JAMITA MINGGU 28 AGUSTUS 2022 – MATEUS 16:21-28

Evangelium Minggu 28 Agustus 2022

Jamita Minggu XI Dung Trinitatis 28 Agustus 2022
MINGGU XI DUNG TRINITATIS
MINGGU, 28 AGUSTUS 2022
MANSOADAHON DIRI, MAMORSAN SILANG, JALA MANGIHUTHON JESUS
Mateus 16:21-28

PATUJOLO

Marbonsir ma turpuk on sian pangantusion na torop taringot tu Mesias nang panghirimon na ro sian pangantusionna i. Tung pe naung didok angka sisean-Na i Ibana Mesias (16), ndang jumpang dope di nasida pangantusion songon na hinirim ni Jesus. Asing do dilapati angka sisean i pandohan “Mesias” nanigorahonna tu Jesus. Ndang boi tarlupahon ni bangso Israel identitasna songon bangso natarpillit na hea manghilala hamajuon di masa ni Raja Daud.

Alai, gabe mago do muse hamajuon i ala maralohon Asyur, dipatalu Babel, Persia, Yunani, sahat tu partingkian ni bangso Rom. Marabad-abad lelengna ndang ra jumpang ni bangso i hamajuon songon masa naung salpu i. Mangihut tu partingkian, lam disadari bangso i, naso tupa be nasida mangulanghon hamajuon na parjolo i molo mangasahon hagogoon politik. Alani i manghirim nasida dihuaso adikodrati na sian Debata marhitehite Mesias na ro sian pomparan ni Raja Daud. Marpardomuan tu si, ndang tarjalo roha ni angka sisean i ditingki di dok Jesus ingkon manaon na porsuk Ibana sian angka sintua ni natorop, sintua ni malim nang siboto surat, jala pola ingkon mate bunuon Ibana. Ala dihirim roha ni nasida do, ia Mesias i ma sahalak namarhuaso dohot na tuk pataluhon angka musu.

BACA JUGA BAHAN EPISTEL MINGGU XI DUNG TRINITATIS – MINGGU, 28 AGUSTUS 2022

HATORANGAN

On ma partingkian na parjolo sian tolu partingkian na pinangke ni Jesus lao mamaritahon na ingkon manaon na porsuk Ibana (Pat. Mat. 17:22-23; 20:17-19). Di na tolu partingkian i sai dijua angka sisean-Na i do pandohan ni Jesus. Di si ma manongtong Jesus mangajari, pabidangkon parbinotoan ni angka sisean-Na i taringot “Pemuridan”. Adong pigapiga tema na ringkot siidaonta di turpuk on, i ma:

Haporsuhon i ma Parmulaan ni Hamuliaon

Dungkon dipataridahon Jesus angka halongangan na pinatupa-Na di Galilea, tarbarita ma goar ni Ibana jala godang natorop paihutihut Ibana. Laho ma Jesus dungkon ni i tu Jerusalem, di si ma dipungka Ibana panuturion tu angka sisean-Na i taringot angka sitaonon ni Mesias. Ndang tarpasiding ianggo silang i jala ingkon manaon na porsuk Ibana sian angka sintua ni na torop, sintua ni malim nang sian si boto surat, jala ingkon mate dibunu.

Dang dirimpu angka sisean-Na i ingkon adopan ni Mesias haporsuhon i. Dungkon marsuraksurak natorop paihutihut Jesus manghirim angka sisean i asa lam dipataridahon Jesus pencapaian na lobi sangap dope, hape balik do namasa sian nahinirim ni nasida. Nunga tolu taon dipaihutihut angka sisean-Na i Jesus jala nunga godang natinadingkon ni nasida holan paihutihut Jesus ala halongangan bolon do nasaleleng on pinatupa ni Jesus. Siala ni i do ro pandohan ni si Petrus mandok: “ Mesias na pinarbagabaga i do Ho (16:16), ditingki disungkun Jesus ise do Ibana diangka sisean-Na i. Barita napinasahat ni Jesus tompu pagogohon panghirimon ni angka sisean i taringot tu Jesus na laho gabe Raja na paluahon bangso Jahudi sian gonggoman ni bangso Rom.

