PANGUNGKAPON 22:1-5

Jangkon Jala Sagihon Ma Aek Hangoluan I Bahen Hangoluan Ni Nasa Na Mangolu

Pambonsiri

Molo tapaihut-ihut angka na masa di bangsonta Indonesia, mansai godang angka hamaolon masa, ima angka na marhadomuan tu politik, na marhadomuan tu hajolmaon nang nang na marhadomuan tu portibi (Ind: alam) on, na mambahen ganggu dohot lulu-lulu roha aha do na ingkon siadopan ni bangso on. Somalna molo masa angka na masa, jotjotan na gabe korban angka jolma na ummetmet (na pogos, na so marjabatan dohot na unjur roha).

Di ombas ni huria na parjolo i, mansai maol situtu pangoluon ni huria i. tarlobi uju digurithon pangungkapon on, Yerusalem digomgomi Kaisar Nero dohot Domitianus. Hinorhon ni politik ni na dua Kaisar on, mambahen marsiak parniahapan ni huria i. Goarna ma penjajah sai marusaha do naeng mangahut arta na gumodang sian na jinajah i so marparduli, manang dia pe panghorhon angka pangalaho i tu torop jolma, na ringkot di ibana dapot na niluluanna. Na pasti, tarlobi tu halak Kristen, mansai posi do dihonahon uhum i, ala dietong do nasa siihuthon Jesus ndang marasing sian Jesus na mansai tangkas mangalo (mengkristisi) angka kebijakan ni pamarenta na so marpihak tu hasintongan manang rakyat na metmet.

Ndada holan sian sudut politik parungkilan ro, alai dohot do sian hajolmaon (kemanusiaan). Nangpe sian bangso Yahudi nasida, alai mansai dihasogohon bangso i do nasida, ai dietong nasida do Jesus dohot nasa na mangihuthon Yesus angka na mangaleai Debata. Ala ni i, si Yohanes ingkon tarbuang sahat tu pulo patmos.

Lam martamba do parungkilon ni huria i, marnida portibi nasida na masai maol mata mual. Ido tutu molo tapamanat di luat Yerusalem dohot na humaliang, mansai maol jumpang mata mual, hape mual ima sada kebutuhan na mansai ringkot di parngoluon. Songon na ni dok ni angka na malo, tagonan do hurang sipanganon dari pada hurang siinumon. (catatan: Manusia dapat bertahan hidup tanpa makan 5 hari lamanya, tapi tanpa minum hanya dapat bertahan 3 hari)

Uju na terbuang i si Yohanes di Patmos, disi ma ro pangungkapon tu ibana, pabotohon paboa na ro ma tingkina, na ro ma Jerusalem na imbaru. Nangpe turpuk on digurithon di bindu 22, alai mamereng isina, lebih tepat turpuk jamita on molo dipeakkon gabe udut ni bindu 21 on.

 

Hatorangan

Ay. 1 – 2 “Batang aek hangoluan na tio”

Molo dipatuduhon surusuruan i tu Si Johanes paboa di Yeusalem na imbaru i, batang aek hangoluan na haruar sian habangsa ni Debata, sasintongna ndada na imbaru be i di bangso Israel, ala uju di padan na robi nunga piga-piga hali dilumbahon Debata na songon i marhite panurirang Sakharia na mandok: “Di ari nasasada i sogot, ruar ma angka aek hangoluan sian Yerusalem…….” (Sakaria 14: 8) dohot panurirang Hesekiel na mandok: Dungi ditogihon ibana ma ahu mulak tu pintu ni joro i, gabe ida ma, ruar angka aek sian toru ni lobulobu ni joro i……   (Hesekiel 47: 1-12). Jadi na niida ni si Yohanes di pangungkapon on ima naung tongtong diparbaga Debata aek na mansai dihasiholi jala mansai ringkot di bangso na i. nasa na pinarbaga ni Debata, ndang adong na tuk manundatisa.

Ia aek na haruar sian Bagas joro i, ndada aek na mansai andul lumobi sian angka aek mata mual na adong di portibi on. Ndada holan alani tiona pola songon sorminan, alai digoar do aek i, aek hangoluan. Goar na i, patuduhon ise jala aha do aek na niida ni si Johanes on. Di Buku na Badia i, tangkas do dipabotohon adong aek na mangolu (air yang hidup) na marlapatan aek na madalan (mengalir), ia na margoar aek hangoluan (air kehidupan) na marlapatan do i, aek na mangalehon hangoluan (air yang memberi kehidupan). Nian, molo aek na tio jala mardalan, aek na denggan do, ai pasti boi dinikmati (diinum dohot ragam ni haporluan), alai andul lumobi do aek hangoluan i, ala mangalehon ngolu tu angka na marhaseanghon ibana.

Hangoluan i, tangkas situtu do dipatuduhon tu si Johanes, paboa di siamun nang di sihambirang ni aek hangoluan (sungai) i, tubu jala jongjong do angka torop nasa hau. Tutu do molo di angka topi ni sunge mansai denggan manang lomak do nasa suan suanan. Ai aek na mar dalan mamboan hirta na marguna gabe pupuk na mambahen marlomak angka suan-suanan. Alai lobi sian i do na masa hinorhon ni aek hangolua i, patar ma i, marparbue lobi sian somalna nasa hau i, pola 12 hali.  Ndada holan parbue ni hau i halobian na jumpang, alai nang bulung ni hau i pe mansai arga situtu, ala marguna gabe ubat ni nasa sahit.

Ay. 3-5 “Hatuaon bolon masa”

Di parngoluon on, ragam do dibahen jolma suhat-suhat ni hatuaon. Tu si Johanes dipapatar do piga-piga ni ragam ni hatuaon i, ima:

Malua sian bura.

Ndang sadia leleng dung ditompa Debata jolma na parjolo i, madabu do nasida tu dosa. Hinorhon ni dosa na niula ni jolma i, masa do angka ragam ni bura (toru) tu ulok, si Hawa, Si Adam bahkan dohot tano on hona bura. (1 Musa 3: 14-21). Pangkorhon ni pangalaho ni adam na parjolo i, gabe mangonai tu jolma na mangihut. Nunga disalosehon Tuhan Jesus Kristus dosa i, ido umbahen na digoar Jesus i, adam na paduahon na mangalehon dohot papatarhon hajolmaon na hinalomohon ni Debata. Uju di tingki ni si Hesekiel nunga dilumbahon paboa di Yerusalem na imbaru i, ndang masa be hamagoan…. (Hesekiel 14: 11), ima na pinapatar na tu si Johanes mandok “ ndang adong be na hona bura.”

Marnida bohi ni Debata

Nunga di hangoluhon bangso Israel paboa na badia jala marmulia do Jahowa. Alani i ndang tarbahen jelma marnida bohi ni Debata. Mardomu tusi, diaturhon ugamo Yahudi do, ganup taon dipabangkit malim bolon (imam besar) na bangot tu bilut na sun badia di bagas joro I, marhobas manombahon pelean tu Jahowa huhut manjalo tona sian Jahowa sipasahatonna tu na torop di bagas joro i. alai di pangungkapon na tu si Johanes, dipapatar paboa na tuat habangsa ni Debata. Alani i, gabe masa ma na so dung hian, tuk nasida marnida bohi ni Debata. Nda hatuaon do i. Hasasaor (kehadiran) ni Debata, ndada holan marpanghorhon asa boi bangso Israel marnida bohi ni Debata, alai gabe talup nasida mandapothon Debata manombahon pelean tu Debata, pola songon malim nasida tarsurat goar ni Debata di pardopahan nasida be.

Hatiuron na manontong

Mamungka ditompa Debata hasiangan on, dipaimba do partingkian na margoar arian dohot borngin. Ndada holan goar ni partingkian i na na marimba, alai laos dohot do nang rumangna. Ia arian marrumanghon na tiur jala borngin marrumanghon na holom, nang nadua partingkian i pe marpanghorhon do tu parngoluan ni jolma.

Uju bangso Israel haruar sian tano Misir, boluson nasida na dua partingkian i. Alai pardalanan ndang manundati manang mangambati pardalanan nasida, ala mangula Debata patulus pardalanan ni bangsona uju arian merhite ombun jala borngin marhite api.

Pangungkapon tu si Johanes dipapatar paboa, ia Debata ima hatiuron i, alani di Yerusalem na imbaru i, tontong do gok hatiuron arian nang borngin pe, ala Debata (hatiuron) imaringan di tonga-tonga nasida.

Siputik-putikon gabe Jamita

  1. Diboto Debata do ganup na masa di panggulmit ni ngolu ni jolma i. di angka na masai, ndang hea marsombu-sumbu ibana, alai disangkapi do laho palua jolma i sian angka hamaolon molo tung diloas Ibasa masa na songon i di ngolu ni jolma i. Ido na pinapatarna marhite turpuk on, alani i, unang sai dibagasan hatahuton, alai maniop haporseaon i dohot hataNa, ai dongananNa huhut pamonangnonna do angka naporsea di Ibana
  2. Debata mual hangoluan i. dilehon do mual hangoluan i tu ganup jolma (tu boru Samaria pardosa ipe ditawarhon do). Nasa na manjangkon mual hangoluai natruli di hangoluan na gok las ni roha (Sejahtera dan Sehat)
  3. Hatuaon do las ni roha do na binoan ni Jesus tu portibi on, laos pasingkop on na do i, di ngolu nuaeng nang sogot pe di Banua ginjang i.
  4. Hombar tu minggu sadari on, minggu “lingungan hidup” manogihon hita asa gabe siboan aek hangoluan na pangoluhon nasa na manggulmit dohot pamalum sahit, angka naporsea di ibana. (MBW)
Bagikan Postingan ini: