JAMITA MINGGU 20 MARET 2022 – LUKAS 13:1-9

JAMITA MINGGU, 20 MARET 2022 - MARHAMUBAON ASA UNANG MAGO

Jamita Minggu 20 Maret 2022
MINGGU OKULI
MINGGU, 20 MARET 2022
“MARHAMUBAON ASA UNANG MAGO“
Lukas 13:1-9


PATUJOLO
Evangelium Lukas marisi 24 bindu jala adong 1.151 ayat. Di bagasan Bukku na Badia (Bibel), adong dua bukku na sinurathon ni si Lukas, i ma buku Evangelium Lukas dohot bukku Ulaon ni Apostel. Molo si Lukas i ma sahalak Gorik na porsea tu Tuhan Jesus, marhite natarsurat i dipaboa, ia si Lukas i ma sahalak panambari manang dokter molo di zamanta saonari (ida Kol. 4:14). Jala dipaboa natarsurat i do, molo si Lukas i ma sahalak dongan ni Apostel Paulus di na laho marbarita na uli ibana di luat Gorik (ida 2 Tim. 4:11, Pile. 1:24). Marhite i boi ma antusanta sian dia panadaion ni si Lukas tu Tuhan Jesus, i ma marhite barita na uli pinasahat Apostel Paulus. Di mulana bukku sinuraton si Lukas on ditujuhon do tu halak na so Jahudi, i ma tu sahalak Gorik na margoar Teofilus (Luk. 1:1-3, Ul. 1:1), jala sahat tu sadari on bukku ni si Lukas on gabe sada Barita na Uli do tu sude halak na porsea. Asa disurathon si Lukas buku na on, marbingkas ma i siala hatiha i di godang do tarsar angka panurirang pargapgap na mamaritahon Kristus pargapgap, laho paliluhon haporseaon ni halak na porsea. Digohi Tondi Porbadia ma si Lukas laho manuraton barita na tutu taringot tu Tuhan Jesus, na mandok: Jesus do Debata na gabe jolma, sipalua i, na binabagabagahon ni Debata sian Padan na Robi. Denggan ma lam tapabagas Jamita Minggu 20 Maret 2022 on.

BACA JUGA EPISTEL MINGGU OKULI, 20 MARET 2022

HATORANGAN
Turpuk Jamita Minggu 20 Maret 2022 on, dipungka di tingki pigapiga halak Jahudi pasahaton barita taringot jorbut ni pangalaho ni halak Galilea, i ma tu hasipelebeguon do nasida. Ala ni jorbut ni pangalaho halak Galilea, gabe tarrimas panggomgom Rom na di si na margoar si Latus. Pola didurushon si Latus mudar ni halak Galilea i, jala disaorhon si Latus tu mudar ini pahanpahanan na naeng dipelehon nasida tu hasipelebeguon nasida i. Siala songon i do na masa, laos i ma na gabe diparhatahata jolma di tingki i, molo di masanta sinuaeng didok ‘viral’ manang gabe ‘trending topic’ ma jorbut ni pangalaho ni halak Galilea i. Dipaboa halak Jahudi ma i tu Jesus, dirimpu nasida na ingkon dohot do Jesus pahatahata jorbut ni pangalaho ni halak Galilea i. Alai ndang songoni dibahen Jesus, gariada gabe pangalaho halak Jahudi na pahatahata hahurangan ni halak Galilea i do na pininsang ni Jesus, didok Jesus ma mangalusi nasida: Na diagam rohamuna do pardosaan halak Galilea i martimbangkon saluhut halak Galilea, ala songon i diahap nasida? Hudok ma di hamu: Ndang; anggo so muba rohamuna, laos songoni do hamu mago muse!


Sian alus ni Jesus on, boi do tarajumi: Sipinsangon do pangalaho ni jolma, molo sai dipahatahata hahurangan ni dongan na, holan laho pasombuhon tagas na, gari dirina sandiri pe gok do hahurangan. Hahurangan pangalaho ni dongan na tarbarita ndada laho dipahatahata, alai hahurangan ni angka dongan na tarbarita i pinangke ma i gabe dalan laho tu hamubaon ni roha, laho tu parsiajaran asa unang diulahon angka sisongoni. Songon hata ni angka na bisuk na mandok: “Tung aha ma labana sai pasalasala pangalaho ni dongan na sala, ai nunga tutu sala. Alai parange ni dongan na sala i, gabe parsiajaran ma i asa unang diulahon be angka na sala i.” Ai angka halak na paroaroahon angka parange dongan na roa, ndada ulaon situnjang na galdap goar ni i? Nunga galdap dongan i siala parangena na sala i, alai tong dope tatunjang ibana sian hatahatanta. Nda tung pajebujebuhon hahuranan donganta hita di si? Tangkas do dipaboa turpuk jamitanta on, ingkon sipinsangon ni Debata do angka pangalaho ni jolma sisongoni. I do boasa didok Jesus muse: Manang na dirimpu hamu, anggo na sampuluualu halak, na mate ditingang palaspalas na di Siloam, parsalaan sian sude pangisi ni huta Jerusalem? Hudok ma di hamu: Nda tung; anggo so muba rohamuna, laos songon i do hamu mago muse! Adong sada parange ni halak Jahudi, sahalak do na mangulahon na humurang alai ingkon rarat, ingkon marlea do sude bahenon nasida sahuta manang saompung. Ra, adong dope parange sisongoni di hita halak Kristen sahat di partingkian on. Dipaingot hita marhite turpuk jamita sadari on, na gabe pangantusion di partondionta i ma: Na so jadi ala ni hahurangan sasahalak, gabe rarat tabahen marlea sude halak. Molo so tarbahen hita laho paturehon hahurangan ni parange ini donganta, pinomat gabe pangarajumion ma i tabahen tu dirinta asa unang taulahon parange na humurang i, unang pararatrarat, ai uhuman ni Debata do angka pangalaho sisongoni.


