JAMITA MINGGU 24 APRIL 2022 – KISAH PARA RASUL 9:1-6

JAMITA MINGGU, 24 APRIL 2022 - PARJUMPAAN DOHOT TUHAN JESUS MANGHORHON HAIMBARUON

Jamita Minggu Quasimodogeniti 24 April 2022
MINGGU QUASIMODOGENITI
MINGGU, 24 APRIL 2022
PARJUMPAAN DOHOT TUHAN JESUS MANGHORHON HAIMBARUON
Ulaon ni Apostel 9:1-6

PATUJOLO

Dung manaek Tuhan Jesus tu banua ginjang. Saut ma bagabagaNa, na marsuru angka siseanNa dung jolo ro Tondi Porbadia. Mangondihon nasida huhut mangalehon gogo laho mambaritahon “Barita na Uli.” Barita haluaon na pinatupa ni Jesus Kristus tu saluhut jolma. Tarida do i di na disurathon si Lukas di buku Ulaon ni Apostel, di parmulaan ni angka huria manang parsaoran ni angka na porsea di Jesus Kristus. Songon parbue ni ulaon ni angka siseanNa di parsuru ni Jesus: Na ingkon gabe sitindangi Jesus nasida di Jerusalem, di sandok Judea, di Samaria sahat tu ujung ni tano on, dung jolo dijalo nasida hagogoon na sian Tondi Porbadia na songgop tu nasida (ida Ulaon ni Apostel 1:8+2:4).

Tangkas do tarida parbue ni ulaon panindangion ni angka Apostel i di na mambaritahon barita haluaon na sian Jesus i tu ganup jolma. Jala tangkas do dijangkon nasida hata haluaon i, gabe porsea nasida di Jesus Kristus, marhite na padidihon dirina. Pola do sahat tolu ribu halak martamba di bagasan sadari, angka na marsihohot di poda ni angka Apostel i.

Marparsaoran do nasida ganup ari di Bagas Joro, martangiang jala jojor bagas nasida marulaon na badia. Sai mar las ni roha do nasida huhut mamujimuji Debata, gabe lam ditambai Debata do di na sahuria i, angka na dapotan haluaon (ida Ulaon ni Apostel 2:41+46-47).

BACA JUGA BAHAN EPISTEL MINGGU QUASIMODOGENITI – MINGGU, 24 APRIL 2022

HATORANGAN
Parungkilon dohot sitaonon ni angka na porsea di Jesus

Sai adong do sangkap ni halak mangambati, mangalele huhut paporsukporsuk angka na porsea jala siihuthon Jesus. Nang pe lam rarat Barita na Uli marhite ulaon ni angka Apostel i, jala lam tamba halak na porsea di Jesus Kristus. Alai adong do parungkilon bolon na niadopan ni halak siihuthon Jesus. Ala mansai godang do jolma na so marlomo ni roha marnida angka na porsea di Jesus. Sai disangkapi do laho mangambati asa unang nian lam martambatamba halak siihuthon Jesus.

Sahalak na margoar si Saulus, na sai mangondamhon asupasup dohot pamunuon tu angka sisean ni Tuhan i. Jala sai dilului ibana do dalan laho patulus angka sangkapna laho manangkupi angka baoa dohot boruboru, na mangihuthon Tuhan i. Pola do laho ibana sahat tu parguruan ni angka siihuthon Jesus na adong di Damaskus (ayat 1-2).

Di jolo ni ojahan ni Jamita Minggu 24 April 2022 on di Ulaon ni Apostel 6:5-8 dipapatar do taringot tu ngolu ni sahalak na margoar Stepanus. Sahalak na dipillit gabe Apostel ni Kristus laho pararathon Hata ni Debata. Tardok do si Stepanus on sada halak na porsea di Jesus Kristus, jala na gok Tondi Porbadia. Halak na gok asi roha jala napatupahon angka halongangan dohot angka tanda na balga di adopan ni torop halak.

Alai tung gok do parungkilon niadopan ni ibana. Ala dihasogohon angka na so olo porsea di Jesus do ibana. Jala disangkapi nasida do laho mamunu ibana. Jala saut do ibana manaon “hamatean” marhite na didanggurhon angka batu tu ibana (ida Ulaon ni Apostel 7:58-60). Tung dihalomohon si Saulus do hamamate ni si Stepanus i. Laos ala ni i ma lam marsigorgor roha dohot pingkiranna laho mangalele huhut manangkup angka halak na porsea di Jesus. Jala paporsukporsuk na sahuria i (ida Ulaon ni Apostel 8:1-3).

Sai dilului si Saulus do dalan patulus sangkapna i. Sahat do ibana mangidohon surat sian malim, asa adong dalanna laho manangkup halak siihuthon Jesus sahat tu Damaskus. Songon naung binegena di na lam martamba angka na porsea di Damaskus. Luat Damaskus on ma na gabe inganan ni angka halak siihuthon Jesus. Marhite surat legitimasi na sian malim i gabe adong ma huaso ni si Saulus laho manangkup nasida jala boanonna tu Jerusalem.

Dipapatar Jesus hadirionNa tu si Saulus, laho mangambati sangkapna mangalele angka na porsea.

Di na disangkapi si Saulus laho manangkup angka siihuthon Jesus tu Damaskus. Di tonga dalan dope ibana nunga dipabotohon Tuhan i hadirionNa tu si Saulus. Dipabotohon Jesus hadirionNa marhite sondang na sian ginjang na mangkaliangi ibana. Dohot muse marhite soara na manjou goarna huhut papatarhon tu ibana, taringot tu na binahenna (ayat 3-4).

Ndang boi marnida si Saulus. Ditutupi sondang na sian ginjang i do simalolongna. Jala di na tinggang ibana, diungkap ma matana. Ndang boi be marnida ibana, tolu ari lelengna (ida ayat 8-9). Nang pe so marnida si Saulus, alai dilehon Tuhan i dope parbinegean tu ibana. Asa boi ibana tumangihon soara ni Tuhan i, na manjou goarna pola dua hali: “Saulus, Saulus!”  Dipasungkunhon tu ibana, di na sinangkapan ni rohana laho mangalele dohot manangkup siihuthon Jesus sahat tu Damaskus. Didok: ”Boasa leleanmu Ahu?”

Di son tung tangkas do dipabotohon Tuhan i tu si Saulus. Na nileleanna i ndang holan angka siihuthon Jesus sambing. Alai Tuhan Jesus i sandiri do na nileleanna. Ai sada do Ibana dohot angka siihuthon Jesus dohot angka naung porsea di Ibana. Tarida do i di tangiang ni Jesus sandiri taringot tu hasadaonNa dohot Debata Ama, songon hasadaonNa dohot angka na porsea di Ibana (ida Johannes 17:21-23). Didok Jesus do muse: ”Na tumangihon hamu, Ahu do tinangihonna, jala na manulak hamu, Ahu do tinulakna; alai na manulak Ahu, na marsuru Ahu do tinulakna di si (ida Lukas 10:16; Mateus 10:40).

Dipatuduhon Jesus do tu si Saulus na so boi saut sangkapna laho mangambat parsaoran, dohot mangalele jala paporsukporsuk angka halak na porsea di Jesus. Ndang boi ambaton ni manang ise pe, marhite huaso dohot gogona, laho mangorai, jala manundati hasasaor dohot hasasaut ni Barita na Uli tu ganup jolma. Angka halak na naeng porsea di Tuhan Jesus Kristus huhut gabe siihuthon Ibana.

Panandaion di hadirion ni Jesus, naung pinapatarNa. Dalan patulus sangkapNa laho mambaritahon GoarNa jala manghatindangkon hataNa na gabe haluaon dohot hangoluan.

Dung tangkas dipatuduhon Jesus hadirionNa tu si Saulus di panjouonna i marhite sipaingot. Gabe disungkun si Saulus ma: “Ise do Ho Tuhan?” Dialusi ma ibana: “Jesus do Ahu, na nileleanmi!” Angka hitir jala tarhalomong ma ibana mandok: “Dia ma bahenonku, Tuhan, dipangido rohaM?” Dung i didok Tuhan i ma tu ibana: ”Hehe ma ho, bongoti ma huta i; disi ma paboaon tu ho sibahenonmu” (ayat 5-6). Di pangidoan ni si Saulus taringot tu aha ma na naeng patupaonna, lomo ni roha ni Tuhan i? I ma patuduhon naung adong panandaion ni si Saulus, di hamubaon ni roha dohot pingkiran naung masa di ibana.

Marhite huaso dohot gogo ni Tondi ni Jesus, gabe dipangido si Saulus ma aha na naeng sipatupaonna marguru tu lomo ni roha ni Tuhan i. Alai ingkon paimahon dope si Saulus. Jala ingkon tangkas do borhat ibana tu Damaskus. Alai ndang patulus sangkapna i hian be. Alai sabalikna, laho patulus sangkap ni Tuhan Jesus naung pinabotohonNa tu ibana.

