JAMITA MINGGU 18 SEPTEMBER 2022 – MATEUS 4:1-11

Jamita Minggu 18 September 2022

Jamita Minggu XIV Dung Trinitatis 18 September 2022
MINGGU XIV DUNG TRINITATIS
MINGGU, 18 SEPTEMBER 2022
“MANGALANGKA RAP DOHOT TUHAN”
Mateus 4:1-11

PATUJOLO

Molo binege hata ‘mangalangka rap dohot Tuhan’, timbul do di roha tung soadong be mangambati langka niba di bagasan ngolu on. Ripe sonang dang adong na sungkot, tung tu dia pe iba laho mangalangka. Ido tutu, tung godang poda-poda nauli asa rap mangalangka dohot Tuhan, asa dapotan hasonangan di bagasan ngolu on dohot hangoluan sogot na pinarade ni Debata tu jolma manisia. Alai molo songon i do tabo na rap mangalangka rap dohot Tuhan, boasa dang sude olo jolma i mangalangka rap dohot Tuhan?

HATORANGAN

Diunjuni si bolis do Jesus Kristus di halongonan. Hata “diunjuni” boi ta ida di ayat 1,3,7. Hata “unjun” di hata gorik di dok ‘peraizo’ na marlapatan ‘mangunjuni laho mambuktihon’. Peraizo sian dingkan (pihak) ni Debata marlapatan “pangunjunan laho mangajar haporseaon asa togu”. Sian dingkan ni siboli, peraizo lapatanna “mangunjuni asa madabu tu bagasan dosa. Pangunjunan na dihilala ni Jesus, ima pangunjunan situtu, ala nadiunjuni sibolis i Ibana ima marhitehite hajolmaonNa. Gabe malean, mauas, loja do Ibana songon sada jolma nasatohona. Di heber 4:15 di dok: “Ai naung adong do di hita sintua ni malim na tarbahen dongan mangkilala di angka hagaleonta; tung na tarunjun do Ibana di na saluhut songon hita, alai ndang mardosa”.

Di ayat 1; Dung i ditogihon Tondi i ma Jesus tu halongonan, asa diunjuni sibolis i Ibana. Tondi nanidok na di son “tondi ni Debata” naung adong hian di masa ni panurirang di angka narobi. Tondi do tong na manuntun Jesus di angka ulaonNa (pat. Mat. 3:16 du, Luk 4:1 du) jala Tondi i do na mamungka huria naparjolo dohot pahembanghon sa.

Di bahasa Gorik, sibolis di dok “diabolos” di bahasa Heber “Satan” namarlapatan “apas, asung, panuhas, pandaho” (Job 1:6). Sibolis ima nanaeng mandabu saluhut jolma tu hasalahan, nanaeng maneganegai ulaon ni Tuhan Debata (Mat. 13:39, Joh. 8:44, Joh. 13:2; Ul. 10:38). Pangunjunan nanaeng bahenon ni sibolis tu Tuhan Jesus ima asa manimbil Jesus sian dalanNa naung ditahi Debata Jahowa tu Ibana.

Di ayat 2 di dok: “Jadi dung opatpulu ari opatpulu borngin lelengna so mangan Ibana, male ma dihilala”. Jesus sian hajolmaonNa, naeng parade diriNa laho mangula jala manghobasi hata ni Debata, marhitehite tangiang dohot namangorom siallangon, asa diramoti jala tarpasupasu panghobasionNa. Asa dapotan togu ni roha sian namamungka panghobasionna sahat tu nanaeng tarpajal Ibana di hau pinarsilang. Opat pulu ari opat pulu borngin ma Ibana mangorom mangan di halongonan i. Pardagingon naung gale, siubeon naung takkuraparon, gabe sada partingkian na tongon di si bolis laho mangunjuni Jesus. Dohot halongonan na tung mansai godang angka dorbia na riar. Di bagasan hasusaan i ma mullop sibolis laho mangunjuni Jesus.

Di ayat 3 di dok: “Dung i didapothon sipangunjuni i ma Ibana, ninna ma: Molo na tutu Ho Anak ni Debata, dokkon ma batu on gabe sipanganon!”. Hata on ndang naeng patuduhon hasangsion ni sibolis taringot tu status ni Jesus na gabe “Anak ni Debata”, alai parhitean ni sibolis ma i laho mamungka mangunjuni Tuhan Jesus. Asa madabu Jesus tu hasalaan ‘menyalahgunakan huasoNa” songon sada Anak ni Debata.

Di ayat 4 di dok: ‘Alai ninna ma mangalusi: Na didok Surat i do: “Apala holan sipanganon hangoluan ni jolma; tung nasa hata ni Debata do, na ro sian Ibana!’. Sanga do dibuat Jesus sian buku ni si Musa alusna ima di 5 Musa 8:3; “ Ibana tutu paserep roham, Ibana huhut mangaranapi ho, Ibana muse mangalehon ho mangan Manna, na so tinandam hian, manang tinanda ni angka ompum; asa Ibana pabotohon tu ho, ndada holan sagusagu hangoluan ni jolma, mangolu do tahe jolma i sian ganup hata na ruar sian pamangan ni Jahowa”. Gabe malua ma Jesus sian pangunjunan na parjolo. Ala dang tuk huaso ni sibolis laho mangunjuni Jesus sian pardagingon, diuduti si bolis ma muse mangunjuni Jesus sian hosaNa.

Di ayat 5,6,7 naeng unjunan ni si bolis ma Jesus marhite-hite hosaNa. “Molo Anak ni Debata Ho, timbungkon ma Dirim tu toru, ai didok Surat i do: “Dohononna do angka surusuruanna manangannangan Ho, asa unang tartuktuk patmu tu batu!” tahi ni si bolis, asa tung sangsi Jesus tu diriNa naung dihalomohon Debata. Alai di alusi Jesus ma muse sian buku ni si Musa ima di 5 Musa 6:16; Ndang jadi unjunanmuna, Jahowa Debatamuna i, songon naung niunjunanmuna Ibana di Massa. Ala tarsundati do pangunjunan ni si bolis tu Jesus di padua halihon, gabe diuduti sibolis ma tong mangunjuni Jesus tu napatolu halihon. Gabe diunjuni ma Jesus sian partondion.

Ayat 8-10: “Dung i diulahi sibolis i ma manogihon Ibana tu punsu ni dolok na timbo situtu, dipatuduhon ma tu Ibana nasa harajaon na di portibi on ro di hasangaponna, dung i ninna ma mandok Ibana, saluhutna i lehononku do tu Ho, molo olo Ho marsomba tu ahu. Dung i didok Jesus ma mandok ibana: Laho ma ne ho, bolis; ai didok surat i do: “Tuhan Debatam do sisombaonmu, Sasadasa do sioloanmu!”

Molo sangkap ni Jesus asa gabe pangulu ni harajaon ni portibion boi do tibu di oloi si bolis. Mangihut ma muse hasangapon, hamoraon di parade si bolis di Jesus asal ma di oloi Jesus si bolis i laho marsomba ibana. Alai sangkap ni Jesus ima sangkap na badia, laho mangula jala manghobasi ulaon naringkot tu hasangapon ni Debata Ama, dohot marsomba tu Ibana. Sangkap ni Jesus ima laho manobus dosa ni jolma dohot patuduhon tu dalan harajaon ni Debata. Asing do sangkap ni Jesus sian sangkap ni portibion. Ndang politik haportibion, ndang hamoraon ni perekonomion. Harajaon ni Jesus ima harajaon ni partondion na ro di saleleng ni lelengna. Aha na jinanjihon ni portibion ima sian hagiot ni daging, hagiot ni mata, dohot hisapshisap ni parngoluon naung jinanjihon ni sibolis hian do i tu Jesus 2000 taon naung salpu. Alai tangkas do i ditulahi Jesus, gabe di dok: Laho ma ne ho, bolis; ai didok Surat i do: “Tuhan Debatam do sisombaonmu, Sasadasa do sioloanmu!” Manomba debata asingni sian Debata Jahowa, ndang tama i di adopan ni Jahowa. Molo sangkap ni sibolis, sombaon ni jolma i ma nian angka debata na leban.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Molo pinaihutihut hatorangan ni jamita on mardomu tu thema minggunta tingki on ima “mangalangka raphon Tuhan”, boi i marhusori dibagasan rohanta. Tung na denggan situtu do tahe mardalan/ mangalangka raphon Tuhan i, alai gabe sipangambati do hape sibolis i di jolma laho mardalan dohot Debata. Ia Jesus i sandiri pe tahe, di bagasan hajolmaonNa, naeng do padaoon ni sibolis sian sangkap ni Jahowa.

Molo sangkap nang roha ni jolma i, naeng do tahe pajonok diri tu Debata, alai diboto si bolis i do hagaleon ni jolma asa mandao sian Debata. Songon pangunjunan na tu Jesus, tong do diunjuni sibolis hita sahat ro tu tingki on. Sipata haraparon, parsahiton, hapogoson, angka mara mambehen jolma i dielaela si bolis asa mandao sian Debata. Dang holan sian hapariron, sian hasonangan pe naeng do dielaela siboli hita asa mandao sian Debata. Marhitehite hamoraon, sangap dohot angka ondeng na asing boi dipangke sibolis i asa mandao sia Debata, asa unang mardalan raphon Debata. Boha tahe? Boi do hita marsihohot raphon Tuhan Jesus mardalan di lomo ni rohaNai? Dipatuduhon Jesus do hadirionNa na gabe sitiruon ni saluhut jolma laho mangalo pangunjunan ni sibolis. Asa unang dipaotooto sibolis i hita.

Molo sian hajolmaonta do, olo do dang sanggup hita mangalo pangunjunan ni si bolis. Ido umbahen di tongos Jesus di hita Tondi Parbadia, asa margogo hita laho mangalo elaela ni sibolis (pat. Lukas 4:1). Angkup ni i, ringgas ma hita marsaor dohot Debata. Asa adong sinjatanta laho mangalo sibolis i. Amen.

Penulis:
Departemen Marturia HKI

Penyunting:
Yohanes Simatupang

Bagikan Postingan ini:

About Yohanes Simatupang

Staff Biro Infokom

View all posts by Yohanes Simatupang →