Mangolu di Bagasan Hatigoran Hombar tu Uhum Ni Debata

Jamita Minggu 05 Februari 2023
Jesaya 58:1-9a

Sibonsiri
Di bagasan turpuk on, dipaboa taringot tu ulaon panurirang si Jesaya laho paingothon angka jolma pardosa na di Sion, lumobi angka na so unduk tu uhum ni Debata, jala ingkon paboaon ni panurirang i ma angka pangalaosionansida (ay 1). Hata sipasingot i ndada holan tu angka pardosa di zaman i, alai dohot tu saluhut generasi. Dietong nasida do boi sesa dosanasida marhite angka tangiang dohot puasa di pardagingon (Za. 7:3, d.u.). Hape ndang marlapatan i di jolo ni Debata ala ulaon angka na marpangansi do songon i. Ndang mamboan hadameon ulaon nasida i ala ndang marsitutu manang sadalan tu parbue ni ulaonna. Dipodai jala disungguli panurirang do bangso Israel asa marpuasa di bagasan hasintongan, na polin hombar tu uhum ni Debata.

Hata Sipaingot Hombar tu Uhum ni Debata (Ay 1-2)
Hata sipaingot dipasahat tujuanna laho manogunogu angka pardosa i asa disolsoli hasalaanna. Ringkot do paboaon hasalaan ni jolma asa diboto jala boi paturehon diri. Taingotma di evangelium ni si Johannes, dipaboa Tuhan Jesus naeng tongosonNa Tondi Parbadia laho paubahon jolma sian angka pangalahona jala paluahonna sian angka hajahatonna (Joh. 16:7-8). Ingkon diparade jolma i ma panolsolion ala ro do Tondi Parbadia laho mangapuli. Ditogihon Tondi i do angka jolma asa manadingkon dalan na ramun. Songon i do na dipangido Debata tu panurirang Jesaya asa mamboan angka pardosa i tu panolsolion. Diurupi Debata ma marhite TondiNa laho mamboan nasida tu hasesaan ni dosa dohot haluaon.

Ingkon tangkas do paboahon hasalaan ni jolma, ndang boi songon hulinghuling asca. Nang pe angka anak ni si Jakkob, bangso na tarpillit, ingkon patar do paboaon ni panurirang taringot tu angka hadosaonna. Ulaon ni panurirang ingkon maniop komitmen pasahathon hata ni Debata termasuk na marisi uhum. Jala ndang boi marnida bohi, manang ise pe ingkon dipasingot dohot denggan. Nang pe adong gelar istimewa di keturunan ni si Jakkob ndang boi nasida malua sian uhum, ala sejajar do sude jolma di jolo ni Debata. Anak hasian pe ringkot do dipinsang asa diboto hasalaanna jala diboto laho paubahon roha. Hasalaan na jotjot di angka natuatua ima na sai mangampini hasalaan ni gellengna, hape lam leleng lam so diboto gellengna i ma dia na tingkos dohot na so tingkos. Dung balga maol ma dipature. Jadi holong na mambahen bolong do anggo so olo maminsang gelleng. Ndang sitolopan angka pangalaosion nasida i, ingkon patar ma dipaboa hadosaon nasida, asa unang lam bonom tu hadosaon. Ringkot do dipapatar sude, atik boha adong na so sadar di hasalaanna i. Denggan do molo tapapatar i, dohot sude na mambahen dokdok ngolunasida. (3 Musa 16:21).

Baca Almanak Minggu 22 Januari 2023

 Dison panurirang ingkon gomos maminsang angka pardosa asa ditangihon. Ingkon tarbege songon sarune, asa unang paula so dibege nasida. Godang do joma si jogal rungkung na so olo muba jala dipanengel sipareonna. Jolma naung somal mangulahon dosa gabe sogo mambege angka singotsingot ni uhum. Alai dison dipangido Debata do panurirang Jesaya asa gomos maminsang anak ni si Jakkob asa muba jala mulak tu Debata.

