EPISTEL MINGGU 4 SEPTEMBER 2022 – LUKAS 14 : 25-33

Epistel Minggu XII Dung Trinitatis 4 September 2022
MINGGU XII DUNG TRINITATIS
MINGGU, 4 SEPTEMBER 2022
“PATAR DO LUHUTNA DI ADOPAN NI DEBATA“
Lukas 14 : 25-33

PATUJOLO

Tangkas dope di parningotan, uju mendaftar tu Sekolah Tinggi Teologia ima di STT Abdi Sabda Medan, adong do syarat-syarat na binahen ni kampus asa boi muse mandohoti ujian masuk jala diterima gabe mahasiswa di si. Sada sian i ima na ingkon adong do surat rekomendasi sian Pendeta Resort na binoan sian huta. Molo dang terpenuhi syarat-syarat i, konsekuensina dang boi mangalanjuthon proses seleksi marhite ujian, jala dang boi diterima di kampus STT Abdi Sabda. Jadi ganup calon mahasiswa ingkon melengkapi angka persyaratan administratif do ujui, asa boi muse tu tahap selanjutna. Adong ma hatiha i naso lolos di persyaratan i, jala ingkon mulak ma muse tu hutana. Angka naung lolos di persyaratan administrasi, lanjutma tu tahap ujian masuk. Bentuk soal ujian masuk i mencakup bidang teologi, sosial, bahasa inggris, dohot wawancara. Di tahap on pe godang do naso lolos. Calon mahasiswa naung lolos ujian i, diterima ma di kampus teologi i. Alai dang sae dope disi, angka naung lolos i, naung gabe mahasiswa, selama 4 semester tong dope mangadopi ujian penyaringan. Di bagasan 4 semester i, angka mahasiswa naso mencapai standar IPK (Indeks Prestasi Kumulatif) naung ditotophon kampus, dang boi be mangalanjuthon perkuliahan alias DO (Drop Out). Alai angka na lolos, boi ma muse lanjut sahat tu na selesai. Ima angka syarat-syarat na gabe mahasiswa teologi ujui.

Di bagasan turpuk epistel on pe, Tuhan Jesus mambahen persyaratan tu angka jolma na naeng mendaftar gabe siseanNa. Ima na tarsurat di Lukas 14:25-33. Aha do syarat-syarat na binahen ni Jesus i tu angka natorop na naeng gabe siseanNa? Antong tapaihutihut ma hatorangan ni turpuk on.

HATORANGAN

Di panghobasion ni Jesus ujui, godang do angka natorop mangihuthon Ibana, sada contoh ima di masa halongangan na binahen ni Jesus marhite 5 roti dohot 2 dengke, godang ni angka natorop i pola sahat tu 5000 halak angka baoa. Sian i pe tarida do torop ni jolma na mangihuthon Ibana di panghobasionNa. Di bagasan turpuk on, na di pardalanan do Jesus dohot angka siseanNa laho tu Jerusalem, ima inganan natinuju ni Jesus hombar tu angka napinasahat panurirang di haluaon na binoan ni Mesias. Di pardalanan i, sai dipaihutihut angka natorop i do Ibana dohot siseanNa. Jala somal do molo sai marcerita nasida di pardalanan. Molo tapamanat di turpuk on, adong do pembahasan khusus sian Jesus tu angka natorop na mangihuthon Ibana. Jala adong 3 hali hata na sarupa dipasahat Jesus, ima: “ndang tarbahen gabe siseanku”. Ternyata di pardalanan i Jesus mambahen persyaratan tu angka ise na naeng gabe siseanNa.

Na parjolo, “Ganup halak na ro tu Ahu, ndang tarbahen gabe siseanku, ia so dihasogohon ibana amana, inana, na niolina, anakkonna, hahaanggina dohot angka ibotona, ro di hosana sandiri”.

Molo tapamanat ayat on, dang adong didok “manghasogohon baoana (suami)” holan “na niolina (isteri)” do na adong. Gabe sahira holan tu baoa do dipasahat Jesus hata on. Di ayat 25, tarsurat do disi “..torop do halak mandongani Ibana..”, molo di hata Indonesia didok “..banyak orang berduyun-duyun mengikuti Yesus..”. Istilah berduyun-duyun on di KBBI sarupa do tu “berbondong-bondong, berturut-turut banyak sekali”. Jala molo di pemahaman ni jolma molo “berduyun-duyun” olo do gabe “berdesak-desakan”. Molo masa na “berdesak-desakan” hatiha i na marlapatan ma i dang adong angka borua di punguan natorop i. Boasa? Ala adong do tradisi di halak Jahudi, angka borua dang boi “berdesak-desakan” dohot angka baoa. Ala dang adong borua hatiha di pardalanan na tu Jerusalem i, umbahen holan tu angka baoa ma dipasahat Jesus HataNa di turpuk on. Di sisi na asing muse, boi do terpengaruh adat nasida na berpaham patriarki na mandok umtimbo do posisi ni baoa sian borua, nangpe adong angka borua di punguan natorop i. Songon paretongan jumlah ni angka natorop di halongangan na pinatupa ni Jesus marhite roti dohot dengke i, holan 5000 baoa do didok, dang dietong angka borua dohot dakdanak.

