Jamita Minggu Jubilate 8 Mei 2022
MINGGU JUBILATE
MINGGU, 8 MEI 2022
“HUASO NI DEBATA NA PANGOLUHON“
Ulaon ni Apostel 9:36-43
PATUJOLO
Minggu Jubilate i ma sada minggu rangkaian Paskah ni halak Kristen. Marhite Minggu Jubilate dibaritahon do ulaon ni Jahowa na paluahon bangsoNa. Hata Jubilate marharoroan sian hata Latin, sian hata jubilee. Molo di hata Heber didok do yobel na marlapatan ari palimapulutaonhon dungkon ari haluaon. Molo di halak Israel na parjolo somal do diulahon ulaon Yobel sahali lima pulu taon. Di na diulahon halak Israel ulaon Yobel on, marningot do nasida di angka pambahenan ni Jahowa, na paluahon bangso i sian parhatobanan Misir.
Pambahenan ni Jahowa na patuduhon huaso dohot hamuliaonNa na so hatudosan laho paluahon bangso Israel. I do umbahen molo pe diulahon halak Israel ulaon Yobel, sude angka utang disesa, songon i nang angka halak na diparhatoban malua ma sude. Sude angka singkoram ingkon do dipaulak tu nampunasa. Jala molo masa taon Yobel masa ma pardamean, ingkon do mardame nasida sama nasida. Dipalu ma sofar (sejenis alat tiup Israel yang terbuat dari tanduk domba jantan, yang selalu dibunyikan setiap tahun perdamaian Israel, yaitu tahun Yobel). Ojahan di ganup ulaon Yobel i ma pambahenan ni Jahowa, na paluahon bangso manang na niasianNa.
Sude angka pambahenan ni Jahowa tung halongangan bolon do. Pambahenan ni Jahowa masa do nang di huta Joppe, na patupahon halongangan bolon marhite si Petrus uju na mian ibana huta Lidda. Aha do na masa di huta Joppe, jala halongangan na songon dia do dipatupa Jahowa di huta i marhite si Petrus? Antong masuk ma hita tu hatorangan ni turpuk Jamita Minggu 8 Mei 2022 di Minggu Jubilate on.
BACA JUGA BAHAN EPISTEL MINGGU JUBILATE – MINGGU, 8 MEI 2022
HATORANGAN
Bukku Ulaon ni Apostel on i ma bukku sinurat ni si Lukas. Sahalak parbarita na uli dongan ni si Paulus laho mambarita na uli tu halak na so Jahudi. Disurathon si Lukas surat na on tu si Teopilus (ida Ulaon ni Apostel 1:1), i ma sahalak na sangap di Antiokhia. Di huta Antiokhia do si Lukas manurathon buku Lukas dohot buku Ulaon ni Apostel. Asa tung diboto, diantusi jala ditanda si Teopilus taringot hasintongan ni hata naung dipodahon tu ibana (ida Lukas 1:4). Di bukku Ulaon ni Apostel jojor do disurathon si Lukas songon dia do hiras ni roha ni angka apostel laho marbarita na uli dohot angka ragam ni hamaolon na niadopan ni angka Apostel. Sahat tu na hona uhum huhut mangadopi hamatean.
Dungkon manaek Jesus tu Surgo, marpungu ma angka Apostel na sampulu sada i rap dohot angka na porsea di sada inganan. Hombar tu Ulaon ni Apostel 1:15 disurathon adong do 120 halak di inganan i. Sai diulahon nasida do ulaon parpunguan dohot martangiang uju so saor dope Tondi Parbadia tu nasida. Dipillit ma muse si Matias gabe Apostel singkat ni Judas, parjehe i.
Dungkon ro Tondi Parbadia, marhiras ni roha do nasida jala ndang mabiar laho mambaritahon barita na uli. Mamaritahon angka pambahenan ni Jahowa Debata na singkop di bagasan Jesus Kristus. I do na gabe barita hamubaon ni roha, hasesaan ni dosa, barita na uli dohot barita haluaon. Tung disogohon halak Jahudi dohot pamarenta ni Rom do barita na uli na binaritahon angka Apostel i. Dilele do halak Kristen uju i sahat tu na ditangkup. Dung i diuhum hamatean nang angka Apostel. Alai tung na so jadi mansohot ulaon marbarita na uli. Lam digosa, dilele, jala dibahen angka na hansit tu nasida, alai lam tu torop na do angka na porsea di Barita na Uli na binaritahon ini angka Apostel.
