HATA NI DEBATA GABE PARGOGO LAHO MANGULA ULAONNA LOMO NI ROHA NI DEBATA-OLEH PDT. EBERT MARBUN, S.TH-EPISTEL MINGGU ESTOMIHI-MINGGU, 27 FEBRUARI 2022

Jamita Minggu 27 Februari 2022

Epistel Minggu Estomihi
Minggu, 27 Februari 2022
“Hata Ni Debata Gabe Pargogo Laho Mangula Ulaonna Lomo Ni Roha Ni Debata”
Mateus 13:18-23

PATUJOLO
Jotjot do hita mambege umpama, arti ni umpama on molo di Bahasa Indonesia didok ma; persamaan manang perbandingan. Alai molo di teologi didok ma on allegoris. Songoni do nang di nats Epistel di Minggu sadarion ima taringot tu umpama sahalak panabur. Umpama i ima taringot tu harajaon ni Debata adong di bindu 11. Alai andorang so masuk hita tu hatorangan ni turpuk on, parjolo hupatorang ma jolo songon dia latar belakang Injil Mateus.

Hata ni debata na adong di Mateus on digurithon sahalak sisean ni Jesus ima na margoar si Mateus, ibana sahalak Jahudi na ulaonna ganup ari sijalo beo (pemungut cukai). Ibana mangolu di taon 70 dung Masehi. Ondolan barita ni Mateus nungga adong di Padan na Robi ima Raja na paluahon bangsoNa. Nang pe naung tubu Jesus jala taboto do Jesus ima sahalak Jahudi, alai barita nauli i ndang holan tu bangso Jahudi dipasahat alai tu saluhut bangso do.

HATORANGAN
Molo marjamita Tuhan Jesus jotjotan do Ibana marumpama jala umpama na pinangke ni Tuhan Jesus ima angka umpama na adong manang namasa di ngolu ni jolma si ganup ari. Adong piga-piga umpama na pinasahat ni Jesus Kristus alai na porlu tapamanat dison ima:

Ay. 18-19 Mamiltik tu dalan
Parumpamaan on patuduhon roha ni jolmai na terfokus tu permasalahan ni portibion. Burju do ibana manangihon hata ni Debata, alai gumodangan pikiranna manang rohana tu angka na maol na diadopi ibana dingoluon, ido mambahen hata ni Debata mengalami pergeseran nilai dibagasan rohana. Hata ni Debata i dijalo ibana dohot denggan alai dungkon ro na maol i sian portibion, dang di pakke ibana hata ni Debata songon landasan na kuat, alai dipaloas ibana do na borat i menguasai roha dohot pikiranna songoni nang perasaanna jala tanpa disadari ibana gabe dibahen masalahna umbalga sian Debata na boi pasidunghon masalahna.

Ay. 20 Tano na batuon
Hata ni Debata na dipasahat tu hita sadarion di ay. 20 on ima jolma na so boi mengendalihon hadagingonna manang hawa nafsu duniawi. Hape sasintongna diboto do adong hata ni Debata na gabe hatigoran, alai nunga gumodangan rohana na naeng mangalului angka kemewahan na di tawarhon portibion manang arta portibion jala ndang be tu hata ni Debata rohana. Ndang olo be ibana tunduk tu hatigoran ni hata ni Debata. Jala jolma si songon on diboto do memang adong hata ni Debata alai ndang boi ibana mangatasi hagigiot ni portibi on jala olo mangalanggar hata ni Debata. Akibatna dia akan terhimpit ancaman ala ndang porsea ibana tu hata ni Debata.

Ay. 22 Parsihupian (Semak duri)
Alai ndang marurat dibagasan rohana hatai, parsatongkinan do di ibana hata ni Debata naung binege nai. Ai pintor targasip do rohana di na songgop haporsuhon manang pangaleleon siala hata i (ay. 21). Alai anggo na sinaburhon tu parsihupian adong dua gombaran ni umpama on:

