EVANGGELIUM, MINGGU VIII DUNG TRINITATIS – MINGGU, 30 JULI 2023

1 MUSA 28:10-22

DEBATA NA MANDONGANI JALA NA MANGONDIHON

I. Patujolo
Ndang adong jolma dungkon ni Tuhan Jesus di portibion na mangolu dibagasan kesempurnaan, nang pe singkop di ibana hamoraon, hagabeon dohot hasangapon, laos parpangkat na timbo, laos pejabat, namora, nang na gogo sahali pe, pasti do sude adong hahurangan/ kelemahan, nang hasalaan ganup jolma i. Jala jotjot do nasa jolma na marhagaleon nang hahuranan tarlumobi ma namangulahon hasalaan gabe sai songon na dilelelele, ganggu rohana gabe tubu ma di rohana biar, laos berupaya ibana paholang diri (melarikan diri) asa unang dituntut hasalaan na i. Tarsongoni do na niadopan ni si Jakob di turpuk ta di minggu on, diongkuhon jala disadari si Jakob do nasalah ulaon na binahen na maradophon hahana si Esau, na manjalo pasupasu anak buha baju sian amana si Isak tagan so mate dope ama na i. Dung ampe pasupasu ni ama na i tu si Jakob, gabe tubu ma pangiburuon dohot rimas di haha na si Esau laos tubu tahi ni rohana naeng mamunu anggi na si Jakob. Hape tarbortikma tahi ni si Esau i tu ina na si Rabekka paboa naeng bunuon ni si Esau angina si Jakob, marhite i pintor sigap ma ina na i paboahon tu si Jakob asa borhat lintun (melarikan diri) tu huta ni ibotona/ tulang ni si Jakob ima si Laban tu huta Padang-Aram (28:1). Nang pe dibagasan biar ni roha si jakob borhat jala diboto ama na nang ina na do huta halintunan na alai ndang dipaboa natuatua na i tu si Esau paboa na lintun si Jakob sian bagas nasida. Jala di pardalanan mandapothon huta ni tulang na i si Jakob nang pe di paborhat natoras na ibana alai roha biar, marhagaleon, loja, ganggu ndang adong be hasonangan di ibana, maninggalhon huta na, maninggalhon natoras na laho mandapothon huta ni tulang na na so hea dope di dalani ibana (hidup dalam situasi gunda gulana). Sian pardalanan ni si Jakob on idaon ta ma tangkas pandonganion jala pangondianon ni Jahowa di ibana, laos ido na naeng idaon ta di turpuk jami ta on, paboa ndang pasombuon ni Debata si Jakob dibagasan habiaran, kegelisahan, terhempit, cemas, gale, gunda gulana rohana, alai di patuduhon Debata do diriNa tu si Jakob paboa Debata do na mandongani jala na mangondihon ibana.

II. Hatorangan
Turpuk jamita on pataridahon paboa manongtong do Debata marningot angka bangso/huriaNa. Sian mulai panompaon, nungga dibaen Debata angka padan sahat ro di haroro ni Tuhan Jesus tu Portibion tangtong dipatuhon padan holongNa, salut na i paboahon na manongtong do Debata marningot nasa na porsea di Ibana. Jadi sian padan na robi, tu padan na imbaru sahat ro tu partingkian nuaengan on tongtong do Debata marningot angka huriaNa. Jala sian na so pamotoan jala panagamon ni angka na porseai do cara ni Debata mangaramoti dohot mangondihon huriaNa. Laos ido na masa di si Jakob dung borhat ibana sian Beerseba laho tu Haran dalanna lintun sian huta na (ay.10), laos marborngin ma ibana di si, ala kondisi mata ni ari pe nungga mate (ay.11). dina so panghirimon na dohot dina so panagamanna, dina tarpodom ibana dibagasan kondisi na loja, roha na mabiar, cemas, gelisa, gunda gulana, marningot namasa di ngoluna gabe tarpodom, jala di namodom i marnipi ma ibana, jala di nipi nai di ida ibana sada tangga na timbo, sian tano sahat tolhas tu ujung ni langit, laos diida ibana angka surusuruan ni Debata marnaek mijur (ay.12). Tangga na ni ida na i paboa adong ungkap dalan tu surgo sian portibi on, sian tafsiran ni na deba mandok mangihuthon tu hata ni Debata na tarsurat di Johannes 14:6 “didok Tuhan Jesus: Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu” tangga mandapothon Ama ima Jesus. Surusuruan na marnaek mijur (naik turun), manggombarhon na mangula do angka surusuruan ni Debata manghobasi tu angka anak ni Debata di portibi on.
Dibagasan nipi si Jakob diida ibana jongjong Jahowa jala di patandahon diriNa tu si Jakob (ay.13). Parnidaan ni si Jakob di nipina paboa na roi ima Debata, Debata ni Ompungna si Abraham, Debata ni ama na si Isak, laos naeng mandok ahu do Debatam tu si Jakob. Sian turpuk on di patandahon Debata do hadirion Na paboa marhuaso situtu do Debata sian na robi sahat tu partingkian on, jala dipatuduhon Debata diriNa tu si Jakob, asa adong pos ni roha, hatoguan (penghiburan/sumber kekuatan dan keselamatan) di si Jakob na dibagasan hagangguon ni roha. Sian panandaion ni Debata tu si Jakob paboa, ditanda Debata do ibana ima pomparan ni si Abraham dohot si Isak (pomparan na naeng pasupasuon ni Debata sian mulana), tudutudu ma i, paboa sian najolo ndang hea lupa Jahowa di angka naung jinou jala pinillitNa sahat tu angka pinomparna. Ndada holan panandaion diri Debata alai asa pos roha ni si Jakob ala di bagasan nipi na i di lehon Debata do tu ibana pasupasu ima angka pomparan (keturunan), tano na pinodoman na i tu sude pomparanna, nang portibi on tarpasupasu ala ni ibana (ay. 13-14), Dibahen Debata do PadanNa ima pandonganion, pangaramotion dohot pangondianon ni Debata, laos ido gabe ojahan ni Jamita di minggu on. Dung i dibahen Debata muse padan Na tu si Jakob ndang pasombuon ni Debata si Jakob nang pomparan na nda jolo pasahaton na sude angka bagabaga nang padan na pisahatNa tu si jakob (ay.15).
Dung sae Debata pasahat pasupasu dohot padan nang bagabagaNa dibagasan nipi ni si Jakob, gabe tarsunggul ma ibana. Seolaholah dung tarsunggul ibana sude angka ganggu ni rohana na parjolo gabe mago so pamotoan, habiaran na ndang be tu persoalan ni ngoluna na parjolo alai nungga gabe muba, gabe mabiar ma ibana paboa na songkal (dasyat) situtu do inagnan na pinodoman na i, didok ibana inganan i gabe bagas ni Debata jala baba pintu ni langit, ala memang idope parjolo sahali si Jakob pajuppang dohot Debata ni Ompung na, dohot Debata ni ama na. Dung tarsunggul si Jakob pittor humalaput do ibana hehe manogot na i patupahon batu partinandaan (tugu), laos di miakhi batu i asa badia, jala dibahen ma goar ni inagan i Bet-El (bagas ni Debata/ Rumah Tuhan). Ndang be dibagasan ganggu niroha si Jakob laho bongot tu huta ni tulang na i, dung di jalo ibana pasupasu, padan dohot bagabaga na sian Debata (ay. 16-19).
Sasintong na humurang dope pangantusion ni si Jakob taringot tu pasupasu andorang so dijalo pasupasu ni Tuhan i, seolaholah pasupasu i holan mamingkiri hamoraon, hagabeon hasangapon di portibion songon naung jinalona pasupasu sian ama na si Isak, hape sai tong dang jumpang na hasonangan, nang ketenagan jiwa, nang tondi ndung pe di jalo pasupasu sian Debata, padan dohot bagabagaNa tu ibana gabe adong ma ketengan jiwa dohot tondina. Alana pasupasu sian Debata ndada holan manghatahon hinaringkot ni ngolu di haportibion alai dohot do hinaringkotni partondion.
Dung adong ketenangan ni roha di si Jakob gabe tubu ma bagabaga nang sangkap nauli, ima manjadihon Debata ni si Abrahan, Isak gabe Debatana, dung i dipelehon ma dirina bahen panghobasion tu hinaringkot ni ulaon ni Debata di portibi on, jala di baen sada bagabaga hamauliateon ni rohana marhite pelean sa parsapulu na tu Debata baen hasangapon di Debata, paboa dihaporseai rohana do Debata do na mamasumasu ngoluna (ay. 20-22).

