JAMITA MINGGU 3 JULI 2022 – GALATIA 6:1-10

JAMITA MINGGU, 3 JULI 2022 - MARPARANGE NA DAULAT TU SALUHUT JOLMA

Jamita Minggu III Setelah Trinitatis 3 Juli 2022
MINGGU III SETELAH TRINITATIS
MINGGU, 3 JULI 2022
MARPARANGE NA DAULAT TU SALUHUT JOLMA
Galatia 6:1-10

PATUJOLO

Turpuk Jamita Minggu 3 Juli 2022 sadari on mangondolhon pangajarion ni Apostel Paulus maradophon ruas ni huria na adong di Galatia. Pangajarion taringot tu na padalanhon sada  kewajiban (ulaon na ingkon dipatupa) tu angka dongan huhut pauliulihon “parsaoran na badia” di bagasan holong na sian Kristus. Boasa diondolhon apostel i pangajarion si songon i? Ala sanga do lipe pangantusion ni ruas i hinorhon ni pangajarion na ro sian angka pangajari na sai mangondolhon parugamoon ni halak Jahudi.

Pangkorhon ni pangajarion na lipe i, gabe manegai hadengganon ni parsaorannasida, jala manegai misi nang pangkobasion di tongatonga ni huria i. Halipeon mangantusi Barita na Uli naung pinasahat ni Apostel Paulus di mula na i. Poda na lipe sian angka pangajari na asing i, naeng patigoron ni Apostel Paulus. Laho patigoron ni Apostel Paulus ma pangantusion na lipe i, huhut lehononna sada pangantusion na sintong taringot tu pangalaho manang etika Kristen na sintong.

Marhite na manaksihon pengalaman pribadina di pangkobasionna songon Apostel ni Kristus, arop do rohana adong hamubaon ni pangantusion, roha nang pangalaho ni huria i. Di turpuk on dipajojor Apostel Paulus ma angka aha na patut sipeopon, sipingkiran jala siulaon asa gabe marlapatan di tongatonga ni parsaorannasida nang maradophon angka dongan na asing, boi gabe tiruan na denggan. Boi ma denggan parsaoran ni huria i, nang na sian horong Jahudi manang Junani. Dao ma pangalaho na sai mura patimbotimbohon diri, na muramura manguhumi dohot angka ulaon na asing na hombar tu si.

BACA JUGA BAHAN EPISTEL MINGGU III SETELAH TRINITATIS – MINGGU, 3 JULI 2022

HATORANGAN

Andorang turpuk Jamita Minggu 3 Juli 2022 on, dipodai Apostel Paulus do asa marhitehite holong, masioloan nasida (melayani seorang akan yang lain oleh kasih) (ida Galatia 5:13). Di parmulaan ni turpuk on diulahi Apostel Paulus do muse manorushon angka poda nang hata sipaingot na patut sipeoponnasida. Asa boi nasida patupahon pangkobasion sama nasida di bagasan holong. Huhut asa manat nasida di hasomalan na boi gabe sipangambati di nasida laho patupahon angka na uli na denggan hombar tu lomo n iroha ni Debata.

Hata “martondi na lambok, huhut mamatahon diri asa unang tarunjun” gabe sada hata na ingkon sipeopon ni angka parhalado nang ruas ni huria i. Lumobi ma di na mangadopi ruas na “tarsomong jolma mardosa”. Tontu sude do jolma hea tarsomong mardosa, ala ni na madabu tu elaela ni sibolis. Tarsomong (kedapatan) ala so tolap mangarajai diri, boi sajo do masa di sude jolma. Di sundut ni na umposo manang di sundut ni na tumua, na pistar manang na hurang pistar, pogos manang mora. Di halak na sangap manang na hurang sangap. Ndang mardia imbar. Madabu di bagasan dosa pataridahon jolma na terbatas do hita, jolma na so sempurna.

Mangadopi angka jolma si songon i ma hita. Didok Apostel Paulus “naung taruli tondi” asa olo “patureturehon marhitehite tondi na lambok, huhut mamatahon diri asa unang tarunjun”. Angka halak na porsea jala naung mangkangoluhon manang naung taruli di Tondi, ringkot patureturehon angka halak na tarsomong dosa. Di ulaon na patureturehon i unang tung  marnaloja hita manosoi, mamodai marhite hata na lambok huhut mameakhon hata i di inganan nang partingkian na topet. Asa tung adong hamubaon (pertobatan) di dongan jolma na tarsomong mardosa i. Rumang ni ulaon si songon i molo di bahasa Junani didok “katartizete”, lapatanna meluruskan tulang sendi.

Hata “katartizete” marlapatan ulaon laho patigorhon, manosoi nasida di hadosaonna laos mangarahon nasida asa marhamubaon, mulak songon na somal, mangulahon na patut hombar tu adat hasomalon di hakristenon. Molo dung marhamubaon donganta i, tong dope ingkon apulanta nasida marhite holong na marpamuati. Dung i ingkon olo hita patoguhon holongta maradophon nasida, asa tung denggan muse parsaoranta. Parsaoran angka naung pinarbadiaan ni Kristus i.

