JAMITA MINGGU PASKAH 17 APRIL 2022 – LUKAS 24 : 1-12

JAMITA MINGGU PASKAH, 17 APRIL 2022 - Nunga Hehe Jesus

Jamita Minggu Paskah 17 April 2022
PASKAH I
MINGGU, 17 APRIL 2022
NUNGA HEHE JESUS
Lukas 24 : 1-12

PATUJOLO

Nunga hehe Jesus! On do na gabe ojahan ni Jamita Minggu Paskah 17 April 2022 di Pesta Paskahta tingki on. Pandohan “Nunga Hehe Jesus” ndada be pandohan na imbaru i, ala sian 2000 taon na salpu pe, pandohan on nunga dibaritahon angka huria na parjolo uju i. Asa molo disungkun hita, boasa hita porsea tu Jesus naung hehe i? Alusna, tontu sahali ala naung sahat do tu hita barita i. Jala dohot hita manghaporseai barita haheheon i, nang pe so dohot hita marnidasa hatiha i.

Alai molo tauji muse mambahen sungkunsungkun. Boasa sahat tu saonari holan hita na marugamo Kristen na sian ragam ni ugamo na adong di portibion na porsea tu Jesus naung hehe i? Sotung na holan turiturian sambing do barita i di nasida umbahen na so olo nasida dohot manghaporseai. I do umbahen sahat tu saonari on, sai adong dope angka arkeolog manang peneliti na sai marusaha laho mambuktihon “na so tutu hehe Jesus”. Tarida do i sian pengalaman ni sahalak jurnalis na margoar “Frank Morison” na marusaha mambahen penelitian laho mambuktihon na so tutu hehe Jesus. Dilului ibana do Jesus naung hehe i tu tanoman ni Jesus, dibahen ibana sude hapistaranna laho mambuktihon na so tutu hehe Jesus.

Nian ndang halak Kristen ibana, jala barita taringot tu Jesus i dietong do songon turiturian, mitos, legenda sambing. Disangkapi ibana ma laho mambahen data sedetail mungkin, marhite fakta-fakta sejarah arkeolog, paboa memang ndang tutu hehe Jesus i.

Dimulai ibana ma manggurithon lembar demi lembar hasil ni penelitianna. Dipaboa ibana di tulisanna i angka fakta-fakta naung diteliti. Alai, aha ma na masa? Di son ma na so tuk hita umboto bagas ni dalan ni Debata. Di ujung ni penelitianna muba do panimbangion, pangarajumion penelitian ni si Morison taringot tu Jesus. Songon halak na so porsea hian di Jesus, jala na mangetong holan turiturian sambing di barita i, muba gabe sahalak peneliti, jurnalis, na manghaporseai Tuhan Jesus. Na so manghaporseai barita ni Jesus hian, muba gabe siihuthon Kristus. Di kesimpulan ni penelitianna, di salah satu kutipan tulisan i didok ibana “Nunga Hehe Jesus”. Panindangion ni si Morison on do nang naung binaritahon ni si Lukas di turpukta sadarion paboa tutu situtu do naung hehe Jesus i.

BACA JUGA BAHAN EPISTEL MINGGU PASKAH I – MINGGU, 17 APRIL 2022

HATORANGAN
Boasa luluanmuna na mangolu di inganan ni angka na mate?

Dungkon mate tarpajal Tuhan Jesus, muba do haporseaon ni angka sisean i maradophon Jesus. Manigor martabuni do nasida jala mansohot sian hasomalanna. Ndang adong be nanggo otik pangkirimon nasida taringot tu Jesus na ingkon hehe muse, songon naung tinonahonNa. Tung mandate situtu do nasida. Ndang margurasa be di roha nasida angka naung nihataan ni Jesus i. Sandok nunga marujung luhutna.

Alai di horong ni angka parompuan na sai mangihuthon Jesus, adong do pe semangat di nasida. Marhite i dungkon marujung Jesus, sai dipaihutihut nasida do tudia bangke ni Jesus ditanom. Dungkon diboto nasida na hinambor ni si Jusuf na sian Arimatea tanoman ni Jesus, marsangkap ma nasida laho mamongoti tanoman i. Jala di ari Jumat dungkon mate Jesus, nunga dipature nasida angka na hushus ro di miak mir laho boanon nasida tu tanoman i (ida Lukas 23:56).

Di ayat na parjolo di turpuk jamita on, dipatorang do; Alai di ari parjolo dung ari Sabbat, ro ma nasida mansai sogot tu tanoman i, mantat na hushus na pinature nasida (ayat 1). Haroro ni angka parompuan laho paulihon bangke ni Jesus gabe tanda. Paboa nang angka parompuan namangihuthon Jesus i pe, ndang be porsea na laho hehe Jesus. Sandok nunga marujung, jala tinggal kenangan nama i sude. Asa haroro nasida i, ndang sangkap laho manguduti angka naung tinonahon ni Jesus. Ndang sangkap dalan marsiadu laho manaksihon haheheon ni Jesus. Alai holan dalan laho paulihon bangke ni Jesus do, asa tung tama bangke i di tanoman i. Boi dohonon, songon dalan penghormatan parpudi nama i di rohanasida.

