JAMITA MINGGU 3 APRIL 2022 – PILIPPI 3:4B-14

JAMITA MINGGU, 3 APRIL 2022 - MANGAUHON PANJOUON NI BANUA GINJANG

Jamita Minggu 3 April 2022
MINGGU JUDIKA
MINGGU, 3 APRIL 2022
“MANGAUHON PANJOUON NI BANUA GINJANG“
Pilippi 3:4b-14

PATUJOLO

Ia panurat ni surat Pilippi, i ma Apostel Paulus, na tinongos ni si Paulus dohot si Timoteus mandapothon huria di Pilippi. Ditongos Apostel Paulus ma i andorang so di hurungan Rom ibana (ida Ulaon ni Apostel 28:30). Jongjong ma huria Pilippi uju na di pardalanan pangkobasionna na paduahon (ida Ulaon ni Apostel 16:1-40). Dididi si Paulus ma si Lidia dohot donganna sajabu di Pilippi (ida Ulaon ni Apostel 16:14-15). Parngoluon ni partondion ni halak Pilippi uju i marangkup do tu angka pangajarion ni portibi on. Disomba nasida do kesar (Julius, Augustus manang Klaudius) dohot angka debata na asing.

Alai nang pe songon i burju do huria Pilippi mangalehon dirina tu Harajaon ni Debata, songon i nang memelehon na adong di ibana laho tu pangkobasion ni si Paulus (ida 2 Korint 8:1-5). Hombar tu panindangion ni si Paulus boi do botoon haburjuon ni huria Pilippi na marulakulak laho manumpaki ulaon ni si Paulus (ida Pilippi 4:15-18). Ditongos Apostel Paulus ma surat on tu huria Pilippi laho pasahathon barita na di bagasan hurungan ibana (ida Pilippi 1:12-26) huhut paboahon sangkapna dung ruar ibana sian hurungan (ida Pilippi 2:23-24). Disangkapi ibana do laho pasadahon haporseaon nasida di bagasan Jesus Kristus (ida Pilippi 2:1-18; 4:2-3). Alai tarlumobi ma di bindu 3, tangkas do dipatolhas tahi ni si Paulus laho patoguhon haporseaon nasida sian angka pangajarion na mambahen tu huria i tu haliluon. (ida Pilippi 3:2-3).

BACA JUGA EPISTEL MINGGU JUDIKA – MINGGU, 3 APRIL 2022

HATORANGAN

Sada halak Jahudi situtu do ianggo Apostel Paulus andorong so diulahon ibana ulaon pangkobasion laho marbarita nauli, togu do ibana mangihuthon sude uhum ni halak Jahudi. I do umbahen na mansai alo di ibana angka pangajarion ni Kristus di mula na i. I do umbahen na didok ibana musu ni Kristus (ida ayat 4-6). Saluhut angka sipangasahononhon ni ibana na hinan, magopo do sasudena i laos so marlapatan, ala ndang dietong Debata saluhutna i songon sada habonaran angka hajahudion na i. Ndang adong halak na bonar mangasahon gogona sandiri. Dung ditanda ibana Jesus, sude napinangasahonna sian hajahudion na i hian gabe orbuk na so marlapatan do i (ayat 8).

Ayat 9, “asa di bagasan Ibana ahu didapot, unang ma marhatigoran sian patik, tung sian haporseaon di Kristus do, i ma hatigoran na sian Debata, na marojahan di haporseaon.” Songon sada pamunu na paluahon hosana sian na mangaluluhon hosa nabinununa tu huta haporusan (ida 4 Musa 35:25). On ma sada tudosan di hita, di panguhuman ni Debata sogot, na ingkon mardame do hita dohot Ibana asa boi tapalua hosanta sian hamatean.  Tung na mate do hita molo jongjong hita di adopan ni hamuliaon ni Debata, ala jolma naung mardosa do hita. Alai ala naung maporus do hita tu Tuhan Jesus gabe dapotan haluaon ma hita. Si Paulus mandok, asa di bagasan Jesus ibana, dapotna ma haluaon. Ndang marhite hatigoran ni patik, alai marhite mudar ni Jesus (ida Rom 3:25)

Di ayat 10 didok “asa hutanda Ibana dohot hagogoon ni haheheonNa i, ro di hasasaor tu angka haporsuhonna, di na gabe sapangalaho ahu dohot Ibana di hamamatena i. Mananda Jesus Kristus lapatanna, mamboto lomo ni roha ni Debata, tau uhum dohot holong ni roha ni Jesus Kristus sian angka jamita na uli, mangoloi dohot mangihuthon lomo ni roha ni Debata. Mangulahon nasa pinangido ni roha ni Debata dibagasan haporseaon. Mananda huaso haheheonna sian hamatean (ida Pilippi 3:10), lapatanna, mangoloi pangimbaruon ni ngolu asa malua sian hadosaon (ida Rom 6:4; Epesus 1:18-20). Ro di hasasaor tu angka haporsuhon, na marlapatan mansoadahon diri laho manuhuk silang jala na olo manaon haporsuhon ala ni Jesus Kristus, laho mambaritahon harajaonNa i (ida Pilippi 1:29; Ulaon ni Apostel 9:16; 1 Korint 15:31; 2 Korint 4:10; Galatia 2:20).

Haheheon sian angka na mate, di ayat 11 mangalumbahon tu na masa sogot di ari parpudi di ngolu ni portibi on. Na naeng sihatahonon ni si Paulus di ayat on, i ma upa ni halak naung mangoloi manuhuk silangna, gabe dapotan jambar hangoluan si salelengnilelengna (ida Rom 8:17). Tingki naung salpu, nuaeng dohot ari marsogot. Sude jolma do mangolu di bagasan tolu tingki: tingki naung salpu, nuaeng dohot ari marsogot. Si Paulus mandok: “Huhalupahon na di pudingku, hueaki angka na di jolo. Dompak pandang i do hupuspus, dompak upa hamonangan na sian panjouon ni Debata sian ginjang, di bagasan Kristus Jesus i” (ayat 14). Sandehon ma nasa ulaonmu na denggan manang na roa tu Tuhan Jesus, tabahen ma Ibana parsigantunganta asa Ibana patuduhon dalan. Taeaki ma harajaon banua ginjang, i ma tu hangoluan sogot, hangoluan si salengnilelengna.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Situjuon ni ngolu ni halak Kristen i ma hangoluan si salelengnilelengna rap dohot Jesus Kristus di banua ginjang. Ala ni i, tung saluhut jolma do ingkon paubahon dirina, maninggalhon nasa dosa dohot hisaphisap ni pamatangna. Manadingkon angka parngoluon na so denggan di tingki naung salpu na so tama di adopan ni Debata. Mangolu di bagasan parsaoran dohot Tuhan Jesus. Asa tatuju ma tu situjuon ni angka halak na porsea, i ma Tuhan Jesus Kristus (ida ayat 4-7).

Andorang so ditanda jala dijangkon si Paulus Kristus gabe Tuhanna mansai satia do ibana tu uhum ni halak Jahudi. Halak na bisuk do ibana di parugamoon ni halak Jahudi, tarsunat, jala halak na patut do ibana di Israel sian marga Benjamin. Tangkas do ibana halak Heber, Parise, jala sipusa halak na marhaporseaon tu Kristus. Tarsar do goarna halak na pistar jala na barani. Alai dung jumpang ibana dohot Kristus, gabe marbalik do rohana mangkaholongi Kristus. Gabe sahalak sipararat Barita na Uli do ibana tu godang bangso sian nasa roha na marsitutu. Disoadahon do dirina dohot hosana, laho mangoloi Tuhan Jesus asa pararathon Barita na Uli i. I do sada panjouon tu dirina, dioloi ibana do i, asa sahat ibana tu hangoluan sisalelengnilelengna.

Jamita on paingothon tu hita, asa tabahen Apostel Paulus gabe sada tudosan di bagasan ngolunta. Naung tarjou do hita asa gabe sada parjambaron rap dohot sude halak na porsea asa masuk tu harajaon banua ginjang. Dibahen i, tatadingkon ma angka parulaonta na so ture di angka ngolunta naung salpu. Taeaki ma ngolu na imbaru na marpangkirimon. Taeahi ma i sian panandaion di Jesus Kristus di bagasan roha na marsitutu saleleng hita mangolu di tano on.

Tema ni jamita di hita di bagasan minggu on, i ma “Mangauhon Panjouon ni Banua Ginjang.” Aha do lapatan ni panjouon ni banua ginjang i? Panjoun banua ginjang i ma panjouon tu hangoluan si salelengnilelengna, panjouan asa masuk tu sangkap ni Debata. Panjouon tu parsaoran dohot Kristus, jala panjouon tu pangkobasion laho mamaritahon Barita na Uli. Ndang sude panjouon i sarupa tu ganup jolma. Di si ma hita ingkon mananda, mamboto dohot mangantusi panjauon ni Tuhan i di bagasan ngolunta. Tung arga situtu do panjouon i.

Pardalanan ni ngolu ni jolma ditotophon marhitehite panjouon di bagasan ngoluna. Molo halak na so porsea, mardalan do ibana tu panjouon ni portibi na mambahen sombu hisaphisap ni dagingna. Alai molo angka na porsea i, dioloi do panjouon ni banua ginjang i, jala disoadahon dirina, manuhuk silang asa pasangaphon Jesus Kristus di bagasan ngoluna dohot di tongatonga ni ngolu ni jolma. Songon dia ma dalan laho mangauhon panjouon ni Banua Ginjang i?

  1. Marsitutu di bagasan haporseaon paboa naung tinobus ni Jesus Kristus hita marhitehite mudarna.
  2. Mananda panjouonta sian mula na i andorang so jinadihon ni Debata dope portibi on (ida Epesus 1:4).
  3. Mangkirim di jambar naung pinarade ni Jesus di angka na mangoloi ibana. Di Pilippi 3:14 didok, “huhalupahon na di pudingku, hueaki angka na di jolo. Dompak pandang i do hupuspus, dompak upa hamonangan na sian panjouon ni Debata sian ginjang, di bagasan Kristus Jesus i.
  4. Mandok mauliate. Di 2 Tesalonik 2:13 didok, “alai na tama do hami tongtong mandok mauliate tu Debata marningot hamu, ale angka dongan, na hinaholongan ni Tuhan i, ala dipillit Debata hamu sian mulana, asa saut hamu malua, i ma marhite sian Tondi na pabadiahon dohot haporseaon di hasintongan.

Di tingki on, dipaingot do tu hita laho mangauhon panjouon ni banua ginjang. Taalusi ma nian marhitehite hata nang pambahenan na mangoloi panjouon i. Tahi manang sangkap ni Jahowa di mula na i, asa marsaor hita dohot Ibana jala manghobasi jala marhalado tu Ibana. Amen.

Penulis:
Departemen Marturia HKI

Penyunting:
Timothy P. Saragi

BAHAN KHOTBAH INI JUGA DAPAT DIUNDUH DENGAN MENG-KLIK TULISAN DI BAWAH INI
JAMITA MINGGU 3 APRIL 2022 – MINGGU JUDIKA

Bagikan Postingan ini:

About Timothy Saragi

Staf Biro Infokom HKI

View all posts by Timothy Saragi →