Jesus sandiri do na mambahen inisiatif, marhite huaso dohot gogo nang lomo ni rohaNa, laho paimbaruhon roha dohot pingkiran ni si Saulus. Di na marsangkap ibana laho mangalele angka siihuthon Jesus hian, gabe dipauba Jesus laho pararat Barita na Uli, tu angka si pele begu dohot tu na dao.

Panindangion ni si Saulus on dipapatar ibana sandiri do dung muba goarna gabe si Paulus. Gabe apostel ni Kristus ibana. Sada halak naung pinillit ni Debata hian laho mananda lomo ni rohaNa. Tutu do gabe sitindangi Hata ni Debata ibana tu sude jolma asa taruli haluaon na sian Jesus Kristus (ida Ulaon ni Apostel 22:14-15+21).

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Na gabe sipahusorhusoron ni rohanta marhite Jamita Minggu 24 April 2022 di ngolunta, adong do dua ojahan. Naparjolo, ojahan ni jamita minggu on i ma, ”Parjumpangan dohot Tuhan Jesus Manghorhon Haimbaruon.” Marhite na dipataridahon Jesus hadirionNa gabe adong ma hamubaon ni roha dohot pingkiran. Gabe marhaimbaruon di sude panggulmiton ni ngolu. Dipatuduhon Jesus do holong dohot asi ni rohaNa tu si Saulus. Dipaso Jesus do sangkap ni si Saulus, laho mangalele angka halak siihuthon Jesus. Uju di tonga dalan dope ibana laho tu Damaskus.

Ndang gabe diuhumi Tuhan Jesus si Saulus di ulaon na sinangkapan ni rohana i. Baliksa, dipaingot do ibana, asa di huta Damaskus jaloonna ulaon sipasahaton ni Jesus tu ibana. Na ingkon gabe sitindangi goar ni Jesus do ibana.

Sian on boi ma taida: ”parjumpangan dohot Tuhan Jesus” i ma dalan ”pasauthon, patulus, patupa dohot mambahen haimbaruon ni ngolu ni si Saulus. Jesus sandiri do na marsangkap di ngolu ni si Saulus jala marguru tu lomo ni rohaNa do laho paimbaruhon ngolu ni si Saulus.

Napaduahon, domu tu goar ni Minggu sadarion, Quasimodogeniti, na marlapatan, “songon posoposo na imbaru tubu.” Nunga dipaimbaru Jesus ngolu ni si Saulus. Dung ditanda ibana Jesus na manjou goarna gabe tarambat ma sangkapna hian di na laho mangalele angka halak siihuthon Jesus. Nuaeng dung dipaimbaru Jesus ibana, gabe disalpuhon ibana ma ngolu na buruk i. Ndang dapot be di ngolu ni si Saulus roha na jahat i, di na naeng mangasupi huhut paporsukporsuk angka halak siihuthon Jesus.

Nunga disolukkon tu ibana sada ngolu na imbaru. Ngolu na di bagasan Jesus. Ditangkup Jesus sandiri ibana, jala ditodo gabe naposoNa. Gabe marsinondang ma tutu di ibana “haluaon dohot hangoluan” na sian Jesus. Marhite i ma disuru ibana gabe sitindangi goarNa di na laho mamaritahon Hata ni Debata na gabe Barita na Uli tu saluhut jolma.

PANIMPULI

Nunga tangkas dipatuduhon Jesus hadirionNa, dalan paimbaruhon dohot paubahon roha nang pingkiran ni jolma, laho mangihuthon Ibana. Ala ni i, jangkon ma Jesus Kristus na papatarhon hadirionNa di sude panggulmiton ni ngolum. Hatindangkon ma goarNa marhite na mambaritahon HataNa. Amen.

Penulis:
Pdt. Toljun Lumbantobing, S.Th (HKI Resort Medan I – Petisah)

Penyunting:
Timothy P. Saragi

BAHAN JAMITA INI JUGA DAPAT DIUNDUH DENGAN MENG-KLIK TULISAN DI BAWAH INI
JAMITA MINGGU 24 APRIL 2022 – MINGGU QUASIMODOGENITI

Bagikan Postingan ini:

About Timothy Saragi

Staf Biro Infokom HKI

View all posts by Timothy Saragi →