Dung i asa lam torang, dibahen Jesus ma sada tudostudos tu angka nasida, i ma sada umpama hau ara na so marparbue. I ma taringot tu sasahalak nampuna porlak anggur, jala tubu hau ara na sinuanna di porlak anggurna i. Jadi ro ma ibana mangalului parbue na, alai ndang adong jumpangsa. Gabe ninna nampunasa porlak i ma tu pangulana, taba ma i nunga pola patolutaonhon hulului parbuena alai laos so adong do. Alai dielek pangula i do tuanna i mandok: Unang pola tuannami, paloas ma jolo sataon nari asa hupature hami laos hubahen hami napa di humaliangna, anggiat gabe olo marparbue tu joloan on; alai molo tong soada parbuena, tabaon ma. Sian umpama ni Jesus i, adong tolu na didok di si i ma: Naporjolo i ma tuan nampuna porlak, napaduahon i ma pangula porlak dohot napatoluhon i ma hau ara na so marboras di porlak i. Tuan nampuna porlak, i ma Debata sitompa langit dohot tano on; pangula, i ma Jesus Sipalua Jolma i jala porlak, i ma huria-Na ai didok na tarsurat i do: Huria ni Tuhan i do porlak ni Debata. Jala hau ara i ma hita jolma. Molo ndang ala ni Jesus, ra nunga diusehon Debata nasa rimas-Na laho mangarimpashon hita jolma na sai tongtong mangulahon dosa. Alai di bagasan Jesus i, marpangulahi do roha ni Debata, saban do Tuhan i laho paimaima parbue ni haporseaonta di tano on. I do umbahen na didok di bagasan na tarsurat i: Molo so di bagasan Jesus jolma i, na ingkon sai maralo do ngoluna tu Debata na badia i. Alai molo di bagasan Jesus jolmai, gabe dipadenggan, dipadomu jala dipasaor do ngolu ni jolma i tu Debata. Nang songon ngolu ni Huria i, molo ni rajuman Hata ni Tuhan Jesus di bagasan turpuk on, boi ma antusanta: Ndada sude halak na porsea di tongatonga ni huria mamparbuehon haporseaonna. Tarajumi jala tarimangi be ma ngolunta ganup marsadasada. Hita do ulaning na nidok na Hau Ara na so marparbue, na tubu di tongatonga porlak ni Tuhan i? Molo tutu ngolunta do i, antong tapauba be ma rohanta binsan tarbahen dope, binsan ndang ro dope panabaion na sian Debata.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN
Goar ni Mingunta sadari on i ma Okuli, na marlapatan: Sai tong mangaranapi do matangku tu Jahowa (ida Psalmen 145:15). Jala ondolan ni Jamita Minggu 20 Maret 2022 i ma: Marhamubaon Asa Unang Mago. Diondolan ni jamitanta on, hamagoan na nidokna ndada hamagoan na di tano on, alai hamagoan si salelengnilelengna. Hamubaon ni roha di hata Heber dipangke hata “syuv” jala di hata Gorik dipangke hata “metanoeo” jala di hata Inggris didok “repentance.” Jala hamubaon ni roha i boi do nilapatan songon haoloon na marsitutu manolsoli angka dosa, jala paubahon ngolu tu dalan ni Debata. Jadi hamubao ni roha i ma roha na marbalik sian dosa gabe tu hasintongan ni Debata. Jala ondolan barita Harajaon ni Debata nabinoan ni Jesus i ma: Pauba hamu ma rohamuna, ai nunga songgop Harajaon ni Debata (ida Mateus 4:17). Jala tangkas do dipaboa na tarsurat i, hamubaon ni roha na adong di jolma i dung dioloi do mangalusi soara ni Debata na ro joujou tu bagasan ngoluna. Songon Apostel Paulus, dung dioloi ibana mangalusi soara ni Debata na manjou ibana, di si ma masa hamubaon ni rohana. Jadi ndang tarbahen jolma i marhamubaon ni roha molo sian gogona sandiri, ingkon begeonna jala oloanna do Hata ni Debata na ro tu nasida, di si ma asa tarbahen jolma i marhamubaon ni roha.


Hombar tu goar ni minggunta sadarion, Okuli, sai tong mangaranapi do matangku dompak Jahowa. Mangaranapi do matangku dompak Jahowa, i ma tanda haoloon ni jolma i naeng marsigantung tu Debata, di na mangaranap jolma i dompak Debata, di si ma dapotsa hamubaon ni roha. Siala molo didok mangaranapi matangku dompak Jahowa, dos do i mandok: Oloanku ma Debata, oloanku ma marsigantung tu Debata. Jala di bagasan hamubaon ni roha i do Barita na Uli i, jala di hamubaon ni roha i do tagotaphon hamatean si salelengnilelengna i.

Penulis:
Pdt. Ewen Josua Silitonga, S.Th

Penyunting:
Timothy P. Saragi

About Timothy Saragi

Staf Biro Infokom HKI

View all posts by Timothy Saragi →

One Comment on “JAMITA MINGGU 20 MARET 2022 – LUKAS 13:1-9”

Comments are closed.