EPISTEL MINGGU 10 APRIL 2022-MATEUS 21:1-9

EPISTEL MINGGU, 10 APRIL 2022 - PINASUPASU MA IBANA NA RO DI BAGASAN GOAR NI TUHAN

Epistel Minggu 10 April 2022
MINGGU PALMARUM

MINGGU, 10 APRIL 2022
“PINASUPASU MA IBANA NA RO DI BAGASAN GOAR NI TUHAN”
Mateus 21:1-9

PATUJOLO

Molo taparrohahon barita taringot di haroro ni Jesus tu Jerusalem, ndang holan evangelium Mateus na manurathon i, sude evangelium mulai sian Markus, Lukas dohot Johannes dohot do manurathon manang manghatindangkon i. Alani i, tung mansai ringkot do barita on ala manghatindangkon pardalanan ni Kristus tu hamonangan. Anggo peristiwa on ima 5 ari andorang so masa partinaonan dohot hamamate-Na, ai nunga adong hian boaboa taringot tusi di tradisi halak Israel, ingkon dibuat ma sada birubiru gabe pelean ni paskah (2 Musa 21:1-9). Sada gombaran do on taringot tu Kristus na gabe pelean asa manobus hita jolma pardosa tu hangoluan na salelenglelengna.

Mardalan pat do Tuhan Jesus sian Galilea tu Jerusalem na manggombarhon habuluson dohot habengeton di panghobasionNa. Pinasupasu ma tutu angka na ro di bagasan goar ni Tuhan, manang songon dia pe harorona, termasuk ma i di bagasan bulus ni roha. Di tongatonga ni huria pe tung mansai ringkot do marhobas di bagasan bulus ni roha, jala nunga di patudu Tuhan i tu hita pangkorhonna, gabe taruli pasupasu do sude.

BACA JUGA BAHAN KHOTBAH MINGGU PALMARUM – MINGGU, 10 APRIL 2022

HATORANGAN
Marhobas Ma Hita di Bagasan Bulus ni Roha dohot Pangoloion

Panomunomuon ni halak Jerusalem i pe tung mansai bulus do, ndang adong pangaradeon na istimewa. Pangidoan ni Jesus pe ndang pola maol, ai holan halode, ipe na maminjam do, jala ingkon paulakhononna do muse tu nampunasa (ay 2). Somalna hoda do dipangke jolma na marsangap. Tontu boi do i diparade Tuhan, gari surusuruan boi gabe hundulanNa (Ps. 18:11), alai ndada i dipatudu Jesus, halode do dipillit asa gabe tiruan ma on jala tarida bulus ni rohaNa di adopan ni angka jolma. Ai ndada sian portibion harajaonNa, jala nunga rap dohot Ibana dohot hita di bagasan toruk ni roha, tadok ma i immanuel.

Molo didok hata “maminjam”, somal do dipatudos tu hadangolon manang hapogoson. Jala dison pe dipatudu Jesus do na so pola arta na ingkon sipangasahononhon laho mamboan dame. Jala sisean i pe ditongos asa maminjam halode tu sahalak na di Jerusalem. Ditonahon jala diajari do sisean i asa maminjam ala ringkot. Alani i, di tongatonga huria, so tung maila hita maminjam laho pangkeon di panghobasion. Suangsongon i na marhasurungon di sinadongon pe tung mansai ringkot mangalehon na di ibana i asa boi pangkeon di tongatonga pelayanan ni huria.

Jala taingot ma ingkon konsisten do huria i, dung dipinjam ingkon do paulakon. Ndang adong istilah pinjam loss di halak Kristen. Ingkon boi goaron hita halak na bertanggungjawab di ulaonta. “Barang” na tapinjam pe so tung sega. Molo denggan tingki dipinjam, ingkon denggan muse tingki dipaulak. Halode na dipinjam Jesus tontu diparateatehon dohot denggan. Ai disarihon Debata do sude asa tu haulion ni ngolu (1 Kor. 9:9).

Pintor dioloi sisean i do mangulahon hombar tu pandohan ni Jesus i. Ndang pola sangsi nasida ala memang nunga diajari sian mulana, di na mangalusi angka sungkunsungkun. Di tongatonga ni huria pe songon i ma nian. Ingkon roha pangoloi do marhobas, jala unang mabiar manang sangsi ala diajari Tuhan i do hita laho marargumen asalma hombar tu hasintongan jala ringkot di ulaon pelayanan, ala sude tujuanna laho pasangaphon Debata. Ndang gabe dipasombu angka sisean mangula angka siulaonna, denggan do diajari jala dipaborhat asa boi mandiri di bagasan pamingkirion dohot haporseaon. Tung mansai uli do molo huria manghangoluhon roha na masiajarajaran. Na tumua ringkot mangajari angka sundut na umposo jala angka na umposo ringkot mangido angka panuturion sian naung godang pengalaman. Ai nunga diajari Tuhan Jesus ringkot ni na mangajari angka sisean di bagasan ulaon panghobasion (pelayanan).

Tahaposi Ma Tuhan i Sian Bulus ni Roha dohot Holong

Masa pe sude i asa jumpang do na tarsurat i, ima sian Panurirang Sakaria 9:9 na paboahon haroro ni Mesias di bagasan halambohon dohot hadameon. Ditujuhon ma i tu boru Sion, na manggombarhon ‘huria’. Ditogihon do muse boru Sion asa marnida haroro ni Mesias i. Na marlapatan ingkon tajom parnidaan ni huria i tu angka halombohon, haserepon dohot habuluson. Unang songon si Latus dohot si Herodes na so boi porsea tu raja di bagasan habuluson. Ai nunga tarhurung konsep nasida tu raja na ingkon marhatongamon jala marhuaso.

Halode na dihunduli Jesus tujuanna laho melayani, ndada laho marporang. Ndang gabe diboan muruk ni roha nang pe angka jolma pardosa sijumpanganna. Tama do nian jolma i hona uhum, alai ndada uhum i gabe diondolhon. Ndang adong dendam dohot uhum, alai holong dohot dame do dipataridahon. Ndang mudar ni bangsona dipangido laho manobus dosa, alai mudarna sandiri do diusehon.

Di bagasan habuluson i gabe godang jolma ro, ala memang bebas do jolma ro mandapothon Jesus. Ndang adong batas, sude adong akses laho majumpangi ibana. Ndang adong pejabat tinggi namanomunomu Ibana, tung angka jolma na biasa do. Jala ndang pola godang dipangido Jesus manang songon dia peleanta. Diampehon na torop i ma paheanna tu ginjang ni halode i asa dihunduli Jesus. Na deba dipaherbang ma paheanna tu dalan i patuduhon tung arga do Jesus di nasida. Pahean do sada kebutuhan na mansai ringkot, alai rade nasida mangalehon i. Sosososo do tu hita on asa tapasahat sude hinaarga na adong di hita di toru ni hamuliaon ni Jesus. Sude arta na lohot di hita ingkon boi tapalua di bagasan Jesus asa unang angka na di portibion mangarajai dirinta.

Rade Ma Hita Gabe Siboan Pasupasu

Na deba nari manalliki angka hau ranting dung i dipaserangkon tu dalan i, namanaringoti ari Tabernakel manang digoari ari rea parlapelapean (Sak. 14:16), ari haluaon, las ni roha dohot hamonangan. Jadi nunga adong pos ni roha disi na ingkon monang do Kristus mamolus angka sitaonon asa marhaluaon jala taruli pasupasu ma sude jolma. Diolophon angka na torop i ma “hosanna”, lapatanna ‘Sai manumpak ma Ho’ (Psalm 118:25) di bahasa Indonesia: “Ya Tuhan, berilah keselamatan”.

Mesias nunga dipabotohon gabe batu parsuhi na binolongkon ni angka pande bagas (Ps. 118:22; Ul. Ap. 4:11). Tung hansit do siboluson ni Jesus ala angka na pistar do mambolongkon Ibana. Alai di si do halongangan ni ulaonNa. Ai ndada pingkiran ni jolma, pingkiran ni Debata, ndada dalan ni Debata dalan ni jolma, ninna Panurirang Jesaya (Jes. 55:8-9). Gariada angka dalan na dianggap parir manang oto gabe ido dipangke manghamonangkon harajaon ni portibion.

Arga do batu parsuhi i nang pe dibolongkon, alani i arga jala marhamuliaon do Jesus nang pe ditanggali harajaonNa. Ndang gabe mago sangapNa nang pe dibolus dalan na parir, na so mararga di jolma. Ari hamonangan i nunga gabe patujolo hajongjongan ni huria. Alani i ingkon gabe siboan pasupasu ma huria i marhite angka panghobasionna. Manang songon dia angka na masa, ingkon tampil jala terampil huria di bagasan goar ni Tuhan mamboan angka pasupasu asa mangkorhon hadameon di tongatonga ni konflik, mangkorhon hamamalum di hamamasa sahit nang pandemi, mangkorhon las ni roha di angka na marsak manang na targosagosa.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Sai manghirim do hita tu pasupasu ni Tuhan di bagasan ngolunta, lumobi molo masa angka hamaolon. Tung godang do sipatureonta dung masa pandemi di saluhut luat (global), lumobi di humaliangta. Alai margogo ma hita marhite jamita turpukta on “Pinasupasuma na ro marhite goar ni Tuhan”. Unang mabiar jala unang mandele. Molo tung boi virus rarat, pasupasu ni Tuhan pe boi do rarat. Virus infects, Christus protects. Pos ma rohanta, ramotan ni Debata do hita di nasa angka hamaolon. Tongtong ma togu haporseaonta laho mangadopi angka na masa. Sai mangkirim ma hita, ai gok pasupasu do haroro ni Tuhan i.

Di zaman nuaeng on, godang do angka na mambahen ganggu rohanta, apalagi serba digital nama ulaon. Ndang sala nian i, angka hamajuon na ringkot taihuthon. Alai tongtong ma jamot hita mangihuthon angka na masa. Lam tapajonok rohanta asa unang gabe talu hita sian portibion ai nunga adong sitipon di hita, Kristus Jesus naung mangalehon ngolu dohot las ni roha na manongtong (Mat. 10:39). Di dalam Kristus jalan yang buntu akan menjadi pintu, dan semuanya akan dibukakan bagi orang yang percaya. Amen!

Penulis:
Pdt. Dr. Amran Simangunsong, M.Th

Penyunting:
Yohanes Simatupang

BAHAN EPISTEL INI JUGA DAPAT DIUNDUH DENGAN MENG-KLIK TULISAN DI BAWAH INI
EPISTEL MINGGU 10 APRIL 2022 – MINGGU PALMARUM

Bagikan Postingan ini:

About Yohanes Simatupang

Staff Biro Infokom

View all posts by Yohanes Simatupang →