YOHANES 17:20-26

ENDEHON MA DENGGAN BASA NI JAHOWA

 PAMUHAI

Minggu exaudi lapatanna tangihon ma ahu…..

Molo tapmanat, buku si Johanes on gumodang do manaringoti hadirion ni Jesus songon sipalua (Mesias) ibana. Jesus i do dalan Hangoluan i, Ibana do Sipalua i, na mangalehon Roti dohot Aek Hangoluan. Marhite turpuk epistel on, diondolhon asa sude jolma mangendehon/manghalashon dipanarihonon ni Tuhan Jesus namanangianghon sude jolma asa partohap di Harajaon Debata, banua ginjang i. Tangiang pangondianon, patuduhon naso dihalomohon Jesus jolma i mangolu jala mian dibagasan dosa, alai naeng ma nian sude jolma parsidohot di haluaon na binoanNa, asa mangolu jolma i. dibahen i ma, dipaodahon tu tu hita asa adong hasadaon ni roha laho mangoloi nang mangulahon hata ni Debata, jala pararathon tu sude portibi on, songon dalan manghatindanghon denggan basa ni Jahowa.

HATORANGAN

  • 20-23 : hasadaan ni halak Kristen mangulahon jala manghatindanghon haporseaonna tu sude jolma dibagasan ngolu si ganup ari.

Dipangidohon Tuhan Jesus tu angka sisean i nang angka na porsea di Ibana, asa sada saluhutna manghatindangkon haporseaonna tu liat portibion. Unang ganggu angka na porsea i di barita na uli i, alai naengma haporseaon i lam pasadahon, mangalehon gogo, keberanian manghatindanghon Jesus do Sipalua i.

Molo tung pe disosak portibion angka na porsea i, unang gabe harhar hasadaon i, alai tutoguna, hataridaan ni angka siihuthon Jesus. Hasadaon, ima roha na unduk, roha sipangoloi laho pasauthon lomo ni roha Debata, asa saluhut jolma mananda jala manjanghon Jesus i do Sipalua.

Diparbohali Tuhan Jesus do hita, marhite hataNa na mandok, “…songon Jesus dohot Debata…” Dilehon Debata do huaso dibagasan Jesus, suang songon i nalehonon ni Jesus do hagogoon dohot huaso tu sisean i laho mamaritahon barita na uli i. Asa sude bangso mamuji Debata na songkal i, na mangalehon haluaon tu poribi on.

Mansai denggan do molo tapamanat dirita, nga songon dia pangaradeonta di hataNa ? Holan na ringkot ngolu pardagingon do tapajolo, ianggo ngolu partondion i ndang ta pahibul. Idama na masa nuaeng, nungga godang jolma i sursar dipangalaho: ndang haposan di janji, sibahen lomona, tu ngalina parsaoran nang holong ni roha i, mandao sian Tuhan i. Nungga mabiar jolma manghatindangkon na sintong i,  naniidana dohot na binegena paula so diida jala paula so diboto, ala ni biar ni rohana, disurasura na mangonggop. Lupa jala ndang diparhautu panghonghongkop ni Debata di angka na mangulahon lomo ni rohaNa.

Marhite turpuk on, dijou hita jala ditogu laho mangulahon, asa gabe sitindangi di nasa panghobasion ni Jesus bahen haluaon ni jolma pardosa. Patuduhon tu saluhut jolma asi ni roha ni Debata songon na ni hatahonna di Joh 3: 16 i, “Ai songon on do holong ni roha ni Debata di portibi on, pola do AnakNa na sasada i dilehon, asa unang mago ganup na porsea di Ibana, asa hangoluan na salelenglelengna di ibana”.

Dibahen i, asa tapatuduhon ma holong ni roha na marhasadaon di bagasan Kristus i. Molo tungpe tu toropna  halak manadikhon holong ni Tuhan i, ndang gabe tarela hita disi, baliksa gabe panogu jala situngkoli dongan asa unang tarjargong.  Mansai ringkot pamanatonta ngolu hakristenonta di ari parpudi on: mura mandele, mardandi, marungut-ungut dohot manarita. Lumobi molo ndang pintor dialusi Debata na dirohana, suang songon i nang di ngolu parhuriaon, ala so pintor dioloi jala diulahon angka parhobas i. Disi didok, disi ma nian pintor saut. Disi dipangido, disi ma nian pintor dilehon. Tung so sanga marpanungkun ala ni aha, tung so sanga paimahon nanggo sangombas. Cara berpikir instan, sude naeng hatop. Holan diaduk larut. Holan di rondam di allangkon. Naeng nian sude nasa na adong mangoloi jala unduk hombar tu rohanta sandiri.

Bengetma hita mangadopi angka na masa i, marsihohot di haporseaon na togu jala mangolu di bagasan holong na sian Tuhan i. Halak na manghalomohon hadameon, i do halak na masihol pajongjong hasadaon di tongatonga ni Huria, punguan nang masyarakat pe. Ianggo angka parungutungut, na so sabar paimahon pangurupion ni Tuhanta i, boi do i manogu tu hagaleon, pandelean so marpangkirimon.

ginjang ni roha. Molo pe torop jolma naso parduli di holong ni roha ni Tuhanta i, ianggo hita, tapatuduhon ma ngolunta ganup tingki halak na masihol mangulahon holong ni roha di bagasan Kristus Jesus Tuhanta i. Molo taulahon holong ni roha, na denggan do i, alai sai adong do halak na so parduli disi, ta-ingot ma: Nunga ro Ibana sian ginjang manopot hita jolma pardosa, gabe sitindangi maradophon hita. Ibana gabe pangurupi di hita napatupa las ni rohanta, ai Ibana do namargogo mangatasi saluhutna. Ndang tolap ianggo sian pingkiranta dohot gogonta sandiri laho mangatasi saluhutna angka namasa di portibi on, i do alana umbahen na ro Ibana, laho paturehon ngolunta, mangurupi hita, mambuat angka boban na dokdok na pasorathon pingkiranta, asa sai tongtong marlas ni roha hita mangulahon holong ni rohaNa i.

  • 24-25 : Tangiang ni Jesus asa rap parsidohot saluhut na porsea di Harajaon ni Debata na dibanua ginjang i.

Diboan Jesus do siseanNa i dibagasan tangiangNa mandok asa parsidohot sude sisean i diinganan naung pinaradeNa dibanua ginjang. Alai, diboto Jesus do ndang guru di Ibana namangaturhon i, ai holan parhitean do Ibana di Debata asa sahut lomo ni roha Debata. Umbahen i, ditangiangkon Jesus do nasida asa songon Debata na sada dibagasan Jesus, suang songon i ma sisean i dohot na porsea i sada dibagasan Jesus. Holong ni roha Jesus on mangonjar asiasiNa asa sude jolma i malua sian dosa nang hamatean, jala partohap diharajaon ni Debata.

  • 26 : Singkop ni ulaon Tuhan Jesus di portibion ima patubegehon haluaon dibagasan Ibana, jala ditonahon tu sude jolma asa dipararat barita haluaon i gabe sude bangso mananda huhut manjanghon Jesus Sipalua i.

Hasisingkop ni ulaon Jesus di portibion ima patupahon haluaon marhite hamatean – haheheon – hananaek tu banua ginjang, ima dalan patuduhon hasongkalan ni Debata dibagasanNa. Ndang adong na boi mangambati sangkap ni Debata. Saluhutna tarpatupa Ibana do siala huasoNa mangaturhon saluhut portibion. Suang songon i, ditugas pemuridan i, asa sude jolma manghatindanghon dibagasan ngoluna Jesus do Sipalua jala marhite i lam martamba bilangan angka na porsea. Nuaeng dipasahat Debata do tugas i tu  hita saluhutna, asa tapararat barita na uli on di hasiangan on, asa sude jolma mamuji, marsomba pasangaphon Debata jala parsidohot di harajaonNa di banua ginjang i.

HAHONAAN

Tongtong do marpanarihonon Debata dibagasan ngolunta. Ndang marpasombu Debata dingolu jolma, alai sai dipangido rohaNa do asa sude hita mian dibagasan dame nang hasonangan. Dang holan diportibion, alai dohot do dingolu na mangihut ima dibanua ginjang. Asa tajalo saluhutna i, naeng ma adong hasadaon ni rohanta songon halak Kristen laho mamuji, pasangaphon Debata marhite ngolu nang ulaonta si ganup ari. Ima, sada visi/misi laho pararathon barita nauli, jala mambahen hinadenggan parsaoran ni haKristenon gabe sorminan tu liat portibion asa sude bangso mananda, mangjanghon, manghaporseai Jesus do Sipalua di hita.

Mangulahon hata ni Debata, adong do resikona, i ma: Rade gabe sihagigihonon ni jolma na so olo manjalonsa, alai mararga di Debata. On do siulaon ni halak namanjangkon Tuhan Jesus. Panghorhonna, ndang be dihalomohon portibi on hita. Somal do binege Sihagigihononhon do halak sidok na sintong. Tutu do i, alai molo ndang tamulai sian dirinta sandiri, ba ise be namangulahon, gabe bolong sambing ma visi/misi haluaon i. Ingkon barani do hita mamulai sian dirinta sandiri, manghatindanghon taringot tu na taida dohot natabege, nang pe borat resikona. Ai ingkon gabe sipasidingon ni halak ma hita ala ni hata hasintongan i. Dumenggan do i, daripada hata lemes-lemes, tabo-tabo begeon, lehon-lehon tu roha, alai dipudina manurai songon suga.

Parsintong do Debata di angka dalanNa, alai ianggo hita jolma, jotjot do lipe angka dalanta, pingkiranta pe mardangkai tu jae tu julu. Halak na sinuru ni Debata do hita mamaritahon HataNa di tonga-tonga ni portibi on, ai ndang marpanuhatan Ibana mangalehon Tondi i laho margogoihon hita mamaritahon haluaon i, dohot mamaritahon hasintongan ni Barita Nauli i. Ai nunga ro Tuhanta Jesus patupa pardameanta. Tahatingdanghon ma Ibana di tonga-tonga ni portibi on sian nasa roha dohot haporseaonta di Ibana. Amen.

C.Pdt. Leri Cahaya Duma Simatupang, S.Th

Bagikan Postingan ini: