JAMITA MINGGU 15 JANUARI 2023 – JESAYA 49:1-7

JAMITA MINGGU, 15 JANUARI 2023 - PANONDANG HALUAON NI SALUHUT BANGSO

Jamita Minggu 2 Dung Epiphanias 15 Januari 2023
MINGGU 2 DUNG EPIPHANIAS
MINGGU, 15 JANUARI 2023
PANONDANG HALUAON NI SALUHUT BANGSO
Jesaya 49:1-7

PATUJOLO

Jesaya dijou jala disuru Debata manurirangi bangso Israel di tongatonga ni pangalaho ni bangso na manundalhon Debata. Andorang so tarbuang dope nasida tu parhatobanan Babel, nunga marpangalaho na so biar mida Tuhan Debata be nasida. Nunga tumagonan bangso i umbiar jala marpangunsandean tu pangurupion gogo ni angka bangso sileban martimbangkon biar dohot mangido pangurupion sian Tuhan Debata. Ala ni i do dipaloas Debata bangso i madabu tu habuangan Babel (ida Jesaya 1-40). Turpuk na sahat tu hita di tingki on, i ma hamumulak ni nasida sian habuangan Babel di na mangangguk gobar nasida di haholomon parhatobanan Babel jala marpangulahi roha ni Tuhan Debata di pangalaho dosa ni Bangso i, gabe dipaloas Bangso i haruar sian parhatobanan Babel (ida Jesaya 41-55).

Di turpuk on, dipapatar naposo ni Tuhan i disuru gabe panondang tu tongatonga ni haholomon ni sude jolma na tinggal di portibi on. Panondang haluaon dihasiholi jala diharingkothon uju madabu bangso i tu haholomon manang godang sitaonon. Songon sihol ni roha ni jolma di pangurupion tim pemadam kebakaran, molo adong hagoran manang hatutungan. Godang ni sitaonon/ masalah mambahen jolma i targogot jala mangkonjar dohot mangontang jolma i mangalului pangurupion marhite parsaoran namarsihohot tu Debata, mual ni panondang haluaon i. Laho pagokhon dohot mangalusi anggukangguk pangidoan ni Bangso Israel na manolsoli dosana. Debata marsuru anak-Na ro tu hajolmaon gabe panondang ni portibi on (ida Johannes 8:12). Panondang ni haluaon ni saluhut bangso.

BACA JUGA BAHAN EPISTEL MINGGU 2 DUNG EPIPHANIAS – MINGGU, 15 JANUARI 2023

HATORANGAN

Turpuk Jesaya 49:1-7 on patorangkon taringot tu panjouon dohot parsuruon ni Debata tu naposo-Na si Jesaya, pabotohon tu bangso Israel hababangkit ni Naposo ni Debata (Jesus Kristus) gabe sipalua jala Panondang tu angka parbegu na di portibi on songon na nidok ni ojahan ni jamita di minggunta, “Panondang Haluaon ni Saluhut Bangso.”

Songon naposo ni Tuhan i, si Jesaya na mangula mamaritahon/ marbagabagahon haroro ni Tuhan Jesus na gabe panondang hatiuron, na paluahon portibi on sian haholomon ni dosa. Adong tolu ulaon na ingkon sipatolhason:

1. Papatarhon hamuliaon ni Tuhan marhitehite Israel (ayat 3).

Ulaon na mengharuskan Jesaya paboaboahon sangap hamuliaon ni Tuhan tu sude jolma manisia so mardia imbar (ida Psalmen 30, 31, 33).

2. Paulakhon parsaoran ni Israel songon uju i parsaoran ni si Jakkob tu Tuhan (ayat 5).

Lapatanna, marhite Jesaya Israel dijou asa pajolohon Tuhan di ngoluna sian angka na asing. Masa pembaruan/ haimbaruon (restorasi) partondion na pajongjongkon hahoton jala hasadaon ni suku-suku Jakkob marsada, pasangap dohot mamuji hamuliaon ni Debata (ayat 6).

