EPISTEL MINGGU PASKAH 17 APRIL 2022-MAZMUR 103:1-5

Epistel Minggu Paskah 17 April 2022
PASKAH I
MINGGU, 17 APRIL 2022
“NUNGA HEHE JESUS“
Psalmen 103:1-5

PATUJOLO

Buku Psalmen 103 on dipungka dohot joujou tu pamujion di Debata Jahowa (ayat 1-2), dung i diuduti muse dohot sibingkasi, boasa ingkon mamuji Tuhan i (ayat 3-19), jala dipaujung dohot joujou tu pamujion di Debata (ayat 20-22). Targoar do Psalmen on sada joujou namarisihon asa mamuji Debata. Joujou tu dirina sandiri. Na manghatai do parpsalmen on tu dirina sandiri. Jala sian i ma gabe tubu sada ende pamujion tu Debata. Naeng pujionna Tuhan i sian nasa gogona. Dung i dipaingot do dirina asa unang hea manghalupahon denggan basa ni Debata. Sipaingot i patuduhon hadirion, sian bagas ni roha marningot asi ni roha ni Debata Jahowa.

Ndang hasuhatan denggan basa ni Debata. Dijou Tuhan i do hita laho mamuji Debata, ala denggan basa ni Debata naung tajalo di bagasan ngolunta. Di ari parningotan haheheon ni Jesus di bagasan sadarion di Epistel Minggu Paskah 17 April 2022 on, dijou do hita asa mamuji dohot manghaporseai haheheon ni Jesus. Alai ndang holan i, dohot do disosoi tu hita asa manghaporseai huaso ni Debata na tarida di haheheon ni Jesus.

Porlu do hita marningot denggan basa dohot asi ni roha ni Debata naung tajalo sian na jolo sahat tu sadarion. Marjea do jolma na so olo marningot denggan basa ni Debata Jahowa di bagasan ngoluna. I ma halak na mangarajumi ngoluna dohot nasa na adong di ibana, holan ala ni gogona sambing. Unang tung tahalupahon nanggo sada angka asi ni rohaNa i di hita. Psalmen on tung tangkas panindangion ni haporseaon na i ma: Parjolo, Jahowa do na mamparrohai angka halak na dangol marhite na pajongjong hatigoran dohot uhum tu nasida. “Parasiroha jala pardenggan basa do Jahowa, lambat tarrimas jala parasi roha godang” (ida 2 Musa 34:6; Psalmen 86:15; Nehemia 9:17).

BACA JUGA BAHAN KHOTBAH MINGGU PASKAH I – MINGGU, 17 APRIL 2022

HATORANGAN

Angka ulaon na adong di portibion olo do mambahen hita gabe lalap di bagasan ngolunta, gabe ndang taingot be laho mamuji Tuhan i. Ndang tarajumi angka pambahenan ni Debata di bagasan ngolunta. I do umbahen maol hita porsea tu Tuhan i, ala gumodang do partingkianta tu angka ulaon siganup ari marimbangkon mamuji Debata.

Buku Psalmen on paingothon hita asa unang lalap hita di ngolu siganup ari. Dirajumi si Daud do pambahenan ni Jahowa di bagasan ngoluna umbahen digurithon ibana ma ende pamujion tu Jahowa di bagasan roha na ias. Ndang adong pangurupion dungkon ni Jahowa. Di na marningot hita di haheheon ni Jesus sian na mate jala mulak mangolu di ari patoluhon. Sian i nian ndang talup be hita mansoadahon pambahenan ni Jahowa di ngolunta.