Molo pola so adong be na manghaporseai na ingkon hehe Jesus, songon dia ma udut ni haluaon naung pinatupaNa i? Di ayat 2-3 didok; Alai nunga digulang batu i sian tanoman i, jala ndang di si be bangke ni Tuhan Jesus. Molo di evangelium na asing, dipaboa do, ia na manggulang batu i, i ma angka surusuruan na tuat sian banua ginjang (ida Mateus 28:2). Na gabe sungkunsungkun, boasa pola digulang batu i? Asa boi do nuaeng Jesus haruar sian tanoman i? Di Evangelium Markus dibaritahon, gabe sada diskusi na serius do di nasida taringot tu manang ise na boi sian nasida laho manggulang batu ni tanoman i (ida Markus 16:3).

Sian on boi ma antusanta, batu na ginulang ni surusuruan i, i ma songon dalan ni Tuhan Jesus laho mangurupi angka parompuan i. Asa tung boi nasida mamongoti tanoman i jala marnida angka na masa i. Tung sari situtu do Tuhanta i di angka parompuan i. Ndang di pasombu Tuhan Jesus angka parompuan i, gabe sundat laho marnida na masa i. Dipatulus do sangkap nasida asa sangkap i paobaon jala paulion ni Debata hombar tu sangkapNa.

Dungkon diida nasida na masa i. Ndang dapot nasida be bangke ni Tuhan Jesus, tung jut situtu do roha ni angka parompuan i (ayat 4). Jala dung diida nasida surusuruan i, gabe huhut nasida mabiar (ayat 5). Roha biar on, tubu sandiri do di hajolmaon. Taboto do, jotjot do digombarhon haroro manang hataridaan ni angka surusuruan i, marhitehon rupa na saksak, marlinanglinang jala mardongan hamuliaon. Molo jolma biasa di situasi si songon on, pasti do gabe tarhalomong huhut mardongan biar. Barita ni surusuruan i mandok; Ndang di son Ibana: Nunga dipahehe Ibana. Ingot hamu ma na hinatahonNa (ayat 6-7).

Mangalului Jesus di inganan ni angka na mate, i ma ulaon na so marguna, ulaon na so marimpola, ulaon si soada. Lapatanna, angka ulaon na siasia sambing do i. Boasa dilului nasida Jesus di inganan ni na mate? Ala memang, ndang porsea nasida di heheheon ni Jesus. Asa boi dohonon, tung marisuang do jala tudos na so marguna, na so marimpola, na so marniula, molo so porsea hita di Tuhan Jesus. Laos dohononta ma, molo so porsea hita di Tuhan Jesus, tung aha pe na taula, na di rohanta angka na boi mambahen hita sonang, tung na so marguna jala marniula do i. Gariada pangkorhon ni angka na taula i, boi gabe mambahen jut rohanta, mambahen hita mabiar, tahutan, marsak, ala so tuk gogonta, jala ndang hombar tu na di rohanta. Antong aha do sipatupaon ni angka parompuan i asa gabe marguna jala marimpola haroro nasida i?

Nunga hehe Jesus, haporseai ma hataNa jala baritahon ma haheheonNa.

Di ayat na mangihut didok: Diingot nasida ma hataNa i, jala mulak nasida sian tanoman i laho mamaritahon tu angka donganna paboa “Nunga Hehe Jesus”. Ngolu na marimpola jala na marguna, i ma molo mulak parompuan i tu dalan na pinatuduhon ni Jesus. Mulak sian tanoman, mulak sian ulaon na soada, mulak sian sangkapsangkap ni roha, mulak sian na holom. Jala borhat tu ulaon na imbaru, borhat tu dalan na tiur, borhat tu dalan na denggan. Borhat laho mangeahi sangkap ni Tuhan Jesus.

Aha do na pahothon roha ni angka parompuan i asa borhat manadingkon jut ni roha, borhat manalpuhon lungun dohot arsak ni roha, borhat laho muba sian ngolu na digohi arsak tu ngolu na gok las ni roha dohot olopolop? I ma marhite na manongtong manghaporseai hata ni Tuhan Jesus. Bukti nyata di naung kosong tanoman i, huhut di barita na pinaboa ni surusuruan i, gabe dalan laho papos rohanasida laho manghaporseai hata ni Jesus  paboa tutu situtu do naung hehe Jesus.

Barita haheheon i gabe margurasa di rohanasida. Laos i do na mangonjar rohanasida laho mamaritahon barita i tu angka sisean i. Ndang laos ditabunihon boti barita haheheon i. Alai tung digogo do laho borhat manopot angka donganna. Asa donganna na tongon di songgopi na holom i, dohot umboto barita i. Asa nang nasida pe ihut gabe muba manghaporseai Jesus naung hehe i.

Alai aha ma alus ni angka sisean na asing dungkon dipaboa angka parompuan i luhut angka na masa i? Hira turiturian sambing do angka hata i di rohanasida jala ndang dihaporseai (ayat 11). 2000 taon naung salpu pe hape, nunga parjolo dipungka angka sisean i di mulana i, ndang manghaporseai paboa naung hehe Tuhan Jesus.