3. Panjouon asa gabe panondang tu angka bangso (ayat 6).

Pembaruan Israel mambahen halongangan bolon di sude bangso na humaliang gabe sude bangso-bangso mananda jala mangaku hadaulaton ni Tuhan ni Israel. Panondang songgop di parngoluon ni bangso/ jolma i laho mangintopi dohot paujungkon parsorion ni bangso/ jolma i jala mamboan bangso/ jolma i, mulak tu sondang haluaon, i ma parngoluon/ parsaoran na sada, dame, sintong dohot Debata marhite Hata-Na na Badia. Pangurupion sondang haluaon na binoan ni naposo ni Tuhan Debata di bagasan Jesus Kristus, ndang terbatas tu sada bangso, alai tu sude bangso. Debata marhite haroro ni Naposo-Na, manjou jala patupahon sangkap na bolon jala na ummuli i ma haluaon tu parngoluon ni nasa bangso, di bagasan holong, dame dohot hasintongan. Naposo ni Debata ro jala mangula di tongatonganta, patupahon sangkap halongangan na sian Debata Ama. Sondang haluaon na binoan-Na ndang mardongan podang/ kekerasan/ parsalisian alai holan mangasahon Hata-Na na Badia na tumajom sian podang si dua baba (ida Heber 4:12); mamola/ membedah angka pingkiran parsalisian ringring dohot utokutok na tangkang marroha asa marsada, mardame jala masihaholongan. Apala sian on ma tandaon ni halak saluhutna, hamu siseanku, molo masihaholongan hamu sama hamu (ida Johannes 13:35).

Naposo ni Debata i ma Jesus Kristus na nimaksud ni si Jesaya di turpuk on gabe panondang ni portibion (ida Johannes 8:12) na mangalehon haluaon asa malua jolma i sian haholomon ni dosa gabe marsihohot tinggal di bagasan sondang hatiuron ni Tuhan Jesus. Jolma naung mian di bagasan sondang hatiuron na sian Tuhan ingkon rade secara bertanggungjawab gabe panondang di na humaliangna; gabe sulu manang palito hatiuron tu sude na humaliangna. Marhite na mangulahon angka ulaon hatiuron patar ma hita songon nampuna ni Tuhan i. Debata di bagasan hita jala hita di bagasan Debata, marhite na mangulahon sondang haluaon ni Debata gabe patar ma hita hataridaan ni pasupasu tu sude jolma manisia (na humaliang: angka raja, bangso dohot sude na tinompa). Mangulahon ulaon hatiuron on ma gabe tanda mauliate ni rohanta di sondang haluaon ni Tuhan Jesus. Asa sude hehe marnida angka pambahenan ni na porsea huhut mamuji pasangap Debata.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Di tongatonga ni angka ragam ni na masa di ngolunta dijou Tuhan Jesus do hita asa tongtong manjalo jala papatarhon sondang hatiuron ni Hata ni Tuhanta. Di manang aha masa pe, tontong ma hita boi gabe panondang di dirinta dohot tu nahumaliangta (panondang ni haluaon ni saluhut bangso). On ma gabe ulaon tanggungjawab ni naporsea di panjouonna gabe Kristen. Gareja lapatanna dijou haruar sian haholomon tu sondang hatiuron ni Debata. Ala ni i do marsitutu jala marlojong ma hita mamaritahon Barita na Uli dohot mangula angka tanggungjawabta gabe sondang hatiuron, mangula Barita na Uli laho manondangi portibi na mian dope di haholomon. Songon tanda ni na porsea di Jesus Kristus, dijou do hita gabe panondang ni portibion. Amin.

Penulis:
Pdt. Salome Nainggolan S.Th, MM (Kepala Departemen Koinonia HKI)

Penyunting:
Vic. Pdt. Timothy P. Saragi

BAHAN JAMITA INI JUGA DAPAT DIUNDUH DENGAN MENG-KLIK TULISAN DI BAWAH INI
JAMITA MINGGU 15 JANUARI 2023 – MINGGU 2 DUNG EPIPHANIAS

Bagikan Postingan ini:

About Timothy Saragi

Staf Biro Infokom HKI

View all posts by Timothy Saragi →