III. Hahonaanna

  1. Sai na adong do dalan ni Debata, marningot, mandongani, dohot mangondihon huriaNa. Setiap jolma pasti ada kekurangan, kelemahan nang kesalahan, jala pasti do setiap na mangulahon hasalaan mabiar, ganggu, jala diupayahon do lintun (melarikan diri) sian hasalaanna, alai ta ingot ma pambaenan ni Debata songon tu si jakob, dibagasan hagaleon, ganggu ni rohana ro do Debata mangalehon gogo tu ibana din a so pamotoan jala panagaman na. Nang pe di hita ingkon adong do pos ni roha paboa na adong do Debata mandongani jala mangondihon hita di sude angka habiaran ni roha ta, memang ndang ta antusi manang sadihari tingkina, manang di dia inganan na, alani i pos ma roha ta adong do Ama ta Tuhan Jesus inganan pangalualauan ta di ganup angka ragam ni parungkilon ta.
  2. Tarjou do hita gabe siihuthon Jesus na mamorsan silang i. Ragam ni parungkilon dohot sitaonon marganti soring manahopi ngolu on, dibahen i songon Kristen na pinillit jala jinou ni Tuhan ta hita ingkon antus hita mangalapi makna mangihuthon Jesus, ima na ingkon mangihuthon dohot manghangoluhon ngolu dibagasan holong. Manghaholongi Debata, manghaholongi dongan jolma, dohot manghaholongi musu. Namangihut nasa siihuthon Jesus ingkon mamorsan silang, lapatan na siap mangadopi segala persoalan molo tung pe mansai dokdok sitaonon i, alai dibagasan Kristus na boi do adopan dohot boluson ta i saluhut na, songon si Jakob nang pe batu di parbantal alai empuk/lambok do di hilala molo dung pajumpang dohot Tuhan i. Na gabe sungkunsungkun di hita di partingkian on, boa ta hangoluhon dope panjouon ni Tuhan ta ?, manang na marbalik do hita sian Tuhan ta, ta pangke bantal na empuk/lambok alai sai hera namamodomi batu dope hita. Alani i dibagasan Jesus adong do hagogoon, pangapulon, hahisaron, lasniroha dohot angka na asing. Hot ma hita manghaporseai Tuhan ta Jesus kristus i.
  3. Manongtong do Debata mangaramoti, mandongani, jala mangondihon huriaNa. Pasupasu, padan nang bagabaga ni Debata pasti do terjadi dibagasan angka na manghaporseai Ibana. Songon si Jakob pomparan ni si Abraham, si Isak nang hita pe, hot do pasupasu, padan, nang bagabagaNa. Nang pe nian dibagasan hasalaan do si Jakob na merebut pasupasu sian amana, na seharusna ingkon tu haha na si Esau, alai ringkot botoon ta dibagasan ni situasi i, dipaloas Debata do masa i ala sian si Jakob do angka pomparan na tarpasupasu gabe huriaNa. Dibahen i ndang paloason ni Debata na tarpillit jala na tarjou mangadopi parungkilon sahalaksa, alai manongtong do Debata mandongani jala mangondihon huriaNa. Antong ta baen ma Jahowa dibagasan Tuhan Jesus gabe Tuhan asa sahat hita tu Ama i, jala dapotan tumpal hangoluan hita. Debata do na mandongani jala namangondihon jolma na manghaposi Ibana asa adong pos ni roha, hatoguan (penghiburan/sumber kekuatan dan keselamatan) di ngoluna. Songon sada na porsea hita paboa naung di tobus Jesus hita sian nasa dosa, gabe sada kebanggaan do di hita paboa sai manongtong do Debata mandongani jala mangondihon hita. Antong ta jaga, ta jamothon ma haluaon na pinasahatNa i. Jala hotma pos niroha di hita na pasti Debata mangaramoti, mamasumasu, mandongani jala mangondihon hita, unang be adong na sangsi di kehadiran pasupasu ni Debata.
  4. Ngolu na lam dumenggan diadopan ni Tuhan. Adong do jolma na lupa di pambahenan ni Debata di tonga ngoluna uju malua ibana sian ragam ni parungkilon songon mara, parsahiton, bangkrut, turun jabatan, dohot angka lan na asing. Jotjotan dope jolma i ro tu Debata uju mangadopi parsitaonon, alai dung malua sian sitaonon na i, lupa do ibana tu Debata. Intap ni on marhite turpu on, dipangido do tu hita, molo dung ta jalo pasupasu na sian Debata marhite na mandongani jala namangondihon nasa ngolu ta nang ulaon ta, ingkon mangolu ma hita dibabagasan ngolu na lam dumenggan di adopan ni Debata, marningot sude pambaenanNa na tu hita. Godang nuaeng cara ta patupahon na dumenggan di adopan ni Tuhan ta marhite na mamelehon diri mangulahon angka ulaon na ringkot di keluarga, parsahutaon, punguan marga tarlumobi ma ulaon di huria i songon gabe sada parhalado, ruas na ringgas marminggu, ruas na aktif mangihuthon ulaon huria, mangalehon gogo nang roha di pembangunan huria, pasahathon pelean sian parbue na niula paboa na porsea hita Debata do mangaramoti dohot mamasumasu nasa ulaon ta. Songon si Jakob dung juppa ibana dohot Tuhan i marhite parnipion lam tarida do perubahan ngoluna, di hangoluhon do ngolu na lam dumenggan diadopan ni Debata. Ngolu na lam dumenggan diadopan ni Debata, tarida doi sian ulaon na niulana di ngoluna, apakah angka ulaon na denggan diulahon asa idaon tama do, manang asa adong do maksud dibalik ulaon nai? Ala ni i tarida do ngolu na dumenggan diadopan ni Debata molo mangulahon dibagasan tulus ni roha. Amen

Pdt. P. Simangunsong, S.Th
Pendeta HKI Resort Parsingkaman

Bagikan Postingan ini: