EVANGELIUM, MINGGU XV DUNG TRINITATIS – 17 SEPTEMBER 2023

Marsada Roha Huhut Patutoru Diri

Pilippi 2:1-11

I. Patujolo
Manuk ni pea langge, hotek-hotek laho marpira, sirang marale-ale, lobian matean ina. Sada pandohan ni Halak Batak na manggombarhon arga dohot ronsot ni angka na marale-ale. Molo marsirang na marale-ale, tung mansai lungun rohana, lobi sian lungun ni roha uju matean ina. Ise do goaron ale-ale di Halak Batak, ima dongan saparmeaman, dongan satorbang, dongan saulaon dohot dongan sahuria dohot na asing dope tahe.
Di ulaon adat Batak, ale-ale dipatudos do i songon sihal-sihal di dalihan na tolu. Somal do di ganup dalihan na tolu i, sai adong do batu na metmet (na digoari sihal-sihal) ima na marguna laho manungkol ganup batu na bolon na tolu i, asa unang moleng-oleng, alai sabalikna asa hot di haojahanna be. Ido umbahen di ganup parhataan di adat pe, sai tarbege do pandohan ni natua-tua na mandok dalihan na tolu, paopat sihal-sihal.
Jadi di Halak Batak, sasintongna ale-ale (sihal-sihal), mansai balga do tohonanna dohot panghorhonna, ai saluhut batu dalihan na tolu i mangharingkothon sihal-sihal. Songon i prinsip ni ngolu ni Halak Batak, molo so adong ale-ale na ro di ulaonna, mansai lungun situtu rohana.

II. Hatorangan
Di minggu sadari on, itagoari do minggu parale-aleon. Hurianta HKI marale-ale dohot sada Distrik (molo di HKI margoar Daerah) sian gereja Jerman na di huta Ham na margoar Evangelische Kirchen Kreis (EKK) Ham di Jerman, mamungka sian taon 1978, jala ganup bulan September itahalashon manang itapestahon do paralealeon i, songon na tapatupa suang sadari on.
Dia ma nanaeng sitangkasanta dohot siradotanta di Jamita on, di minggu parale-aleon sadarion.

  1. Rajumi donganmu sumurung sian dirim (ay 1-4)
    Adong do pandohan ni Halak Batak na mandok: sada ma hamu songon daion aek, unang dua songon daion tuak. Pandohan on, pataridahon paboa mansai dihasiholi Halak Batak do hasadaon. Jala ragam do dipatupa Halak Batak laho patulus hasasada i. Aut sura diuji godang ni punguan na nidohotan ni jolma di portibi on, ra olo do gumodang punguan ni Halak Batak. Adong do punguan marga (Sa ama, sa ompu, sangkabona, dohot sahorong). Diihuthon do nang punguan ni hula-hula, tulang, adong dope punguan huta, dohot dongan sahuta di Bona Pasogit, dohot lan na asing.
    Di tupuk on pe disoarahon apostel Paulus do paboa ringkot situtu do hasadaon i, di na nidokna: sada parrohaon, sada haholongon, sada roha, sada pingkiran muna. Lapatanna, mansai uli situtu do jala marparbuehon las ni roha do ganup molo jumpang hasadaon i. Alai ingkon tongtong do jamot hita, paboa mansai solhot do hasadon dohot parsalisian. Alani i di nasa parsaoran sipasidingon do nasa pangalaho na patubu parsalisian, isarana na holan mangharingkothon dohot manaringoti na ringkot di dirina, jala ndang mar-parrohahon na ringkot di donganna, baliksa tahe ndang di lehon tingki laho manangihon soara dohot na ringkot di donganna. Sipasidingon do pangalaho na songon on, molo itahasiholi naeng jumpang hasadaon di angka parngoluon dohot parale-aleon.
    Di angka parsaoran manang parale-ale on pe, sipasidingon do angka pangalaho na tarhitup. Lapatanna, ingkon rade do hita pabotohon secara tebuka tu angka dongan, angka na ponjot di roha. Ai laos disi ma boi angka dongan tuk laho mangalehon angka na tau mangurupi manang poda/nasehat asa mananhan manang malua sian parungkilon i. Ra marragam dope lan na asing sijamothonon, asa jumpang hasadaon ima marhite holong ni roha, ai diparbaga Debata do las ni roha dohot pasu-pasu na godang tu angka na marsaroha. (Buku Ende No. 122: 3)
  2. Kristus do suhat-suhat ni haulion ni ngolu jolma (ay 5-11)
    Adong dua pandohan ni Halak Batak na jojot disoarahon jala dihangoluhon, ima: Parjolo, Holong mangalap holong. Tangkas do i, ai mansai godang do dipajongjong halak Batak Punguanna, laos mansai godang do nang dibahen goar ni punguan i, holong mangalap holong. Somalna, ndada asal dibahen goar ni punguan i, alai goar i manggombarhon isina, manang songon na somal itabege dipandohan ni Halak Batak: Goarna ma daina.
    Alai di turpuk on didok do: songon parrohaon ni Kristus Jesus ma Parohaon muna. Songon dia do imbar ni parrohaon ni Kristus Yesus martimbangkon parrohaon ni Halak Batak, secara khusus taringot tu holong?. Jesus manghaholongi jolma, ndada ala naung parholong roha jolma i, manang laho mamalos holong ni jolma i. Alai sebalikna, Jesus mang-haholongi jolma uju dibagasan dosa dope jolma i. Si Paulus di turpuk jamita on, mansai tangkas do paandarhon suhat-suhat na patut siihuthonon ni jolma, ima na rade mangarumari diri pola manolukhon rupa hatoban, olo patutoru diri pola mate tarsilang laho papatarhon holong na mamolin tu jolma manisia.
    Napaduahon, batas ni jolma manesa hasalaan ni donganna, ima sintap ni tolu hali.
    Uju didapothon angka siseanNa Jesus, dipatupa nasida di pangarata-rataion taringot tu harajaon ni Debata dalam bentuk diskusi. Godang do sungkun-sungkun ni sisean i, tarmasuk si Petrus mandok: Tuhan, sintap ni piga hali do sesaonku sala ni donganku, pola do pitu hali? Sasintongna sungkun-sungkun na sekaligus pandapot ni si Petrus on, nunga melebihi hasomalan ni Halak Batak, ai ditangkasi si Petrus, mandok: pola do pitu hali?. Mangalusi sungkun sungkun i, ndada diolohon Jesus mandok pitu pulu hali, alai sintap ni pitupulu hali pitu do. Pangajarion ni Jesus on, ndada holan na mandok boti, alai mansai tangkas do jumpang ngolu na songon i di nasa pangulahonon ni Jesus, ai ndang marnaloja manang marpansohotan Jesus manalpuhon hasalalaan ni jolma, baliksa tahe, diusehon do mudarna, bahen tobus ni dosa ni jolma i (Jaha: 1 Korint 6: 20).
  3. Na patutoru diri nasida do sipatimboon.
    Saluhut jolma di portibi on masihol do di hasangapon. Halak Batak pe diparsinta do asa taruli di hasangapon raphon hamoraon dohot hagabeon. Sitiruon do dilehon Tuhan Jesus uju ro tu portibi on. Ima na olo Ibana patutotu diri, alai ndada gabe ditoru, olo Ibana mate alai dang margogo hamatean i maniop Ibana. Disi ma patar huaso ni Debata, lobi sian nasa hagogoon di portibi on, nang dibanua toru ro di Banua Ginjang pe tahe. Ai dung dibolus hamatean i, sude do somba tu goar ni Jesus, jala na marsoara marhatopothon Jesus Kristus do Tuhan.
    Di pangjarion ni Jesus on pe tangkas do didok: manang ise na naeng sangap, ima na gabe pangoloi di donganna (Mateus 20: 26)

III. Panutup
Di tingki parpudi on, itapahembang do parale-aleon ni Hurianta, ndada holan parale-aleon tu EKK Ham, alai lam martamba do parale-aleon ni HKI, isarana tu Yayasan Bahteraku, Gereja GMIM di Manado, Gereja Onnuri di Korea dohot piga-piga Perguruan Tinggi di Indonesia, nang angka Lembaga oikumene Internasional di luar Negeri pe tahe. Sasintongna, di bagasta di keluarga nang di masyarakat, na marale-ale do hita. Jala di angka parale-aleonta di portibi on, itaingot ma paboa naung ditodo Jesus Kristus hita ale-aleNa. Naeng ma patar parale-ale on i, marhite na satia hita mangulahon Hata dohot Patik ni Kristus I (Johanes 15: 14; Galatia 6: 2). Amen.

Pdt. Hotman Hutasoit, M.Th
Sekretaris Jenderal

Bagikan Postingan ini: