JAMITA MINGGU 27 MARET 2022 – PSALMEN 32:8-11

JAMITA MINGGU, 27 MARET 2022 - MARLAS NI ROHA JALA MARSURAKSURAK DI BAGASAN TUHAN

Jamita Minggu 27 Maret 2022
MINGGU LETARE
MINGGU, 27 MARET 2022
“MARLAS NO ROHA JALA MARSURAKSURAK DI BAGASAN TUHAN“
Psalmen 32:8-11

PATUJOLO

Di hata Heber, digoari do buku ni parpsalmen on ‘tehilim’ na marlapatan ‘angka ende olopolop manang pujipujian’. Buku Psalmen i ma sada buku na marisihon angka ende na ginurithon ni angka pande bisuk ni halak Israel na marojahan tu na masa di parngoluon nasida jala angka na hinalungunhon ni bangso i maradophon pangaramotion ni Debata. Dipandohan sinuaeng, didok ma muse buku Psalmen on, doksologi lapatanna endeende, tangiang, pujipujian, hamauliateon ala las ni roha, olopolop (sukacita) nang panindangion haporseaon tu Debata, boi do tong isi ni tehilim/doksologi on angka ‘andungandung’. Sandok sude tehilim/doksologi i mangondolhon ‘pujipujian’, andung tu Debata na badia jala na songkal saleleng ni lelengna. Isi ni pangajarion i manaringoti sintasinta ni ngolu parugamoon na rosu marparsaoran tu Debata, manolsoli dosana huhut mangeahi ngolu na sintong.

Psalmen 32 on i ma na sinurathon Raja Daud di na dipanghilalahon ibana do jorbut ni dosa maradaphon Debata. Ala ni i, Psalmen 32 on masuk do tu horong ni Psalmen Hamubaon ni Roha (pertobatan) (ida Psalmen 6:38, 51, 102, 130 dohot 143), marhite pangajarion dohot hamauliateon ni roha. Asa marhitehite Psalmen 32 on gabe lam diarahon do angka na porsea i laho mananda hadirion ni Debata jala ise do hita jolma di adopan-Na. Ai jolma pardosa do hita. Ndang adong na tigor nanggo sada, ndang adong na marroha, na usouso di Debata (ida Rom 3:10-11). Marhite Jamita Minggu 27 Maret 2022 na tarsurat di Buku Psalmen 32 on, dipabotohon parpsalmen do tolu dalan ni Jahowa laho pasaehon dosa ni jolma, i ma: Disesa nasa pangalaosionna; dihungkupi nasa dosana jala ndang dijujur nasa hajahatonna. Ia Psalmen 32:8-11 on i ma sada panindangion ni parpsalmen taringot tu pangajarion manang poda taringot sidalanan ni angka naung disesa angka pangalaosionna.

BACA JUGA EPISTEL MINGGU LETARE, 27 MARET 2022

HATORANGAN

Di ayat 8–11, parpsalmen mamodai bangso Israel uju i tu pangajarion di lomo ni roha ni Debata. Marhite pangajarion on adong hamanaton manang sipaingot songon dia do marparange di ngolu siganup ari. Dia do dalan sidalanonna, unang gabe tartuktuk manang mulak muse mangulahon dosa manang hajahaton. Lam marbisuk ma nian bangso i laho mamillit angka dalan sidalananna. Dia do tutu dalan na ingkon sidalanon, na hombar tu lomo ni roha ni Debata, asa unang gabe manimbil tu sihambirang manang tu siamun alai mardalan di bagasan hatigoran. Marhite pandohan “Huparrohai jala Hupodai” (אַשְׂכִּֽילְךָ֨ ׀ וְֽאוֹרְךָ֗ (’aś·kî·lə·ḵā, wə·’ō·wr·ḵā) I will instruct and teach you) na marlapatan tuntunonKu jala ajaranKu. Laos i do ngolu ni halak Kristen laho manuntun tu dalan hasintongan, dalan na tigor ndada gabe mamboan jolma tu dalan na sala, na maralo tu lomo ni roha ni Debata. Marhite pangajarion ni Debata i ma na mangiringiring pardalanan ni ngolu nasida. Ai patik manang aturan ni Jahowa do na gabe benteng tu hita angka naung pinalua marhitehite asi dohot holong ni roha ni Jahowa. Molo dung disesa dosanta, sada siradotanta, i ma marhaposan tu Jahowa. Didok di buku na badia i: Pasahat ma dalanmu tu Jahowa jala haposi Ibana, asa Ibana paturehon (ida Psalmen 37:5). Jala dipodahon TUHAN Jesus Kristus do songon on: Sai jumolo ma lului hamu harajaon ni Debata dohot hatigoranna, dung i tambahononNa do sude angka ondeng tu hamuna! (ida Mateus 6:33).

Ingkon marbisuk, unang ma songon hoda manang halode na so marroha, na ingkon jumolo dilinsing asa mangoloi parenta ni tuanna. Sai dipangke do hoda manang halode songon sada alat transportasi, alai ingkon dilinsing do i jumolo asa diboto hoda manang halode i hatop manang lambat langkana. Hoda dohot halode na boi diatur marhite kokang (dikendalikan dengan tali dan kekang), alai molo halak na bisuk jala marroha na boi do marhite habisuhon na sian Debata dipangke laho manaluhon habisuhon na di portibi on. Alai taingot ma, ndang na dos upa ni parjat (na so olo manadingkon dosana) sian angka na olo manadingkon dosana jala marhadaulaton di ngoluna.