BACA JUGA JAMITA MINGGU XII SETELAH TRINITATIS – MINGGU, 4 SEPTEMBER 2022

Alai terlepas sian i, aha do lapatan ni pandohan ni Jesus tu angka natorop i? Na ingkon dihasogohon do amana, inana, na niolina, anakkonna, hahaanggina dohot angka ibotona, ro di hosana sandiri asa boi gabe sisean ni Jesus? Molo songoni do pangantusionta, olo do on gabe maralo tu parenta ni Jesus taringot Holong. Ndang mungkin dipasahat Jesus parentaNa na maralo muse tu HataNa, ai didok do “Ingkon pasangaponmu do natorasmu, angka baoa dihaholongi ma pardihutana be, dioloi angka parompuan ma baona be, jala dihaholongi natorasma angka ianakhonna”. Adong do pangantusion na naeng lehonon ni Jesus tu angka natorop taringot pandohanna i. Jolma manisia ima na bersosial do di ngoluna, adong relasi primer jala adong relasi sekunder. Relasi primer ima hubungan naung adong tingki sorang tu portibion, ima natoras, haha anggi, iboto, dna. Jala relasi sekunder, ima relasi na nidapot hatiha sikkola manang karejo, termasuk ma i dongan, aleale, bos, dna. Molo adong relasi on, otik manang godang adong do na mangihot i (terikat). Na nidok ni Jesus di turpuk on asa unang tarihot relasi i do molo mangihuthon Jesus. Isarana, molo mangihuthon Jesus ingkon mardalan tu siamun, hape ala relasi primer manang sekunder i gabe tu hambirang. Ido lapatanna didok Jesus asa molo so dihasogohon amana, inana, na niolina, anakkonna, hahaanggina dohot angka ibotona, ro di hosana sandiri, dang tarbahen gabe siseanNa. Sipata di ngolu ni angka na porsea boi do gabe mandao sian aturan ni Tuhan i alani persoalan keluarga. Tardapot mangulahon na sala sada sian anggota keluarga i, hape parhalado do amanta i, olo do gabe dipasip jala dihungkupi asa unang habotoan tu halak na asing. Hape molo na asing mangulahon sisongoni, ibana do parjolo pajongjonghon aturan lumobi aturan di huria i. Asa syarat na parjolo na gabe sisean ni Jesus i, dihasogohon ma keluarga molo gabe keluarga i mambahen paraloon tu parenta ni Tuhan i. Umtimbo do aturan ni Tuhan i sian aturan ni keluarga. Unduk tu Tuhan i pataluhon haunduhon na asing, asa tardok ma gabe sisean ni Kristus.

Na paduahon, “Ndang tarbahen gabe siseanku halak, na so manuhuk silang na tu ibana, laho mangihuthon Ahu”.

Mangihuthon Jesus manang na gabe siseanNa, ingkon manuhuk silangna do. Lapatanna, adong konsekuensi di angka na porsea molo mangihuthon Kristus manang na gabe siseanNa, adong tanggung jawab, adong boban na mansai borat. Godang do halak Kristen alai dang sude na olo menanggung resiko ala haporseaonna tu Tuhan Jesus Kristus i. Resiko i ma nanidokna silang na situhukon i. Sifat ni silang i ima sitaonon. Alai dang sude sitaonon tardok gabe silang. Dang boi dohonon koruptor na masuk penjara, na manuhuk silangna. Sala do i. Alai na tardok silang situhukon ima na marsitaonon ala haporseaonna dohot haunduhon tu Jesus Kristus. Di negaranta on, adong do silang situhukonta, ima molo sai ditindas angka na porsea i, dilarang marminggu, ditutup jala ditutung gareja, maol mandapot izin bangunan gareja, maol mandapot posisi di parkarejoan ala faktor agama. Ima nanidokna konsekuensi mangihuthon Kristus. Ingkon manahan do angka na porsea di sitaonon na masa, unang gabe lari manang manadinghon Tuhan i. Ingkon dituhuk do silang i, ai ido didok Tuhan Jesus Kristus tu hita molo olo hita gabe siseanNa.

Na patoluhon, “Hamu pe, ndang tarbahen agia ise hamu gabe siseanku, anggo so tartadingkonsa nasa na di ibana”.

On ma syarat na patoluhon, asa gabe sisean ni Kristus ingkon rade do manadinghon nasa na adong di ibana. Molo taingot sejarah ni si Abraham, disuru Debata do ibana manadinghon hutana, laho tu inganan naung pinarade ni Debata. Marhaunduhon do ibana tu Debata, dang dipikkiri ibana taringot nasa na adong di ibana, ima artana na di huta i, tanona, pahanpahanna, dna. Dipatulus ibana do rohana mangulahon parsuruon ni Tuhan i, ima ala ni haporseaonna. Rade do ibana manadinghon nasa na adong di ibana asalma mangulahon parenta ni Tuhan i. Boasa didok Jesus syarat na patoluhon on tu angka natorop i? Na marlapatan ma i asa unang gabe sipangambati angka arta, sinamot, manang hamoraon i di tingki mangihuthon Jesus Kristus manang na gabe siseanNa. Ala berdampak do arta na di portibion tu pardalanan ni angka na mangihuthon Jesus i. Jala didok do di Mateus 6:21 “Ai ia di si artam, di si do roham!”, molo masa sisongonon dang boi be fokus angka na porsea i mangihuthon Kristus. Dilanjuthon do muse di ayat 24 “Ndang haoloan sada halak dua induk! Sai hosomanna do na sada, haholonganna do na sada nari; hombaranna do na sada, toisanna do na sada nari. Ndang haoloan hamu Debata rap dohot Mammon!” Adong ketegasan manuru mamillit sada sian nadua i. Nadia do na di bagasan rohana, nasa na adong di ibana do manang Jesus Kristus i do? Ido umbahen didok Tuhan Jesus di syarat na patoluhon on, manadinghon nasa na adong di ibana, asa gabe sisean ni Jesus Kristus. Hati harus dicurahkan seutuhnya kepada Tuhan, kita boleh punya harta namun tidak boleh terikat padanya. Namun jika ingin menjadi murid Kristus, terikatlah kepada Jesus Kristus, bukan kepada harta. Ingkon gabe prioritas do Kristus i di parngoluanta tumimbanghon na asing.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Aha do na masa di ngolunta nuaeng? Godang do na marbunibuni mangihuthon Kristus i, dang dihasogohon ibana portibion, laos gabe dihalomohon do. Didok do ibana Kristen alai di sihabunian i, maralo tu ajaran Kristen i do naniulahononna. Jotjot do on masa lumobi tingki adong penawaran tu haulion ni portibi, dilehon jabatan, arta, hepeng, asal ma olo mangulahon naso denggan na maralo tu parenta ni Tuhan i. Diboto jolma do ibana na siihuthon Kristus, alai di pambahenanna di na buni i dang tardok ibana gabe siihuthon Kristus. Ala marbunibuni ibana mangulahon, dang adong na umbotosa, ninna rohana. Hape diboto Tuhan i do i, ala dang adong na buni di adopan ni Tuhan i, patar do saluhutna. Jala dang boi jolma manisia martabuni sian Tuhan i. Asa manang ise na mangulahon sisongoni, dang tardok ibana sisean ni Kristus i.

BACA JUGA ALMANAK MINGGU XII SETELAH TRINITATIS – MINGGU, 4 SEPTEMBER 2022

Molo olo hita gabe sisean ni Kristus, ingkon olo do hita manuhuk silangta. Manahan di angka sitaonon alani haporseaonta, unang gabe terpengaruh alani keluarga, jabatan, manang sinamot na mambahen maralo tu parenta ni Tuhan i. Unang gabe lari sian parungkilon jala gabe manadinghon Tuhan i. Molo tadok hita manuhuk silangta, hape dang songoni na taulahon, gabe marbalik, ingotma diboto Tuhan i doi ala dang boi tagabusi Tuhan i, dang adong na buni di adopanNa. Na gabe sungkunsungkun, olo do hita manuhuk silang i manang ndang? Molo olo do hita na marlapatan doi na olo hita gabe sisean ni Kristus. Torop do na mandok dirina Kristen, alai dang rade manuhuk silangna, dang olo mangadopi konsekuensi na gabe sisean ni Kristus, dang olo manadinghon nasa na adong di ibana, sai di rohana do arta i, jala sai aturan ni keluarga do diihuthon nang pe maralo tu ajaran ni hakristenon i. Antong, molo olo hita gabe sisean ni Kristus, taulahon ma angka syarat na binahen ni Kristus i. Amen.

Penulis:
Pdt. Raja Andre Samuel Simatupang, S.Th

Penyunting:
Yohanes Simatupang