JAMITA MINGGU 26 JUNI 2022 – RUT 1:7-17

Jamita Minggu 26 Juni 2022

Jamita Minggu 26 Juni 2022
MINGGU II DUNG TRINITATIS
MINGGU, 26 JUNI 2022
MANGIHUTHON TUHAN JESUS
Rut 1:7-17

PATUJOLO

Adong 4 hasintongan di Padan Naimbaru na dipatorang di Buku Ru, parjolo; Parungkilon, parsorion na songgop tu jolma gabe dalan ni Debata laho patulushon sangkap panobusion ni Debata (pat. Pilipi 1: 12). Paduahon; Marhite parsidohoton ni si Rut di bagasan sangkap panobusion ni Debata patuduhon paboa parsidohot di harajaon ni Debata, ndada ala ni tarombo partuturon, alai siala haumbukon ni parngoluan tu lomo ni roha ni Debata marhite parsihohoton na tubu sian haporseaon (Rm. 1: 5; pat. Rm. 16:26). Patoluhon; Partording ni si Rut di tarombo ni si Daud dohot Jesus (Mat. 1: 5) patandahon paboa saluhut bangso parsidohot di harajaon “Anak ni si Daud” (Pangk. 5:9; 7:9). Paopathon; Si Boas, sitobus teanteanan ni sisolhotna, i do gabe gombaran ni ‘Panobus Bolon’ i ma Jesus Kristus (Mat. 20: 28; Rut 4:10).

Ndang tarboto manang na ise panurat ni buku Rut (tradisi Yahudi: Samuel panurat), alai ra disurat di tingki harajaon ni si Daud, ala tarombo sian si Rut sahat tu Raja Daud do na pinajojorna (Rut 4:21 – 22) jala dapot putihon impolana:

  1. Paandarhon songon dia do holong na sumeahon, jala songon dia do na sintong mangulahon uhum ni Debata dipataridahon si Rut, boru Moab na daulat roha gabe targoar “Ompu” di Raja ni Israel, i ma Raja Daud.
  2. Buku Rut digurithon asa unang mangalupahon barita ni sada ripe na daulat, na sai marsihohot atik pe marsitaonon, na mansai andul tu degradasi (kemerosotan) rohani dohot parange na lumlam di partingkian ni angka Panguhum di Israel.
  3. Rut gabe symbol anti rasisme na mangorai perkawinan campuran dohot bangso sileban (Heb. goyyim) tingki ni Panurirang Esra dohot Nehemia (pat. Neh. 13: 23-28).

HATORANGAN

Di hamamasa ni haleon potir di tano Juda, bungkas do si Elimelek (Heb. Eliymelekh – Debatangku do raja) dohot ripena, Naomi (Heber no’omi: hasolomanku) rap dohot dua anakna: Malon (mangoli si Rut), dohot Kilian (mangoli si Orpa). Di tano Moab, mabalu ma si Naomi, jala duansa anakna pe marujung ngolu so pola marrindang (punu). Gabe mulak ma si Naomi tu Betlehem dung sampulu taon lelengna maringan di tano Moab rap dohot parumaenna na dua i, ala so adong be sihirimon ni si Naomi di tano Moab, hape di tano Juda nunga marpangulahi roha ni Jahowa. Di na borhat nasida (Naomi, Rut dohot Orpa) disosoi si Naomi do parumaenna na dua i asa mulak tu ganup natorasna be. Hata pasupasu do dipasahat si Naomi tu parumaenna i duansa (boru Moab): Sai marasi ni roha ma Jahowa mamaloshon tu hamu, hombar tu na binahenmuna ‘tu angka na mate’ dohot tu ahu. [‘tu angka na mate’: mandok tu sinonduknasida naung mate i, i ma si Malon dohot si Kilian].

Ndang olo si Rut dohot si Orpa manadingkon simatuana, sai diihuthon nasida do si Naomi. Alai dung dilehon si Naomi ‘hatorangan na tarjalo roha’ (ay. 11-13) gabe muba do pingkiran ni si Orpa, dioloi si Orpa do hata ni simatuana, gabe mulak ibana tu natorasna dohot tu hinaporseaanna atik pe mansai lungun do nian rohana manadingkon simatuana. Alai si Rut (Heb. ruwth – re’ut – dongan parompuan) sai marsihohot do mangihuthon si Naomi (ay. 14). Atik pe sai disosoi si Naomi ibana asa mulak tu natorasna, ndang olo si Rut manadingkon si Naomi. Marnida si Rut na so olo manadingkon simatuana i, lam disosoi si Naomi do si Rut, parumaenna i asa mulak tu natorasna songon si Orpa (ay. 15). Alai nang pe lam disosoi si Naomi ibana (Rut) marhite hatorangan na tarjalo roha baliksa asing do alus ni si Rut: “Unang sai sosoi ahu tumadingkon ho, laho sirang sian ho; ia tusi ho laho, ingkon tusi ihuthononku; ia tusi ho maringanan, ingkon tusi ahu maringanan; bangsom nama bangsongku, Debatam nama Debatangku. Ia disi ho mate, ingkon disi ahu mate, disi do ahu huhut naeng tartanom. Sai songon i ma dibahen Jahowa tu ahu, jala songon i ditambai tu joloan on, holan hamatean i nama tarbahen manirang ahu sian ho” (ay. 16-17).