Diboto Raja Daud do angka halongangan na adong di bagasan ngoluna marhite na dipalua ibana sian angka hamaolon na di portibion. Ala ni i digurithon dibuku Psalmen on “Puji ma Jahowa ale tondingku … ” (ayat 1-2). Marisuang do saluhutna pamujionta i molo ndang taulahon angka pambahenan ni Jahowa di bagasan ngolunta. Dipatuduhon Debata do hasatiaonNa tu jolma marhitehite na so tarrimas Ibana marnida pangalaho dohot pardosaon na niula ni angka jolma i. “Ibana do manesa dosam sudena, Ibana pamalum sahitmu … ” (ayat 3). Ndang dibaloshon tu jolma i angka pangalaosion dohot hajahaton na niulana.

Hinorhon ni dosa dohot hajahaton ni jolma naung ni rajaan ni sibolis, ndang tarbahen na be patubegehon angka pujipujian tu Debata. Ise do na martanggungjawab di si, tontu hita jolma do. Alai sai tongtong do Ibana di bagasan hasabaron manganjuanju jolma i. Asa anggiat nian marhamubaon ni roha jala sai tongtong mian jala mangolu di bagasan goar ni Debata Jahowa.

Di pataridahon Jahowa do holongNa i tu angka jolma na mian di bagasan dosa. Asa unang mago jolma i didok roha ni Jahowa di suru do Jesus Kristus ro tu portibion laho patupahon haluaon nang hatuaon (ida Johannes 3:16; 1 Johannes 4:10). Dipatuduhon Jesus Kristus do asi dohot holong ni rohaNa di na laho manghongkop jolma i sian dosa (ida Mateus 9:9-13; Lukas 7:36-50). Pola do mate tarpajal Ibana di hau silang. Nang pe gantung Ibana di hau silang i tongtong do dipatuduhon holong dohot asi ni rohaNa marhite pandohan na mandok: “Ale Amang! Marpamuati ma rohaM mida nasida, ai ndang diboto nasida na binahen nasida i” (ida Mateus 23: 34). I ma sada sipeopon di ngolu ni jolma, paboa na torus do Jahowa mian di bagasan holongNa.

Ibana do na paluahon ngolu ni jolma sian hamagoan (ayat 4). Hamatean i ma sada alo na mansai borat jala ndang taralo. Songon dia pe gogo ni tambar dohot panambarion ni angka na malo. Ndang adong manang ise pe na gogo taringot tu hamatean. Songon dia pe hita padaohon hamatean i, alai sai tong do ro jala ndang taboto sadihari harorona i.

Godang do nang angka sipingkiran di bagasan ngolunta on. Alai holan ala ni holong dohot lambas ni roha ni Jahowa do boi hita Manahan. Molo songon si Daud nunga jotjot ibana sai diburu angka musuna. Dung malua ibana sian pamuruon i dirajumi ibana do saluhut pambahenan ni Debata di bagasan ngoluna. Ai boi ibana malua sian hamagoan ala Debata do na paluahon ibana. Songon si Daud i tama do hita mandok mauliate tu Debata. Ala gabe pangomoan do hamatean i. Gabe mansohot mandapothon Tuhan jala manontong las ni rohanta di bagasan Tuhan (ida Filipi1:20-22) ndang adong be sidalian mabiar tu hamatean (ida 1 Korint 15:55-57). Ala ni i do dipaborhat Jesus angka siseanNa dohot sude angka na porsea i. Asa mamaritahon barita na uli taringot haluaon dohot haheheon na binoan ni Jesus tu saluhut bangso.

Marhite i do gabe sude nasa ulu ni tot manghatindanghon paboa Debata di bagasan Jesus Kristus na mangalehon haluaon dohot hatuaon di bagasan ngolu ni jolma. Tapatogu ma rohanta mandok mauliate sian nasa gogo tu Debata marningot sude asi ni rohaNa tu hita. Marhitehite angka ende, pujipujian, tangiang dohot mangula ulaonta di bagasan lomo ni roha ni Tuhan i. Naeng ma mulak rata ganup semangatta mamuji dohot mangulahon lomo ni rohaNa.

Dung tangkas tahangoluhon jala tahamauliatehon asi ni roha dohot denggan basa ni Debata. Tarjou do hita manogihon angka dongan na asing. Asa dohot nasida mananda asi ni roha ni Debata. Gabe rap dohot hita pangasaphon Debata di bagasan pardalanan ni ngolunta. Saluhut naung mananda Tuhan i gabe dongan ni Tuhan i mangula lomo ni rohaNa. Alani i adong do tohonan dipasahat tu hita asa manogihon, mangarahon halak na asing gabe si puji Debata. Taulahon ma tohonan i, sian las ni roha dohot roha mauliate tu Debata. Ala dipangke dope ngolunta mangarahon angka donganta.

Ingkon rap mamuji jala pasangaphon Debata do hita dohot saluhut na tinompa ni Debata di portibion. Ingkon sude do jolma i manghatindangkon paboa Debata do sitompa ibana. Ndang adong haluaon nang hatuaon so dungkon ni sian Debata. Ndang boi halupahonhon nanggo satongkin pe di bagasan ngolunta laho mangarahon donganta laho mamuji dohot pasangaphon goar ni Debata.

Ibana do pamahap rohanta marhitehite denggan basa (ayat 5). Halak na porsea jala sai manongtong mamuji Debata sai na dongananna do molo tung pe merus sibukta dohot rohanta. Holan Debata do partanobatoanta saleleng ni lelengna (ida Psalmen 73:25-26). Ibana do mamasumasu dohot mangalehon hangoluan di hita saleleng ni lelengna. Ibana do na mangalehon ngolu na imbaru di angka na marhaposan tu Jahowa. Angka na marhaposan tu Jahowa maruli hagogoon mardapotdapot, gabe marhabong ni lali laho manaek. Marlojongi nasida ndang olo loja, mardalani nasida ndang olo mandate (ida Jesaya 40:31).

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Mahite turpuk Epistel Minggu Paskah 17 April 2022 on tontong ma hita mamuji Tuhan. Nang pe godang angka hamaolon na taadopi di bagasan ngolunta arsak nang las ni roha. Nang angka na masa di bagasan ngolunta boi tapatudos songon sada solu na metmet na mardalan di tongatonga ni laut na bidang jala na bagas. Mansai godang do ancaman na boi mangkaromhon solu i. Sian galumbang na balga jala gogo dohot alago na gogo situtu. Di ganup tingki boi do ro galumbang i jala mangauphon solu i dohot pangisina.

Pardalanan ni jolma i pe suang songon i do, godang do angka na masa di na mandalani ariari ni ngolunta. Mansai godang sangkap ni portibion, sibolis laho mangaithon jolma i asa mian, mangolu di bagasan pardosaon. Jotjot dilehon sibolis i hasonangan parsatongkinan di ngolu ni jolma i. Asa mian di dosa jala mago jolma i sian adopan ni Debata. Mansai godang masa jala songgop parungkilon dohot hasusaan di bagasan ngolunta on. Alai molo tung songgop pe tu hita angka parungkilon i ndada dalan ni Debata i laho manguhumi manang pamatehon jolma i. Alai boi do parhatopotonta dalan ni Debata do i laho patoguhon haporseaonta. Ndada molo ro haporsuhon, sitaonon i gabe mandate, maheu pangkilalalaanta. Alai merhitehite sitaonon i gabe lam pita mata ni haporseaonta jala lam solhot hita tu adopan ni Debata. Kita tidak ingin pulang karena ada gelombang yang besar, akan tetapi manfaatkanlah gelombang itu untuk mencapai tujuan. Amen.

Penulis:
Pdt. Suan Dame Siahaan

Penyunting:
Timothy P. Saragi

BAHAN EPISTEL INI JUGA DAPAT DIUNDUH DENGAN MENG-KLIK TULISAN DI BAWAH INI
EPISTEL MINGGU 17 APRIL 2022 – MINGGU PASKAH I