Di ayat 10–11 tangkas do dipabotohon  na lan do parniahapan ni parjat i. Ndang adong dapot las ni roha di partondion ni angka parjat nang pe dapot ni nasida hasonangan, alai holan parsatongkinan do i jala na so marpansohotan do hasonanganna i. Alai molo halak na marhaposan tu Jahowa haliangkononNa do tu si asi ni roha.  Jolma na marhaposan tu Jahowa sai margogo do ibana mangadopi parniahapan ala sai diramoti jala didongani Tuhan Debata do halak partigor i. Di ujungna gabe tarbahen halak partigor i do marlas ni roha mida Tuhan i, marolopolop ma angka partigor i, jala marende rap dohot angka naung tinobus.

Sada halak tokoh sejarah gereja i ma Yohanes Calvin mandok adong do tolu istilah laho pataridahon hasonangan. Naparjolo: Marlas ini roha (שִׂמְחוּ, śimḥû) manggombarhon las ni roha sian nasa roha, sada las ni roha na mansai balga. Napaduahon marolopolop (גִילוּ,gîlû) menggombarhon las ni roha na tarida sian pambahenan. Napatoluhon  marsuraksurak (רָנַן,rānan) sada panjouon laho mamuji Debata dohot angka ende jala marsurak. Sada hasintongan do on, molo halak na mangolu di bagasan las ni roha, boi do dapot na dalan boasa ingkon gok las ni roha di bagasan Tuhan i. Las ini roha na masa i ma las ni roha ala pasupasu na sian Debata marhite na disesa do angka dosanta. Ndang adong be biar manang ganggu, ndang adong be tekananjiwa jala ndang adong be uhum hamatean. Marhite naung disesa Jahowa angka pangalaosionta mulak ma hita gabe masuk tu hangoluan si saleleng ni lelengna, ai tu si do hita tarjou.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Goar ni minggunta sadari on i ma Letare, lapatanna ‘marlas ni roha ma hamu’. Jala ojahan ni Jamita Minggu 27 Maret 2022 i ma Marlas ni Roha jala Marsuraksurak di Bagasan Tuhan. Las ni roha na nidokna ndang marojahan tu situasi/keadaan ngolu sian ruhut pardagingon hasangapon, hamoraon dohot hagabeaon. Alai ojahan manang hinsu ni las ni roha i ma hubungan/parsaoran ni angka naporsea i dohot Tuhan (mian di bagasan Tuhan i). Dirajumi parpsalmen do umbahen tarbahen jolma i marlas ni roha ala naung disesa Debata do dosanta. Rade do Debata manesa dosa ni jolma ala ni holong dohot asi ni rohaNa. Aut sugari so holong Debata tu jolma i, hamatean ma na gabe jambarna. Songon pandohan ni Apostel Paulus di Rom 6:23 Ai upa tinuhor ni dosa do hamatean; alai basabasa ni Debata do hangoluan salelenglelengna marhitehite Kristus Jesus Tuhanta i. Alabalga ni holong ni Debata tu jolma pardosa, gabe malua jolma i.

Marhite turpuk on dipodai hita asa marbisuk hita mangalangkahon silangkahononta, marroha ma hita di na mamolus angka na masa on nang pe lam torop angka parjat. Ala ni i didok di Psalmen 90:12 “Sai parrohai ma hami mamilangi angka ariarinami, asa dapotan roha na bisuk hami. Asa ganup jolma na marroha diboto mamangke ariari ni ngoluna hombar tu lomo ni roha ni Debata. Diboto manimbangi dalan sidalananna. Unang gabe sarombang dohot portibion (ida Rom 12:1). Ndang dihalomohon Debata gabe songon hoda manang halode na so marroha jolma i, alai marhite habisuhon i asa mangolu hita hombar tu lomo ni roha ni Debata. Ingkon sian ias ni roha do hita mangaradoti dalanNa i. Las ni roha jolma naung ditobus/palua sian dosa naeng ma gabe halak na marroha. Halak na marroha ingkon mangolu di bagasan hataNa,  huhut marparange na denggan tu saluhut jolma asa marhite parange i gabe manait roha ni jolma na so mananda Tuhan i, asa olo paubahon rohana jala manjangkon Tuhan i. Asa jumpang las ni roha di ngolunta tapasiat ma Tuhan Jesus Kristus tu bagasan ngolunta, ai Ibana do dalan hasintongan. Amen.

Penulis:
Pdt. Darwin Agustus Saragi, S.Th

Penyunting:
Timothy P. Saragi

BAHAN KHOTBAH INI JUGA DAPAT DIUNDUH DENGAN MENG-KLIK TULISAN DI BAWAH INI
JAMITA MINGGU 27 MARET 2022 – MINGGU LETARE

Bagikan Postingan ini:

About Timothy Saragi

Staf Biro Infokom HKI

View all posts by Timothy Saragi →