  1. Di parngoluon on godang angka hamaolon na manekan ngolu ni sasahalak di kebutuhan, kenyamanan, dohot keamanan na mambahen hita gabe mabiar. Molo taida dison molo masalah do tabahen naumbalga di ngolunta, secara tidak sadar nunga margeser keberadaan ni Debata dibagasan ngolunta. Tabahen hamaolon i menguasai ngolunta baru ma tajou Debata. Dison taida gabe hamaolon i do na marhuaso dingolunta, ndang hata ni Debata be. Hape diajari hata ni Debata asa berfokus tu Debata dohot tu hata-Na asa unang hamaolon portibion manosak ngolunta ima umbahen hata-Na ndang tubu jala ndang marparbue.
  2. Gaya hidup jala keinginan duniawi jotjot do lao mamboan hita lam dao sian Debata. Tu jaman na lam tamba lumlam on sai olo do gabe nomor dua Debata di ngolunta. Portibion godang manawarhon kesenangan sesaat, jala jotjot menggoda ganup jolma asa mangalupahon hata ni Debata. Hata ni Debata gabe tarhimpit alani hasonangan dohot kemewahan na adong di portibion. Sudena i boi mamboan hita mangalupahon hata ni Debata.
    Hata ni Debata gabe holang jala ndang boi mandodo ngolu ni jolma i, ai nunga dao jolma i jala lomoan rohana dihasonangan na nilehon portibion, ndang parduli tu donganna, ndang olo mangalehon tingkina laho manangihon hata ni Debata, molo tung pe ditangihon Hata ni Debata lewat sambing mai jala ndang diulahon

Ay. 23. Tu Tano Na Denggan
Halak na marsihohot tu hata ni Debata alani diboto ringkot ni tumangihon hata ni Debata, panean do ibana sogot di surgo naung pinarade Na. Jala jolma na tutu na manangihon hata ni Debata diboto do naung sintong manang naung salah na niulahonna siganup ari. Molo nunga marsihohot hita tu hata ni Debata ndang dipadao Debata pangurupionNa tu hita jala sikkaton ni Debata saratus lopit angka ulaon na denggan na tabaen i asal ma hita hot di hata ni Debata naung tabege.

HAHONAAN
Boni na sinabur tu parsihupian ndang adong andulna sian boni na sinabur dipinggir dalan dohot di ginjang ni batu. Jala on ma gombaran ni roha ni jolma molo dung dibege barita na uli i, alai holan parbinege do nasida ndang marparbue. Alai jolma na manangihon jala mangulahon hata ni Debata, dipeop ibana do hata i dibagas rohana saluhut ngoluna, parbinotoanna, dohot sude aha na masa dingoluna dijou Debata parsidohot di ulaonnai. Jolma na naung manghilalahon panghorhon ni hata ni Debata naung tinangihonnai gabe marparbue do dingoluna, mangajari, paboahon tu torop halak naung diingani hata ni Debata ibana.

Panabur na manaburhon boni, ima sude jolma na mambaritahon barita na uli. Parsidohot do disi. Hamu nang dohot au pe ditongos Debata do hita lao manaburhon barita nauli i, manogunogu, mangajari halak na asing marhite parniulaan na tarida sian parbue ni haporseaon hakristenontai, asa boni na madabu tu tano na paboahon barita na uli taringot tu ngolu saleleng ni lelengna.

Hata ni Debata boi do sinaburhon tu torop halak alai ingkon olo hita lao mangajari nasida, manogunogu, jala paboahon ia hata ni Debata haluahon na saleleng ni lelengna. Alai unang pintor didodo rohanta na jaloon nasida hata i ai berbeda do kualitas dohot keadaan hati ni sasahalak lao manjalo hata ni Debata naung tabaritahon i ditongatonga nasida, adong doi na manolak jala adong doi na manjangkon gabe muba rohana jala malua sian parhatobanon i.

Adong do jolmai i na mambahen barita na uli di posisi terakhir di ngoluna jala gumodangan ngoluna dihaliangi (kekuatiran, kekayaan, keinginan daging) alai halak na mambahen hata ni Debata songon ondolan ni ngoluna tutu do gabe marparbue ibana.

Alani i ingkon tongtong ma hita marsihohot tu hasintongan barita na uli i jala Debata ma tabahen marhuaso dibagasan ngolu na taadopi. Porsea jala olo hita ndang adong na sia-sia perjuanganta mangalo hagogoon ni portibion, alai ingkon tutu hita marsihohot tu hata ni Debata.
Songon hata ni Debata na mandok: “Pelita bagi kakiku dan terang bagi jalanku (lih. lagu rohani: “Firman-Mu P’lita Bagi Kakiku”), unang be hita marsidalian, menutup mata, songon i menutup hati (lih. KJ. No. 53:2 “Tuhan Allah T’lah Berfirman”), marnida na masa dihumaliangta asa targoar ma hita siula hata ni Debata (lih. Jakobus 1:22 “Alai gabe siulahon hata i ma hamu, unang holan pananginangi, angka na paotootohon dirina”). Amen.

Penulis:
Pdt. Ebert Marbun, S.Th

Penyunting:
Yohanes Simatupang

Bagikan Postingan ini:

About Yohanes Simatupang

Staff Biro Infokom

View all posts by Yohanes Simatupang →