Parsihohoton manang hasatiaon ni si Rut maradophon simatuana boru, Naomi, sada parsihohotan na luar biasa. Mansai arga do parsihohoton sisongon i di jolo ni Debata. Si Orpa gabe mago ma sian barita ni Buku Nabadia, alai si Rut gabe Ompu di sundut ni Jesus, Panobus Nasintong i. Hinorhon ni i ma pataridahon, paboa Jesus na ro tu portibi on ndada holan paluahon sada bangso (Israel) alai dohot do tu saluhut bangso. Huroha, saleleng rap si Rut dohot sinondukna dohot simatuana, mamoto do si Rut paboa na adong do parsaoran na polin di keluarga i tu Debata di ngolu siapari. I do umbahen naso ragu ibana marsihohot mangihuthon si Naomi, gariada barani do si Rut manghatindangkon: ia tusi ho laho, ingkon tusi ihuthononku; ia tusi ho maringanan, ingkon tusi ahu maringanan; bangsom nama bangsongku, Debatam nama Debatangku. Ia disi ho mate, ingkon disi ahu mate, disi do ahu huhut naeng tartanom. Sai songon i ma dibahen Jahowa tu ahu, jala songon i ditambai tu joloan on, holan hamatean i nama tarbahen manirang ahu sian ho.”

Sada komitmen – padan, na mansai togu atik pe ndang diboto si Rut aha konsekuensi-resiko di ujung ni haputusanna i. “Ia tusi ho laho, ingkon tusi ihuthononku, ia tusi ho maringanan, ingkon tusi ahu maringanan” – sada ikrar manang ‘padan patepatean’ naso jadi mose, gariada rela si Rut mutasi ras, kewarganegaraan dohot mutasi ugamo (murtad). “…holan hamatean i nama tarbahen manirang ahu (Rut) sian ho (Naomi)” – on ma “pun” ni ikrar ni si Rut tu si Naomi. Ndang adong tawar-menawar be na boi mangose padan i. Songon panindangion ni sada namarbaju na naeng marsaripe tu sada hamulianna na sai diorai natorasna, “Rabi sian ginjang, sangkalan sian toru, ndang tarsirang ahu sian na naeng helam i.” Manang masursur, manang magargar dolok i, manang mahiang laut, tung naso muba, tung naso mose padan i.

HAHONAAN

Molo marnida sian sibonsiri habubungkas ni si Elimelek, Naomi dohot anakkonna tu Moab, i ma ala hamamasa ni haleon potir di tano Juda, boi do dapot putihon parsiajaran na arga:

Parjolo

“Paet unang pintor niutahon, tonggi unang pintor nibondut.” Sian sada pamingkirion, ndang manahan si Elimelek mangadopi masa haleon potir (na marombas) gabe pintor bungkas ibana dohot keluargana tu luat na asing, hape balik sian panghirimon do na masa di luat sihadaoan i. Ai gabe mate di luat sihadaon i do si Elimelek dohot anakna na dua i so taruli ‘urat natogu’ laho manguduti sundutna. Hape, angka donganna sabangso, pasti do godang na ‘bertahan’ (manahan) di hamaolon i, jala terbukti do i. Alai masa pe i, molo sian parnidaan hadebataon, i ma dalan ni Debata laho patulushon sangkap hatuan ni Debata, i ma songon tujuan ni buku Rut.

Paduahon

“Ndang marimbar tano hamatean” Ndang mabiar si Elimelek laho bungkas sian huta hagodanganna tumopot luat na asing laho mempertahankan ngolu siapari. Ra, di rohanta dohonon ma, ua holan si Elimelek ma borhat ‘mangaranto’ so pola dohot ripe dohot anakkon. Sian pangarantoanna ma ibana manongos balanjo tu keluargana. Ai aut so dohot diboan sude keluargana, atik na so pintor mate do anakkonna i duansa so jolo marpinompar. Sudena i surasura ni roha na boi do i jaloon saonari. Hape, tupa do ra molo tung pe ndang bungkas ibana tu tano Moab, ndang gabe jaminan i naso monding ibana dohot anakkonna na dua i so martinading sundut. Alai molo tajaha isi ni buku Rut, gabe sada dalan ni Debata do i patulushon sangkapNa. Alai sian barita ni buku Rut, adong sada sintuhu na mansai arga sian sahalak na dirajumi naso bangso ni Debata (Israel) jumpang panindangion na na marsihohot, jala hinorhon ni parsihohoton i tulus sangkap ni Debata bahen haluaon ni saluhut bangso di bagasan Jesus Kristus. Ai marhite si Rut na marsihohot mangihuthon si Naomi. Songon i do padan siihuthon Jesus: “…sai ihuthononku Ho…” (BE. 211: 1) dohot “Manang aha pe na masa, las ni roha, arsak pe…tung saleleng au mangolu, nang dung suda bohalhon…” (BE. 149: 3).

Tanda naung porsea hita paboa Debata do Ama di ngolunta, ingkon patuduhononta do paboa saluhut jolma donganta rap mar-Amahon Debata atik pe na pogos manang na lea. Halak na manadingkon hatopan ni angka Nabadia laho mulak muse tu ulaon narobi (songon si Orpa), hatop manang lambat gabe manundalhon hatopan ni angka Nabadia jala manadingkon Debata. Alai ganup na sai marsihohot di TUHAN i atik pe masa parsorion na mamunjung, dipatudu jala lehonon ni Debata do tu ibana hamuliaon di ujungna. Amen

Kunjungi juga kanal YouTube HKI untuk mengetahui informasi seputar pelayanan HKI.

Penulis:
Departemen Marturia HKI

Penyunting:
Yohanes Simatupang

About Yohanes Simatupang

Staff Biro Infokom

View all posts by Yohanes Simatupang →