Ingkon di bagasan halambohon ni roha do hita mangulahon saluhutna i. Sotung di bagasan muruk manang rimas. Molo do bagasan muruk manang rimas ni roha do hita mngulahon i, dos ma hita songon pangalaho ni jolma na lomo rohana mida donganna tarsomong. Jadi ingkon marungkil do hita mida donganta na tarsomong. Molo marungkil do hita di hahurangan ni donganta, marlapatan do i gabe tanggungjawabta do paingothon, mamodahon poda na sintong. Asa boi marpangkorhon angka hata poda nang sipaingot na tapasahat i marhite hamubaon ni roha di angka jolma hasahatan ni hata poda sipaingotta i.

Boasa ingkon di bagasan tondi halambohon huhut mamatahon diri unang tarunjun hita di na pasahathon hata sipaingot tu donganta na tarsomong i? Ala di partingkian na asing boi sajo do hita na gabe tarsomong mardosa. Molo hita do na tarsomong mardosa, donganta na asing pe na paingothon hita gabe mamangke cara naung hea taulahon. Memang bangko ni jolma do bangkol manjalo hata sipaingot molo di bagasan rimas manang muruk. Secara otomatis sai adong do pembelaan diri sian dirinta nang pe taboto hasalaanta, molo tarrimas jolma na paingothon hita.

Naeng ma nian jumpa di ngolu hakristenonta songon na niarophon ni Apostel Paulus, I ma pangalaho marsiurupan laho mamorsan angka na dokdok. Ai i do dalan mangaradoti patik  ni Kristus. Pangajarion ni apostel on gabe parsiajaran na arga di hakristenon, sian na robi sahat tu partingkian si saonari. Pangajarion on boi do pasomalsomal hasabaronta jala mangonjar hita laho mangkaholongi angka donganta na asing di bagasan hagaleonna, haotoonna nang di angka hahurangan na asing. On ma ciri khas ni hakristenon, songon naung niula ni angka donganta na porsea di mula ni hakristenon di portibi on.

Songon i do sasintongna ngolu ni halak Kristen laho manggohi uhum ni Kristus, i ma uhum Holong. Uhum na gabe rimpunan ni nasa uhum na adong di Padan na Robi, na pineop ni angka halak Jahudi. Uhum holong na imbaru, na gabe ciri khasta, i do na mangonjar hita asa marpangalaho lambas ni roha, marpamuati mida dongan na mangulahon na jat tu hita, mamparsangapi dongan na asing, nang pe marasing pangantusionna huhut patuduhon ngolu na masiasian. Nang pe ndang di toru ni uhum ni si Musa be hita, alai hot do di toru ni uhum ni Kristus.

Memang molo jujur hita mangida hakristenon si saonari, tung jotjot dope hita marpangalaho songon jolma na di toru ni uhum ni si Musa. Isarana molo adong donganta na tarsomong mardosa, gabe dohot do hita manambai beban ni na tarsomong i. Sai jotjot do tarbege di sipareonta pangkataion na manguhumi, isarana “patut ma antong songon i diae ibana, ai holan na manangko, mabuk, marjuji do ulaonna, ujungna sega ma ruma tanggana”. Hape ndang tasadari gabe dohot hita manguhumi di si, manamba beban di na mardosa i. Hape molo taihuthon pangajarion ni Apostel Paulus di turpuk jamita on, ingkon marungkil do hita molo jumpa di donganta si songon i. Angka halak na porsea, naung di toru ni uhum ni Kristus, ingkon di bagasan tondi na lambok do mamodai dongan na tarsomong mardosa.

Disosoi Apostel Paulus do hita asa manangkasi ulaonta be (menguji pekerjaan kita). Manangkasi sian roha na marsitutu, hombar tu hasintongan ni Hata ni Debata. Pangalaho si songon i gabe sada ulaon na ingkon diulahon (kewajiban) sude halak Kristen. Angka pande bisuk mamodahon, ganup borngin andorang so modom hita, ringkot do taingot angka naung taula di na sadari i, sian na hehe hita sian podomanta manogot na i sahat tu na borhat muse hita naeng modom di borngin na i. Angka dia ma na hombar tu lomo ni roha ni Tuhan i, angka dia ma na maralo, tatangkasi be ma. Hasomalan si songon i gabe mamboan hita tu hatangon di haporseaon nang di pangalaho/ etika.

Mansai ringkot do di hita marpangalaho manangkasi ulaonta be. Ala ganup jolma adong be do si porsanonna. Lapatanna, di ari paruhuman i, nasa jolma ingkon mangalehon pertanggungjawaban, mardabudabu sian naung niula na uju mangolu di portibi on. Tu Debata do hita mangalehon pertanggungjawaban, ndang tu dongan jolma. Ala ni i ukuran ni Debata do na marlakku, ndang ukuran ni jolma. I do na ingkon si pamanatonta. Asa molo pe taula angka na denggan i, ndang ala biar mida jolma, tung ala ni biar mida Debata do.