Tudos songon angka ugamo na asing na adong di sandok portibion, na sahat tu saonari ndang porsea dope paboa naung hehe Tuhan Jesus. Songon angka peneliti, arkeolog na sai manguji jala patuduhon angka bukti paboa na holan turiturian sambing do haheheon i di rohanasida. Alai adong do tong sisean i, i ma si Petrus songon barita na di ginjang taringot tu sahalak jurnalis na margoar “Frank Morison”, nang pe so manigor porsea si Petrus, manigor laho do ibana tu tanoman i, laho marnida bukti, fakta paboa na tutu hehe Tuhan Jesus (ayat 12).

Nang si Petrus pe dohot do marnida angka panindangion ni parompuan i, ia hinambor i nunga kosong, ndang di si be bangke ni Jesus, nunga hehe Ibana. Evangelium Lukas mandok: Longang do si Petrus marnida na masa i. Nian holan di mulana i do angka sisean i so manghaporseai naung hehe Tuhan Jesus. Dibarita na mangihut muse, gabe dohot do angka sisean i manghaporseai barita “Nunga Hehe Jesus”.

Marhite sian barita ni si Lukas on, gabe boi ma idaonta gombaran/model ni angka na umbege barita haheheon i. Naparjolo, rumang ni hadirion ni angka parompuan i. Dung diboto nasida na masa i, gabe muba ma nasida gabe porsea di hata ni Jesus, jala huhut borhat laho mamaritahon barita haheheon i. Napaduahon, rumang ni hadirion ni angka sisean na deba. Dung di bege nasida barita i, ndang manigor porsea nasida. Ala so dohot nasida marnida jala umbege barita ni surusuruan i. Ala so porsea nasida, ndang dohot nasida laho mamaritahonsa. Ala dietong do barita i, holan turirutian sambing. Napatoluhon, rumang hadirion ni si Petrus. Ndang manigor dihaporseai ibana barita ni angka parompuan i. Alai naeng di rohana, jolo idaonna, jolo pamanatonna, jolo ujionna, atik tutu do manang ndang barita i. Sian na tolu horong on, dohononta ma: Martua ma angka na porsea, atik pe so diida (ida Johannes 20:29b).

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Aha do patupaonta di naung parsidohot hita umbege barita haheheon ni Tuhan Jesus di Pesta Paskah sadari on, songon nidok ni Jamita Minggu Paskah 17 April 2022 on? Songon parrohaon ni angka parompuan i do hita? Manang songon parrohaon ni na deba sian sisean i? Manang songon hadirion ni si Petrus? Tontu sahali, ragam do alus dohot reaksi ni jolma di na umbege barita “Nunga Hehe Jesus”. Buktina, sahat tu saonari, holan hita parugamo Kristen dope na porsea paboa Tuhan Jesus nunga hehe sian hamatean, jala nunga hundul di siamun ni Debata.

Sahat tu tingki on, sai marusaha do angka torop jolma laho manulak barita haheheon i. Marragam usaha dipatupa marhite penelitian, bukti dohot lan angka na asing. Boha ma asa unang porsea jolma i dihaheheon ni Tuhan Jesus. Asa unang porsea jolma i, paboa holan Jesus do sipalua. Alai ndang adong na tuk mangambat huaso barita haheheon ni Jesus i. Antong naeng ma tongtong porsea hita di barita haheheon i, jala huhut parsidohot hita songon na binahen ni angka parompuan i. Songon na tarsurat di Rom 10:9 “Ai malua ma ho molo diparhatopot pamanganmi Tuhan Jesus i huhut dihaporseai roham naung dipahehe Debata Ibana sian angka na mate”.

Nunga bongot hita di Pesta Paskah sadarion, borhat ma hita marbarita. Tabaritahon ma haheheonNa i marhite angka ragam ni cara, metode. Boi do i marhite Facebook, Whatsapp, video YouTube, ulaon Diakonia dohot lan angka na asing. Taingot ma, sian sude angka ugamo na adong di hasiangan on, holan tanoman ni Jesus i do naung rumar (kosong). On do fakta secara ilmiah na porlu diboto saluhut jolma. Jala on do fakta na mambahen ugamo Kristen marasing sian angka ugamo na asing. Tanoman ni Jesus nunga rumar (kosong).  Nunga hehe jala mangolu di surgo, jala nasa huaso nunga dipasahat Ama i tu Ibana (ida Filipi 2:10-11). Nunga hehe Jesus i, beta ma borhat laho marbarita. Selamat Pesta Paskah.

Penulis:
Pdt. Suan Dame Siahaan

Penyunting:
Timothy P. Saragi

BAHAN JAMITA INI JUGA DAPAT DIUNDUH DENGAN MENG-KLIK TULISAN DI BAWAH INI
JAMITA MINGGU 17 APRIL 2022 – MINGGU PASKAH I

About Timothy Saragi

Staf Biro Infokom HKI

View all posts by Timothy Saragi →