Puasa na so marsitutu (ay 3-5)
Puasa ima sada tradisi na mansai arga. Jala on do na sai dipangasahon jala dihaginjangkon nasida tu adopan ni Debata. Muruk rohanasida tu Debata ala na so diparrohahon puasa nasida i. Gabe adong pangkilalaan na so adil pambahenan ni Debata tu jolma. Jadi suman do nasida songon halak Parise na sai mangasahon ulaonna (Luk. 18:12). Songon i do biasa halak parpangansi, sai dietong ulaonna na dumenggan. Jala sai dipangido rohana do asa gabe sipujion ma ulaonna. Alai taida ma di ay 3 on, ndang gabe dipuji Debata parpuasaonnasida i. Diboto Debata do rohanasida i na so marsitutu marpuasa. Ndang sian ias ni rohanasida na mangulahon ugamo i, alai holan formalitas do. Ndang dibahen nasida ulaon i laho marparsangapi Debata (Sak 7:5). Diulahon nasida puasa alai huhut do mangulahon dosa.

Hosuk jala jahat do rohanasida. Didok Debata: “…Ida ma di ari parpuasaonmuna, apala disi ma disubut hamu rohamu, jala disosaksosak hamu do pangulamuna”. Digosa nadisa do halak na pogos dohot na gale, hape molo jolma na marpuasa ingkon olo do paluahon angka na sisongon i, angka jolma na metmet manang na tama siurupon.

 Haporseaon nasida ndang polin ala di bagasan parpuasaonna i huhut diulahon bada manang parsalisian (ay. 4). Didok nasida marpuasa dohot tujuan asa unang hona uhum, alai paula so diboto nasida do hasalaannasida i. Somalna joma sisongoni sai mangulului hasalaan ni halak. Jadi, tujuan ni puasa laho mangarajai diri sian angka hagiot ni daging gabe sundat manang batal. Parmusuan i do na gabe mangarajai dirina. Ndang holan hata na jahat, dohot do mamastapi angka donganna. Dipastap jala digosa nasida do angka na pogos, dibahen nasida gabe hatoban. Jadi dao do paruasaon nasida i sian hasintongan. Nunga gabe peol lapatan ni puasa di nasida, tontu ingkon uhumon do nasida.

 Puasa na sisongoni ndang boi sahat i tu banua ginjang. Nang pe dipagogo soarana di angka kebaktian-kebaktian asa songon dibege jala diida halak, gabe so marlapatan i di joloni Debata. Jadi ndang sihormaton jolma sisongoni ala ulaonna pe ndang badia. Ndang lomo rohani Debata di angka ulaon sisongon i songon angka jolma pangansi. Dipangiar soarana martangiang asa dibege halak, alai pambahenanna mambahen parungkilon tu jolma na pogos. Jolma sisongon on ndang holan mangotootoi halak alai dohot do mangotootoi dirina sandiri. Ndang sae ulaon puasa molo holan patuduhon bohi na dokdok, dipatungki uluna songon arung, marpeahan di hori dohot di sirabun. Puasa na songon i holan patuduhon dompak duru, jala somal do dibahen angka parpangansi, diajari Tuhan Jesus do hita marpuasa alai ndang holan patuduhon dompak duru, ingkon dohot do ias di bagasan (Mat. 6:16).

DEBATA DO MUAL NI BISUK DOHOT GOGO

Puasa na Sintong (ay 6-7)
Puasa na sasintongna ima na pasangaphon Debata jala na mangulahon hatigoran. Aha ma i? Ima na patorukhon dirinta (Im. 16:29). Sian i tapasahat ma dirinta jala tahatindangkon hagaleonta. Tatopoti angka dosanta jala tapangido hasesaan ni dosa asa unang hona uhum. Puasa na dihalomohon Debata ima na marharhari nasa ihot ni dosa, palua angka tali ni auga, palua halak na nirupa, jala ropuhi nasa auga. Ingkon tarida do i di ari parpuasaon, tabahen ma angka ulaon na marparbuehon denggan tu angka donganta.

