EPISTEL MINGGU 29 MEI 2022-JOHANNES 5:1-9

Epistel Minggu 29 Mei 2022
MINGGU EXAUDI
MINGGU, 29 MEI 2022
“DITANGIHON DEBATA DO JOUJOU NI ANGKA NA PORSEA“
Johannes 5:1-9

PATUJOLO

Di turpuk Epistel Minggu 29 Mei 2022 on, dipatorang do, ima na marhuaso do Jahowa parohon sahit dohot pamalumhon namarsahit songon namasa di Padan Na Robi, manguhum do Jahowa marhite parohon sahit songon namasa tu Raja Firaun di tingki ni si Abraham dohot namasa tu si Miryam iboto ni si Musa (1 Musa 12: 17, 4 Musa 12: 9-10, 2 Samuel 24:15). Di tingki na asing diondingi/diolati Jahowa do naposoNa sian sahit (2 Musa 23: 25, 5 Musa 7:15). Jala disurat na asing dipamalum Jahowa do si Job sian sahit na posa (Job 2:7, 3:11-13, 42:10+16), dipamalum Jahowa do Raja Hiskia na posa sahitna jala naeng mate, pola ditambai Jahowa umurna 15 taon nai (2 Raja-Raja 20: 1-6).

Suang songoni ma nang di Padan Na Imbaru. Boi do idaonta namansai godang dipamalum Tuhan Jesus angka namarsahit, ima halak namarsahit huliton/ kusta (Markus 1: 39-40), dipamalum namarsahit solpot, dipamalum halak na mapitung dohot na pangpang (lumpuh) (Mateus 4:23-24), dipamalum Jesus do sahalak baoa na nengel dohot na ngungu (bisu), dipamalum Jesus do boru ni si Jairus (Lukas 8: 40-56), sada dakdanak nasolpoton (Lukas 9:37-45), songoni nang naposo ni Letnan i (Lukas 7:1-10). Asa dibuku evangelium Johannes on, tolu hali do di patorang Jesus na pamalumhon namarsahit ima:

1) Jesus pamalumhon anak ni pegawai istana (Johannes 4:46-54)
2) Jesus pamalumhon na pangpang naung 38 taon naso boi mardalan, ima na di aek paridian Betesda (Johannes 5:1-18), laos on ma natauhal diturpuk jamitanta on.
3) Jesus pamalumhon halak naso marnida sian nametmet (Johannes 9:1-41)

HATORANGAN

Dung sidung di pamalum Jesus anak ni na marpangkat di huta Kapernaum, salpuni i adong ma pesta ni halak Jahudi. Jadi nangkok ma Jesus tu Jerusalem, ai sada kesempatan na mansai uli doi di Tuhan Jesus laho patuduhon angka holong, angka ulaon na denggan di inganan i, ia goar ni inganan i ima aek paridian Betesda. Lapatan ni Betesda: “bagas asi ni roha/ rumah belas kasihan (The House of Mercy)”, ala disi ma tarida boi paltak holong ni Tuhan Jesus tu angka namarsahit dohot angka namarsitaonon. Inganan aek paridian i ndang manggarar, alai gratis do. Alana holan mangasahon huaso ni Tuhan i do umbahen namalum nasa sahit dohot angka namarsitaonon.

Lima do soposopo di si, marpeahan do di si torop halak nahansitan, namapitung, nasarion, natiarapon angka na paimaimahon hagugunsang ni aek i. Panurat Surat Evangelium on manurathon tolu mansam ni sahit, ima: namapitung, nasarion, dohot natiarapon. Molo mamereng mansam ni sahit on ndang na boi nasida masuk sandiri tu paridian Betesda i molo so ditogu ni keluarga, sisolhot manang halak. Hape borhat pe nasida tu aek paridian Betesda i nunga bersusah payah jala butuh kesabaran nasida paimaimahon hagugunsang ni aek paridian Betesda i. Boasa boi gunsang aek i? Ai surusuruan ni Jahowa i do na tuat marombasombas tu bagasan paridian i laho manggunsang aek i.

Surusuruan i ima na sinuru ni Tuhan i. Asa na parjolo bongot di hagugunsang ni aek i, gabe malum do, manang dia pe sahit na lohot tu ibana. Jadi halak na parjolo masuk tu aek paridian Betesda i, ido na parjolo boi malum. Alai halak na lemba manang na lambat, ndang taruli dihamamalum ni sahit.

Di paridian aek Betesda i ma Tuhan Jesus pajumpang dohot sahalak baoa naung marsahit saleleng 38 taon, lumeleng sian tingki ni Jesus mangolu di tano on. Disungkun Jesus ma tu baoa i manang naolo do ibana boi mardalan muse? Jadi dipaboa ibana ma tu Jesus olo do ibana dipamalum alai ndang adong naolo manogu ibana tu aek paridian i di hagugunsang ni aek i, ai mandok ro dope ahu, nunga dijoloani na asing ahu mijur.

Dungi disuru Jesus ma baoa i mangulahon naso boi ulahononna salelengon. Jadi di suru Jesus ma baoa i manghindat lagena laos mardalan. Di hindat baoa i ma lagena, jala mangalangka ma ibana. Tanda halongangan na binahen ni Jesus on patuduhon aha na laho sibahenonNa tu angka nahinaholonganNa i. Nasa na binahen ni Jesus tu baoa i gabe marhamalumon, tanda ni bagas holong dohot asi ni roha ni Tuhan Jesus doi tu angka jolma. Ido umbahen ro Ibana tu aek paridian Betesda i, laho mangurupi angka halak namarsitaonon. Aha na diulahon Jesus manjou rohanta ma nian asa manarihon angka halak namarsitaonon.

HAHONAAN

Marhite Epistel Minggu 29 Mei 2022 on, di pabotohon si Johannes do di turpuk on angka dia do ulaon ni Tuhan Jesus, ima na pamalumhon angka namarsahit dohot angka namarsitaonon, songoni ma nang paluahon angka halak na targogot. Laos marhite ulaon na pinatupa ni Jesus on do gabe manindangi baoa i paboa Jesus do Sipalua i, namarhuaso pamalumhon nasa namarsahit. Ido umbahen Tuhan Jesus bongot tu aek paridian Betesda i. Malum pe baoa i ndada pola masuk tu aek paridian Betesda i ibana dibahen Tuhan Jesus. Alai marhite hataNa dohot pangulaonNai namangkorhon haluaon tu angka na porsea tu Ibana. Lapatanna, molo di si mian Jesus jala molo di si tarbege hataNa, na marhuaso doi patupahon haluaon dohot patupa hamamalum ni nasa parsahiton.

Tongtong ma hita mangasahon Tuhan Jesus manang aha pe sitaononta jala aha pe sahitta. Ai rade do Tuhan i mangurupi hita. Ibana do pangaramoti na sumurung, Ibana do sitompa hita, diboto Tuhani do sahitta dohot lungun niroha na tahilala. Alani holan tu Jesus i ma hita mangalualu jala mangido hamamalum ni nasa parsahitonta. Amen

Kunjungi juga kanal YouTube HKI untuk mengetahui informasi seputar pelayanan HKI.

Penulis:
Departemen Marturia HKI

Penyunting:
Yohanes Simatupang