JAMITA MINGGU 7 AGUSTUS 2022 – PSALMEN 50 : 1-6

Evangelium Minggu 7 Agustus 2022

Jamita Minggu VIII Dung Trinitatis 7 Agustus 2022
MINGGU VIII DUNG TRINITATIS
MINGGU, 7 AGUSTUS 2022
“DEBATA DO PANGUHUM“
Psalmen 50 : 1-6

PATUJOLO

Tarmasuk sada sipaingot do turpuk on di masana, ima paingothon hapolinon ni roha, pingkiran, lumobi haporseaon ni Israel maradophon Debata Jahowa. Tarboan-boan do bangso i mangihuthon hasomalan parsombaonon, lumobi ma unok ni haporseaon ni bangso na humaliangnasida. Ndang gomos nasida maniop haporseaon nasida naung sian sundut tu sundut ditean nasida di inganan na imbaru na, alai gabe di adaptasihon nasida do tu haporseaon dohot hasomalan ni bangso na humaliang nasida.

Boi dohonon turpuk jamita on masuk tu rumang suara nabiah na paingothon bangso i, baik di peribadahan, moral, ngolu siganup ari tongtong manghangoluhon panandaon nasida di Debata Jahowa manang na di dia pe nasida maringanan.

Dalan mangurupi pamanathon turpukta on, ta ida ma jolo parpeakna di bindu na secara umum. Hira 3 bagian bolon bindu ni turpuk jamitaon, ima: ayat 1-6 taringot tu lukisan manang gombaran teofani ni Debata Jahowa; ayat 7-15 sipaingot tu parsombaonon na salah (ay. 8-13), dohot joujou asa pasahathon pelean na sintong; 15-23 sipaingot tu ngolu manang parange na marsipaula/ kesalehan na palsu (ay. 16-21b), peringatan dohot ancaman (ay. 21c-22), pernyataan dohot bagabaga (ay. 23). Di bagian parjolo ma ianggo konteks ni turpuk jamita on.

Sadalan tu tema mingguan, ima Debata do panguhum na sintong, songon panguhum Debata, dihatindangkon di turpuktaon hadirion ni Debata Jahowa, ima na tadok di ginjang teofani.

BACA JUGA BAHAN EPISTEL MINGGU VIII SETELAH TRINITATIS – MINGGU, 7 AGUSTUS 2022

HATORANGAN
Ayat 1a

Mangihuthon ayat 1, ende on didok, sian si Asap. Adong do 12 turpuk ayat di bukku Psalmen na mamangke judul “sian si Asap”, ima Psalmen 50, 73, sahat tu bindu 83. Hata “sian”, di hata heber ima ‘le, astuanna boi; sian, tu, taringot, lapatanna ende i ginurithon ni si Asap, manang digurithon na asing taringot tu si Asap, isarana laho marningot angka ulaonna. Pada umumna pande bisuk padan na robi lobih sapandapot paboa pandohan sian i patorangkon paboa ende i dikarang manang digurithon si Asap. Ala memang si Asap sahalak pande musik sian pomparan Lepi. Garis sundutna selengkapna mangihuthon 1 Kronika 6 i ma; ia si Asap anak ni si Berekia, ima anak ni si Simea (ay. 24). I ma anak ni si Mikhael, i ma anak ni si Baeseya, ima anak ni si Malkia (ay. 25). I ma anak ni si Etni, i ma anak ni si Jara, i ma anak ni si Adaya (ay. 26). I ma anak ni si Etan, i ma anak ni si Zima, i ma anak ni si Simei (ay. 27). I ma anak ni si Jahat, i ma anak ni si Gerson, i ma anak ni si Lepi (ay. 28).

Si Asap raphon si Heman, dohot si Jedutun ima angka siradoti ulaon parende di bagas joro i, nang angka pomparan nasida pe tongtong do manguduti ulaon i, angka na manurirangi huhut umpalu hasapi, arbab, dohot sordam (1 Kronika 25:1-31, 2 Kronika 5:12, 20:14, 29:13, 35:15; Esra 2:41, 3:10, Neh. 7:44, 12:27-47).

Ayat 1b-6

Turpukta on manghatindangkon sada lukisan taringot tu teofani ni Debata. Memang ndang adong di bagasan turpuk on tarsurat pandohan teofani, alai gagasan manang konsep teofani do. Teofani, lapatanna Debata (theos) papatarhon manang mangungkaphon (phaino) hadirionNa.  Debata Jahowa, Tuhan ni saluhut tuhan, ro marsinondang di hasangaponNa i sian Sion (ay. 1b-3).

Torang do marhite peristiwa hapapatar i dipaullop Debata Jahowa hadirionNa, ima Debata Jahowa na songkal jala mamunjung, na mangatasi saluhut huaso na adong di portibion (pat. 5 Musa 10:17). Mangkuling do Debata Jahowa, jala martingting tu sandok tano on “bumi” (ay. 1b), lapatanna saluhut tano on dohot pangisina gabe sitindangi (ay. 6).

Sian Sion do Debata Jahowa ro, ndada sian Sinai. Sion, ima dolok na tung mansai uli, inganan ni Debata Jahowa maringan (pat. Psalm. 46), songon sada Raja (pat. Pslam. 47, 48). Hatongamon dohot hagogoon ni haroro ni Debata Jahowa manang hapapatarNa digombarhon dohot gombaran manang konsep tradisional. Gombaran manang konsep tradisioal i ma marhite pandohan; Debata na “marsinondang” (pat. 5 Musa33:2, Pslam. 80:2; 94:1), di joloNa api mandilatdilat, jala ronggur na gogo situtu humaliang Ibana (pat. Psalm. 18:12a, 97:2a).

Haroro ni Debata Jahowa i ma manguhumi bangsona, jala dijou tano on sian habinsaran tolhas tu hasundutan gabe sitindangi ni panguhumion i. Motif panguhumion i patuduhon huaso dohot hagogoon ni Debata Jahowa na mangatasi manang mangalompoi saluhut. Ibana do panguhum ni saluhut na adong.

Panimpuli lukisan teofani ni turpukta on, parpsalmen mansoarahon dibaritahon angka langit hatigoran (pat. Pslam. 97:6) ni Debata Jahowa, songon panguhum na mamunjung Ibana.

HAHONAAN

Adong do piga-piga na boi ni usulhon songon hahonaan ni turpukta on, laos ditamba angka dongan na parade jamita ma;

  • Pengalaman nyata ni bangso i manang marsasahalak pe tangkas songon sitindangi paboa Debata Jahowa papatarhon hadirionNa mangula, manogihon bangso i asa manghangoluhon parsaoran na mangolu. Ende Psalmen na ginurithon ni si Asap on, paingothon manang mangalumbahon tu bangso i asa unang munggil-unggil nasida manghangoluhon haporseaon nasida lumobi ma di tonga-tonga ni angka na humaliang na marasing haporseaon.
  • Debata Jahowa do panguhum na mamunjung, ima Debata Jahowa na paluahon dohot na sinomba nasida. Di toru ni gomgomanNa do nasa na adong. Unduk do tu hata dohot huasoNa saluhutna. Alani ndang adong na talup angka na asing sihabiaran dohot sipardebatahonon nanggo sada sian nasa na adong i.
  • Panandaon na sintong on, mampangkorhon hamanaton marparange di ngolu siganup ari. Marpardomuan situtu do panandaon i tu moralitas siganup ari. Asa ndang tarsirang na dua hiring on. Parange ima indikator panandaon dohot holong na tutu tu Debata Jahowa.

Kunjungi juga kanal YouTube HKI untuk mengetahui informasi seputar pelayanan HKI.

Penulis:
Pdt. Dormen Pasaribu (Kantor Pusat HKI)

Penyunting:
Yohanes Simatupang

About Yohanes Simatupang

Staff Biro Infokom

View all posts by Yohanes Simatupang →