Andul do partinandaan dohot panghirimon ni angka sisean-Na i, ai parbinotoan portibi do dibahen nasida mananda Jesus. Hagiot laho paulak hajayaon na parjolo i, i do dipingkiri nasida. Molo mate Jesus astuanna sipartalutalu do hape Ibana, ai hamatean gombaran ni hataluon do i. Terfokus tu si nama roha ni angka sisean i, dang dilapati nasida be pandohan ni Jesus na mangihut, na mandok mulak mangolu Jesus di ari patoluhon. Hape di si do Jesus mangalehon pangantusion na imbaru (merekonstruksi ulang) taringot tu lapatan ni Mesias na sasintongna. Ia Kristus, Mesias i, ndada ro tu portibion laho mangharingkothon angka na olo salpu (perkara duniawi), baliksa, ro do Ibana laho mamboan manisia i mananda hangoluan na manongtong (kerajaan kekal/perkara surgawi). Ai haporsuhon nang hamatean nabinolus ni Jesus, i ma parmulaan ni habadiaon nang hamuliaon ni Raja i.

Siihuthon Jesus Mamparrohahon Angka na di Debata

Diarahon si Petrus ma Jesus, huhut didok: “asi ma roha ni Debata di Ho, Tuhan! unang ma songgop i tu Ho” Sian roha hajolmaon na i, diarahon si Petrus Jesus asa unang saut hamatean di hau pinarsilang i. Panjuaon ni si Petrus sarupa ma i songon pangunjunan na dialaman ni Jesus di halongonan (Mat. 4). Gasip do parulaon ni si Petrus i di Jesus, ala naeng disundati Ibana patupahon haluaon di hau pinarsilang. Ala ni i didok Jesus ma: “Laho ma ne ho bolis”. Dialo Jesus do pandohan ni si Petrus ala maralo do i tu sangkap ni Debata. Sian pardagingon ni hajolmaon, boi do dapot rohanta panjuaon ni si Petrus, ala dihirim ibana guru napinarsangapanna i gabe sahalak na diparsangapi saluhut jolma. Alai ndada panimbangion dohot parrohaon haportibion napinatuduhon ni Jesus. Andul sian napiningkiran ni hajolmaon, i do dipatupa Jesus laho pataridahon haunduhon ni roha-Na tu Ama-Na i.

Suang songoni do dipangido roha ni Jesus sian angka sisean-Na i, natorop nang sian hita, songon siihuthon Jesus. Dia ma namambahen hita andul sian angka jolma na so mangihuthon Jesus, ima molo taparrohahon na di Debata. Molo hajolmaon mangasahon pingkiran nang hagiot ni rohana di ngoluna, alai angka siihuthon Jesus ingkon mamparrohahon na di Debata do. Patudoshon hajolmaonna mangihuthon parrohaon ni Debata. Menaruh pikiran Allah di dalam hati manusia dan menyamakan pikiran dan laku hidupnya seperti pikiran Allah.

Mansoadahon Diri nang Mamorsan Silang

Dipinsang Jesus ma si Petrus laos lam di pabidang Ibana pangajarion-Na taringot tu namangihuthon Jesus. Yesus membalikkan pandangan umum yang berlaku di masyarakat tentang menjadi pengikut Dia. Didok: “Nasa na giot mangihuthon Ahu, disoadahon ma dirina, diporsan ma silang na tu ibana; diihuthon ma Ahu”. Dang hea tarsingot pingkiran ni angka sisean i tu pandohan ni Jesus taringot mansoadahon diri dohot manuhuk silang. Godang na torop tarmasuk angka sisean-Na i, mangihuthon Ibana ala diida nasida angka halongangan bolon napinatupa ni Jesus, jala manghirim nasida gabe taruli hasangapon nang nasida pe. Tarsonggot angka sisean i manangihon pangajaran i. Dang dope tarjalo roha ni nasida taringot tu Kristus, Mesias na ingkon manaon na porsuk dohot hamatean i, ditamba muse pandohan na ingkon dohot do saluhut angka namangihuthon Jesus manaon na porsuk.

Mangihuthon Jesus ndada ulaon na neang, dohot ndada na mangait tu hasangapon ni diri. Ingkon tuk do ibana mansoadahon diri sian angka hagiot namaralo tu parrohaon ni Debata. Diparbadiai ma roha, pamingkirion nang dirina jala dialo ma angka hagiot ni pardagingon. Parrohaon nang sangkap ni Debata ingkon i do na gabe fokus manang tujuan ni parngoluon ni angka siihuthon Jesus. Menyangkal diri artinya menghilangkan diri sendiri sebagai prinsip kehidupan yang utama, dan menjadikan Allah sebagai prinsip kehidupan yang utama. Menyelaraskan hidup terus menerus dengan kehendak Allah. Manggohi roha nang ngolunta di bagasan parrohaon ni Debata asa gabe Ibana na marhuraja di dirinta, dang be angka sintasinta ni pardagingon manang haportibion.

