JAMITA MINGGU 11 SEPTEMBER 2022 – MATEUS 18:12-14

Jamita Minggu XIII Dung Trinitatis 11 September 2022
MINGGU XIII DUNG TRINITATIS
MINGGU, 11 SEPTEMBER 2022
“DIHALOMOHON DEBATA DO HAMUBAON NI ROHA”
Mateus 18:12-14

PATUJOLO

Barita nauli sian si Mateus, masuk tu horong ni Injil Sinoptik. Sian opat Injil Sinoptik mangarihon haunikon na be hombar tu sipareakan na be, hombar tu sipananginangi na sinangkap ni si panggurit, latar belakang budaya dohot parngoluon di partingkian i. Umbahen i do dang ulaon na mura laho mangalapati napinikkiran ni panggurit. Sangkap ni panggurit bukku Mateus dinalaho manggurathon bukku Mateus ima nanaeng manjamitahon parngoluon ni halak naporsea ikkon togu di haporseaon na i tu Debata Jahowa na mangolu di bagasan habonaranNa. Angkup ni i, si Mateus naeng pabotohon ngolu ni halak na porsea ikkon do sada di bagasan parsaoran tu Debata. Na maniop gomos haporseaonna sahat tu ujung ni parngoluon di portibion. Sangkap ni panurat bukku on, asa panjaha ni bukku Mateus boi mangarahon angka donganna tu haporseaon na mangolu di bagasan Tuhan Jesus jala manjadihon sude gabe sisean ni Jesus di portibi on, songon tahi ni Jesus na ro tu portibi on laho mangalului dohot paluahon angka jolma na mago di dosana. (Mateus 18:11 dohot Mateus 28:19-20).

Mateus 18:12-14, taringot tu biru-biru na mago. Sian 100 biru-biru ni parmahan i, adong ma sada na mago. Alai di tadingkon parmahan i ma si 99 nari biru-biru i laho mangalului sada biru-biru na mago i. Laos di paboa do songon dia las ni roha ni parmahan i, dung jumpangsa si sada biru-biru na mago i.

HATORANGAN

Dilehon Jesus do sada tudos-tudosan tu angka sisean-Na dohot angka naumbege jamita-Na. Tudos-tudosan i, dibahen Jesus sian parngoluan siapari. Parmahan di bangso Israel, ima sada ulaon naung mansai tangkas diboto halak Israel. Jadi dipungka Jesus ma mangajari nasida:

Ay. 12 “Beha do rohamuna: Adong ma di sahalak saratus birubiru, gabe mago sada sian i; nda tadingkononna ma na siapulu sia i di tor, laho mangalului na mago i?”

Ay. 13 “Na sintong ma na hudok tu hamu: Anggo dung jumpangsa, lasan ma rohana mida i, asa mida na siapulu sia na so mago i.”

Dibahen Jesus tudos-tudosan i, asa mura antusan ni angka sisean na dohot angka pambege na asing, taringot tu holong ni Debata marnida angka jolma na lilu. Di ayat 14 di dok; “Suang songon i do roha ni Amamuna na di banua ginjang i, ai dipangido do naeng unang mago agia sada sian na metmet on”.

Adong 3 siondolhonon sian ayat on:

