JEREMIA 23:23-29, EPISTEL MINGGU XII DUNG TRINITATIS MINGGU, 14 AGUSTUS 2016

  1. Patujolo

Ditingki Jahowa manjou si Jeremia, bangso Assur nungnga manggomgomi bangso Juda jala ingkon mangalehon pajak tu Assur. Alai ndang sadia leleng,  Juda madabu tu gomgoman ni Babel. Ditingki i adong ma di bangso Juda parbolatbolatan, nadeba pro tu Misir laho mangalo bangso Babel. Hatiha i adong do namargoar si Hananya na tardok sahalak panurirang na mansai berpengaruh.

Di situasi na songon i, panurirang Jeremia mangalo pandapot na ingkon pro Misir (2:18,36;25:17-19;28; 37:7), ala ndang hombar tu sangkap ni Debata jala ingkon gabe mara situtu do naro sian Debata molo diulahon sisongon i. Didok si Jeremia do si Hannya panurirang pargapgap ala ndang Jahowa na mamillit nasida laho pasahathon hataNa tu bangso Juda taringot tu na laho masa, alai na mangasahon pingkiranna sandiri do nasida, jala manang aha pe na diula si Hananya ndang na laho masa ala ndang marharoroan sian Debata. Si Hananya pe didok do panurirang Jeremia songon sahalak na laho manundati sangkap nasida manang songon sahalak penghianat ala ndang ditolopi si Jeremia sangkap ni si Hananya.

Sian hatorangan I boi do idaonta, molo holan sian pingkiranta sandiri do magulahon siulahonon ndang na laho tulus. Alai holan sangkap ni Debata sandiri do siulahononta asa tulus jala manghorhon haulion dohot hadengganon.

  1. Hatorangan

Ayat 23-24. Patoranghon andul do hata na ro sian Debata dohot nasian roha ni jolma na manarupai hata na ro sian Debata (ay.28,29). Tangkas do tarida sian ayat 33-40 na manguhumi angka na so sintong sian angka panurirang pargapgap na mambahen hata ni Debata ndang dihaporseai jala ndang diargahon. Di ayat 23-24 ndang na pola dohononta na malua sian pamotoan ni Debata do angka ulaula ni panurirang pargapgap i, tangkas do diboto nasida angka na hinatahonna i sian dirina sandiri do ndang sian Debata n amarpangalaho sahira na so sian pamotoan ni Debata  do nian angka na nihatahonna. Jotjot do i masa, ndang taboto jala lupa do hita diangka hata ni Debata na so sarombang dohot portibion manang ndang pingkiranta pingkiran ni Debata. Debata do namamboto saluhut jala ndang adong nabuni sian pamerengan ni Debata.

Ayat 25. Patoranghon angka naung hinatahon ni angka panurirang, na paotootohon marhite goar ni Debata na mandok “nunga marnipi ahu ”. Hata on ndang na mandok ndang tutu angka naung sinuriranghon ni angka panurirang na ro tu nasida marhite nipi, gabe hata gabus songon naung dihaporseai angka jolma di Padan na Robi  songon na tarsurat di surat Daniel 7:1). Hata on na naeng mandok dililuhon pargapgap do jolma i naung manghaporseai angka panurirang na manuriranghon hata ni Debata na ro tu nasida marhite sian nipi. Laos on do mambahen gabe songon na sian Debata do hata ni nasida i. Dipakke nasida do kesempatan si songon i laho pasauthon na piningkiran ni roha nasida sandiri, na mambahen gabe lupa bangso i marhite nipi nasida. Jotjot do si songon i tabereng jala taulahon di zaman si saonari on. Tabahen do angka na manarupai angka na denggan tarsongon hata ni Debata hape na laho kepentingan diri sandiri. Molo istilah si saonari “menghalalkan segala cara” asal ma saut na dipingkiran ni jolma i olo do gabe songon surusuruan idaon sian pangkulingna jala meyakinkan angka na umbegesa. Si songon on diulahon angka na so manghabiari Debata jala ndang marpanghirimon tu Debata na gabe mandebatahon roha dohot pingkiran sandiri.

Ayat 28-29. Napatoranghon molo na sian Debata ima tutu dihatahon, molo sian pikkiran ni jolma sian ima dihatahon. Na marlapatan do i asa unang songon na manghatahon na  sian Debata hape na sian roha dohot pingkiran sandiri do. Na mambahen gabe lilu angka na mambege hata i. Ia “Eme” manggombarhon sipanganon natutu do i, manang hata sibegeon jala siulahonon na marharoan sian Debata, jala hata “manggar” (Indo: Palu) manggombarhon gogo dohot huaso ni Debata na mangaropukhon angka dolok batu na pir jala songon api na manoksok angka na so dihalomohon ni Debata. Panurirang Jeremia naeng mandok perbedaan hata nasian Debata dohot na sian pikkiran ni jolma. Molo sian Debata angka na pangoluhon do jala manguhumi angka na jat na so boi tarambatan. Andul do hata na sian Debata dohot na sian pingkiran ni jolma tarsongon ‘hurangkam tu eme’ jala songon api do ianggo hata ni Debata na manguhumi angka na sinangkap dohot na piningkir ni roha (phb. Heb.4:12)

Sian hatorangan i boi do tabereng panurirang Jeremia sahalak na satia jala mabiar situtu mida Debata. Tarida do i sian pangalahona na mamparohahon partondion ni bangso na, bijaksana jala jujur. Ndang boi dituhor manang disogok ibana dohot di etaeta (dibujukbujuk). Sai diajari Tondi do ibana na laho mangulahon siulahononna. Ibana do na dipillit Debata na laho manuriranghon hataNa. Ndang tarpasombu ibana bangso na i dibagasan haliluon dohot haotoon. Dilumbahon ibana do tu bangsona angka uhum na sian Debata na so hambatan molo sai tontong nasida mangido pangurupion manang marpangunsandean tu pikkiran nasida be. Tarlumobi ma di turpuk on na gabe sisogo ibana ala mangalo angka hata na mangotootoi bangso i na niulahon ni angka pargapgap, gabe lilu bangso i.

 

III. Hahonaan

Panurirang Jeremia naeng paluahon bangsona sian uhum ni Debata marhite hamubaon ni roha. Pahothon hadirionta do on, anggiat hita marhamubaon tarlumobi di roha asa malua hita sian hamagoan marhite angka pandelean na mambaen hita gabe ‘buta’ jala ndang boi mamereng tujolo.

Naeng ma nian songon panurirang Jeremia na manontong mangalo angka na humurang nang pe so adong na manjakhon ibana, jala ndang adong na marlomoniroha tu ibana alai sai tontong marsihohot manuriranghon hata na sian Debata ndang sian pingkiranna sandiri.

Asa unang hita paotootohon donganta marhite hata na pasumansumanhon hata na ro sian Debata hape sian pingkiranta sandiri do laho pasauthon na tapingkiri.

(Cln. Pdt. Herwin Nababan, S.Th)

 

Bagikan Postingan ini: