EVANGELIUM MINGGU ROGATE – MINGGU 14 MEI 2023

Unang Holsoan Hamu Agia Aha

Pilippi 4: 1-7

I. Pamuhai
Dung dipiliit Debata si Paulus gabe parbarita nauli tung marragam do angka parungkilan na ni adopan ni si Paulus. Godang angka parsorian i ro tu si Paulus, insarani pola sampe tarhurung ibana, pola dilele ibana, dohot angka na asing hilalaonna holan laho patulushon ulaon ni Debata ima marbarita nauli di ragam luat. Tung marparbue do ulaonna i, lam rarat do harajaon ni Debata di panghabasion naung pinatupana, jala tung tangkas do itahilalahon sahat tu tingki si nuaeng on.

Alai, diparbue ni ulaon panghobasionna i, sipata olo do masa angka parsalisian ditongatong ni ruas ni huria i. Jala, molo masa na sisongon on tontu tung marungkil do si Paulus mamingkirhon i. Tarida do sian turpuk on, dina masa parsalisian antara si Euodia dohot si Sintike, ro do pangapoion si Apostel Paulus. Ido tutu na boi itaida sian rimpunan ni turpuk na gabe ojahan ni jamita di minggu Rogate di bagasan tingki on.
Songon ruas ni huriaNa hita, aha ma na ingkon siulahononta tu angka donganta? Aha do tumpal di hita na manghaporseai Kristus i? Di partingkian sinuaeng on, molo masa angka parsalisian di donganta, aha ma na ingkon siulahononta? Ummotikna, ima na boi itauhal, tamba ni angka panghonaan naung adong dipingkiranta be, laos huhut ma i tutu gabe mutiha di haporseaonta.

II. Hatorangan ni Turpuk
Ayat 1-3. Pangapoion sian Apostel Paulus. Tung holong do roha ni Apostel Paulus tu huria na adong di Pilippi i, tung diondihon Apostel i do huria Pilippi ditangiangna, laos diparhatopot Apostel i do angka naung pinarbadiaan ni Debata saluhut halak na adong di huria i, jala tarmasuk na saor do huria Pilippi tu Barita na uli (1: 1-5). Ia si Euodia dohot si Sintike ima dua halak parompuan, jala tarmasuk do nasida ruas ni huria di Pilippi, naung tarsurat goar nasida di buku hangoluan i (ay. 3), jala parsidohot do nasida na dua mandongani Apostel Paulus marungkil humophop Barita na Uli i. Alai, masa ma parsalisian diantara nasida na dua, hape nunga dijalo nasida Barita na Uli i. Ndada apala dipatangkas di turpuk on aha do sibonsiri ni parsalisian ni na dua parompuan i. Alai, hinorhon ni masa i ma umbahen diapoi Apostel Paulus nasida asa marsada ni roha di bagasan Tuhan i. Jala, dipangapoionna i, tung dielek Apostel i do ima si Sinsigus, sahalak na bontor (LAI: bontor= teman yang setia), rap dohot si Klemens, dongan ni Apostel i, nang songon i angka dongan ni Apostel saulaon na deba nari.

KLIK LINK YOUTUBE HKI

Tung disosohon Apostel i do angka donganna asa mangurupi si Euodia dohot si Sintike, jala tontu parsuruon ni Apostel i asa mardame nasida na dua, unang marsalisi, laos asa unang tung tu bagas na parsalisian ni nasida na dua. Anggiat asa boi rap muse sauduran ruas ni huria i, lumobi ma nasida na dua. Jala, ima na gabe sintuhu ni hataridaan ni na marsada ni roha di bagasan Tuhan i. Ido tutu, tung arga do hasadaan ni roha dibagasan huria i. Itaboto do, sasintongna tung na maol do patupa hasadaon ni roha di angka parpunguan, tarmasuk do i sasintongna di bagasan huria i. Na paling mendasar mambahen i maol ala: ndang mungkin sarupa sude parrohaon ni jolma i; berbeda orang, maka tentu akan berbeda juga karakternya. Laos alani perbedaan ni karakter i do na olo mambahen parsilisian, lumobi tahe di tonga ni huria i.

Alai, atik pe masa parsalisian i, ndada habis pingkir Apostel i manawarhon solusi do ibana di parsalisian i, ima na dielekelek Apostel i si Sinsigus, si Klemens dohot dongan ni Apostel i deba nari. Astuanna, “pihak ketiga/ orang ketiga” do si Sinsigus, si Klemen dohot angka dongan ni Apostel i deba nari. Di pamingkiron ni jolma sinuaeng on, molo taringot tu “orang ketiga” adong makna na negatif di pandohan i. Alai, di jolma ma i, ndada molo di adopan ni Debata.
Astuanna, molo adong na marsalisi, “pihak ketiga/ orang ketiga” na disosohon Debata ingkon do boi pademakhon/ padamehon angka parsalisian. Ae molo Debata na manosoi, tontu rap dohot Tondi na sian Debata do mangula nasida. Songon si Klemens, dohot na asing na i, boi do auhononta, atik pe ‘pihak ketiga/ orang ketiga’ nasida, alai na pinaborhat ni Debata nasida marhite sososo ni Apostel Paulus tu nasida, asa unang marsalisi muse si Euodia dohot si Sintike di bagasan huria i.

Ay. 4-5. Marlas ni roha di bagasan Tuhan i. Dung disoso i Apostel i si Sinsigus dohot na asing na i asa gabe ‘pihak ketiga’ di parsalisian ni si Euodia dohot si Sintike, diuduti do mandok marlas ni roha di bagasan Tuhan i. Tung diondolhon Apostel i do pandaohanna i, pola sampe didok: ‘huulahi ma mandok: Marlas ni roha ma hamu’. Ido tutu, marlas ni roha do jambar ni halak na porsea. Marlas ni roha na nidok na dison, ndada na mandok na so adong parsorian molo porsea tu Kristus, alai na mandok: atik pe masa parsorion i, uruponNa do hita, laos marhite pangurupionNa mambahen las rohanta, jala las ni roha i tontu di bagasan Tuhan i do i. Tung sude do halak mangharingkothon marlas ni roha, alai aha do ukuranna? Ra ragam do parbue ni pamingkirionta molo taringot tu marlas ni roha. Alai, marhite turpuk on ingkon marlas ni roha dibagasan Tuhan i, ndada sian ukuran ni pamingkirionta i. Laos, molo tolapta do manghongoluhon marlas ni roha di bagasan Tuhan i, marhite i do boi hita pabotohon habasaron na sian Tuhan i. Jala, dibagasanna i do na laho pabotohononta na donok do Tuhan i.

Alani i, molo itahangoluhon do na marlas ni roha hita di bagasan Tuhan i, hombar tu turpuk on, tung saurdot do i dohot parsuruon. Astuanna, aktif, unang passif. Ido umbahen didok Apostel i ‘pabotohon hamu ma’. Unang so hita, unang sip tu angka humaliangta dina laho pabotohon huaso ni Debata. Holan halak na manghangoluhon na donok do Debata, tolapna marlas ni roha di bagasan Tuhan i, ndada marlas ni roha di bagasan ni na asing.

Ay. 6-7. Unang holsohon agia aha, pabotohon ma tu Debata marhite tangiang, jala dame ni Debata ma mangaramoti. Tutu, sae olo do ro holso (B. Indoneisa: kekhawatiran) di ngolu ni jolma, jala ha-holso-on on olo do termasuk na di habiari jolma. Disosohon Apostel Paulus do asa holso i dipasahat tu Debata marhite tangiang dohot elek-elek mardongan mauliate. Jala, boi do itarimangi manang itahangoluhon, molo uju ro holso i, alai molo migor martangiang hita, mangelek tu Tuhan i, migor hilalaonta dame panghilalaanta, lumumbang pangikiranta. Jala, molo songoni do panghilalaanta uju martangiang hita, disi ma masa na nidok ni Apostel Paulus di turpuk on, ima: ramotan ni Debata do ateate dohot pingkiranta di bagasan Kritus Jesus i. Laos, marhitehon i pos rohanta lehonon ni Debata do dalan di angka holsonta i. Alani, unang olo hita rajaan ni holso i.

III. Haonahan (Aplikasi)
• Molo masa parsalisian baik ditongatonga ni huria nang songoni di humaliangta, ingkon do gabe ‘pihak ketiga/ orang ketiga na pinaborhat ni Debata hita’, asa sidung parsilisian i, setidak-tidaknya unang mambahen lam bagas parsalisian i. Posisinta sebagai pihak ketiga/ orang ketiga na ni maksud na dison, ima ingkon songon si Sinsigus, Klemens dohot angka na deba nari. Itasungkun ma dirinta, molo orang ketiga do posisinta molo masa parsilisian, apakah na pinaborhat ni Debata hita, manang na pinaborhat ni sibolis i hita? Molo dame donganta na marsalisi, manang gabe marsada, na pinaborhat ni Tuhan i do hita. Alai, molo lam bagas parsalisian i alani posisinta, antong na pinaborhat ni ise ma hita?
Apalagi di kecanggihan jaman on, tung mura do mambahen jolma marsalisi. Marhite turpuk on, tung dipangidohon Debata do asa gabe songon si Klemens, Sinsigus dohot angka na asing na do i hita.
• Dibagasan Tuhan i ma italului dohot itahangoluhon las ni rohanta. Jala, itahangoluhon ma hasisingkop las rohanta di bagasan Tuhan i ima: di naung hehe Tuhan Jesus sian hamatean i (itaingot ma pesta paskah naung itapestahon i di ari naung salpu i). Ndang adong ummarga las ni roha sian las ni roha naung pinasahat ni Debata, ima naung hehe anakNa i sian hamatean i.
• Ia minggunta sadarion ima: ROGATE, na marlapatan martangiang. Adong do pigapiga ende di Buku Endenta i na marpardomuan tu tangiang, ima: BE. No. 279 “Pasahat ma sudena”, dohot BE. No. 487 “Tung halak na margogo”. Marpardomuan tu turpuk na gabe ojahan ni jamitanta di minggu on, dua ende i anggiat gabe motivasi di hita laho lam manghangoluhon tangiang i. Alani, itapasahat ma angka holsonta tu Ibana marhite tangiang, ae guru di Ibana do luhutna. Jala, dokdok pe sitaonon alai molo sipartangiang do hita ndang talu hita di sitaononta i.

Pdt. HERMAN TAMPUBOLON, M.Th

KLIK LINK YOUTUBE HKI

Bagikan Postingan ini: