EPISTEL MINGGU 28 AGUSTUS 2022 – JEREMIA 2:4-13

Epistel Minggu 28 Agustus 2022

Epistel Minggu XI Dung Trinitatis 28 Agustus 2022
MINGGU XI DUNG TRINITATIS
MINGGU, 28 AGUSTUS 2022
MANSOADAHON DIRI, MAMORSAN SILANG, JALA MANGIHUTHON JESUS
Jeremia 2:4-13

PATUJOLO

Bindu na paduahon sian bukku ni si Jeremia, ima jamita na parjolo jinamitahonna dungkon gabe panurirang si Jeremia. Nalnal dijamitahon ibana pinsangpinsang tu bangso Israel ala ditadingkon Debata. Dosa na umbalga do i diadopan ni Debata molo ditadingkon Debata laos disomba debata sileban. Jumolo do dipaingot panurirang Jeremia bangso i, dungkon ni i diarahon asa marhamubaon ni roha, mulak tu Jahowa. Dihatahon si Jeremia pe jamita on, asa dao do bangso i sian panguhumon ni Jahowa.

BACA JUGA BAHAN JAMITA MINGGU XI DUNG TRINITATIS – MINGGU, 28 AGUSTUS 2022

HATORANGAN

Adong ma pigapiga topik na boi taida sian turpuk on na marhahonaan tu topik minggunta, i ma:

Unang halupahon dengganbasa ni Jahowa

Tangkas taida di turpuk on, ise namanghatahon sipasingot tu bangso Israel. Molo tung pe panurirang Jeremia na manghatahon hata on tu bangso Israel ndada patuduhon hagogoon dohot huasona sandiri, baliksa hata ni Debata do pinasahatna tu tongatonga ni bangso Israel. Digurithon di turpuk on pandohan “ale pinompar ni si Jakkob dohot sude marga ni pinompar ni Israel” ima naneng paulakhon parningotan ni bangso i tu Debata na sinomba ni ompuna na parjolo i. Marpardomuan tu si, ringkot ingoton ni bangso i denggan basa ni Debata napalua nasida sian Misir. Uju borhat bangso Israel ruar sian Misir, didok nasida do ingkon gabe bangso na satia jala na olo mangihuthon patik dohot uhum ni Debata nasida.

Disuarahon Debata tu bangso i, asa unang manghalupahon denggan basa ni Jahowa. Uju mardalan nasida dihalongonan opatpulu ari diramoti do bangso i, dilehon sipanganon, dilehon ombun marsijongjong manogihon nasida di dalan i, ia bornginna i marsijongjong api manulu nasida, asa tarbahen ni bangso i mardalan arian dohot borngin. Ndang adong na so denggan na pinatupa ni Debata jala saluhut uhum jumpang ni angka ompu nasida (6), dipatongon tu tano na lunak (7) alai lao bangso i tumundalhon Debata. Ndang dihalashon jala dihamauliatehon pambahenan ni Debata. Gabe andul ummarga dinasida manomba ganagana sian namomba Debata. Dang diihuthon naniulahon ni ompu nasida naparjolo i.

Manomba dohot mamuji goar ni Debata ndada siala paksaan manang formalitas sambing. Baliksa, ingkon marharoroan sian panandaionta di asi dohot holong ni roha ni Debata di ngolunta. Alani i, ringkot do hita manghilala dipambahenan ni Debata jala mandok maulite tu Ibana, i ma marhite pamujionta. Angka na manadingkon Debata jala manomba debata sileban sarupa do i songon na mansoadahon Debata jala ndang manghamauliatehon na niula ni Debata di ngoluna. Ra, dipartingkian sisaonari on ndang angka patung manang ganaganaan be hataridaon ni debata sileban, alai boi do i songon angka hamoraon portibi, jabatan, hepeng, datu, dohot lan angka na asing.

Dipinsang Debata do angka parjahat asa ditadingkon hajahatonna

Tano na lunak, tano na pinasahat ni Debata tu bangso Israel nunga gabe ramun ala ni pangalaho ni bangso i. Ndang dilului bangso i be Debata, ndang ditanda Debata, marbalik angka parmahan sian Debata, jala angka panurirang manurirangi marhitehite baal, diihuthon nasida na so margogo mangurupi. Tarida ma tolu bagian angka naginoaran ni Debata napatupahon hajahaton i, i ma angka panurirang na so mangalului Debata, baliksa mangalului debata sileban; angka panggomgomi ni uhum, siboto surat nang halak Lewi; panggomgomi na so biar miba Jahowa. Angka panurirang ndang dihatahon hasintongan jala ndang dipinsang bangso i ala mangulahon na maralo tu lomo ni roha ni Debata. Ndang sintong angka pangajarionna gabe laos dohot ma angka na torop lumlam mangulahon na jahat di adopan ni Debata. Ala pambahenan ni bangso i, didok Debata ingkon hona badaan ma nasida. Ndang holan nasida dohot do angka nini nasida (cucu mereka) molo so marhamubaon ni roha angka i.

Nunga diose bangso i padan dohot Debata, i ma padan na pinungka ni ompungna si Abraham (1 Mus. 12:1-3); Musa (2 Mus. 24); Josua (Jos. 24); Josia (2 Raj. 23:3); dohot si Daud (2 Sam. 7:12-17). Molo dipatudos tu parpadanan uhum di hasiangan on, dos ma Debata gabe halak na dirugihon di parpadanan. Sepihak mangose padan jala pihak na sada nari dirugihon. Debata do namamillit bangso Israel gabe sada bangso na bolon, alai ndang satia bangso i tu padan naung binuhulna Dohot Debata.

