JAMITA MINGGU 24 JULI 2022 – HOSEA 1:2-10

JAMITA MINGGU, 24 JULI 2022 - DIHAHOLONGI JALA DIPALUA DEBATA DO ANGKA NA PORSEA

Jamita Minggu VI Dung Trinitatis 24 Juli 2022
MINGGU VI DUNG TRINITATIS
MINGGU, 24 JULI 2022
DIHAHOLOGI JALA DIPALUA DEBATA DO ANGKA NA PORSEA
Hosea 1:2-10

PATUJOLO

Tarjou do sahalak Panurirang laho mamaritahon Hata ni Debata tu huria. Asa mangolu huria i di bagasan ngolu na bonar jala unduk tu Hata ini Debata. Sahalak Panurirang di hata Inggris didok“prophet”, di hata Indonesia didok “nabi” jala berita kenabian didok ma i “prophecy”, di hata Indonesia didok nubuat. Di bagas pangantusion taringot tu “prophecy” (nubuat) do sahalak panurirang mamaritahon Hata ni Debata na gabe sipaingot tu angka huria asa unang mangula ulaon na maralo tu lomo ni roha ni Debata.

Sahalak panurirang ingkon mamaritahon Hata ni Debata marhite metode, asa boi huria i mangantusi Hata ni Debata. Asa mulak jala muba maradophon Debata. Sada metode na pinangke ni angka panurirang, i ma marhite na mamangke simbolsimbol asa boi diida, dibege jala ditangkup huria i aha na nidok ni barita pinasahat ni panurirang i. Simbol pinangke ni panurirang i, isarana songon batu na balga si suraton, jala disurathon tu si dohot panurat ni jolma (ida Jesaya 8:1-4) jala marhite angka umpama songon sada hohos sian hori (ida Jeremia 13:1-11).

I do na pinatudu ni turpuk Jamita Minggu 24 Juli 2022 Minggu VI Dung Trinitatis sadari on. Di na marsangkap Debata laho pataridahon simbol marhite na manjou si Hosea asa mambuat sada  boruboru sibabijalang (perempuan sundal), i ma si Gomer boru ni si Diblaim (ida Hosea 1:2). Simbol i pataridahon di na sai didatdati isi ni tano i do marmainan, marbalik sian Jahowa. Naeng tapabagas pangantusionta taringot tu na masa di panurirang Hosea i.

BACA JUGA BAHAN EPISTEL MINGGU III SETELAH TRINITATIS – MINGGU, 3 JULI 2022

HATORANGAN

Na gabe sibingkasi di na dijou Debata Panurirang Hosea mambuat sada boruboru sibabijalang (perempuan sundal) jala tubuan anak sian sada boruboru sibabijalang, i ma laho patuduhon parngoluon ni Bangso Israel uju i, na sai marmainan (bersundal) huhut marbalik sian Jahowa. Halak Israel nunga be marbalik sian Jahowa gabe manomba Baal (ida Hosea 2:15-16). Marhite na binuat ni panurirang Hosea si Gomer boru ni si Diblaim, dapot na ma tolu pinompar, i ma Jesreel, Nai Sohinasian dohot Lo Ami. Sada jamita na mansai menarik do on, ala sude goar na nilehon ni Debata tu pinompar ni Panurirang Hosea i adong be do lapatanna. I ma dalan ni Debata laho pataridahon na masa di Israel.

Tu anak na parjolo didok Jahowa maradophon si Hosea “Jou ma goarna si Jesreel; ai otik nari marlulu ma ahu di angka utang mudar ni si Jesreel tu pinompar ni si Jehu, jala ahu pasiaphon harajaon ni pinompar ni Israel. Jadi di ari na sasada i ponggolhononku ma sior ni Israel di rura Jesreel.” Jadi goar ni anak ni si Hosea na parjolo marlapatan do i, Debata laho manguhum angka pinompar ni si Jehu dohot pasiphon harajaon ni pinompar ni Israel.

Pinompar na paduahon, i ma sada boru. Digoari ma i “Nai Sohinasian” lapatanna didok Jahowa “ai ndang be marpangulahi rohangku tu pinompar ni Israel, manang marpamuati rohangku tu nasida” (ida Hosea 1:6).

Pinompar na patoluhon, i ma sada anak, digoari ma anak i “Lo Ami” lapatanna didok Jahowa “ai ndang bangsongku hamu, jala ndang hamu nampuna ahu” (ida Hosea 1:9).

Marhite Jamita Minggu VI Dung Trinitatis on taida do songon dia Panurirang Hosea na sinuru ni Jahowa laho mamaritahon Hata Debata. Ndang holan hatahata pangajarion ni Panurirang Hosea, rade do ibana mamelehon dirina marhite na mambuat boruboru sibabijalang jala gabean anak dohot boru ibana sian boruboru sibabijalang (perempuan sundal) i.

Molo taauhon tu parngoluonta sisaonari, isarana aha na masa di Panurirang Hosea on masa di ngolunta si saonari, tontu sahali gabe sada barita na mansai balga do on (viral). Haradeon ni Panurirang Hosea mangoloi Hata ni Debata boi do talapati songon sada pambahenan na mansai balga. Pola do dipalua ibana sian na mampartahanhon hamuliaon di goar (sian parnidaan ni jolma) songon sada Panurirang ni Debata. Rade do ibana paluahon hasangapon sian parnidaan ni jolma, tarlumobi ma molo marnida angka sininta ni roha di ari na naeng ro. Atik na boi do lobi denggan ariarina molo so dibuat ibana boruboru sibabijalang (perempuan sundal) i.