Diajari Apostel Paulus do nang ruas ni huria asa mangargahon angka na mangkobasi nasida. Ingkon rajuman ni rohanasida do, na Debata do na pabangkithon angka parhobas di tongatonga ni huria i. Ndang sude jolma ditodo Debata gabe parhobas ni huria. Adong do kekhususan. Marhak do parhobas na mangula di porlak ni Tuhan i (na secara full time) dapotan ngolu sian pangkobasion na. Ala sian Debata do dijalo tohonan i, i do umbahen di nasa pangkobasionna borhat sian Hata ni Debata jala sangkap ni Debata do na ingkon dipasaut, ndang sangkapsangkap ni roha ni parhobas i. Angka i do na ingkon dipamanat angka parhobas di ulaon pangkobasionna. Molo songon i do parange ni angka parhobas, patut ma ibana arga di adopan ini angka ruas na hinobasan na.

Didok Apostel Paulus, “unang hamu lilu; ndang olo Debata leaan. Ai i disabur halak, i do gotilonna. Marhite hata on dipodai do halak Kristen sian na jolo sahat tu nueang asa dirajumi hadosaon nang haotoonna. Molo sai adong angka sidalian asa unang mangula siulaon na ingkon ulaonna. Ingkon saurdot do hata nang ulaon. Unang dihatahon Kristen, alai pangalahona ndang Kristen. Molo siihuthon Kristus ingkon marpangalaho songon naposo ni Kristus do. I ma konsekuensi ni ngolu ni haporseaonta, sapala naung taihuthon Kristus, ingkon rade ma hita laho manuhuk silang na ditontuhon tu hita.

Diajari Apostel Paulus do hita, asa unang madabu tu pangalaho na so konsisten, marhite gombaran boni na sinabur ni pangula di balian. Partingkian sonari, i ma tingki manabur. Molo dung jumpang partingkian na mangihut, i ma tingki laho manggotil hombar tu na sinabur. Adong dua mansam ni boni na tinabur i. Na parjolo, i ma na manabur tu dagingna, na ingkon mangotil do ibana sian dagingna hamagoan. Na paduahon, na manabur tu tondi, na ingkon manggotil do ibana sian tondi i, hangoluan si salelenglelengna. Marlangku ma uhum “tabur tuai” songon pangajarion ni Apostel Paulus di turpuk jamita on.

Di ujung ni pangajarion ni turpuk Jamita Minggu 3 Juli 2022 on diondolhon Apostel Paulus do asa adong di hita haputusan na sintong, komitmen na tegas, na jelas. Dilehon Tuhan i do di hita kebebasan laho mamillit dalan sidalananta. Alai dipatudu do dalan na patut. Molo mardalan hita di dalan naung ditontuhon ni Tuhan i, taruli ma hita di bagabaga nang ragam ni pasupasu ni ngolu. Saonari nang sogot pe, sai na marhasonangan do di harajaonNa. Marbisuk ma hita laho mamparhaseang tingkinta marhite angka ulaon na denggan, na marguna tu diri, dongan nang humaliangta. Unang marna montok hita mangulahon angka na denggan saleleng di ngolu on.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Marhite poda na tegas maradophon haliluon ni ruas na adong di Galatia dipasahat Apostel Paulus pangajarionna. Marhite i adong pigapiga na ringkot sipahusorhusoronta:

  1. Asa taparungkilhon molo adong sian tongatonga ni parsaoranta na tarsomong mardosa. Gabe tarjou do hita laho mamodai angka dongan na tarsomong mardosa di bagasan lambok ni roha huhut mamatahon dirinta asa unang tarunjun. So tung gabe dohot hita manambai boban ni donganta na tarsomong i, marhite hata na manguhumi. Ai sian i do tarida hatangon ni haporseaonta, hatangon ni pangalaho/ etika ni hakristenonta.

  2. Asa taharingkothon ngolu na masiaminaminan songon lampak ni gaol, masitungkoltungkolan songon suhat di robean. Ai i do hataridaan ni paboa naung mangolu hita di uhum ni Kristus, i ma uhum na imbaru. Laos i do patuduhon identitasta na unik, na marasing sian jolma na asing, na so mananda Tuhan i dope.

  3. Asa unang marnaloja hita laho patupahon angka na uli, na denggan songon na hinalomohon ni Tuhan i. Taula pe angka na denggan i, ndang na laho pasonangkon donganta jolma. Sotung madabu hita tu ngolu kemunafikan. Alai laho patulushon sangkap ni Tuhan i do na ingkon ulaonta hombar tu sangkap hatuaonNa. Amen.

Penulis:
Pdt. Tumbur Siahaan, S.Th

Penyunting:
Timothy P. Saragi

BAHAN JAMITA INI JUGA DAPAT DIUNDUH DENGAN MENG-KLIK TULISAN DI BAWAH INI
JAMITA MINGGU 3 JULI 2022 – MINGGU III SETELAH TRINITATIS

Bagikan Postingan ini:

About Timothy Saragi

Staf Biro Infokom HKI

View all posts by Timothy Saragi →