Sahat ma barita na uli i tu huta Lidda na binoan ni si Petrus (ida Ulaon ni Apostel 9:32). Huta Lidda maringanan 15–17 km tungkan anggoni (tenggara) huta Joppe. Di huta Lidda, masa do tanda halongangan pinatupa ni Debata di bagasan goar ni Jesus Kristus. Dipamalum si Petrus si Eneas. Gogo na sian Jesus Kristus do dipangke si Petrus laho patupahon halongangan i. Ndada sian gogona manang sian siadonganna (ida Ulaon ni Apostel 9:34). Marnida na masa i torop ma halak di luat Lidda dohot na di Saron mardompakhon Tuhan i (ayat 35). Lapatanna gabe porsea nasida di Barita na Uli na binaritahon ni si Petrus dohot di angka tanda halonganan naung niida nasida i.
Di turpuk ni Jamita Minggu 8 Mei 2022 on dibaritahon do, adong sahalak parompuan di huta Joppe, goarna Tabita (molo di hata Junani didok: Dorkas). I ma sahalak na porsea. Molo didok sahalak na porsea, i ma halak naung manjangkon Jesus Kristus di bagasan ngoluna. Di ayat 36 didok do ibana sahalak na sumurung mangulahon na denggan dohot mambahen asi ni roha. Ndang pola dipabotohon mansai tangkas di turpuk on angka ulaon aha do na pinatupa ni si Tabita. Alai angka na bisuk mandok molo si Tabita, i ma sahalak na olo marsilehonlehon tu angka na pogos, na olo marsilehonlehon di ulos dohot di parabiton tu angka na pogos songon i nang di angka na mabalu.
Di ayat 37 dibaritahon na di bagasan parsahiton do ianggo si Tabita. Ndang pola mansai tangkas dipabotohon aha do sahit na songgop tu pamatangna. Alai pasti do posi sahitna i, jala laos mate do si Tabita ala ni sahitna i. Diburi ma ibana, dipeakhon ma tu bilut parginjang. Sada hasomalan do di halak Israel molo adong na mate ingkon do diburi (diparidi manang dipaias) jala dipapeak tu bilut parginjang andorang so diboan tu tanoman. Umbahen na jonok do huta Joppe tu huta Lidda (15–17 km), ditongos ma dua halak mandapothon si Petrus asa hatop ibana ro tu Joppe (ayat 37). Tontu sahat do barita halonganan na masa di huta Lidda tu huta Joppe ala tardok jonok do huta i. Laos hinorhon ni barita i do umbahen na ditongos sidua halak i mandapothon si Petrus.
Di ayat 38, sahat ma nasida mandapothon si Petrus. Dibaritahon sidua halak on ma na masa di huta Joppe (nang pe ndang pola tangkas disurathon di ayat 38 on). Hehe ma si Petrus borhat tu huta Joppe. Sahat ma ibana tu huta Joppe, jala sahat ma tu bagas ni si Tabita. Ditogihon ma si Petrus tu bilut parginjang, i ma inganan hapeahan ni bangke ni si Tabita. Adong ma di inganan i angka boruboru na mabalu angka na tumatangis hinorhon ni lungun ni rohanasida di parmonding ni si Tabita. Dipatuduhon nasida tu si Petrus angka ulos dohot abit na pinauli ni si Tabita andorang rap dope ibana dohot nasida (ayat 39). Dipamuli (dipalaho) si Petrus ma nasida saluhutna (ayat 40).
Holan si Petrus dohot bangke ni si Tabita ma di bilut i. Marsinggang ma ibana laho martangiang. Didompakhon ma na monding i, laos didok ma: “O Tabita, hehe ma ho!” Sarupa do pambahenan ni si Petrus on songon na pinatupa Jesus uju na pinaheheNa i boru ni si Jairus (ida Markus 5:41). Dipabidok si Tabita ma matana, dung i di na niidana si Petrus, hehe ma ibana.