Sian ulaon na binahen ni Panurirang Hosea di turpuk on naeng pataridaon ni Jahowa hajongjonganNa songon sada Jahowa na hot mangkaholongi huriaNa. Dipangke Debata do Parngoluon ni Panurirang Hosea gabe dalan laho manggombarhon angka na masa di parngoluon ni Israel, na marbalik sian Jahowa, pambahenan ni Panurirang Hosea i ma na manggombarhon parungkilon ni Jahowa, ala ni dosa binahen ni huriaNa.

Holong ni Jahowa na so hadodoan i, ingkon tabahen do i gabe tiruan di ngolunta. Di bagasan ngolunta, pangurupion dohot pangkophopon ni Jahowa do na mangkajongjongkon holongNa tu sandok huriaNa. Haradeon ni Panurirang Hosea mangalehon dirina gabe gombaran ni pambahenan ni bangso Israel dohot gombaran ni na tinaon ni Debata ala ni holongNa. Di bagasan ngolu ni Panurirang Hosea nunga dihajongjongkon Jahowa holongNa humongkop bangsoNa.

Tongtong do dihaholongi Jahowa bangsoNa i nang pe di mula na i songon gombaran marhite anak ni si Hosea marhite boruboru sibabijalang, i ma Nai Sohinasian, ai ndang be marpangulahi roha ni Jahowa tu pinompar ni Israel, manang marpamuati rohaNa tu nasida; jala digombarhon marhite pinompar ni si Hosea na patoluhon i ma Lo Ami, ai didok Jahowa do “ai ndang bangsongku hamu, jala ndang hamu nampuna ahu.” Alai dipalua Jahowa do angka bangsoNa, angka na porsea di Ibana di bagasan Kristus. Rade do haluaon i tu ganup jolma. Ala ni i, di hita angka naung tinobus ni Debata jala na porsea di Ibana, tarjou do hita laho pataridahon asi ni roha ni Kristus i di bagasan ngolunta si ganup ari.

Ngolu ni Kristus na mansai denggan i ingkon boi do i gabe tiruan di parngoluan ni halak na porsea. I do umbahen na didok Apostel Paulus di Kolosse 2:6-7, “Onpe, songon panjangkonmuna di Kristus Jesus, Tuhan i, songon i ma hamu marparange di bagasan Ibana! Gabe marurat jala pinauliuli ma hamu di bagasan Ibana, togu marhaporseaon, hombar tu na niajarhon tu hamuna; lumobi ma hamu marroha mauliate.

Pandohan ni Apostel Paulus i paingothon angka na porsea di bagasan Kristus asa tongtong mangolu di bagasan Kristus, rade mangolu, marurat jala dipauli di atas ni holong ni Kristus. Molo ndang olo mangolu, marurat jala dipauli di atas ni holong ni Kristus, na pasti songon na masa di bangso Israel di tingki hapanurirangon ni si Hosea, i ma bangso na marbalik sian holong ni Jahowa. Jala pasti do holongnasida pe holong na holan mangkaringkothon diri sandiri do.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Marhite turpuk ni Jamita Minggu 24 Juli 2022 Minggu VI Dung Trinitatis on boi do taida holong ni Jahowa tu bangsoNa na ias jala badia songon holong ni natuatua tu ianakhon. Gombaran ni Jahowa songon sada natuatua on gabe sada sipeopon do on di hita na porsea asa boi tajangkon holong na ias na sian Jahowa i jala asa boi hita marhasatiaon songon ianakhon ni Jahowa.

Holong dohot hasatiaonta tu Jahowa ndang boi holan marhite aturan-aturan sambing songon patik di Bangso Israel. Ndang holan hasation sian na mangoloi patik na hinalomohon ni Debata, alai ingkon dohot do di bagasan holong. Holong dohot hasatiaon di patik ndang boi pataridahon hamubaon ni roha na tutu, olo dope sipata diulahon patik alai mangolu di bagasan huaso ni dosa. I do umbahen na didok Apostel Paulus di Kolosse 2:11, “Laos di bagasan Ibana do hamu tarsunat, ndada binahen ni tangan, laho mananggal pamatang na mardaging on, binahen ni parsunaton na sian Kristus, i do.

Rade Jesus Kristus mangkophop jolma asa malua sian dosa. Gabe mangolu di bagasan ngolu na imbaru, ngolu na di bagasan Kristus. Ndang be mangolu hita di roha na so denggan dohot hisap ni dosa. Alai gabe mangolu hita di bagasan unduk ni roha tu Debata. Amin.

Penulis:
Departemen Marturia HKI

Penyunting:
Timothy P. Saragi

BAHAN JAMITA INI JUGA DAPAT DIUNDUH DENGAN MENG-KLIK TULISAN DI BAWAH INI
JAMITA MINGGU 24 JULI 2022 – MINGGU VI SETELAH TRINITATIS

Bagikan Postingan ini:

About Timothy Saragi

Staf Biro Infokom HKI

View all posts by Timothy Saragi →