Tuhan Silului Angka Jolma na Mago

Tuhan Jesus na tasomba i, ima Tuhan silului angka jolma na mago. Ndang holan sipanguhum sambaing, manang na manulakhon angka jolma pardoasa. Alai didiori do angka nalilu asa mulak tu dalan hatiuron. Boi jahaon di Hezekiel 34:16; 34:16 “Luluanhu ma na mago i, jala mulak boanonku na tardempar i, jala lilitanku do na mabugang i, jala pargogoanku do na marsahit i; alai anggo na mokmok i dohot na gogo i siaphononku do, ahu sandiri tahe marmahansa marhitehite uhum”. Tung so soada do parmahan na mangoloi hamamago ni birubiruna. Birubiru na lilu manang so lilu i, manggombarhon parngoluon ni jolma. Alai tung saluhut do jolma mangharingkothon haluaon na sian Tuhan Jesus Kristus i. Di Efesus 2:1 di dok: “Hamu pe, nunga mate hamu najolo hinorhon ni angka pangalaosion dohot dosamuna.  Alai dang di halomohon Debata hamamago ni parjahat i, alai hamumulak ni parjahat i do di halomohon Debata”. Diuduti di Efesus 2:4-5, Alai anggo Debata parasiroha bolon do jala parholongroha na balga maradophon hita, jala raphon Kristus do dipangolu Ibana hita, angka naung mate di bagasan angka pangalaosion; na sian asi ni roha do, umbahen na malua hamu!

Godang ni Las ni Roha ni Jesus di Hamumulak ni Parjahat i

Di ayat 13 di dok: “Na sintong ma na hudok tu hamu: Anggo dung jumpangsa, las ma rohana mida i, asa mida na siapulu-sia na so mago i. Godang ni las ni roha ni parmahan i dung jumpangsa na lilu na sada i, dipatudos tulus ni roha ni Jesus molo boi mulak sada pardosa tu Ibana. Sian on ma taboto godang ni las ni roha ni Debata di hamumulak ni parjahat i.

Dang Dihalomohon Jesus Hamamago ni Jolma i

Di ayat 14: “Suang songon i do roha ni Amamuna na di banua ginjang i, ai dipangido do naeng unang mago agia sada sian na metmet on. Dihalomohon Debata do sude jolma asa badia, songon Ibana na badia. Songon sada basabasa na balga situtu do di hajolmaon, ala dihaholongi Debata do jolma i nang pe naung madabu tu bagasan dosa. Umbahen i do dang dihalomohon Debata hita lilu di angka dalanta. Jadi, ala dang di halomohon Debata hita manisia lilu di bagasan dosa, dilehon ma di hita basa-basa na sumurung:

1. Dilehon ma tu hita Hata i marhitehite Tuhan Jesus Kristus, jala Jesus do hata i, Ibana ma hata na mangolu i, jala Bibel i paboahon jala patuduhon tu hita.
2. Dilehon tu hita Tondi Parbadia laho mangantusi lomo ni roha ni Debata. Marhitehite Tondi Parbadia i dilehon ma Hata i tu bagasan rohanta, gabe dang adong be pambingkasi di hita asa gabe lilu sian dalan ni Debata, ala naung tinuntun Hata i hita di dalanta.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Molo ta rimangi tema ni minggunta tingki on ima: “Dihalomohon Debata Do Hamubaon Ni Rohanta”, taboto do nian i, hampir sude do halak Kristen mamboto dang na dihalomohon Tuhan i lilu jolma i di dalanna. Alai sering do dang taantusi, na lilu do hita manang daong. Balik tahe, gabe hita do jotjotan manguhumi halak na asing sian dirinta sandiri. Alai di tingki on, di paboa tu hita, marhitehite Tondi Porbadia, boi do dituttun tondinta laho mamboto kondisi di haporseaonta. Tajalo ma i sian Tuhanta, asa taboto angka naringkot di ngolunta.

Marhite Tondi i, boi ma botoonta sadia dao ma hita sian Tuhan Jesus. Molo tung mansai dao, maradu so ta tanda be lomo ni roha ni Tuhan i, di si ma hita naung lilu. Alai molo tung na lilu pe hita, tangkas do dipaboa di jamita on, tung naso lomo do roha ni Jesus hita lilu, di lului do hita sahat tu jumpangNa. Molo dung jumpang Ibana hita, tung mansai las roha ni Jesus. Dungi taruli ma hita di hangoluan sogot na saleleng ni leleng na, jala tarpasu-pasu ma hita di ngolunta di portibion. Amen.

Penulis:
Pdt. Godman Tampubolon, S.Th, M.Pd

Penyunting:
Yohanes Simatupang