Marsinggang jala martangiang i ma tanda mangido pangurupion tu Jahowa Debata di bagasan Jesus Kristus. Marsinggang jala martangiang patuduhon panandaion dohot patutoruhon diri di adopan ni Jahowa. Tung na so margogo do molo holan dirina sambing laho patupahon angka tanda halonganan. Marhite tangiang do mangido gogo dohot huaso sian Jahowa di bagasan Jesus Kristus. Marhite tangiang do dijalo si Petrus huaso laho patupahon halongangan i. Ingot ma hita, unang ma tung tapangasahon gogo dohot pingkiranta laho patupahon ulaon partondion. Alai tajalo jala tapangasahon ma gogo dohot huaso na sian Jahowa Debata di bagasan Kristus. Parhitean do hita, parhitean do si Petrus, jala parhitean do angka apostel. Na patupahon haluaon i holan Jahowa Debatanta do di bagasan Jesus Kristus.
Dung i, disurdukhon ma pahean tu si Tabita jala dijou ma angka na badia i, ro di angka boruboru na mabalu. Dipajongjong ma si Tabita naung mangolu i di jolonasida (ayat 41). Ise do angka na badia nanidokna di son? Halak na badia di pangantusion hakristenon, i ma halak naung porsea jala na olo patupahon ulaon parasinirohaon, mangurupi angka na pogos. Patupahon hadameon jala na tongtong mangulahon angka na denggan tu saluhut. Tontu molo masa angka na so hea masa di luat i, jala masa angka halongangan sai hatop do sar barita i tu saluhut luat i, manang di pangisi ni huta i. Songon i ma na masa di huta Joppe. Gabe torop do jolma na porsea di Tuhan i (ayat 42).
Na nia do lelengna si Petrus mian di Joppe di bagas ni si Simon, sahalak sipauli hulingkuling (ayat 43). Molo sahalak sipauli hulingkuling jotjot do ulaonna marpardomuan tu hulingkuling ini angka binatang naung mate laho mambahen sipatu, hohos dohot angka kerajinan tangan na sian hulingkuling (kulit).
Kunjungi juga kanal YouTube HKI untuk mengetahui informasi seputar pelayanan HKI.
HAHONAAN
Molo berefleksi hita marhite Jamita Minggu 8 Mei 2022 on, Minggu Jubilate, godang nuaeng angka barita na pabotohon angka ulaon ni jolma laho pangoluhon jolma naung mate. Sahalak Pandita Bethel sian Amerika na margoar Tyler Johnson mambahen sada team laho pangoluhon jolma angka naung mate. Songon i nang Sam Parnila, sahalak na bisuk di bidang kedokteran di Universitas Stony Brook, New York. Didok ibana do na boi do ibana pangoluhon jolma naung mate nang pe jolma i nunga leleng mate. Di taon 2020, dipatupa do dalan laho pangoluhon jolma naung mate marhite teknik The Cryonics di Institut Penelitian The Shandong Yinfeng Life – China, dohot angka barita lan na asing. Adong do fase ni hamatean molo di bidang kedokteran, i ma:
- Mati Klinis
Sistem pernafasan dan detak jantung yang telah berhenti, namun ketika dilakukan masase jantung, pemberian nafas buatan, penggunaan defibrilator atau tindakan klinis lainnya, kemungkinan seseorang itu bisa hidup kembali.
- Mati Otak
Berhentinya semua fungsi otak. Pada fase ini orang yang telah mati otak bisa hidup kembali ketika menggunakan alat–alat kedokteran seperti alat pernafasan, alat pacu jantung dan yang lainnya. Namun sering sekali mati otak disebutkan adalah fase terakhir dalam kehidupan manusia, namun organ tubuhnya masih bisa didonorkan ke yang membutuhkan.
- Mati Biologis
Pada fase ini seseorang sudah dapat dikatakan mati secara total dan seluruh organ tubuh dan sel–sel dalam tubuhnya pun sudah mati dan tidak memungkinkan untuk bisa hidup kembali.
Tung boha pe dalan ni jolma laho pangoluhon jolma naung mate, tontu holan Jahowa Debata do nampuna hangoluan on. Molo mangolu hita, mangolu di Tuhan i ma. Molo mate hita, mate di Tuhan i ma. Alana ni i, mangolu manang na mate pe hita di Tuhan i do hita, jala Ibana nampuna hita. Jahowa Debata do na patupahon haheheon sian angka naung mate. Parhitean do angka jolma. Di Padan na Robi dipahehe si Elia do sahalak naung mate, songon i nang si Elisa. Jesus Kristus pe patupahon hahehehon do di angka naung mate. Sahat tu partingkian hakristenon di na parjolo i, dipatupa angka apostel do pahehehon angka naung mate. Alai ingot ma hita, huaso dohot angka pambahenan ni Jahowa Debata do saluhutna i. Jala Jesus Kristus do na marhuaso taringot tu hangoluan dohot hamatean. Marhite haheheon ni Jesus Kristus, nunga talu be sorop ni hamatean i.
Ndada holan pangoluhon naung mate tanda halongangan na binahen ni angka apostel. Pamalumhon angka na marsahit, songon i nang mambaritahon barita haluaon. Nang pe dilele jala ditangkup ndang mansohot nasida marbarita na uli. I do na gabe apulapul tu angka jolma na manjalo barita haluaon i, gabe porsea nasida jala marhasatiaon. I pe sada halongagan do i.
Sadari on, halongangan i masa ma di hita. Mangolu pe hita jala marhahipason, halongangan bolon do i. Nang pe ingkon tabolus angka ragam ni parmaraan ni daging alai mangolu dope hita. Na gabe sirimangrimangionta marhite turpuk jamita on, boha do alusta di sude angka pambahenan ni Jahowa i di ngolunta sahat tu tingki on? Jala boha do jolma na asing boi gabe porsea tu hita angka na porsea? Rade do hita dipangke Debata patupahon angka ulaon halongangan i di ganup ngolunta be?
Sada ulaon halongangan do molo boi hita marhosa, marhasatiaon di haporseaon dohot patupahon angka na denggan, marpanarihonhon tu na hurangan. Sada ulaon halongangan do molo olo hita mardame. Manolukhon tangan laho marsijalangan, mardame nang pe sintong hita. Sada ulaon halongangan do molo boi hita manangiangkon angka na mangarsahi hita asa muba rohanasida. Sada uloan halongangan do molo boi hita paposhon roha ni donganta taringot tu Hata ni Debata dohot haporseaonna tu Debata. Sada ulaon halongangan do molo tutu hita mangkaholongi Debata dohot mangkaholongi sude angka jolma manisia na adong di portibi on.
Sude ulaon halongangan i, unang ma mampangasahon dirina, hapistaranna, dohot siadonganna. Marsinggang jala martangiang, mangido gogo dohot pangajarion ni Debata laho patupahon ulaon halongangan i do na ingkon diulahon. Mangasahon gogo dohot huaso ni Debata di bagasan Kristus, patupaonta ma ulaon halongangan. Molo dung songon i, lam tu toropna ma angka na porsea. Dipapujipuji na porsea i ma goar ni Jahowa Debata, di bagasan Jesus Kristus. Unang ma manghirim hita di pujipujian dohot hasangapon na sian portibi on molo dipangke Tuhan i hita patupahon ulaon halongangan. Ingot ma! Huaso ni Jahowa Debatanta di bagasan Jesus Kristus do na pangoluhon si Tabita. Jala marhite huaso ni Jahowa Debata do hita patupahon angka ulaon halongangan. Amen.
Penulis:
Pdt. Daniel Bonardo Pane, S.Th
Penyunting:
Timothy P. Saragi
BAHAN JAMITA INI JUGA DAPAT DIUNDUH DENGAN MENG-KLIK TULISAN DI BAWAH INI
JAMITA MINGGU 8 MEI 2022 – MINGGU JUBILATE