Ndang lomo roha ni Debata mida hamatean ni parjahat i, alai tung lomo situtu rohana mida halak tumadingkon hajahaton-Na i. Pandohan on, ndada na marlapatan boi marlomolomo ni roha bangso i tu Debata. Diuhum Debata do angka namanundalhon Ibana, alai sai dilehon dope partingkian di hita laho mulak tu hasintongan-Na i. Saluhut angka na masa di parngoluonta naeng ma nian paingothon hita tu Debata, termasuk ma molo masa pe sitaonon naeng manat tasungkun dirinta dia do na pinangido ni Debata sian hita? Asa molo masa pe angka sitaonon i, ndang jadi mandele hita, laos manadingkon Debata, baliksa ingkon lam patoguhon haporseaonta do i laho paingothon hita pajonokhon diri tu Debata. Udut tu si, di hasiangan on ragam do angka pangalaho ni jolma nang angka situasi sisaonari on na olo mambahen ganggu rohanta. Alai marhite epistel di hita di turpuk on, naeng tangkas dohononta tu dirinta asa unang ma sipangoloi hita tu hagiot ni portibi on baliksa ingkon mangoloi Debata do hita. Mansoadahon diri di angka hagiot ni daging asa unang tatundalhon Debata ala ni pambahenanta na so suman.

Angka namanadinghon Debata goaran ma i na lea

Disungguli Debata Kitim dohot Kedar (10) i ma dua huta namarasing, asa disulingkiti bangso Israel manang ise bangso na manadingkon Debatana. Ndang adong hea masa bangso namanadinghon Debatana, sude do bangso manomba nanihaporseaanna. Alai anggo bangso Israel tung andul do sian bangso na asing, ndang ala ni hasatioanna mar-Debata, baliksa ala ni na so satia bangso i. Tuk do rohana laho manadingkon Debata, dipasambar bangso i hamuliaon ni Debata tu na so margogo mangurupi. Hamuliaon ni Debata na so tardodo ni jolma (Pat. 2 Mus. 33:20) ditukkar bangso i tu hagogoon ni na so marguna. Ndang suman nian patudoson hagogoon ni Debata dohot hagogoon ni debata sileban, ala ni i do didok turpuk on gombaranna “na so margogo mangurupi”.

Debata sambing do mual ni hangoluan (13), alai laos ditadingkon bangso i laho mambahen sumursumur angka na so marisi aek. Mual hangoluan namarlapatan ma i “pemeliharaan Allah atas hidup bangsa Israel”. Debata do na mangarorot parngoluon ni bangso i jala namangalehon angka pasupasu, alai ditadingkon do i holan lao manomba debata sileban. “Meninggalkan yang utama demi yang siasia”, i ma haleaon ni bangso i. Ndang diantusi dia do na ingkon siulahonna.

Ndang adong huaso di debata sileban marimbang huaso ni Debata. Ai holan Debata sambing do nampunasa portibi on jala Ibana do nampuna hagogoan na so hatudosan. Ala ni hagogoon-Na i do tuk Debata gabe parsigantungan ni saluhut jolma di angka hagaleonna. Godang do huaso na adong di portibi on, alai ndang adong nanggo sada na tuk mangatasi hagogoon ni Debata. Udut tu si, holan Debata do siihuthonon di bagasan ngolunta. Molo tung pe sipata sai hira na dipasombu hita manaon na hancit i, sada haporseaonta, ingkon tongtong mangolu panghirimonta namandok: ndang pasombuon ni Debata hita manaon angka nahancit i. Unang tadingkon Debata manang dia pe ragam ni hamaolon di ngolunta, baliksa marsihohot ma mangihuthon Ibana.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Sandok jolma namangolu, uju dihasiangan on hita, ragam ingkon adopan na masa i. Sipata do ro las ni roha alai sipata do ro nang arsak ni roha. I ma bungabunga ni parngoluon i. Alai, hombar tu jamitanta on naeng pangkeonta ma namasa i laho paingothon hita tu Debata. Molo masa silasniroha, naeng ma taingot sian Debata do i, namangalehon pasupasu-Na tu hita. Ndang jadi haginjanghononhon saluhutna i. Jala molo masa pe angka arsak ni roha naeng ma tongtong taingot diboto Debata do namasa i. Alani i, naeng pangkeonta tong na namasa i gabe paingothon hita asa unang mandao hita sian Debata, baliksa asa lam togu hita pajonok dirinta tu Debata. Dongananna do hita mangadopi saluhutna i jala paluaonna do hita sian i. Unang ma nian tapangasahon gogonta manang hagogoon ni portibi on, alai holan mangasahon gogo ni Debata ma hita mangolu. Unang ditadingkon Debata manang dia pe na taadopi, manongtong ma mangihuthon Debata jala mandok mauliate disaluhut angka denggan ni basa-Na tu hita marhite pangalaho na manghorhon pamujion dohot hasangapon di goar ni Debata.

Penulis:
Pdt. Rut Debora Butarbutar, M.Th

Penyunting:
Yohanes Simatupang

Bagikan Postingan ini:

About Yohanes Simatupang

Staff Biro Infokom

View all posts by Yohanes Simatupang →