EPISTEL MINGGU 14 AGUSTUS 2022-PSALMEN 82:1-8

Epistel Minggu IX Dung Trinitatis 14 Agustus 2022
MINGGU IX DUNG TRINITATIS
MINGGU, 14 AGUSTUS 2022
“MANGIHUTHON JESUS SIAN NASA ROHA”
Psalmen 82 : 1-8

PATUJOLO

Di hata Heber digoari do bukku on ‘tehillim’, lapatanna angka ende pamujion. Tutu ndada sude ende di Psalmen on marrumang pamujion. Alai sude ende i marharoroan sian parsiranggutan di ngolu na rap dohot Debata (Jahowa) do umbahen digurithon angka na porsea Psalmen. Marragam do tutu Psalmen (ende) i di bukku on. Adong do disurathon marrumang tangiang, adong panghatindanghonon di haporseaon, adong muse ma on pangajarion. Olo do sipata hira holso manang hoi hinorhon ni ragam angka porsorion. Angkup ni olo do sipata hira ‘pangiburuon’ marnida sonang ni ngolu ni halak angka na geduk marroha (pat. bindu 73).

Turpukta di ombas on taringot tu ‘tingting tu angka panguhum’. Sada bindu na manggombarhon Debata (Elohim) jongjong / tindang di adopan ni angka debata laho mandabu uhum. Digombarhon do angka debata sileban i gabe songon angka panguhum (hakim) na mandabu uhum di bagasan paruhuman; marperkara di pengadilan. Haputusan angka natinotophon nasida dang tingkos. I do umbahenna disuru patingkoson (ay. 3). Dipaingot Elohim angka debata na manguhum i di hadirion nasida na tung mansai sangap. Hundulan nasida sada inganan na tung mansai margogo (mardomu tu sangapna) laho patudu hasintongan.

Impola ni tona sian turpuk on digurithon marrumang ‘puisi’. Sada sian ragam ni sastra na ingkon manat sigatanta asa dapot nidokna. Molo taparrohahon na ualu ayat on, hira na dua do ragam ni paniseon (percakapan) disi. Sada ma i sian na paandar barita on (ay. 1 & 5 – 8), sada nari muse parhataan ni Debata Elohim (bentuk kalimat langsung) i ma ayat 2 – 4. Manat ma nian taparrohahon dia nidok ni Elohim, dia muse nidok ni panurat.

BACA JUGA BAHAN JAMITA MINGGU IX DUNG TRINITATIS – MINGGU, 14 AGUSTUS 2022

HATORANGAN

Ayat 1

Ende sian si Asaf. Parsagi ni ende di bindu on masuk tu angka horong ende pinauli ni Asaf. Si Asaf i ma sahalak pomparan ni si Gerson tubu ni Lepi naung tinontuhon gabe siuluhon ende di bagas joro ni Jahowa. Andorang di undungundung dope halak Israel manomba Jahowa nunga dipillit si Asaf siuluhon ende di si. Sai hira na marsarita do endena i. Digombarhon do tindang Elohim di luhutan ni debata. Marahua Ibana disi? Mandabu uhum di tongatonga ni angka debata. Dietong do nasida angka na nilehon huaso laho mandabu uhum. Di turpukta on boi dohonon panguhum (hakim) do nasida.

Ayat 2

Huroha diboto Elohim do na mardingkan angka panguhum i di na mangula nasida tingki mandabu uhum. Mardingkan nasida tu angka parjahat. I do umbahen didok: “Sadia leleng on do pageduhonmuna uhum”, ninna. Songon hata paminsangon do i sasintongna. Di hata Heber didok admatay. Hata hoi do sasintongna admatay. molo di halak Toba, ra hira hoi na mandok: “amangoi amang…” Lam tangkas muse dihatahon hageduhon ni angka panguhum i. Dia ma i? Mardingkan dompak angka parjahat. Meleng rohana tu angka parjahat, tontu tu hajahaton ma rohana.

Ayat 3 – 4

Patingkos uhum huhut mangondihon na metmet dohot na sopot so marama, na dangol dohot na pogos. Sai songon na di paduahali mangondolhon tona i di ayat 3 dohot 4. I ma alani ringkotna tona i. Tona dia ma i angka dongan? Baliksa sian ayat 2 naking asa angka halak sisongon on do siampinan. Mangondihon angka na gale di humaliangta i ma tona ni Psalmen on di suhi ni ngolu sosial. Ingkon tangkas jala tumpol do nian angka panguhum manarihon angka na gumale. Unang golom riaria, sude diparsaorhon, tu hageduhon nang tu angka na denggan pe dijalo tongtong. Ingkon marhiras ni roha do hita mamillit laho mangondihon angka na gale. Unang biar rohanta.

Ayat 5

Dipaboa parpsalmen on na so olo angka panguhum i parrohaan. Mardalani nasida di haholomon. Sai angka na geduk do di rohana. Halak (panguhum) si songoni, digombarhon songon halak na mardalani di haholomon. Molo dung mardalan di haholomon tontu dang adong be tudutudu (arahan). Dang binoto ojahan ni tano dia bahen sidegean ni pat. Reberebe ma sude angka ojahan ni tano on.

Ayat 6 – 7

Dipaingot Debata angka panguhum i taringot tu hadirion nasida. Sada status na tung mansai arga di tongatonga ni masyarakat. Pola do dipangke hata Angka Debata huhut didok anak ni Nasuntimbul. Anak ni Elyon do nasida, i ma pangulu ni debata Kanaan. Da sangap do tutu angka panguhum i? Tung so boi do gere nasida di ulaonna i. Alai ndada na gabe manongtong huaso nasida i. Didok, mate do hamu songon jolma hian. Martingki do status nasida i. Muse didok, jala tinggang do hamu sogot songon raja na asing sada. Songon huaso ni sada raja gabe mansadi do i molo dung tubu huaso harajaan na asing. Tinggang do huasona i ala digulut raja na ro sian pudina. Sandok dang manontong nasida.

Ayat 8

Pangidoan ni parpsalmen asa hehe ma Debata manguhumi tano on. Targombar do pangidoan on paboa porsea do par-psalmen di hagogon ni Debata. Gumogo do Ibana sian sude debata na ni angkupan ni tano on. Tung so adong do dalan laho marsigantung tu debata sileban. Marpangunsandean tu Debata na sintong padiri angka jolma na olo manghatindangkon hasintongan.

HAHONAAN

Ise do Debata na tasomba i? Sipata dang tangkas panandaionta di Ibana ala jongjong do angka debata sileban laho mangaliluhon hita. Reberebe tano on lapatanna dang adong ojahan na tontu di ngolunta. Marpanghorhon do leak ni ngolu partondion sisongon on laho manontuhon pangalahonta taringot tu uhum dohot hasintongan. Unang pola mabiar hita pajongjong uhum hasintongan di ngolu haporseaonta i ala hehe do Debata pajongjong uhum.

Nunga hehe Tuhan Jesus Kristus bahen parpintoranta. Dang adong ganggu ni roha disi. Ai di bagasan Ibana sude hita masuk tu uhum hasintongan binoanNa i. Dia ma i? Di bagasan Jesus dapot hita hasintongan, dipintori do hita asa dapot haluaon. Boasa ganggu be rohanta angka dongan? Pillit ma Jesus..!!!

Kunjungi juga kanal YouTube HKI untuk mengetahui informasi seputar pelayanan HKI.

Penulis:
Pdt. Rinto P. Nainggolan, S.Th

Penyunting:
Yohanes Simatupang