Manuhuk silang lapatanna “olo manaon naporsuk ala ni Jesus”. Parngoluon ni halak Kristen, i ma melayani dan rela berkorban. Siihuthon Jesus ingkon rade manahan di angka ragam ni sitaonon, ala ndang sian portibi on haroroan ni angka na denggan. Ala ni i, gabe sisogo do angka halak namamaritahon hasintongan di tongatonga ni angka namanghasogohon hasintongan. Rade molo tung pe gabe direhei, dihanciti, gariada rade molo pe tung ingkon mate. Ndada holan Jesus namamorsan na porsuk i, dohot do nang angka siihuthon Ibana, ai ingkon ulahonon ni siihuthon Jesus ma ulaon naung dibuhai Jesus. Jala mangihuthon Jesus lapatanna, pasahathon dirina jala gabe sioloi Debata ma ibana.

Na ro ma Sogot Anak ni Jolma Mangalehon Upam

Pandohan ni Jesus tu angka siseanNa sekaligus laho mangalehon garansi tu angka na porsea di Ibana hatiha i, i ma ditingki mangadopi hamaolon bangso i mangadopi bangso Rom. Hatiha i godang do ancaman na niadopan ni halak Kristen molo mangakhu ibana siihuthon Jesus. Ala ni i do di dok Jesus: “Na naeng paluahon hosana, magohonsa do; alai na agoan hosa ala ni Ahu, i do na jumpangan. Dipaingot Jesus angka sisean nang natorop asa unang mabiar mangihuthon Jesus, molo pe masa angka haporsuhon. Ia sura pe mate ibana ala ni Jesus, namangolu do i di bagasan Tuhan i. Ai ndang adong labana diomo jolma i portibi on alai mago tondina. Unang mabiar manghatahon taringot tu hasintongan ni Debata jala unang mabiar manghatindanghon Debata di loloan na torop. Ai na ro ma Debata, jala jaloon ni angka na satia ma tumpal hangoluonna.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Kristen astuanna siihuthon Kristus. Mangihuthon Kristus lapatanna mambahen Ibana gabe tiruan. Debata mardalan di jolo jala hita mangihut di pudi. Asing do Jesus sian panggomgomi di portibi on, na olo patujolo angka na mangihuthon Ibana. Isarana songon permainan catur, ndada parjolo raja ni catur i na mardalan. Dipelehon do parjolo pion i gabe pancingan tu hamatean. Dungkon ni i pe parpudi sahali mardalan ma raja i. Alai anggo Jesus, parjolo do dipataridahon jala diulahon napinangido ni Ibana i sian hita. Saluhut angka napinangido ni Ibana nungga jumolo diulahon Ibana i.

Molo tung pe di jamitanta on dijou hita mansoadahon diri, manuhuk silang dohot mangihuthon Ibana, nunga jumolo diulahon Jesus i. Saluhut angka na mangihuthon Ibana katakanlah “tidak” pada diri sendiri dan katakan “ya” kepada Kristus. Songon na ni dok ni si Paulus di Galatia 2:20: “Ndada ahu be na mangolu i nuaeng; Kristus do mangolu di bagasan ahu. Ia mangolu pe ahu nuaeng di bagasan daging, mangolu marhitehite haporseaon di Anak ni Debata, na manghaholongi ahu jala na mangalehon dirina humongkop ahu. Sude do jolma manuhuk silang na ro tu ibana ganup marsada-sada. Ragam hataridaan ni silang i di ngolunta, alai manongtong ma hita marsihohot mangihut Jesus i. Unang mabiar jala unang parsoadahon Jesus. Ai na lehonon-Na ma tu hita balos ni hasatiaon ta i. Songon Jesus napinarbadiaan dungkon hehe, songoni do nang hita namanaon di silang i.

Penulis:
Pdt. Rut Debora Butarbutar, M.Th

Penyunting:
Yohanes Simatupang

Bagikan Postingan ini:

About Yohanes Simatupang

Staff Biro Infokom

View all posts by Yohanes Simatupang →