            Ingkon taulahon jala tapatudu hatigoran (keadilan) tu ganup angka donganta. Puasa na sasintongna ima na mangarajai diri asa unang madabu tu hadosaon. Ingkon boi mangulahon diakonia manang pelayanan sosial marhite mambagi angka na di hita i songon roti manang sipanganon tu angka na male. Manogihon angka na dangol dohot panangkarnangkar tu jabu (ay. 7). Roti manang sipanganon na tabagi i, ima roti sian dalan na tigor. Ndang songon angka pardosa na godang sipanganonna alai sian dalan na so sintong. Manogihon angka na dangol dohot panangkarnangkar na dimaksud dison ima angka korban kekerasan. Godang do hajahaton hatiha i na mambolongkon angka jolma na pogos. Alani i, dipangido Debata do angka na porsea i asa boi mangalehon pangaramotion. Ndada holan na manogihon tu jabu, alai ingkon rade do mangurupi marhite na mangapuli dohot mangalehon advokasi asa boi jongjong hatigoran i. Ido puasa na sasintongna, paluahon angka na tarrante dohot na tarbuang.

            Molo adong na marsaemara, ingkon rade do jolma na marpuasa i mangalehon sebagian abitna. Asa boi diramoti nasida jala malua sian angka tahi ni parjahat. Abitima sada kebutuhan na mansai ringkot. Ido na mangaramoti daging sian angka cuaca dohot lingkungan. Lapatanna ingkon tingil do solidaritasta tu angka na pogos. Unang loas angka kesempatan halak parjahat mangulahon dosa tu angka na pogos. Unang taloas angka na gogo patupahon eksploitasi na mambahen angka dongan jolma sega. Jolma na marpuasa ima na olo paulihon kondisi masyarakat di bagasan hadameon.

Bagabaga Taringot tu angka parpuasa na sintong (ay 8-9a)
Adong do bagabaga dilehon Debata tu angka na mangulahon puasa na sintong. Ima angka pasupasu na sian Debata. Bangso Israel naung marungkil sian habuangan gabe tarapul ala pintor binsar hatiuronna, ai Debata na mangapuli dohot na pahisarhon nasida sian angka sitaonon i. Nang pe leleng nasida mangae parungkilon i, gabe mulak do halojaonnasidai i ala hamonangan i ingkon mulak dibahen Debata. Jala molo nunga hisar nasida tontu lam martamaba-tamba las ni rohanasida mangulahon puasa na sintong i. Ndang holan pamatang nasida na hisar, dohot do roha nasida na ingkon malua sian hatahuton. Suang songon i di angka parngoluon i pe gabe denggan jala tarpasupasu. Lam marparbue angka na pinauli ni tangan. Sude arsak ni roha pe gabe ditobus jala lam tamba ma ringgas ni roha laho pasangaphon Debata.

Hahonaan
Molo sai taetong do dirinta on na sintong huhut tapangke ukuran hasintongan i sian dirinta sandiri, tontu nga bagas sipatureon disi. Na mangihut, molo sai taetong do kewajiban ni ugamo gabe sada ukuran di hita, hape talupahon ngolu ni angka donganta, tontu on pe lam bagas do sipaturehon. Uhum na sian Debata ima na mangajari hita asa mangolu di bagasan komitmen dohot integritas. Lapatanna ndang boi tarsirang mangulahon uhum i sian ulaon praktis manghaholongi angka donganta.

Dijou do bangso Israel asa gabe parhitean ni pasupasu tu saluhut bangso. Uhum na diondolhon dison ima taringot tu praktek puasa na sintong. Puasa ndang holan membatasi sipanganon dohot siinumon. Alai lumobi sian i, ima laho mangarajai dirinta sian huaso ni pardagingon. Jala ndang tama jolma na marpuasa alai sai mambuat angka paruntungan tu diri sandiri. Ndang dipingkiri harugian dohot parungkilon ni dongan. Sai dipaksa angka naposona karejo di luar batas.

Puasa na sintong ima na patujolohon asi ni roha.  Patuduhon hatigoran jala mangulahon holong marhite marbagi sinadonganta tu angka na pogos. Mangalehon dukungan tu angka na gale, jala mangurupi angka dongan na mardalan di bagasan haholomon asa dapotna hatiuron na sian Debata. Ido puasa na sintong jala ido na mangulahon uhum na hombar tu lomo ni roha ni Debata.

Pdt. Dr. Amran Simangunsong

Kunjungi juga kanal YouTube HKI untuk mengetahui informasi seputar pelayanan HKI.
Bagikan Postingan ini: