon jolma haroro ni Jesus tu portibi on. Ia ditangihon jolma Ibana, tarhalomong ma angka na torop laos sip boti. Ingkon maralus do Barita na Uli binoan ni Jesus i. Jala ingkon tangkas alus na (unang dangoldangol sisilon). Di son ma na didokna “ombas krisis” di angka na naeng mangihuthon Jesus. Krisis i ma mamarungkilhon na porsea do tu Jesus, manang mangkaposi na asing.

Angkup ni i, ala ni tangkasna, sipata ro do konsekuensi na maralo tu si. Pola do marbada (marsalisi) angka na markeluarga. Tutu, ndada na giot roha ni Jesus laho manirang keluarga, alai hatangkason, “ketegasan mangalusi, merespons, Barita na Uli mangido konsekuensi na arga sian hita siihuthon Ibana.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Di ngolu parhuriaon si nuaeng on, olo do hira na burju idaonta jolma na mangkaposi saluhut di ngoluna. Pos rohana tu Tuhan, laos pos do muse rohana tu portibi on. Marsigantung tu Tuhan Jesus laos mangkirim do muse tu portibi on. Ndada sala jolma na sai mangkasiholi hadameon manang pardamean. Alai tung na so jadi do marlaok haporseaonta tu Tuhan Jesus. Molo pe sipata dihasogohon portibi on hita ala ni i, na so patut do monditondit haporseaonta di Jesus. Mangihuthon Jesus sian nasa roha marlapatan do i manjalo jala adong konsekuensi (pangkorhonna) ni pamillitonta i di Ibana. Ndang jadi mardua roha hita. Sada tu Jesus, sada tu na asing. Sandok ingkon sian nasa roha do hita di na mangihuthon Jesus.

Penulis:
Pdt. Rinto P. Nainggolan, S.Th

Penyunting:
Timothy P. Saragi

BAHAN JAMITA INI JUGA DAPAT DIUNDUH DENGAN MENG-KLIK TULISAN DI BAWAH INI
JAMITA MINGGU 14 AGUSTUS 2022 – MINGGU IX DUNG TRINITATIS

Bagikan Postingan ini:

About Timothy Saragi

Staf Biro Infokom HKI

View all posts by Timothy Saragi →