Epistel Minggu 24 April 2022
MINGGU QUASIMODGENITI
MINGGU, 24 APRIL 2022
“PARJUMPAAN DOHOT TUHAN JESUS MANGHORHON HAIMBARUON”
Psalmen 37:34-40
PATUJOLO
Sada kenyataan ni ngolu na nialaman ni jolma tingki nuaeng na so boi juaon, na jotjot mambahen ganggu roha dohot pingkiran, marnida na masa nuaeng di ngolu ni hajolmaon, i ma: ndang secara otomatis, angka halak si bahen na denggan, na mangulahon hatigoran, pintor marhasil, mandapot ngolu na sonang, dohot angka na hinirimna. Alai olo do gabe manaon na porsuk, jala gok angka parungkilon. Baliksa tung mansai sonang do berengon ngolu ni halak, siula na so patut, na mangula ragam ni hajahaton, ala huaso dohot gogo, jala hira na so hurang manang aha di ngoluna.
Situasi dohot keadaan ni ngolu na songon i ma sipata na mambahen ndang adong be dame dohot hasonangan di angka parsaoran di ngolu siapari. Jotjot ma ngolu na songon on, mambonsiri angka sikap hosom dohot late ni roha maradophon donganna. Gabe tubu ma angka pangiburuon, jala ndang dapot be na gabe parsaoran dame di ganup jolma i di ngoluna.
Marhite turpuk Epistel Minggu 24 April 2022 sadari on dipaingot si Daud do saluhut jolma jala didok: “Sai unang ma mohop ateatem mida angka parjahat i, jala unang mangiburu Ho mida angka siulahon hajungkingon. Pasombu ma Jahowa, jala Ibana paimaima; sai unang mohop roham mida jolma na mardohar dalanna, mida baoa siulahon getegete. Otapi rimas jala tadingkon mohopmohop; unang sai hamohophon tu roham, ai laho tu najat do i” (ida Psalmen 37:1+7-8). Pamodaion ni si Daud on, paingothon saluhut jolma asa maniop jala mameop “prinsip hidup” na mananda hadirionna songon si “haposi Debata Jahowa”. Jala na tongtong marsihohot laho mangulahon angka na denggan, songon identitas manag tanda ni angka “halak partigor”. Molo tung pe ingkon mamereng angka na masa—kenyataan hidup si nuaeng on—na sipata balik tu roha dohot pingkiran. Alai naeng ma tongtong marsihohot, tulus, jujur jala satia, laho mangulahon lomo ni roha ni Debata Jahowa.
BACA JUGA BAHAN KHOTBAH MINGGU QUASIMODOGENITI – MINGGU, 24 APRIL 2022
HATORANGAN
Manang ise na marsihohot manghaposi Jahowa, sai na teanonna do sogot tano on.
Dipaingot si Daud do asa saluhut jolma ingkon marhaposan tu Jahowa, jala paihutihut dalanNa. Gabe patimbulon ni Debata Jahowa sandiri do ibana tumean tano i. Halak na si songon i do na sai tartuju matana tu angka na lidang huhut mamereng angka na tigor jala gabe jumpang na ma hadameon (ayat 34a+37). Dirajumi si Daud do di ngoluna, angka na marhaposan tu Debata Jahowa ingkon tongtong do mangulahon lomo ni rohaNa. Mardalan di dalan ni Debata Jahowa marhite hataNa. Gabe i ma na gabe jaminan di angka halak na mangulahon hatigoran, gabe manghorhon hadameon.
Tung mar pos ni roha do parpsalmen on di pasupasu ni Debata di tongatonga ini ngoluna. Jala dihatindangkon ibana do, mandok: “Alai sai na teanon ni angka parlambohi do sogot tano i, jala hahilashononna hinadeak ni hadameon” (ida Psalmen 37:11). Ndang hea ndang jumpang hadameon di angka jolma na mangulahon hatigoran. Na sai marguru tu lomo ni roha ni Debata di bagasan HataNa jala tongtong marhaposan tu Jahowa.
Dibagabagahon Debata Jahowa do angka pasupasu tu angka halak partigor. Sai donganan ni Jahowa do angka na niasianNa, ala ni holong ni rohaNa. Songon panindangion ni si Daud di Psalmen 37:29-31, didok di si: “Teanon ni angka partigor i do sogot tano i, jala tongtong do nasida maringanan disi. Mamodahon habisuhon do pamangan ni partigor i, jala mangkatahon uhum do dilanai. Dipeop rohana do patik ni Debatana, ndang tagamon humordit angka langkana i.”
Sai na siap do sogot angka parjahat dohot pangalaosi.
Dirajumi si Daud do di pardalanan ni ngoluna, jala na gabe sada panindangionna na hot. Tung mansai tangkas do dibereng ibana hasisiap ni angka parjahat. Tung pe songon hau na rugun di hatubuanna parjahat na sumalin na niidana i, alai satongkin do jala dang di si be jumpang na tung pe dilului (ida ayat 34b+35-36+38).
Tung jotjot do tubu “pangiburuon” ni angka jolma molo sai dipamanat ngolu ni angka na jungkat roha, manang parjahat, na sai tongtong di bagasan las ni roha. Ndang hurang manang aha, pola do sai mardohar nasida jala lam tu suksukna hamoraon nasida (ida Psalmen 73:3-12). Alai ndang manahan saluhutna i di nasida. Ai songon halinu do nasida, mago jala ripur dibahen Debata Jahowa, jala satongkin situtu do nasida mago, so marpangkirimon. Songon na niida ni si Daud sandiri. I do umbahen na dipaingot tu angka halak na marhaposan tu Debata Jahowa, na ingkon dohot do mangida hasisiap ni angka parjahat. “Idaidaon ma hasisiap ni angka parjahat.” Ai ida ma, sai na laho mago do angka na paholang dirina sian Ho, disiaphon Ho do sude angka na mangose padan maradophon Ho” (ida Psalmen 73:27).
Nang pe songon i, naeng do tangkas auhononhon ni angka na marhaposan tu Debata Jahowa hadirionna maradophon angka parjahat. Ndang adong dalanna gabe manguhumi angka parjahat i di bagasan ngolu on. Ndang ala ni na marhaposan tu Debata Jahowa, umbahen na pasiapon angka parjahat sian tano on. Holan marguru tu huaso dohot lomo ni roha ni Debata Jahowa do na talup manguhumi, huhut maniaphon saluhut angka parjahat dohot pangalaosi di adopanNa.
Debata Jahowa do silehon haluaon dohot hatuaon di angka partigor.
Panindangion ni si Daud di pesalmen on na gabe sada pangajarion tu saluhut halak na marhaposan tu Debata Jahowa huhut na mangulahon lomo ni rohaNa. Ndang pintor dapotan hasonangan dohot las ni roha. Ai didok do: “Ditumpak jala dipalua Jahowa do nasida dipalua do nasida sian angka parjahat i, jala ditumpahi nasida, ai marhaposan tu ibana do nasida” (ayat 39-40). Dipaingot si Daud do saluhut angka na marhaposan tu Debata Jahowa. “Ndang ala marhite ulaon hatigoran, gabe ojahan, jaminan manang gabe sipangasahononton laho mandapot hatuaon, hasonangan di angka ragam ni pasupasu dohot angka na hinirim ni jolma di portibi on. Alai sai adopan ni halak partigor do angka hamaolon, parungkilon dohot ragam ni hagogotan. Marhite angka musu nang dohot angka parjahat na humaliangsa.
Holan marguru tu lomo ni roha ni Debata Jahowa do, marhite gogo dohot huasoNa sambing di bagasan holong ni rohaNa. Gabe dapotan haluaon dohot hatuaoan angka na marhaposan tu Ibana. Sian Debata Jahowa sambing do molo hatuaon ni angka halak partigor. On ma na gabe jaminan di angka halak partigor. Sai tong do dilului Jahowa, jala sai tongtong mangulahon lomo ni rohaNa, jala holan Debata Jahowa do dibahen haposanna dohot partanobatoanna. Naeng tangkas auhononhon ni saluhut halak Kristen, na ingkon tingkos gabe partigor jala marhaposan tu Debata Jahowa songon na didok di Psalmen 46:2: “Debata do haporusanta dohot hagogoanta, pangurupion situtu di hagogotan, angka na mangonai tu hita.”
Kunjungi juga kanal YouTube HKI untuk mengetahui informasi seputar pelayanan HKI.
HAHONAAN
Marhite hatorangan ni Epistel Minggu 24 April 2022 di Minggunta on. Molo tangkas tapamanat, na gabe si auhononhon ni rohanta di ngolu siapari i. Na parjolo, ngolu ni angka halak na marhaposan tu Debata, i do na gabe sitean tano on sogot. I ma bagabaga ni Debata tu angka halak “partigor” na tutu sian nasa roha dohot pingkiranna mangulahon lomo ni roha ni Debata. Na mangalului Jahowa huhut mangulahon HataNa dohot PatikNa. Alai dang pintor holan hasonangan sambing na gabe jambar—di hangoluan—ni angka na marhaposan tu Jahowa.
Jotjot do angka partigor i mangadopi hamaolon di ngoluna, parungkilon dohot ragam ni sitaonon. Ingkon adopanna do musuna, sian angka na jahat na gabe panggetegete. Jala olo do godang hagogotan si adopan ni angka partigor i. Alai, molo tung pe songon i na masa, dipaingot do tu angka saluhut na marhaposan tu Debata Jahowa. Na ingkon donganan ni Debata jala paluaon ni Debata do sian nasa hagogotan jala dapotan haluaon.
Na Paduahon, ngolu ni angka parjahat, na so manghaposi Debata Jahowa. Angka na mangalaosi Hata dohot PatikNa, jala na so olo mangulahon lomo ni rohaNa. “Ai di tengatengahon parjahat ido sangkap ni rohana, jala dipartuanihon pangalansum, di lesanlesan do ia Jahowa. Ninna roha ni parjahat i do di bausbaus ni ingungna: “Ndang tagamon marlulu Ibana! Ndang adong Debata!” I do pangarimpunan ni angka sangkapna sudena” (ida Psalmen 10:3-4+10). Ingkon do siaphonon ni Debata sian tano on, jala ingkon gabe tu hamagoan do ujungni ngoluna. Debata sandiri do na boi manguhumi nasida dohot maniap ngoluna sian tano on, gabe ndang tarida be jala mago.
PANIMPULI
Marhite Jamita Epistel on. Naeng ma sude halak Kristen, ingkon patuduhon hadirionna—identitasna—na tutu. Holan tu Debata Jahowa do marhaposan di sude panggulmiton ni ngoluna. Marhitehite ulaon na denggan marguru tu lomo ni roha ni Debata. I do tanda ni halak “partigor,” di adopan ni Debata Jahowa dohot di adopan ni jolma. I do jaminan manjalo angka pasupasu ni Debata di bagasan “hatuaon dohot haluaon.” Didok di Psalmen 34:9-10. “Dai jala ida hamu ma denggan basa ni Jahowa, martua ma baoa na marhaposan tu Ibana. Habiari ma Jahowa, hamu ale angka na badiana! Ai ndang hurangan angka na mangkabiari Ibana.”
Aha pe na masa na niadopan ni halak Kristen. Molo angka partigor i, di adopan ni Debata, ingkon do tongtong marhaposan tu Debata Jahowa. Mangulahon na denggan, marguru tu lomo ni roha ni Debata Jahowa, asa dapotan hadamean dohot hasonangan. Amen.
Penulis:
Pdt. Toljun Lumbantobing, S.Th (HKI Resort Medan I – Petisah)
Penyunting:
Timothy P. Saragi
BAHAN EPISTEL INI JUGA DAPAT DIUNDUH DENGAN MENG-KLIK TULISAN DI BAWAH INI
EPISTEL MINGGU 24 APRIL 2022 – MINGGU QUASIMODOGENITI
